Connect with us

ಬಹಿರಂಗ

” ಯಾವ ಘನಂದಾರಿ ಸಾಹಸಕ್ಕೆ…ವೈ- ಪ್ಲಸ್ ಸೆಕ್ಯುರಿಟಿ “..?

Published

on

  • ಹಿರಿಯೂರು ಪ್ರಕಾಶ್

ಸುಮ್ಮನಿರಲಾರದೇ ಇರುವೆ ಬಿಟ್ಟುಕೊಳ್ಳುವುದು ಎಷ್ಟು ಪೆದ್ದುತನ, ಅಮಾಯಕತನ ಅಥವಾ ಉಡಾಫ಼ೆತನವೋ ಆ ರೀತಿ ಅಹಂ‌ನಿಂದ ಸ್ವಯಂ ಇರುವೆ ಬಿಟ್ಟುಕೊಂಡು ಫಜೀತಿ ಸೃಷ್ಟಿಸಿದವರ ನೆರವಿಗೆ ಆದ್ಯತೆ ಮೇರೆಗೆ ಸರ್ಕಾರವೇ ಧಾವಿಸುವುದು ಮತ್ತಷ್ಟು ಕಿರಿಕಿರಿಯಂತೆ ಗೋಚರಿಸುತ್ತದೆ.

ಅಲ್ಲದೇ ಮತ್ತೇನು ! ಬಾಲಿವುಡ್ ನಲ್ಲಿ ಅಭಿನಯಕ್ಕಿಂತ ತನ್ನ‌ ವಿವಾದಗಳಿಂದಲೇ ಸದಾ ಸುದ್ದಿಯಲ್ಲಿರುವ ಕಂಗನಾ ರನೋತ್ ಎಂಬ ನಟೀ ಮಣಿ ಸುಮ್ಮನಿರಲಾರದೇ ತನ್ನ ಟ್ವೀಟ್ ಮೂಲಕ ಸೃಷ್ಟಿಸಿದ ಅನಗತ್ಯ ಅವಾಂತರ ಮತ್ತು ಅದಕ್ಕೆ ಕೇಂದ್ರ ಸರ್ಕಾರ ತಕ್ಷಣಕ್ಕೆ ಸ್ಪಂದಿಸಿದ ರೀತಿ‌- ನೀತಿ ನೋಡಿದಲ್ಲಿ ಮೇಲಿನಂತೆ ಅನಿಸುವುದು ಸಹಜ. ಕೆಲ ದಿನಗಳ ಹಿಂದೆ ಈಕೆ ಮುಂಬೈ ಯನ್ನು ಪಾಕಿಸ್ತಾನ ಆಕ್ರಮಿತ‌ ಕಾಶ್ಮೀರ (ಪಿ.ಓ.ಕೆ) ಕ್ಕೆ ಹೋಲಿಸಿ, ‘ ಸಿನಿಮಾ ಮಾಫ಼ಿಯಾಗಿಂತ ತಾನು ಮುಂಬೈ ಪೊಲೀಸ್ ಕಂಡರೆ ಹೆದರುತ್ತೇನೆ ” ಎಂದು ಹೇಳಿಕೆ ನೀಡಿ‌ ವಿವಾದ ಸೃಷ್ಟಿಸಿದ್ದಲ್ಲದೇ ಮುಂಬೈ‌ ಸುರಕ್ಷಿತವಲ್ಲ ಎಂದೂ ಟ್ವೀಟ್ ಮಾಡಿದ್ದರು.

ಮುಂಬೈನಲ್ಲೇ ಇದ್ದುಕೊಂಡು ಅಲ್ಲಿಯೇ ಹೆಸರು ಮಾಡಿ ಅಲ್ಲಿನ ಅನ್ನ ತಿನ್ನುತ್ತಾ ಈಗ ಅದನ್ನು ಪಾಕ್ ಆಕ್ರಮಿತ ಕಾಶ್ಮೀರಕ್ಕೆ ಹೋಲಿಸುವ ಈ ನಟಿಯ ಟ್ವೀಟ್ ಗೆ ಸಾಕಷ್ಟು ವಿರೋಧಗಳು ವ್ಯಕ್ತವಾದ ಹಿನ್ನೆಲೆಯಲ್ಲಿ ಯಾರಿಗಾದರೂ ತಾನು ಮುಂಬೈಗೆ ಬರುವುದನ್ನು ಧೈರ್ಯವಿದ್ದರೆ ತಡೆಯಲಿ ಎಂಬ ಸವಾಲನ್ನೂ ಎಸೆದಿದ್ದಾರೆ.! ಕರ್ಮ ಕಾಂಡ .

ಆದರೆ ಇದ್ಯಾವುದೂ ನನಗೆ ವಿಶೇಷ ಅನ್ನಿಸೋಲ್ಲ. ಕಾರಣ – ಕೆಲವರು ಇರೋದೇ ಹಾಗೆ. ಮೂಲ ಕಸುಬು ಬಿಟ್ಟು ಸದಾ ವಿವಾದಾತ್ಮಕ ಕಾರ್ಯ ಮಾಡೋದೇ ಇಂತಹವರ ವರಸೆ. ಅದು ಅವರ ವೈಯುಕ್ತಿಕ ಸ್ವಾತಂತ್ರ್ಯ, ಹಕ್ಕು ! ಅಂಥವರು ಏನನ್ನಾದರೂ ಮಾಡಿಕೊಳ್ಳಲಿ.

ಆದರೆ ಸುಮ್ಮನಿರಲಾರದೇ ಏನನ್ನೋ ಕೆದಕಿ ಕೆಣಕಿ ವಿವಾದ ಸೃಷ್ಟಿಸಿದವರನ್ನು ಸರ್ಕಾರ ಗಂಭೀರವಾದ ಎಚ್ಚರಿಕೆ ಕೊಟ್ಟು ಸುಮ್ಮನಾಗಿಸುವುದನ್ನು‌ ಬಿಟ್ಟು ಅವರಿಗೆ ಮತ್ತಷ್ಟು ಬಿಲ್ಡಪ್ ಕೊಟ್ಟು ವೈ- ಪ್ಲಸ್ ಭದ್ರತೆ ನೀಡಿ ಅವರ ರಕ್ಷಣೆಗೆ ಹತ್ತು ಮಂದಿ ಶಸ್ತ್ರ ಸಜ್ಜಿತ ಕಮಾಂಡೋಗಳನ್ನು ನೇಮಿಸಿದ್ದನ್ನು ನೋಡಿದರೆ ನಗಬೇಕೋ ಅಳಬೇಕೋ, ಈ ದೇಶದ ತೆರಿಗೆದಾರನಾಗಿ ವ್ಯಥೆ ಪಡಬೇಕೋ ತಿಳಿಯುತ್ತಿಲ್ಲ.

ಈ ನಟಿ ದೇಶದ ಹಿತಕ್ಕಾಗಿ ಅಥವಾ ಜನಪರ‌ ಕಾಳಜಿಗಾಗಿ ಹೋರಾಟ ನೆಡೆಸಿದ್ದರ ಪ್ರಭಾವದಿಂದ ವಿರೋಧಿಗಳು ಹುಟ್ಟಿಕೊಂಡದ್ದಕ್ಕಾಗಿ ಅವರಿಗೆ ಸೆಕ್ಯುರಿಟಿ ಕೊಡಬೇಕೆಂದುಕೊಂಡರೆ ಅದು ತಪ್ಪಲ್ಲ. ಕೊಡಲಿ ! ಅಥವಾ ದೇಶದ ಮಾಜೀ ಪ್ರಧಾನಿಯೋ, ರಕ್ಷಣಾ ಮಂತ್ರಿಯೋ , ಅತ್ಯುನ್ನತ ವಿಜ್ಞಾನಿಯೋ ಇಲ್ಲವೇ ಅತೀ ಸೂಕ್ಷ್ಮ ಹುದ್ದೆಯಲ್ಲಿನ‌ ಗಣ್ಯರೋ ಇಂದೋ, ಹಿಂದೆಯೋ ಆಗಿದ್ದರೂ ಭದ್ರತೆ ಕೊಡಲಿ.

ಆದರೆ ಇದಾವುದೂ ಇಲ್ಲದೇ ಹೋದರೂ ಕೇವಲ ತನ್ನ ಖಯಾಲಿಗಾಗಿ ವಿವಾದಾಸ್ಪದ ಹೇಳಿಕೆಗಳನ್ನು ನೀಡುತ್ತಾ ಬೇಕಾಗಿಯೇ ವಿರೋಧ ಸೃಷ್ಟಿಸಿಕೊಳ್ಳುತ್ತಾ ಬಂದಿರುವ ಈ ಬಾಲಿವುಡ್ ನಟಿಗೆ CRPF ಶಸ್ತ್ರ ಸಜ್ಜಿತ ಕಮಾಂಡೋಗಳ ರಕ್ಷಣೆ ನೀಡುವ ನಿರ್ಧಾರ ಆಕೆಗೆ ಇಂತಹಾ ಮತ್ತಷ್ಟು ತಪರಾಕಿಗಳನ್ನು ಯಾವುದೇ ಎಗ್ಗಿಲ್ಲದೇ ತಗಲಾಕಿಕೊಳ್ಳಲು ಉತ್ತೇಜಿಸಿದಂತಾಗಲಿಲ್ಲವೇ ?? ಆಕೆಗೆ‌ ಮುಂಬೈನಲ್ಲಿ ಇರುವುದು ಉಸಿರು ಕಟ್ಟಿಸಿದಂತಹ ಅನುಭವವಾಗಿದ್ದರೆ ಅದನ್ನು ಬಿಟ್ಟು ದೇಶದ ಇನ್ನಿತರೆ ಯಾವುದೇ ಭಾಗದಲ್ಲಿ ವಾಸಿಸಲು ಅವರು ಸ್ವತಂತ್ರರು.

ಮೇಲಾಗಿ ಕೇಂದ್ರ ಸರ್ಕಾರ ತಾನೇ ಈಕೆಯ ಟ್ವೀಟ್ ಸೃಷ್ಟಿಸಿದ ಆವಾಂತರದ ಮಹತ್ಕಾರಣಕ್ಕಾಗಿ ಸಿ.ಆರ್.ಪಿ.ಎಫ಼್ ಭದ್ರತೆ ಒದಗಿಸುವ ಬದಲು ಅವರೇ ಸೆಕ್ಯುರಿಟಿ ಹೆಚ್ಚಿಸಿಕೊಳ್ಳುವಂತೆ ಸಲಹೆ ನೀಡಬಹುದಿತ್ತು ! ಇಲ್ಲವೇ ಸುಮ್ಮನಿದ್ದಿದ್ದರೆ ಆಕಾಶವೇನೂ ಕಳಚಿ‌ ಬೀಳುತ್ತಿರಲಿಲ್ಲ ! ತಮಾಷೆಯೆಂದರೆ ಇಡೀ ದೇಶದಲ್ಲಿ ಸಿ ಆರ್ ಪಿ ಎಫ಼್ ಭದ್ರತೆ ಪಡೆದ ಅರವತ್ತು ಮಂದಿ ಗಣ್ಯರಲ್ಲಿ ಈಗ ಕಂಗನಾ ಕೂಡಾ ಒಬ್ಬರು ! ಮತ್ತು ಈ ಸೌಲಭ್ಯ ಪಡೆದ ಮೊಟ್ಟ ಮೊದಲ ಬಾಲಿವುಡ್ ನಟಿಯೂ ಕೂಡ.

ನಮ್ಮಲ್ಲಿ ಒಂದು ರೋಗವಿದೆ. ಅದೆಂದರೆ ಯಾವುದೇ ವಿಷಯವನ್ನು ರಾಜಕೀಯ ಗೊಳಿಸುವುದು.! ಘಟನೆಯನ್ನು ವಸ್ತುನಿಷ್ಠ ಹಿನ್ನೆಲೆಯಲ್ಲಿ ನೋಡದೇ ಅದನ್ನು ರಾಜಕೀಯಕರಣಗೊಳಿಸಿ ನಿರ್ಧಾರ ತೆಗೆದುಕೊಳ್ಳುವುದರಿಂದ ಯಾವ ಪಕ್ಷ ಅಧಿಕಾರದಲ್ಲಿದ್ದರೂ ಇಂತಹಾ ಅಸಹಜ ಬೆಳವಣಿಗೆಗಳು ಆಗಾಗ್ಗೆ ಜರುಗುತ್ತಲೇ ಇರುತ್ತವೆ.

ಹೀಗಾಗಿ ಯಾರದೋ ಕ್ಷುಲ್ಲಕ ವಿಚಾರಗಳೂ ಸಹ ರಾಜಕೀಯ ಸ್ವರೂಪ ಪಡೆದು ಕೊನೆಗೆ ಅದರ ದುಷ್ಪರಿಣಾಮ ಬೀರುವುದು ಸಾರ್ವಜನಿಕರ ತೆರಿಗೆ ಹಣದ ಮೇಲೆಯೇ ! ಕಷ್ಟಪಟ್ಟು ಮೈಮುರಿದು ದುಡಿದು ಸರ್ಕಾರಕ್ಕೆ ತೆರಿಗೆ ಕಟ್ಟಿದ ಹಣ ಇಂತಹಾ ಕ್ಷುಲ್ಲಕ ಕಾರ್ಯಕ್ಕೆ ವಿನಿಯೋಗವಾಗುವುದು ನಮ್ಮಲ್ಲಿ ಮಾತ್ರ ! ಸರ್ಕಾರ ಇವರಿಗೆ ಭದ್ರತೆ ಕೊಟ್ಟಿದ್ದಕ್ಕೆ ನಿಜವಾಗಿಯೂ ಬೇಸರವಿಲ್ಲ. ಆದರೆ ಸುಮ್ಮನಿರದೇ ವಿನಾಕಾರಣ ವಿವಾದಗಳನ್ನು ಮೈಮೇಲೆ ಎಳೆದುಕೊಳ್ಳುವ ಉಡಾಫ಼ೆಯವರಿಗೆ ಮಣೆ ಹಾಕಿ ಮೆರವಣಿಗೆ ಮಾಡುವ ಸರ್ಕಾರಗಳ ಧೋರಣೆಯಷ್ಟೇ ‌ಪ್ರಶ್ನಾರ್ಹ !

ಮರೆಯುವ ಮುನ್ನ

ಯಾವುದೇ ಜವಾಬ್ದಾರಿಯುತ ಆಡಳಿತ ಸಾರ್ವಜನಿಕರ ತೆರಿಗೆ ಹಣವನ್ನು ವೆಚ್ಚ ಮಾಡುವ ಮುನ್ನ ಅದರಿಂದ ಸಾರ್ವಜನಿಕರಿಗೆ ಉಪಯೋಗವಿದೆಯೇ ಅಥವಾ ಸಮಾಜಕ್ಕೆ ರಾಜ್ಯಕ್ಕೆ, ದೇಶಕ್ಕೆ ಅದರಿಂದ ಸೇವೆ ಸಲ್ಲಿಸಿದಂತಾಗುತ್ತದೆಯೇ ಎಂಬುದರ ಸೂಕ್ಷ್ಮವನ್ನು ಅರಿಯಬೇಕಾಗಿದೆ.

ಈ ಸೂಕ್ಷ್ಮತೆ ಆಳುವವರಿಗೆ ಇಲ್ಲವಾದಲ್ಲಿ ಅದು ಸಾರ್ವಜನಿಕರಿಗೆ ಮತ್ತು ತೆರಿಗೆದಾರರಿಗೆ ಮಾಡುವ ಅನ್ಯಾಯದಂತೆಯೇ ಗೋಚರಿಸುತ್ತದೆ. ರಾಜಕೀಯವನ್ನು ಬದಿಗಿಟ್ಟು ನೋಡುವುದಾದಲ್ಲಿ ಕಂಗನಾ ರಣಾವತ್ ಮಾಡಿಕೊಂಡ ಸ್ವಯಂ ಕಿರಿಕ್ ಗಳಿಗೆ ಸಿ ಆರ್ ಪಿ ಎಫ಼್ ರಕ್ಷಣೆ ನೀಡುವ ವಿಚಾರದಲ್ಲಿನ ಕೇಂದ್ರದ ‌ನಿರ್ಧಾರ ಸಮಂಜಸವಲ್ಲವೆಂದೇ ಹೇಳಬೇಕಾಗುತ್ತದೆ. ವೈಯುಕ್ತಿಕ ಪ್ರತಿಷ್ಠೆಯ ಟ್ವೀಟ್ ಗೆ ಇಷ್ಟೆಲ್ಲಾ ದುಬಾರಿ ಸ್ಕೋಪ್ ಸಿಗೋದು ನಮ್ಮಂತಹಾ ” ಬಡಾ” ದೇಶದಲ್ಲಿ ಮಾತ್ರವೇ ಅನ್ಸುತ್ತೆ.

ಇಂತಹಾ ಘಟನೆಗಳನ್ನೆಲ್ಲಾ ನೋಡಿದಾಗ…… ಇಂದು ಬರೀ ಖತರ್ ನಾಕ್ ಕುಖ್ಯಾತರಿಗೆ , ಪೊಳ್ಳು ಪ್ರಚಾರ ಗಿಟ್ಟಿಸುವವರಿಗೆ, ಗಿಮಿಕ್ ಗಳ ಗ್ಲಾಮರ್ ಗಳಿಗೆ, ಪ್ರಯೋಜನಕ್ಕೆ ಬಾರದ ಮಾತುಗಳ ಮಲ್ಲರಿಗಷ್ಟೇ ಕಾಲವೆನಿಸುತ್ತದೆ…!
So sad….!

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

ದಿನದ ಸುದ್ದಿ

ಆರ್ಯರದು‌ ಜೂಜುಕೋರ ಜನಾಂಗ : ಡಾ.ಬಿ.ಆರ್. ಅಂಬೇಡ್ಕರ್

Published

on

  • ಡಾ.ಬಿ.ಆರ್. ಅಂಬೇಡ್ಕರ್

ರ್ಯರದು ಜೂಜುಕೋರ ಜನಾಂಗ. ಆರ್ಯರ ಆರಂಭದ ಘಟ್ಟದಿಂದಲೇ ಜೂಜು ಒಂದು ಶಾಸ್ತ್ರವಾಗಿ ಬೆಳೆದುಬಂದಿದೆ.ಆರ್ಯರು ಆ ಬಗೆಗೆ ತಾಂತ್ರಿಕ ಪರಿಕಲ್ಪನೆಗಳು ಹುಟ್ಟುಹಾಕಿದ್ದರು. ಅವರು ಇತಿಹಾಸವನ್ನು ಕೃತ, ತ್ರೇತ, ದ್ವಾಪರ ಮತ್ತು ಕಲಿ ಎಂದು ನಾಲ್ಕು ಯುಗಗಳನ್ನಾಗಿ ವಿಂಗಡಿಸಿದ್ದರು. ಆದರೆ, ಇವು ವಾಸ್ತವವಾಗಿ ಅರ್ಯರು ಜೂಜಿನಲ್ಲಿ ಬಳಸುತ್ತಿದ್ದ ದಾಳಗಳ ಹೆಸರುಗಳು. ಅತ್ಯಂತ ಅದೃಷ್ಟದಾಯಕವಾದ ದಾಳವೆಂದರೆ ಕೃತ.

ದುರದೃಷ್ಟ ತರುವ ದಾಳವೇ ಕಲಿ. ತ್ರೇತ ಮತ್ತು ದ್ವಾಪರ ಇವೆರಡರ ನಡುವಿನ ದಾಳಗಳು. ಆರ್ಯರ ಕಾಲದಲ್ಲಿ ಜೂಜಿಗೆ ಒಡ್ಡುತ್ತಿದ್ದ ಪಣ ಕೂಡ ತೀರಾ ದೊಡ್ಡದು. ರಾಜ್ಯಗಳನ್ನೂ ತಮ್ಮ ಪತ್ನಿಯರನ್ನೂ ಅವರು ಪಣಕ್ಕಿಡುತ್ತಿದ್ದುದುಂಟು. ನಳ ಮಹಾರಾಜ ರಾಜ್ಯವನ್ನೇ ಪಣಕ್ಕಿಟ್ಟು ಸೋತ. ಪಾಂಡವರು ಮತ್ತೂ ಮುಂದೆ ಹೋದರು.

ಅವರು ತಮ್ಮ ರಾಜ್ಯದ ಜೊತೆಗೆ ಪತ್ನಿ ದ್ರೌಪದಿಯನ್ನೂ ಪಣಕ್ಕಿಟ್ಟು ಎರಡನ್ನೂ ಸೋತರು. ಆರ್ಯರಲ್ಲಿ ಜೂಜು ಕೇವಲ ಸಿರಿವಂತರ ಕ್ರೀಡೆಯೇನಾಗಿರಲಿಲ್ಲ. ಇದು ಬಹುತೇಕ ಎಲ್ಲ ಜನರ ದೌರ್ಬಲ್ಯವಾಗಿತ್ತು. ಈ ವ್ಯಸನ ಅದೆಷ್ಟು ತೀವ್ರವಾಗಿ ಹಬ್ಬಿತ್ತೆಂದರೆ ಧರ್ಮಶಾಸ್ತ್ರದ ಕತೃಗಳೆಲ್ಲ ಇದನ್ನು ರಾಜ್ಯದ ಕಾನೂನುಗಳ ಮೂಲಕ ಮಟ್ಟಹಾಕಬೇಕೆಂದು ರಾಜರುಗಳಿಗೆ ಒತ್ತಿ ಒತ್ತಿ ಹೇಳಿದರು.

ಡಾ.ಬಿ.ಆರ್.ಅಂಬೇಡ್ಕರರ ‘ ಹಿಂದೂ ಧರ್ಮದ ಒಗಟುಗಳು’ ಪುಸ್ತಕದಿಂದ ಈ ಬರಹ ಆಯ್ಕೆ ಮಾಡಿಕೊಳ್ಳಲಾಗಿದೆ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ದಿನದ ಸುದ್ದಿ

ಸ್ವಾತಂತ್ರ್ಯ-ಸಮಾನತೆಯನ್ನುಳಿಸುವುದು ಸಹಜೀವನ : ಡಾ.ಬಿ.ಆರ್.ಅಂಬೇಡ್ಕರ್

Published

on

ಕೆಲವರು ಪ್ರಜಾಪ್ರಭುತ್ವವನ್ನು ಸಮಾನತೆ ಮತ್ತು ಸ್ವಾತಂತ್ರ್ಯದ ಜೊತೆ ಸಮೀಕರಿಸುತ್ತಾರೆ. ನಿಜ, ಪ್ರಜಾಪ್ರಭುತ್ವದ ಅತ್ಯಂತ ತೀವ್ರ ಕಾಳಜಿ ಎಂದರೆ ಸಮಾನತೆ ಮತ್ತು ಸ್ವಾತಂತ್ರ್ಯವೇ, ಆದರೆ ಈ ಸ್ವಾತಂತ್ರ್ಯ ಮತ್ತು ಸಮಾನತೆಯನ್ನು ಶಾಶ್ವತವಾಗಿ ಉಳಿಸುವುದು ಯಾವುದು ಎಂಬುದು ಮುಖ್ಯವಾದ ಪ್ರಶ್ನೆ.

ಕೆಲವರ ಪ್ರಕಾರ ಪ್ರಭುತ್ವದ ಕಾನೂನು, ಸ್ವಾತಂತ್ರ್ಯ ಮತ್ತು ಸಮಾನತೆಯನ್ನು ರಕ್ಷಿಸುತ್ತವೆ. ಆದರೆ ಇದು ಸತ್ಯದ ಸಂಗತಿಯಲ್ಲ. ಸ್ವಾತಂತ್ರ್ಯ ಮತ್ತು ಸಮಾನತೆಯನ್ನುಳಿಸುವುದು ಸಹಜೀವನ. ಫ್ರೆಂಚ್ ಕಾಂತಿಕಾರರು ಯಾವುದನ್ನು ಸಹೋದರ ಭಾವ (fraternity) ಎಂದು ಕರೆದರೋ ಅದು. ಈ ಸಹ ಬ್ರಾತೃತ್ವ ಎಂಬ ಪದ ಸಮಪರ್ಕವಾದ ಪದವಲ್ಲ. ಈ ಬುದ್ಧನ ‘ಮೈತ್ರಿ’ ಎಂಬ ಪದವೇ ಅದಕ್ಕಿಂತ ಹೆಚ್ಚು ಸಮರ್ಪಕವಾದದ್ದು.

ಈ ಸಹಬ್ರಾತೃತ್ವವಿಲ್ಲದ ಸ್ವಾತಂತ್ರ್ಯವು ಸಮಾನತೆಯನ್ನು ನಾಶಮಾಡಿಬಿಡುತ್ತದೆ. ಅಥವಾ ಸಹಭ್ರಾತೃತ್ವವಿಲ್ಲದ ಸಮಾನತೆಯು ಸ್ವಾತಂತ್ರ್ಯವನ್ನು ನಾಶಮಾಡಿಬಿಡುತ್ತದೆ. ಪ್ರಜಾಪ್ರಭುತ್ವದಲ್ಲಿ ಸಮಾನತೆಯಿಂದ ಸ್ವಾತಂತ್ರ್ಯವೂ, ಸ್ವಾತಂತ್ರ್ಯದಿಂದ ಸಮಾನತೆಯೂ ನಾಶವಾಗದಿರಲು ಈ ಎರಡರ ಮೂಲದಲ್ಲಿರುವ ಸಹಬ್ರಾತೃತ್ವವೇ ಕಾರಣ. ಆದುದರಿಂದ ಸಹಭ್ರಾತೃತ್ವವು ಪ್ರಜಾಪ್ರಭುತ್ವದ ಮೂಲ.

ಡಾ.ಬಿ.ಆರ್.ಅಂಬೇಡ್ಕರರ ‘ ಹಿಂದೂಧರ್ಮದ ಒಗಟುಗಳುಪುಸ್ತಕದಿಂದ ಈ ಬರಹ ಆಯ್ಕೆಮಾಡಿಕೊಳ್ಳಲಾಗಿದೆ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಬಹಿರಂಗ

ಬಾಲಕ ಅಂಬೇಡ್ಕರರ ಭವಿಷ್ಯ ಬದಲಿಸಿದ ಆ ಒಂದು ಬೆಳವಣಿಗೆ

Published

on

  • ರಘೋತ್ತಮ ಹೊ.ಬ

ಕೆಲವೊಮ್ಮೆ ನಮ್ಮ ಜೀವನಗಳಲ್ಲಿ ನಮಗರಿವಿಲ್ಲದಂತೆ ಕೆಲವು ಬೆಳವಣಿಗೆಗಳು ನಡೆದು ಬಿಡುತ್ತವೆ. ಆ ಕ್ಷಣಗಳಲ್ಲಿ ಅಂತಹ ಬೆಳವಣಿಗೆಗಳು ನಮಗೆ ತೀವ್ರ ನಷ್ಟ ಮತ್ತು ನೋವನ್ನು ಕೂಡ ಉಂಟುಮಾಡಬಹುದು. ಆದರೆ… ಮತ್ತೊಂದು ರೀತಿಯಲ್ಲಿ ನಮಗೆ ಅವು ಭಾರೀ ಅನುಕೂಲ ಅಥವಾ ಒಳ್ಳೆಯ ಬೆಳವಣಿಗೆಗೂ ಕಾರಣವಾಗಿಬಿಡಬಹುದು!

ಹೌದು, ಬಾಬಾಸಾಹೇಬ್ ಅಂಬೇಡ್ಕರರ ಬದುಕಿನಲ್ಲೂ ಅಂತಹದ್ದೆ ಒಂದು ಬೆಳವಣಿಗೆ ನಡೆದಿದೆ. ಅದು ಅವರು ಜನಿಸಿದ ಸಂದರ್ಭದಲ್ಲಿ. ಅಂದರೆ 1892ರಲ್ಲಿ ಬ್ರಿಟಿಷರು ಅದುವರೆಗೆ ತಮ್ಮ ಮಿಲಿಟರಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದ ಮಹಾರ್ ಸಮುದಾಯವನ್ನು ಇದ್ದಕ್ಕಿದ್ದ ಹಾಗೆ ಸೇನೆಗೆ ಸೇರಿಸಿಕೊಳ್ಳುವುದನ್ನು ನಿಲ್ಲಿಸಿತು.

ಸ್ವತಃ ಬಾಲಕ ಅಂಬೇಡ್ಕರರ ತಂದೆ ರಾಮ್ ಜಿ ಸಕ್ಪಾಲ್ ರು ಕೂಡ ಸೇನೆಯಲ್ಲಿ ಸುಬೇದಾರ್ ಆಗಿ ನಿವೃತ್ತರಾಗಿದ್ದರು. ಸೇನಾ ಶಾಲೆಯಲ್ಲಿ ರಾಮ್ ಜಿ ಸಕ್ಪಾಲ್ ರು ಶಿಕ್ಷಕರಾಗಿಯೂ ಕಾರ್ಯನಿರ್ವಹಿಸಿದ್ದರು. ಆದರೆ ಹೀಗೆ ಇದ್ದಕ್ಕಿದ್ದ ಹಾಗೆ ಬ್ರಿಟಿಷರು ಮಹಾರ್ ಸಮುದಾಯದವರನ್ನು ಸೇನೆಗೆ ಸೇರಿಸಿಕೊಳ್ಳುವುದನ್ನು ನಿಲ್ಲಿಸಿದ್ದರಿಂದ ಸಮುದಾಯ ಭಾರಿ ತೊಂದರೆಗೆ ಸಿಲುಕಿತು. ಉದ್ಯೋಗಕ್ಕಾಗಿ ಮಹಾರ್ ಸಮುದಾಯ ಪರದಾಡುವಂತಾಯಿತು.

ಆದರೆ ಅವರಿಗೆ ಆ ಕ್ಷಣಕ್ಕೆ ಆದ ನಷ್ಟ ಇಡೀ ಜಗತ್ತಿಗೆ ಒಂದು ದೊಡ್ಡ ಲಾಭ ತಂದುಕೊಟ್ಟಿತ್ತು! ಅದೇನೆಂದರೆ ಮಹಾರ್ ಸಮುದಾಯ ಹೀಗೆ ಮಿಲಿಟರಿ ಸೇವೆಯಲ್ಲೇ ಮುಂದುವರಿದಿದ್ದರೆ ಸುಬೇದಾರ್ ರಾಮ್ ಜಿ ಸಕ್ಪಾಲರು ತಮ್ಮ ಪುತ್ರರನ್ನು ಕೂಡ ಬ್ರಿಟಿಷ್ ಸೇನೆಗೆ ಸೇರಿಸುವ ಸಾಧ್ಯತೆ ಇರುತ್ತಿತ್ತು.

ಇದನ್ನು ಉಲ್ಲೇಖಿಸುತ್ತಾ ಬಾಬಾಸಾಹೇಬ್ ಅಂಬೇಡ್ಕರರ ಜೀವನ ಚರಿತ್ರಕಾರರು 1892 ರಲ್ಲಿ ಬ್ರಿಟಿಷರು ಮಹಾರರನ್ನು ಸೇನೆಗೆ ಸೇರಿಸಿಕೊಳ್ಳುವುದನ್ನು ನಿಲ್ಲಿಸಿದ್ದರಿಂದ ಪರಿಸ್ಥಿತಿ ಬದಲಾಗಿ ಮಹೌ (MHOW-Military Head Quarters Of War) ಅನ್ನು ತೊರೆದ ರಾಮ್ ಜಿ ಸಕ್ಪಾಲರ ಕುಟುಂಬ ಸ್ವಂತ ಜಿಲ್ಲೆ ರತ್ನಗಿರಿ, ನಂತರ ಸತಾರ, ತದನಂತರ ಮುಂಬಯಿ ಹೀಗೆ ತೆರಳುವಂತಾಯಿತು. ಆ ಮೂಲಕ ಬಾಬಾಸಾಹೇಬ್ ಅಂಬೇಡ್ಕರರು ಶಿಕ್ಷಣದ ಮೇರುಶಿಖರವೇರುಂತಾಯಿತು ಎನ್ನುತ್ತಾರೆ. (Vol.10, Pp.4).

ಅಂದಹಾಗೆ ಮುಂದೊಂದು ದಿನ ಬಾಬಾಸಾಹೇಬ್ ಅಂಬೇಡ್ಕರರು ಬ್ರಿಟಿಷರಿಗೆ “ಬ್ರಿಟಿಷರು ತನ್ನ ಜನರಿಗೆ ಮಿಲಿಟರಿ ಪ್ರವೇಶ ನಿರಾಕರಿಸಿದ್ದರ ಬಗ್ಗೆ” ಖಾರವಾಗಿ ಪತ್ರ ಬರೆಯುತ್ತಾರೆ. ಆದರೆ ಕಾಕತಾಳೀಯವೆಂದರೆ ಆ ಸಂದರ್ಭದಲ್ಲಿ ಮಹಾರ್ ಸಮುದಾಯಕ್ಕೆ ಆದ ನಷ್ಟ ಇಡೀ ಜಗತ್ತಿಗೆ ಅಂಬೇಡ್ಕರರ ರೂಪದಲ್ಲಿ ಶಿಕ್ಷಣದ ಜ್ಞಾನದ ಒಂದು ಬೃಹತ್ ಲಾಭ ತಂದುಕೊಟ್ಟಿತು ಎಂಬುದು ಖಂಡಿತ ಸುಳ್ಳಲ್ಲ!

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

Trending