Connect with us

ಅಂತರಂಗ

ನಿಬ್ಬೆರಗು ಮೂಡಿಸುವ ಇನಿದನಿಯ ಗಾನ ಕೋಗಿಲೆ ಜೆ.ಕೆ ಶಿವಕುಮಾರ್

Published

on

ವ್ಹಾ ,,, ಅನ್ನಲೇಬೇಕು

ವಾಹ್…! ಈ ಪ್ರಪಂಚದಲ್ಲಿ ಎಂತೆಂಥಾ ಅದ್ಭುತ ಕಲಾವಿದರು ಇದ್ದಾರೆ. ಅವರ ಕಲಾವಂತಿಕೆಯನ್ನು ಕಣ್ಣಾರೆ ಕಾಣುವುದು ಸಹ ಸೌಭಾಗ್ಯವೇ ಸರಿ. ಅದೊಂದು ಕಲೆಯೊಳಗಿನ ಕಲಾತ್ಮಕತೆಯ ದಿವ್ಯ ದರ್ಶನ – ದಿಗ್ಧರ್ಶನ ಎಂದರೂ ಅಚ್ಚರಿ ಏನಿಲ್ಲ.
ಇಂತಹ ಅಚ್ಚರಿಯ ಮೂಡಿಸುವ ಅಪರೂಪದ ಕಲಾವಿದರ ತಡಕಾಟದಲ್ಲಿ ತೊಡಗುವವರ ಕಣ್ಣೆದುರು ಗಾಡ್ ಗಿಫ್ಟ್ ಮೂಲಕ ನಿಬ್ಬೆರಗು ಮೂಡಿಸುತ್ತಾರೆ ದೇವನಗರಿಯ ಸಂಗೀತ ಕಲಾವಿದರಾದ ಶ್ರೀ ಜೆ.ಕೆ ಶಿವಕುಮಾರ್.

ಒಂದಷ್ಟು

ವೃತ್ತಿಯಲ್ಲಿ ಅಕೌಂಟೆಂಟ್ ಆಗಿ ಸೇವೆ ಸಲ್ಲಿಸಿ ಪ್ರಸ್ತುತ ವಿಶ್ರಾಂತ ಜೀವನ ನಡೆಸುತ್ತಿರುವ ಜೆ.ಕೆ ಶಿವಕುಮಾರ್ ಅವರು ದಾವಣಗೆರೆಯ ಪ್ರಸಿದ್ಧ ವರ್ತಕರಾದ ದಿ. ಜವಳಿ ಕೊಟ್ರಪ್ಪ ಅವರ 4ನೇ ಪುತ್ರರು. ಕೆ.ಟಿಜೆ ನಗರದ 16ನೇ ಕ್ರಾಸ್ ನಿವಾಸಿಯಾಗಿರುವ ಅವರು ಸುಮಾರು 35ಕ್ಕೂ ಅಧಿಕ ವರ್ಷಗಳಿಂದ ಹವ್ಯಾಸಿ ಕಲಾವಿದರಾಗಿ, ಸೃಜನಶೀಲ ಗಾಯಕರಾಗಿಯೂ ಸೇರಿದಂತೆ ಹತ್ತು ಹಲವು ಬಹುಮುಖ ಪ್ರತಿಭೆಯಿಂದ ರಾಜ್ಯಾದ್ಯಂತ ಇನಿದನಿಯ ಗಾನಕೋಗಿಲೆ ಎಂದೇ ಗುರುತಿಸಿಕೊಂಡಿದ್ದಾರೆ.

ಗಾಡ್ ಗಿಫ್ಟ್

ಹಾಡುವುದೆಂದರೆ ಸುಲಭದ ಮಾತಲ್ಲ. ಹೆಣ್ಣಿಗಾಗಲಿ ಗಂಡಿಗಾಗಲಿ ಅವರವರ ಧ್ವನಿಯಲ್ಲೇ ಆದರೂ, ಅದಕ್ಕೆ ಎಷ್ಟೇ ಪೂರ್ವಭ್ಯಾಸ ಇದ್ದರೂ ಸಂಗೀತ ಕಲೆ ಎಲ್ಲರಿಗೂ ಒಲಿಯುವಂತದ್ದಲ್ಲ. ಆದರೆ ಹೆಣ್ಣು ಮತ್ತು ಗಂಡು ಧ್ವನಿಯಲ್ಲಿ ಸರಾಗವಾಗಿ ಹಾಡಬಲ್ಲ ವಿಶಿಷ್ಟ ಕಲೆ ಶಿವಕುಮಾರ್ ಅವರಿಗೆ ಸಹಜವಾಗಿ, ಪ್ರಕೃತಿ ಮತ್ತು ದೇವರ ಕೊಡುಗೆಯಾಗಿ ಲಭಿಸಿದೆ. ಅವರು ಹಾಡಲು ನಿಂತರೆ ಪ್ರೇಕ್ಷಕರು ಮೂಕ ವಿಸ್ಮಿತರಾಗಿ ಆಲಿಸುತ್ತಾರೆ. ತಂತಾನೆ ಪ್ರೇಕ್ಷಕರಿಂದ ಹೊರಹೊಮ್ಮುವ ಕರತಾಡನ ಮುಗಿಲು ಮುಟ್ಟುತ್ತದೆ.
ಶಿವಕುಮಾರ್ ಅವರ ವಿಷಯದಲ್ಲಿ ಹೇಳಲೇಬೇಕಾದ ಅದ್ಭುತ ಸಂಗತಿ ಎಂದರೆ ಅವರು ಎಂದೂ ಸಂಗೀತ ಅಭ್ಯಾಸ ಮಾಡಿದವರಲ್ಲ. ಶಾಸ್ತ್ರೀಯವಾಗಿ ಕಲಿತವರಲ್ಲ. ರೇಡಿಯೋ, ಟೆಪ್‍ರೆಕಾರ್ಡರ್ ಟಿವಿಯಲ್ಲಿ ಹಾಡು ಕೇಳಿಸಿಕೊಳ್ಳುತ್ತಲೇ ಆ ಕಲೆಗೆ ಒಗ್ಗಿಕೊಂಡು – ಮೈಗೂಡಿಸಿಕೊಂಡವರು.


ಸುಮಾರು ವರ್ಷಗಳ ಹಿಂದೆ ಬೆಂಗಳೂರಿನಲ್ಲಿ ಖಾಸಗಿ ಕಂಪನಿಯೊಂದರಲ್ಲಿ ಖಾಸಗಿ ಕೆಲಸ ಮಾಡುತ್ತಿದ್ದ ಸಂದರ್ಭದಲ್ಲಿ ಆಕಸ್ಮಿಕವಾಗಿ ವೇದಿಕೆಯಲ್ಲಿ ತಮಗೆ ಸಿಕ್ಕ ಅವಕಾಶಗಳನ್ನು ಬಳಸಿಕೊಳ್ಳುತ್ತಿದ್ದ ಅವರು ನಂತರ ರಾಜ್ಯೋತ್ಸವದಂತಹ ಕಾರ್ಯಕ್ರಮಗಳಲ್ಲಿ ನಡೆಯುತ್ತಿದ್ದ ಆರ್ಕೆಸ್ಟ್ರಾಗಳಲ್ಲಿ ಹಾಡುವುದನ್ನು ರೂಢಿಸಿಕೊಂಡರು.
ಬಹುಮುಖ ಪ್ರತಿಭೆಯ ಗಾನಕೋಗಿಲೆ :
ಬೆಂಗಳೂರಿನ ಯಶವಂತಪುರದಲ್ಲಿ ಸವಾಲು ಎಂಬಂತೆ ಎದುರಾದ ಒಂದು ಪ್ರಸಂಗದಿಂದ ಅವರು ಹೆಣ್ಣು ಮತ್ತು ಗಂಡು ಧ್ವನಿಗಳೆರಡರಲ್ಲೂ ಹಾಡಲು ಪ್ರಾರಂಭಿಸಿದರು… ಹೀಗೆ ಆರಂಭವಾದ ಅವರ ಹಾಡುಗಾರಿಕೆಯ ಅಭಿಯಾನ ಇಂದಿಗೂ ಸಾಗುತ್ತಿದೆ. ಪ್ರಸ್ತುತ 57ರ ಹರೆಯದಲ್ಲೂ ಅವರ ಧ್ವನಿಯಲ್ಲಿ ಉಳಿದಿರುವ ಅದೇ ಮಾಧುರ್ಯ ಮತ್ತು ಉತ್ಸಾಹ ಪ್ರೇಕ್ಷಕ ವರ್ಗಕ್ಕೆ ಪವಾಡ ಸದೃಶ್ಯ ಎಂಬಂತೆ ಕಾಣುತ್ತಿದೆ. ಒಲವೇ ಜೀವನ ಸಾಕ್ಷಾತ್ಕಾರ…., ಸಿರಿವಂತನಾದರೂ ಕನ್ನಡ ನಾಡಲ್ಲೇ ಮೆರೆವೆ… ಎಂಬಿತ್ಯಾದಿ ಕನ್ನಡದ ಹಾಡುಗಳನ್ನು ಅವರು ಹಾಡುತ್ತಿದ್ದರೆ ಹೊತ್ತು ಹೋಗಿದ್ದೇ ಗೊತ್ತಾಗುವುದಿಲ್ಲ.
ಗಾಯನ ಅಷ್ಟೇ ಅಲ್ಲದೆ ಮಿಮಿಕ್ರಿ, ಅಭಿನಯ, ಜೋಕ್ಸ್ ಕಟ್ಟಿಂಗ್ ಇತ್ಯಾದಿ ಹಲವು ಹವ್ಯಾಸವುಳ್ಳ ಶಿವಕುಮಾರ್ ಅವರ ವ್ಯಕ್ತಿತ್ವ ಸೂಜಿಗಲ್ಲಿನಂತದ್ದು. ತಮ್ಮ ಬಳಿ ಇರುವವರನ್ನು ಆತ್ಮೀಯತೆಯಿಂದ ನಕ್ಕು ನಗಿಸುವ ಅವರು ಎಲ್ಲರ ಮನದಲ್ಲಿ ಸದಾ ಹಸಿರಾಗಿ ಉಳಿದು ಬಿಡುತ್ತಾರೆ. ಅಂತೆಯೇ ಅವರ ಇನಿದನಿಯ ಗಾಯನವೂ ಕೂಡ…. ಗೀತೆಗಳ ಆಯ್ಕೆಯ ಅವರ ಸೂಕ್ಷ್ಮತೆಯೇ ಅದಕ್ಕೆ ಕಾರಣ. ಹೆಚ್ಚಾಗಿ ಅವರು ಸಾಮಾಜಿಕ ಕಳಕಳಿ, ನಾಡು-ನುಡಿ, ದೇಶ ಪ್ರೇಮ -ದೇಶಭಿಮಾನ ಮೆರೆಯುವಂತಹ ಹಾಡುಗಳಿಗೆಯೇ ಧ್ವನಿಯಾಗಿದ್ದಾರೆ.

ಒಂದು ವಿಷಾದ

ಕೇಳುಗರ ಹೃದಯವನ್ನು ತಲ್ಲಣಗೊಳಿಸಿ ಪುಳಕಿತರನ್ನಾಗಿಸುವಂತೆ ರೋಚಕವಾಗಿ ಹಾಡಬಲ್ಲ ಈ ಅದ್ಭುತ ಗಾಯಕ ಗಾಯನವನ್ನೇ ತಮ್ಮ ವೃತ್ತಿಯಾಗಿಸಿಕೊಂಡಿದ್ದಲ್ಲಿ ಇಂದು ಸಿನಿಮಾ ರಂಗದಲ್ಲಿ ಅತ್ಯುನ್ನತ ಗಾಯಕರ ಪಟ್ಟಿಯಲ್ಲಿ ಗುರುತಿಸಿಕೊಳ್ಳಬಹುದಿತ್ತು, ಅಂತೆಯೇ ಕೋಟಿಗಟ್ಟಲೆ ಹಣವನ್ನೂ ಸಂಪಾದಿಸಿಬಹುದಿತ್ತು.
ಅದರಲ್ಲೂ ಶಿವಕುಮಾರ್ ಅವರು ಬೆಂಗಳೂರಲ್ಲಿ ಹಲವು ವರ್ಷಗಳ ಕಾಲ ತಂಗಿದ್ದಾಗ ಸಿನಿಮಾ ರಂಗದ ಅನೇಕ ದಿಗ್ಗಜರ ಪರಿಚಯವೂ ಆಗಿತ್ತು. ಹಲವರಿಗೆ ಇವರ ಕಲೆಯ ವೈಶಿಷ್ಟ್ಯತೆಯೂ ತಿಳಿದಿತ್ತು. ಸ್ವಾಭಿಮಾನದ ಕಾರಣ ಇವರಂತೂ ಯಾರಲ್ಲೂ ಅವಕಾಶಕ್ಕಾಗಿ ಬೇಡಿ ನಿಲ್ಲಲಿಲ್ಲ. ಆದರೆ ಅವರಲ್ಲಿ ಯಾರೊಬ್ಬರೂ ಸಹ ಗುರುತಿಸಿ ಪ್ರೋತ್ಸಾಹಿಸುವ ಮನಸ್ಸು ಮಾಡಲಿಲ್ಲ. ಶಾಸ್ತ್ರೀಯವಾಗಿ ಸಂಗೀತ ಕಲಿತಿಲ್ಲ ಎಂಬ ಒಂದೇ ಕಾರಣಕ್ಕಾಗಿ ಇವರ ಸಹಜ ಪ್ರತಿಭೆ ಮತ್ತು ಸಾಮಥ್ರ್ಯ ಬೆಳಕಿಗೆ ಬಾರದಾಯಿತು. ಕೈಗೆ ಬಂದ ಅದೆಷ್ಟೋ ಅವಕಾಶಗಳು ಸಹ ಕೈ ತಪ್ಪಿ ಹೋಗಿ ಮನಸ್ಸಿಗೆ ಘಾಸಿ ಕೂಡ ಮಾಡಿದ್ದವು. ಆದರೂ ಹಾಡುವುದು ಮಾತ್ರ ನಿಲ್ಲಲಿಲ್ಲ.

ಹ್ಯಾಟ್ಸಾಫ್

ಕಾಂಚಾಣ ಮತ್ತು ಕೀರ್ತಿಯ ಬೆನ್ನತ್ತಿ ಹೋಗದೆ, ಯಾವ ಸಂಭಾವನೆಯನ್ನೂ ಬಯಸದೆ ಕರೆದವರ ಆತ್ಮೀಯ ಆಹ್ವಾನಕ್ಕೆ ಒಲ್ಲೆನ್ನದೆ ಹೋಗಿ ಇತರರ ರಂಜಿಸುತ್ತಾ ಅದರಲ್ಲೇ ಆತ್ಮ ತೃಪ್ತಿ ಕಂಡುಕೊಳ್ಳುತ್ತಿರುವ ಶಿವಕುಮಾರ್ ಅವರ ವ್ಯಕ್ತಿತ್ವ ನಿಜಕ್ಕೂ ವಿಶೇಷವೇ ಸರಿ.
ಅಮೋಘ – ಅದ್ಭುತ ಕಲೆಗಳ ಸಾಕಾರ ಮೂರ್ತಿಯಂತಿರುವ ಶಿವಕುಮಾರ್ ಅವರದು ಸರಳತೆ, ಸಜ್ಜನಿಕೆಯೇ ಮೈದೆಳೆದಂತಿರುವ ವ್ಯಕ್ತಿತ್ವ. ತಮ್ಮ ಸಹೋದರ ಒಬ್ಬರಿಗೆ ಕಿಡ್ನಿ ದಾನ ಮಾಡುವ ಮೂಲಕ ಅವರ ಆರೋಗ್ಯದ ಕಾಳಜಿ ಹಾಗೂ ಸಹೃದಯತೆ ಮೆರದಿರುವ ಪುಣ್ಯಾತ್ಮ ಕೂಡ ಆಗಿದ್ದಾರೆ ಈ ಕಲಾವಿದ.

HATS OFF SIR

ಗಂಗಾಧರ ಬಿ.ಎಲ್ ನಿಟ್ಟೂರ್
ಮೊ.ಸಂ : 8867702396

ಅಂತರಂಗ

ಮತ್ತೊಂದು ಜೀವ ಮತ್ತದೇ ಬೇಸರ ಇನ್ನೆಷ್ಟು ದಿನ

Published

on

  •  ನಾ ದಿವಾಕರ

ತ್ತರ ಪ್ರದೇಶ ಭಾರತದ ಅತ್ಯಾಚಾರ ಪ್ರದೇಶ ಆಗಿದೆ. ಯೋಗಿಯ ರಾಮರಾಜ್ಯದಲ್ಲಿ ಸೀತೆಯರಿಗೆ ರಕ್ಷಣೆಯಿಲ್ಲದಂತಾಗಿದೆ. ಈಗ ಮತ್ತೋರ್ವ ಯುವತಿ ಮನೀಷಾ ವಾಲ್ಮೀಕಿ ಅತ್ಯಾಚಾರಕ್ಕೊಳಗಾಗಿ ಹತ್ಯೆಗೀಡಾಗಿದ್ದಾಳೆ. ದಲಿತ ಸಮುದಾಯಕ್ಕೆ ಸೇರಿದ 19 ವರ್ಷದ ಮನೀಷಾ ನಾಲ್ವರು ದುಷ್ಕರ್ಮಿಗಳ ಕಾಮತೃಷೆಗೆ ಬಲಿಯಾಗಿದ್ದಾಳೆ. ಎಂದಿನಂತೆ ಆರೋಪಿಗಳು ಮೇಲ್ಜಾತಿಯವರಾಗಿದ್ದಾರೆ.

ಆರೋಪಿಗಳನ್ನು ಬಂಧಿಸಲಾಗಿದೆ, ಅತ್ಯಾಚಾರಕ್ಕೊಳಗಾದ ಮನಿಷಾ ಹಲವು ದಿನಗಳ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾಳೆ. ಮತ್ತದೇ ಹಲವು ಲಕ್ಷ ರೂಗಳ ಪರಿಹಾರ, ತನಿಖೆ, ವಿಚಾರಣೆ, ಆರೋಪಿಗಳಿಗೆ ಜಾಮೀನು , ನಂತರ ಸಾಕ್ಷ್ಯಾಧಾರಗಳಿಲ್ಲದೆ ಬಿಡುಗಡೆ. ಮನೀಷಾಳ ನಾಲಿಗೆ ಕತ್ತರಿಸಲಾಗಿದೆ, ಕಾಲು ತುಂಡಾಗಿದೆ ಎನ್ನಲಾಗಿದೆ. ಆದರೂ ಅತ್ಯಾಚಾರಿಗಳ ರಕ್ಷಣೆಗೆ ಯೋಗಿರಾಜ್ಯದ ಸವರ್ಣೀಯರು ಟೊಂಕಕಟ್ಟಿ ನಿಂತಿದ್ದಾರೆ.

ಯೋಗಿ ಆಡಳಿತದಲ್ಲಿ ಅಪರಾಧಿಗಳಿಗೆ ಶಿಕ್ಷೆಯಾಗುವುದಿಲ್ಲ ಎನ್ನುವುದು ಸಾಕಷ್ಟು ಬಾರಿ ನಿರೂಪಿತವಾಗಿದೆ. ನಿರಪರಾಧಿಗಳಿಗೆ ಉಗ್ರ ಶಿಕ್ಷೆ ಆಗುವುದನ್ನೂ ಕಫೀಲ್ ಖಾನ್ ಪ್ರಕರಣದಲ್ಲಿ ಕಂಡಿದ್ದೇವೆ. ಇದು ಬದಲಾಗುತ್ತಿರುವ ಭಾರತದ ದಿಕ್ಸೂಚಿ. ದೆಹಲಿ ಗಲಭೆಗಳಲ್ಲೂ ಗೋಲಿ ಮಾರೋ ಸಾಲೋಂಕೋ ಎಂದವರು, ಪೊಲೀಸರ ಎದುರಿನಲ್ಲೇ ಬಂದೂಕು ಬಳಸಿದವರು ಮುಕ್ತವಾಗಿ ಓಡಾಡುತ್ತಿದ್ದು ಅಮಾಯಕ ಉಮರ್ ಖಲೀದ್ ಬಂಧನಕ್ಕೊಳಗಾಗಿದ್ದಾನೆ. ಇದು ಪ್ರವರ್ಧಮಾನಕ್ಕೆ ಬರುತ್ತಿರುವ ನವ ಭಾರತದ ಹೊಸ ರೂಪ. ಉತ್ತರ ಪ್ರದೇಶ ಒಂದು ಪ್ರಾತ್ಯಕ್ಷಿಕೆ .

ಭಾರತದಂತಹ ಪಿತೃಪ್ರಧಾನ ಸಮಾಜದಲ್ಲಿ
ಅತ್ಯಾಚಾರಿಗಳಿಗೆ ಮರಣದಂಡನೆ ವಿಧಿಸಿದರೆ ಗಲ್ಲಿಗೇರುವವರು ಹೆಚ್ಚಾಗುತ್ತಾರೆಯೇ ವಿನಃ ಅತ್ಯಾಚಾರ, ದೌರ್ಜನ್ಯ ಕಡಿಮೆಯಾಗುವುದಿಲ್ಲ. ನಿರ್ಭಯ ಪ್ರಕರಣದ ನಂತರ ಮಹಿಳೆಯರ ರಕ್ಷಣೆಗಾಗಿ ಕಠಿಣ ಕಾನೂನು ರೂಪಿಸಿದ ಪ್ರಭುತ್ವಕ್ಕೆ ಭಾರತೀಯ ಸಮಾಜದಲ್ಲಿ ಅಂತರ್ಗತವಾಗಿರುವ ಪಿತೃ ಪ್ರಧಾನ ಧೋರಣೆ ಮತ್ತು ಮಹಿಳೆಯನ್ನು ಭೋಗವಸ್ತುವಿನಂತೆ ನೋಡುವ ಪುರುಷ ಸಮಾಜದ ಧೋರಣೆಯೂ ಅರ್ಥವಾಗಿರಬೇಕು.

ಕಾನೂನು ಅಪರಾಧವನ್ನು ತಡೆಗಟ್ಟುವ ಸಾಧನವಾಗಲಾರದು, ಅಪರಾಧ ಎಸಗುವವರಲ್ಲಿ ಭೀತಿ ಹುಟ್ಟಿಸಬಹುದಷ್ಟೆ. ಆದರೆ ಅಸಹಾಯಕ, ಅಮಾಯಕ ಮತ್ತು ದುರ್ಬಲ ಹೆಣ್ಣು ಮಕ್ಕಳ ಮೇಲೆ ದೌರ್ಜನ್ಯ ಅತ್ಯಾಚಾರ ನಡೆಸುವವರ ದೃಷ್ಟಿ ಕಾನೂನು ಪುಸ್ತಕದ ಮೇಲಿರುವುದಿಲ್ಲ, ಮಹಿಳೆಯ ಮೇಲಿರುತ್ತದೆ. ನಮಗೆ ಶಿಕ್ಷೆಯಾಗುವುದಿಲ್ಲ ಎನ್ನುವ ಭಂಡತನ ಬೆಳೆಸಲು ರಾಜಕೀಯ ನಾಯಕರು ವ್ಯವಸ್ಥಿತವಾಗಿ ಪ್ರಯತ್ನಿಸಿದ್ದಾರೆ. ತನಿಖೆ ನಡೆಸುವ ಪೊಲೀಸ್ ಇಲಾಖೆ ಭಂಡ ಅತ್ಯಾಚಾರಿಗಳಿಗೆ, ಭ್ರಷ್ಟ ನಾಯಕರಿಗೆ ಒತ್ತಾಸೆಯಾಗಿ ನಿಲ್ಲುತ್ತದೆ. “ಅವರು ಮೇಲ್ಜಾತಿಯವರು ಕೆಳಜಾತಿಯ ಮಹಿಳೆಯ ಅತ್ಯಾಚಾರ ಮಾಡಿರಲಾರರು” ಎಂಬ ಮಾತನ್ನು ನ್ಯಾಯಪೀಠದಲ್ಲಿ ಕೇಳಿರುವ ದೇಶ ನಮ್ಮದು.

ಜನಕವಿ ಸಾಹಿರ್ ಲುಧಿಯಾನ್ವಿ , ಫಿರ್ ಸುಬಹ್ ಹೋಗಿ ಚಿತ್ರದ ಹಾಡೊಂದರಲ್ಲಿ ” ಮಿಟ್ಟಿ ಕಾ ಭೀ ಹೈ ಕುಚ್ ಮೋಲ್ ಮಗರ್ ಇನ್ಸಾನ್ ಕಿ ಕೀಮತ್ ಕುಚ್ ಭೀ ನಹ್ಞೀ ” ಎಂದು ಹೇಳುತ್ತಾರೆ. ಆರು ದಶಕಗಳು ಕಳೆದರೂ ಭಾರತ ಬದಲಾಗಿಲ್ಲ. ಏಕೆಂದರೆ ಇಲ್ಲಿ ಮಾನವ ಜೀವಕ್ಕೆ ಅಸ್ಮಿತೆ ಇರುವಂತೆಯೇ ಸಾವಿಗೂ ಅಸ್ಮಿತೆಯಿದೆ, ಶವಗಳಿಗೂ ಅಸ್ಮಿತೆ ಇದೆ. ಅಪರಾಧವನ್ನು ನಿಗ್ರಹಿಸಲು ಕಾನೂನು, ಪೊಲೀಸ್, ನ್ಯಾಯ ವ್ಯವಸ್ಥೆ ಇದ್ದರೂ ಅಪರಾಧಿಯ ನಿಷ್ಕರ್ಷೆಯನ್ನು ಸಾಕಷ್ಟು ಸಂದರ್ಭಗಳಲ್ಲಿ ಸಮಾಜವೇ ಮಾಡುತ್ತದೆ.

ಸಮಾಜ ಎನ್ನುವುದು ಬಲಾಢ್ಯರ ಹಿಡಿತದಲ್ಲಿರುತ್ತದೆ. ಬಲಾಢ್ಯರನ್ನು ಸಮಾಜದ ಮೇಲ್ ಸ್ತರದ ಸಮುದಾಯ ಪ್ರತಿನಿಧಿಸುತ್ತದೆ. ಈ ಚಕ್ರವ್ಯೂಹಕ್ಕೆ ಅಮಾಯಕ ಮಹಿಳೆಯರು ಬಲಿಯಾಗುತ್ತಲೇ ಇದ್ದಾರೆ. ಮನೀಷಾ ವಾಲ್ಮೀಕಿ ಮತ್ತೊಂದು ಜೀವ. ಪ್ರತಿಯೊಂದು ಅತ್ಯಾಚಾರ ನಡೆದಾಗಲೂ ಕಠಿಣ ಕಾನೂನುಗಳನ್ನು ಉಲ್ಲೇಖಿಸುವ ಸರಕಾರಗಳಿಗೆ ಮನೀಷಾಳಂತಹ ಜೀವಗಳು ನಿಕೃಷ್ಟವಾಗಿ ಕಾಣುತ್ತವೆ. ಏಕೆಂದರೆ ಇದು ದೆಹಲಿ, ಕೊಲ್ಕತ್ತಾ, ಬೆಂಗಳೂರಿನಲ್ಲಿ ನಡೆದುದಲ್ಲ. ರಾಜಕೀಯವಾಗಿ ಲಾಭದಾಯಕವೂ ಅಲ್ಲ.

ಈಗಾಗಲೇ ಉತ್ತರ ಪ್ರದೇಶದ ಪೊಲೀಸರು ಮನೀಷಾ ಪ್ರಕರಣದಲ್ಲಿ ಸಾಕ್ಷ್ಯಾಧಾರಗಳಿಲ್ಲ ಎಂದು ನಿರೂಪಿಸಲು ರಂಗಸಜ್ಜಿಕೆ ಮಾಡಿರುತ್ತಾರೆ. ಆರೋಪಿಗಳ ಪರ ಮೇಲ್ಜಾತಿಯ ಬಲಾಢ್ಯರು ಸರಕಾರದ ಮೇಲೆ ಒತ್ತಡ ಹೇರಲಾರಂಭಿಸಿರುತ್ತಾರೆ. ಇನ್ನು ಕೆಲವೇ ದಿನಗಳಲ್ಲಿ ಮನೀಷಾ ಹತ್ತು ಜನರಲ್ಲೊಬ್ಬಳಾಗುತ್ತಾಳೆ.

ಊಳಿಗಮಾನ್ಯ ಧೋರಣೆ, ಮೇಲ್ಜಾತಿಯ ಪ್ರಾಬಲ್ಯ, ಬಲಪಂಥೀಯ ರಾಜಕಾರಣ, ಕೋಮು ದ್ವೇಷ, ಜಾತಿ ಶ್ರೇಷ್ಠತೆಯ ವ್ಯಸನ ಈ ಎಲ್ಲ ಅನಿಷ್ಟಗಳನ್ನೂ ವ್ಯವಸ್ಥಿತವಾಗಿ ಒಡಲಲ್ಲಿ ಕಾಪಿಟ್ಟುಕೊಂಡಿರುವ ಹಾಲಿ ಯೋಗಿ ರಾಜ್ಯದಲ್ಲಿ ಶೋಷಿತ ಸಮುದಾಯಗಳು ನಿರಂತರ ದೌರ್ಜನ್ಯ ಎದುರಿಸುತ್ತಲೇ ಇವೆ. ದಲಿತ ಸಮುದಾಯದ ಹೆಣ್ಣುಮಕ್ಕಳು ನಿರಂತರ ದೌರ್ಜನ್ಯ, ಅತ್ಯಾಚಾರಕ್ಕೊಳಗಾಗುತ್ತಲೇ ಇದ್ದಾರೆ. ನ್ಯಾಯಕ್ಕಾಗಿ ಹಂಬಲಿಸುತ್ತಲೇ ಇದ್ದಾರೆ. ನ್ಯಾಯ ಮರೀಚಿಕೆಯಾಗಿಯೇ ಇದೆ.

ಅಂತರ್ಜಾತಿ ವಿವಾಹ ಮೇಲ್ಜಾತಿಗಳ ಗೌರವಕ್ಕೆ ಧಕ್ಕೆ ಉಂಟು ಮಾಡುತ್ತದೆ , ಗೌರವ-ಮರ್ಯಾದಾ ಹತ್ಯೆಗಳು ನಡೆಯುತ್ತವೆ. ಆದರೆ ಮಹಿಳೆಯ ಮೇಲಿನ ಅತ್ಯಾಚಾರ ಸದಾ ಅಂತರ್ಜಾತಿಯೇ ಆಗಿರುತ್ತದೆ. ದಲಿತ ಹೆಣ್ಣುಮಕ್ಕಳ ಸ್ಪರ್ಶವನ್ನೇ ಪಾಪ ಎಂದು ಭಾವಿಸುವ ಮೇಲ್ಜಾತಿ ಪುರುಷರಿಗೆ , ದಲಿತ ಹೆಣ್ಣಿನ ಮೇಲೆ ಅತ್ಯಾಚಾರವೆಸಗುವುದು ಮಲಿನ ಎನಿಸುವುದಿಲ್ಲ. ಏಕೆಂದರೆ ಇಲ್ಲಿ ಜಾತಿ ವಿಷದೊಡನೆ ಪುರುಷ ಬಲದ ವಿಕೃತ ರಾಕ್ಷಸೀ ಪ್ರವೃತ್ತಿ ಸೇರಿರುತ್ತದೆ.

ವಿವಾಹ ಮಾಡಿಕೊಳ್ಳುವ ದಲಿತ ಹೆಣ್ಣೂ ಹತ್ಯೆಗೀಡಾಗುತ್ತಾಳೆ. ಅತ್ಯಾಚಾರಕ್ಕೊಳಗಾದವರೂ ಹತ್ಯೆಗೀಡಾಗುತ್ತಾರೆ. ಎರಡೂ ಸಂದರ್ಭಗಳಲ್ಲಿ ಪ್ರಥಮ ಅಪರಾಧಿಯಾಗಿ ವ್ಯಕ್ತಿ ಪಾರಾಗುತ್ತಾನೆ. ಮೂಲ ಅಪರಾಧಿಯಾಗಿ ಈ ವ್ಯವಸ್ಥೆ ಜಾಣ ಮೌನಕ್ಕೆ ಜಾರುತ್ತದೆ. ದಲ್ಲಾಳಿಯಾಗಿ ಸರಕಾರ ಧನ ಪರಿಹಾರ ನೀಡಿ ಪಾಪಪ್ರಜ್ಞೆಯನ್ನು ಕಳೆದುಕೊಳ್ಳುತ್ತದೆ.ಇದು73 ವರ್ಷಗಳ ಸ್ವತಂತ್ರ ಭಾರತದಲ್ಲಿ ನಾವು ನೋಡುತ್ತಿರುವ ದುರಂತ.

ಇದು ಒಂದು ರಾಜ್ಯದ ಪ್ರಶ್ನೆಯಲ್ಲ. ಒಂದು ಸಮುದಾಯದ ಪ್ರಶ್ನೆಯೂ ಅಲ್ಲ. ಇದು ಈ ದೇಶದ ಮಹಿಳೆಯರ ಸಮಸ್ಯೆ, ಹೆಣ್ತನದ ಘನತೆಯ ಸಮಸ್ಯೆ. ದಲಿತ ಮಹಿಳೆಯರ ಸಂದರ್ಭದಲ್ಲಿ ಜಾತಿ ವಿಷ ಸೇರಿಕೊಳ್ಳುತ್ತದೆ. ಈ ಹೆಣ್ತನದ ಘನತೆಯನ್ನು ಗೌರವಿಸುವ ಕನಿಷ್ಟ ಸೌಜನ್ಯವನ್ನೂ ನಮ್ಮ ಸಮಾಜ, ರಾಜಕಾರಣ ಕಳೆದುಕೊಂಡಿದೆ. ಕೇಂದ್ರದಲ್ಲಿ ಅಧಿಕಾರದಲ್ಲಿರುವ ರಾಷ್ಟ್ರೀಯ ರಾಜಕೀಯ ಪಕ್ಷದ ಪ್ರಧಾನ ಕಾರ್ಯದರ್ಶಿ ಅನುಪಮ್ ಹಜ್ರಾ ” ನನಗೆ ಕೊರೋನಾ ಸೋಂಕು ತಗುಲಿದರೆ ಮಮತಾ ಬ್ಯಾನರ್ಜಿಯನ್ನು ತಬ್ಬಿಕೊಂಡು ಅವರಿಗೆ ಸೋಂಕು ತಗುಲಿಸುತ್ತಿದ್ದೆ ” ಎಂದು ಬಹಿರಂಗ ಹೇಳಿಕೆ ನೀಡುತ್ತಾರೆ.

” ಮುಸ್ಲಿಂ ಮಹಿಳೆಯರ ಶವಗಳನ್ನು ಗೋರಿಯಿಂದ ಹೊರತೆಗೆದು ಅತ್ಯಾಚಾರ ಮಾಡಬೇಕು ” ಎಂದು ಹೇಳಿದ ಮತಾಂಧನ ವಿಕೃತಿಯನ್ನು ನಗುನಗುತ್ತಾ ಆಸ್ವಾದಿಸಿದ ಬಿಜೆಪಿ ಸಂಸದ ಅಜಯ್ ಬಿಷ್ಟ್ ಈಗ ಉತ್ತರ ಪ್ರದೇಶದ ಮುಖ್ಯಮಂತ್ರಿಯಾಗಲು ಹಂಬಲಿಸುತ್ತಿದ್ದಾರೆ. ಭಾರತೀಯ ಸಂಸ್ಕೃತಿಯ ವಾರಸುದಾರರು ದಿವ್ಯ ಮೌನ ವಹಿಸುತ್ತಾರೆ. ಪಕ್ಷ ಈ ರೀತಿಯ ಹೇಳಿಕೆಗಳನ್ನು ಖಂಡಿಸುವುದಿರಲಿ ಗಮನಿಸುವುದೂ ಇಲ್ಲ. ವಾಜಪೇಯಿ ಬದುಕಿದ್ದರೆ ಕನಿಷ್ಡ ಪಕ್ಷ ” ಐಸಾ ನಹ್ಞೀ ಬೋಲ್ನಾ ಥಾ ಏ ಠೀಕ್ ನಹ್ಞೀ ಹೈ ” ಎಂದು ಮುದ್ದುಮುದ್ದಾಗಿ ಹೇಳುತ್ತಿದ್ದರೇನೋ. ಈ ಮನೋಭಾವವೇ ಅತ್ಯಾಚಾರಿಗಳನ್ನು ನಿತ್ಯಾಚಾರಿಗಳನ್ನಾಗಿ ಮಾಡುತ್ತದೆ. ಮನೀಷಾಳಂತಹ ದುರ್ಬಲರು ಇಂತಹ ವಿಕೃತಿಗಳಿಗೆ ಬಲಿಯಾಗುತ್ತಾರೆ.

ಈ ವಿಕೃತಿಯ ಮೂಲ ನಮ್ಮ ಸಾಮಾಜಿಕ ಸಂರಚನೆಯ ಚೌಕಟ್ಟಿನಲ್ಲೇ ಇದೆ. ನಮ್ಮ ಸಮಾಜೋ ಸಾಂಸ್ಕೃತಿಕ ಬದುಕಿನ ಗರ್ಭದಲ್ಲೇ ಇದೆ. ಬಾವರಿದೇವಿಯಿಂದ ಮನೀಷಾಳವರೆಗೆ, ಮಥುರಾದಿಂದ ಇತ್ತೀಚಿನ ಹತ್ಸಾರ್ ಗ್ರಾಮದವರೆಗೆ ಈ ಗರ್ಭದಿಂದ ಜನಿಸಿದ ರಕ್ಕಸ ಸಂತಾನಕ್ಕೆ ಸಾವಿರಾರು ಹೆಣ್ಣು ಮಕ್ಕಳು ಬಲಿಯಾಗಿದ್ದಾರೆ. ಪುರುಷ ಪ್ರಧಾನ ಧೋರಣೆ ಮತ್ತು ಪುರುಷಾಧಿಪತ್ಯದ ಮೌಲ್ಯಗಳನ್ನು ಸಾಮಾಜಿಕ ಬದುಕಿನಿಂದ ತೊಡೆದುಹಾಕುವ ನಿಟ್ಟಿನಲ್ಲಿ ಆಡಳಿತ ವ್ಯವಸ್ಥೆ ಯಾವುದೇ ಶೈಕ್ಷಣಿಕ ಕ್ರಮಗಳನ್ನು ಕೈಗೊಂಡಿಲ್ಲ .

ಏಕೆಂದರೆ ಈ ಮೌಲ್ಯಗಳೇ ಅಧಿಕಾರ-ಅಧಿಪತ್ಯ ರಾಜಕಾರಣದ ಬುನಾದಿಯಾಗಿದೆ. ಈ ರಾಜಕಾರಣದಲ್ಲಿ ಮಹಿಳೆಯರಿಗೆ ಸಮಾನ ಸ್ಥಾನಮಾನಗಳನ್ನು ನೀಡಲೂ ಈ ಮೌಲ್ಯಗಳೇ ಅಡ್ಡಿಯಾಗುತ್ತಿವೆ. ಹೆಣ್ತನದ ಘನತೆಯನ್ನು ರಕ್ಷಿಸುವ ಹಾದಿಯಲ್ಲೂ ಈ ಮೌಲ್ಯಗಳೇ ತಡೆಗೋಡೆಗಳಾಗುತ್ತವೆ.

ಇದು ತಾತ್ವಿಕವಾಗಿ ಗಂಡು ಹೆಣ್ಣಿನ ಪ್ರಶ್ನೆಯಾದರೂ, ಮೂಲತಃ ಪುರುಷಾಧಿಪತ್ಯ ಮತ್ತು ಹೆಣ್ತನದ ನಡುವಿನ ಸಂಘರ್ಷವಾಗಿದೆ. ಹೆಣ್ತನ ಮತ್ತು ಹೆಣ್ತನದ ಗೌರವ ಸತತ ದಾಳಿಗೊಳಗಾಗುತ್ತಿದೆ. ಮೌಖಿಕ ಅತ್ಯಾಚಾರದಲ್ಲಿ ನಿಷ್ಣಾತರಾಗಿರುವ ರಾಜಕೀಯ ನಾಯಕರುಗಳ ಬೃಹತ್ ದಂಡು ನಮ್ಮ ಶಾಸನ ಸಭೆಗಳಲ್ಲಿದ್ದಾರೆ. ಇಂತಹ ವಿಕೃತ ಪಿಶಾಚಿಗಳನ್ನು ಬೆಂಬಲಿಸುವ ಮಹಿಳಾ ಸಮೂಹವೂ ನಮ್ಮ ನಡುವೆ ಇದೆ.

ಜಾತಿ ಅಸ್ಮಿತೆ, ಮತಧರ್ಮ ಶ್ರೇಷ್ಠತೆ, ಅಂತಸ್ತಿನ ಅಹಮಿಕೆ ಮತ್ತು ಸಾಂಸ್ಕೃತಿ ರಾಜಕಾರಣದ ಸನ್ನಿ ಭಾರತದ ಸುಶಿಕ್ಷಿತ, “ನಾಗರಿಕ” ಮತ್ತು “ಪ್ರಜ್ಞಾವಂತ” ಪ್ರಜೆಗಳನ್ನೂ ನಿರ್ಲಜ್ಜರನ್ನಾಗಿ ಮಾಡುತ್ತಿದೆ. ಹಾಗಾಗಿಯೇ ಮನೀಷಾ ಅನಾಥಳಂತೆ ಕಾಣುತ್ತಾಳೆ. ಮನೀಷಾಗೆ ಹಿಂದೂ ಹಣೆಪಟ್ಟಿ ಇಲ್ಲ ಅತ್ಯಾಚಾರಿಗಳಿಗೆ ಮುಸ್ಲಿಂ ಹಣೆಪಟ್ಟಿ ಇಲ್ಲ. ಹಾಗಾಗಿ ಸಾಂಸ್ಕೃತಿಕ ಆರಕ್ಷಕರು ನಿರಾಳವಾಗಿರುತ್ತಾರೆ. ಒಂದು ವೇಳೆ ಅತ್ಯಾಚಾರಿಗಳಲ್ಲಿ ರಾಮ್, ಲವ್ ಕುಶ್ ಬದಲು ಅಬ್ಬಾಸ್, ಹುಸೇನ್ ಇದ್ದಿದ್ದರೆ ವಿಷಯ ಸಂಸತ್ತಿನಲ್ಲಿ ಮೊಳಗುತ್ತಿತ್ತು ಇದು ಕಳೆದ ಮೂರು ದಶಕಗಳಲ್ಲಿ ಭಾರತ ಕಂಡುಕೊಂಡಿರುವ ” ಶವ ರಾಜಕಾರಣ “ದ ಪ್ರತಿಫಲ.

ತಮ್ಮ ಮೇಲೆ ನಡೆದ ದೌರ್ಜನ್ಯ, ಆಕ್ರಮಣ, ದಬ್ಬಾಳಿಕೆ ಮತ್ತು ಅತ್ಯಾಚಾರಗಳಿಗೆ ತಾವೇ ಸಾಕ್ಷ್ಯಾಧಾರಗಳನ್ನು ಒದಗಿಸಿ ನ್ಯಾಯ ಪಡೆಯಬೇಕಾದ ಪರಿಸ್ಥಿತಿಯಲ್ಲಿ ಈ ದೇಶದ ಶೇ ೫೦ ರಷ್ಟಿರುವ ಜನಸಮುದಾಯಗಳು ಬದುಕುತ್ತಿವೆ. ಮಹಿಳೆಯರು, ದಲಿತ ಮತ್ತು ಅಲ್ಪಸಂಖ್ಯಾತರು ಇದರ ಒಂದು ಭಾಗವಾಗಿದ್ದಾರೆ. ಮನೀಷಾ ಇಂತಹ ನತದೃಷ್ಟ ಸಂತ್ರಸ್ತರನ್ನು ಪ್ರತಿನಿಧಿಸುವ ಅಸಹಾಯಕ ಮಹಿಳೆಯಾಗಿದ್ದಾಳೆ.

ಈ ಪರಿಸ್ಥಿತಿಗೆ ಯಾರು ಕಾರಣ ? ಸಮಾಜ, ಸಂಸ್ಕೃತಿ, ರಾಜಕಾರಣ, ಪ್ರಭುತ್ವ, ನ್ಯಾಯಾಂಗ, ಸರಕಾರಗಳು, ಪುರುಷ ಸಮಾಜ , ಶಿಕ್ಷಣ ವ್ಯವಸ್ಥೆ ಓಹ್ ಯಾರತ್ತ ಬೆಟ್ಟು ತೋರುವುದು ? ಇದು ನಮ್ಮೆಲ್ಲರನ್ನೂ, ಅಂದರೆ ವಿವೇಕ, ಸೌಜನ್ಯ, ಸಂವೇದನೆ, ಸಭ್ಯತೆ, ಮನುಜ ಪ್ರಜ್ಞೆ, ಮಾನವೀಯತೆ ಇರುವ, ಎಲ್ಲರನ್ನೂ ಕಾಡಬೇಕಿರುವ ಪ್ರಶ್ನೆ. ಇದಾವುದೂ ಇಲ್ಲದವರು ಅಧಿಕಾರ ಪೀಠಗಳಲ್ಲಿರುವುದೇಕೆ ಎನ್ನುವುದು ಮತ್ತೊಂದು ಜಟಿಲ ಪ್ರಶ್ನೆ. ಮನೀಷಾ ಕೇಳ್ತಿದಾಳೆ. ಉತ್ತರ ಕೊಡಿ…..

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಅಂತರಂಗ

ಅಬ್ಬಬ್ಬಾ..! ಇದು ಭಾರತೀಯ ಸಾಹಿತ್ಯದಲ್ಲಿಯೇ ವಿಶಿಷ್ಟವಾದ ಕಾದಂಬರಿ

Published

on

  • ರವಿ ಕೃಷ್ಣ ರೆಡ್ಡಿ

ಹಿಂದೂ: ಬದುಕಿನ ಸಮೃದ್ಧ ಅಡಕಲು“. ಇದು ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ಮರಾಠಿ ಲೇಖಕ ಡಾ.ಭಾಲಚಂದ್ರ ನೇಮಾಡೆ’ಯವರ 600+ ಪುಟಗಳ ದೀರ್ಘ ಕಾದಂಬರಿ, ಉದ್ಗ್ರಂಥ. ಇದನ್ನು ಕನ್ನಡಕ್ಕೆ ಚಂದ್ರಕಾಂತ ಪೋಕಳೆ‘ಯವರು ಬಹಳ ಶ್ರಮ ಮತ್ತು ಆಸ್ಥೆ ವಹಿಸಿ ಭಾಷಾಂತರಿಸಿದ್ದಾರೆ. ನಾನು ಈಗ ಬಲವಂತದ ಕಡ್ಡಾಯ ಗೃಹಬಂಧನದಲ್ಲಿ ಇರುವುದರಿಂದಾಗಿ ಇದನ್ನು ಓದುವಂತಾಯಿತು. ಹಿಂದೊಮ್ಮೆ ಒಂದೆರಡು ಪುಟ ನೋಡಿ ಇದರ ಭಾಷಾ ವೈಖರಿ ಮತ್ತು ನಿರೂಪಣೆಯ ಕಾರಣಕ್ಕೆ ನನ್ನಿಂದಾಗದು ಎಂದು ಬದಿಗಿಟ್ಟುಬಿಟ್ಟಿದ್ದೆ.

ಆದರೆ ನಾಲ್ಕೈದು ದಿನದ ಹಿಂದೆ ಹಠ ಹಿಡಿದು ಕುಳಿತ ಮೇಲೆ ನಿಧಾನಕ್ಕೆ ರುಚಿಸುತ್ತಾ ಹೋಯಿತು. ಸರಿಯಾದ ಸೂತ್ರವಿಲ್ಲ. ಅಸ್ತವ್ಯಸ್ತ ನಿರೂಪಣೆ. ಎಲ್ಲಿಂದಲೋ ಎಲ್ಲೆಲ್ಲಿಗೋ. ಒಮ್ಮೊಮ್ಮೆ ಕಾಲದೇಶಗಳನ್ನು ಉಲ್ಲಂಘಿಸಿ ಸಾಗುತ್ತದೆ. (60ರ ದಶಕದ ಕಥೆಯಲ್ಲಿ ಕೆಲವೊಮ್ಮೆ 90ರ ದಶಕದ ವಿಚಾರಗಳು ನುಸುಳುತ್ತವೆ.) ಇದರಲ್ಲಿ ಬರುವ ಪಾತ್ರಗಳ ಸಂಖ್ಯೆ ಮಹಾಭಾರತದಲ್ಲಿಯ ಪಾತ್ರಗಳನ್ನೂ ಮೀರಿಸುತ್ತದೆ. ನೂರಾರು ಪಾತ್ರಗಳು ನಾಲ್ಕಾರು ಸಾಲಿಗೆ ಮುಗಿಯುತ್ತವೆ. ಏಳೆಂಟು ಪಾತ್ರಗಳು ಮಾತ್ರ ಒಂದಿಷ್ಟು ವಿಸ್ತಾರ ಪಡೆಯುತ್ತವೆ. ಆದರೆ ಯಾವ ಪಾತ್ರಗಳೂ ಅನುದ್ದಿಶ್ಯ ಎಂದೆನಿಸುವುದಿಲ್ಲ.

ಈ ಕಾದಂಬರಿಯನ್ನು ಅರ್ಧ ಓದಿದ್ದಾಗ ಇದೊಂದು ಹಳೆಯ ತುಂಡುಬಟ್ಟೆಗಳನ್ನು ಹಾಕಿ ಹೊಲಿದ ಕೌದಿಯಂತಿದೆ ಎನಿಸುತ್ತಿತ್ತು ನನಗೆ. ಜೊತೆಗೆ ಅಡಕಲು ಎನ್ನುವ ಪದದ ಅರ್ಥವೂ ಗೊತ್ತಿರಲಿಲ್ಲ. ಕೊನೆಗೆ ಇದರ ಮರಾಠಿ ಪದವನ್ನು ಹುಡುಕಿ ಅದನ್ನು ಗೂಗಲ್ ಭಾಷಾಂತರ ಮಾಡಿದಾಗ ಗೊತ್ತಾಗಿದ್ದು ಅದಕ್ಕೆ ಇಂಗ್ಲೀಷಿನ Junk ಅಥವಾ Llitter ಎನ್ನುವ ಅರ್ಥವಿದೆ ಎಂದು. ಕನ್ನಡದಲ್ಲಿ ಇದಕ್ಕೆ ಕಸಕಡ್ಡಿ, ಚಿಂದಿ, ತ್ಯಾಜ್ಯ, ನಿರುಪಯುಕ್ತ ಎನ್ನುವಂತಹ ಅರ್ಥ ಬರುತ್ತದೆ. ಈ ಪುಸ್ತಕದ ಟ್ಯಾಗ್‌ಲೈನ್’ನ ಇಂಗ್ಲೀಷ್ ಭಾಷಾಂತರ ಮಾತ್ರ ಬಹುಶಃ ಅದರ ಮರಾಠಿ ಭಾವಾರ್ಥಕ್ಕೆ ಹತ್ತಿರವಿದೆ; Rich Junk of Living. ಜೀವನದ ಸಮೃದ್ಧ ಕಸಕಡ್ಡಿ.

ಕೊನೆಗೆ ನನಗೆ ಅನ್ನಿಸಿದ್ದು, ಹಲವು ಶತಮಾನಗಳ ಹಲವು ತಲೆಮಾರುಗಳ ಹಲವು ಕುಟುಂಬಗಳ ಜನರು ಬಳಸಿದ ಬಟ್ಟೆಗಳಿಂದ ಒಂದೊಂದೇ ತುಂಡು ಅಥವಾ ಚಿಂದಿಯನ್ನು ತೆಗೆದುಕೊಂಡು ಅವೆಲ್ಲವುಗಳನ್ನು ಸೇರಿಸಿ ಹೊಲಿದ ಒಂದು ವಿಸ್ತಾರವಾದ ದಪ್ಪಪದರದ ಅಮೂರ್ತ ಚಿತ್ರವಿನ್ಯಾಸದ ಕೌದಿಯಂತೆ ಇದೆ ಈ ಕಾದಂಬರಿ ಎಂದು.

ಇಂದಿನ ಪಾಕಿಸ್ತಾನದ ಮೊಹೆಂಜದಾರೋದಲ್ಲಿ ಐವತ್ತುಅರವತ್ತರ ದಶಕದಲ್ಲಿ ನಡೆದ ಉತ್ಖನನದ ವಿವರಗಳಿಂದ ಆರಂಭವಾಗಿ ಕಳೆದ ಎರಡು ಮೂರು ಶತಮಾನಗಳ ಮಹಾರಾಷ್ಟ್ರದ ಖಾನ್ದೇಶ್ ಪ್ರದೇಶದ ಮೋರಗಾಂವ ಎಂಬ ದೊಡ್ಡ ಹಳ್ಳಿಯಲ್ಲಿಯ ಬದುಕುಗಳೊಂದಿಗೆ ಈ ಕಾದಂಬರಿ ಸುತ್ತಿಕೊಳ್ಳುತ್ತಾ, ತೆರೆದುಕೊಳ್ಳುತ್ತಾ, ಗೋಜಲಾಗುತ್ತಾ ಹೋಗುತ್ತದೆ.

19ನೇ ಶತಮಾನದ ಆರಂಭದಲ್ಲಿ ಬ್ರಿಟಿಷರ ವಿರುದ್ಧ ಮಿಕ್ಕೆಲ್ಲಾ ಮರಾಠ ಸಂಸ್ಥಾನಗಳು ಶರಣಾಗುತ್ತ ಹೋದಾಗ ಯಶವಂತರಾವ್ ಹೋಳ್ಕರ್ ಎಂಬ ಮರಾಠ ದೊರೆ ನಡೆಸುವ ಏಕಾಂಗಿ ಹೋರಾಟದ ದಿನಗಳಲ್ಲಿ ಈ ಭಾಗದ ಗ್ರಾಮೀಣ ಬದುಕು ಹೇಗಿತ್ತು ಎಂದು ನಿರೂಪಿಸುತ್ತಾ, ಆ ಸಮಯದಲ್ಲಿ ತಮ್ಮ ಹಿತವನ್ನು ರಕ್ಷಿಸಿಕೊಳ್ಳಲು ಆ ಭಾಗದ ರೈತಾಪಿ ಜನರು–ಅದರಲ್ಲಿಯೂ ಕಾದಂಬರಿಯ ನಾಯಕ ಖಂಡೇರಾವ್’ನ ಪೂರ್ವಿಕರು–ಯಾವೆಲ್ಲ ತಂತ್ರಗಳನ್ನು ಮಾಡಿದರು.

ತದನಂತರ ಸ್ವಾತಂತ್ರ್ಯ ಸಂಗ್ರಾಮದ ಸಂದರ್ಭದಲ್ಲಿ ಪಾಲ್ಗೊಂಡು ಹುತಾತ್ಮನಾಗುವ ಆತನ ಚಿಕ್ಕಪ್ಪನ ಒಂದಷ್ಟು ಕಥೆ, ಗಾಂಧೀಜಿ ಹತ್ಯೆಯ ಸಂದರ್ಭದಲ್ಲಿ ವಿವಿಧ ಮಹಾರಾಷ್ಟ್ರ ಸಮುದಾಯಗಳ ವರ್ತನೆ, ಮಳೆಯಾಶ್ರಿತ ಕೃಷಿಯಿಂದ ನೀರಾವರಿಗೆ ಹೊರಳುವ ರೈತ, ಅನಿಶ್ಚಿತ ಕೃಷಿಯಿಂದ ಬಿಡುಗಡೆಗೊಂಡು ಶಿಕ್ಷಣ ಮತ್ತು ನೌಕರಿಯ ಮೂಲಕ ನೆಮ್ಮದಿಯ ಜೀವನ ಕಂಡುಕೊಳ್ಳಲು ಗ್ರಾಮೀಣರು ಮಾಡುವ ಪ್ರಯತ್ನ, ಆ ಭಾಗದ ವಾರಕರಿ ಪಂಥದವರ ಸಂಪ್ರದಾಯಗಳು, ಕೂಡುಕುಟುಂಬದ ಲಾಭ-ನಷ್ಟಗಳು, ಅದರಲ್ಲಿಯ ಸಣ್ಣತನ ಕಿರಿಕಿರಿ ಅಸೂಯೆ ಮೋಸ ವಂಚನೆ ಔದಾರ್ಯ ತ್ಯಾಗ ವಿಘಟನೆ ಮುಂತಾದುವುಗಳ ಹಸಿಹಸಿ ಅನಾವರಣ ಇಲ್ಲಿದೆ.

ಸ್ವಾತಂತ್ರ್ಯೋತ್ತರ ಕಾಲದ ರಾಜಕಾರಣ, ಜಾತೀಯತೆ, ವಿಶ್ವವಿದ್ಯಾಲಯಗಳಲ್ಲಿ ನಡೆದ ಜಾತಿವಾದದ ಚರ್ಚೆ, ಕುಟಿಲತೆ, ವಿಶ್ವವಿದ್ಯಾಲಯದ ಶಿಕ್ಷಣ ದಕ್ಕಿಸಿಕೊಳ್ಳಲು ರೈತಾಪಿ ಯುವಕರು ಪಟ್ಟ ಪಡಿಪಾಟಲು, ಅಲ್ಪರು ಪ್ರಾಮಾಣಿಕರಿಗೆ ಮಾಡುವ ಅನ್ಯಾಯ, ಅಂತಹ ಸಂದರ್ಭದಲ್ಲಿಯೂ ವಿವಿಧ ಪ್ರದೇಶಗಳ ಅನ್ಯಜಾತಿಗಳ ವಿದ್ಯಾರ್ಥಿಗಳು ಕೂಡಿ ಕಲಿಯಬೇಕಾದ ಅನಿವಾರ್ಯತೆ ಸೃಷ್ಟಿಸಿದ ಮನೋವೈಶಾಲ್ಯತೆ, ಹೀಗೆ ಹಲವು ಸ್ತರಗಳಲ್ಲಿ ಕಾದಂಬರಿ ಸಾಗುತ್ತದೆ.

ಆರ್ಥಿಕವಾಗಿ ಒಂದಷ್ಟು ಸಬಲರಾದ ರೈತ ಕುಟುಂಬಗಳ ಮಹಿಳೆಯರು ತಮ್ಮ ಮನೆಯ ಹೆಣ್ಣುಮಕ್ಕಳನ್ನು ಯಾವುದೇ ಕಾರಣಕ್ಕೂ ರೈತಾಪಿ ಕೆಲಸ ಮಾಡುವ ಯುವಕರೊಂದಿಗೆ ಮದುವೆ ಮಾಡಿಸಕೂಡದು ಎಂದು ಗಟ್ಟಿಯಾಗಿ ನಿಲ್ಲುವುದು, ಆಸ್ಪತ್ರೆ ಹಾಗೂ ವೈದ್ಯರುಗಳು ಇಲ್ಲದಿದ್ದ ಸಮಯದಲ್ಲಿ ಗ್ರಾಮೀಣ ತಾಯಂದಿರು ತಮ್ಮ ರೋಗಪೀಡಿತ ಮಕ್ಕಳನ್ನು ಉಳಿಸಿಕೊಳ್ಳಲು ಮಾಡುತ್ತಿದ್ದ ಹರಸಾಹಸ, ಹಠ, ತ್ಯಾಗ; ಇಂತಹ ವಿಚಾರಗಳು ಇಲ್ಲಿ ಬಹಳ ಸೃಜನಶೀಲತೆಯಿಂದ ಹೇಳಲ್ಪಟ್ಟಿದೆ.

ಚರಿತ್ರೆಯ ಸಂಗತಿಗಳು ಬಂದಾಗ ಯಾವುದು ನಿಜವಾದದ್ದು, ಯಾವುದು ಕಾಲ್ಪನಿಕ, ದಂತಕಥೆ ಮತ್ತು ಊಹಾಪೋಹಗಳು ಯಾವುದು ಎಂಬೆಲ್ಲಾ ವಿಚಾರಗಳು ನಮ್ಮನ್ನು ಕಾಡುತ್ತವೆ. ಭೂಗೋಳ, ವಿಕಾಸವಾದ, ಪ್ರಾಗೈತಿಕ ಇತಿಹಾಸ, ಸಾಮಾಜಿಕ ಚರಿತ್ರೆ ಮುಂತಾದ ವಿಚಾರಗಳ ಬಗ್ಗೆ ಲೇಖಕರ ಅಪಾರ ಅಧ್ಯಯನ ಮತ್ತು ಜ್ಞಾನ ಕಾದಂಬರಿಯುದ್ದಕ್ಕೂ ನಮ್ಮನ್ನು ಬೆರಗುಗೊಳಿಸುತ್ತದೆ. ಕಳೆದ ಐದುಸಾವಿರ ವರ್ಷಗಳ ಭಾರತದ ಸಾಮಾಜಿಕ ಸಂರಚನೆ ರೂಪುಗೊಂಡ ಬಗೆಯನ್ನು ಅಲ್ಲಲ್ಲಿ ಅಮೂರ್ತವಾಗಿ ತಿಳಿಸಲು ಪ್ರಯತ್ನಿಸುತ್ತದೆ.

ಇನ್ನೂ ಅನೇಕ ವಿಚಾರಗಳನ್ನು ಈ ಕಾದಂಬರಿ ಹೇಳುತ್ತದೆಯಾದರೂ ನಾನು ಅವುಗಳನ್ನು ಇಲ್ಲಿ ವಿವರಿಸಲು ಹೋಗುವುದಿಲ್ಲ. ಅದು ಒಬ್ಬೊಬ್ಬರಿಗೆ ಒಂದೊಂದು ರೀತಿ ಕಾಣಿಸುತ್ತದೆ. ಮತ್ತು ಒಂದು ಓದಿಗೆ ಚೆನ್ನಾಗಿ ಅರ್ಥವಾಗುವುದೂ ಇಲ್ಲ.

ಭಾಲಚಂದ್ರ ನೇಮಾಡೆ’ಯವರು ಕಳೆದ ಅರ್ಧಶತಮಾನದ ಮರಾಠಿ ಸಾಹಿತ್ಯದ ಅತ್ಯಂತ ಪ್ರಭಾವಶಾಲಿ ಮತ್ತು ವಿವಾದಾತ್ಮಕ ಲೇಖಕರು ಎಂದು ಅವರ ಬಗೆಗಿನ ಕೆಲವೊಂದು ಓದು ತಿಳಿಸುತ್ತದೆ. ಇದು ಅವರ ಮಹತ್ವಾಕಾಂಕ್ಷಿ ಕೃತಿಯೂ ಹೌದು. ದೇಸಿವಾದ ಮತ್ತು ದೇಶಭಾಷೆಗಳ ಬಹುದೊಡ್ಡ ಪ್ರತಿಪಾದಕರವರು.

ಭಾರತವು ಬಹಳ ಪ್ರಾಚೀನವಾದ, ವಿಸ್ತಾರವಾದ, ಹಲವು ಸ್ಥಿತ್ಯಂತರಗಳನ್ನು ಕಂಡಂತಹ, ವಿಭಿನ್ನ ಸಂಪ್ರದಾಯ-ಸಂಸ್ಕೃತಿ-ಭಾಷಾ ವೈವಿಧ್ಯತೆಗಳನ್ನು ಹೊಂದಿದ್ದ, ಅಂತಹವು ಎಷ್ಟೋ ನಾಶವಾದ, ಮರುರೂಪಗೊಂಡ, ಹೊಸದನ್ನೇ ರೂಪಿಸಿಕೊಳ್ಳುತ್ತಿರುವ, ಅಲ್ಲಲ್ಲಿಯೇ ಕವಲೊಡೆದ ಸಹಸ್ರಾರು ಭಾಷೆ-ಸಂಸ್ಕೃತಿ-ಸಂಪ್ರದಾಯಗಳ ಬಹುದೊಡ್ಡ ಸಮಾಜ.

ಹಾಗಾಗಿ ಸಹಜವಾಗಿಯೇ ಇಲ್ಲಿ ಕಸವೂ ಇದೆ, ಅಮೂಲ್ಯವೂ ಇದೆ. ದಾರಿದ್ರ್ಯವೂ ಸಮೃದ್ಧವಾಗಿದೆ; ಸಮೃದ್ಧತೆಗೂ ದರಿದ್ರವಿಲ್ಲ. ಆಳದಲ್ಲಿ ಹಿಂಸೆಯೂ ಇದೆ, ಅಹಿಂಸೆಯೂ ಇದೆ. ಶೋಷಣೆಯೂ ಇದೆ, ಅದನ್ನು ಧಿಕ್ಕರಿಸುವ ಪ್ರತಿರೋಧವೂ ಅಂತರ್ಗತವಾಗಿದೆ. ಜ್ಞಾನವೂ ಇದೆ, ಅಜ್ಞಾನವೂ ಇದೆ. ಹೀಗೆ ಇದೊಂದು ವೈರುಧ್ಯಗಳ ಮಿಶ್ರಣ; ಭೂತದಲ್ಲಿ ಮತ್ತು ವರ್ತಮಾನದಲ್ಲಿಯೂ; ಬಹುಶಃ ಭವಿಷ್ಯದಲ್ಲಿಯೂ. ಇಂತಹ ವಿಚಾರಗಳನ್ನು ನಮಗೆ ತೋರಿಸುವ ಕನ್ನಡಿ “ಹಿಂದೂ” ಕಾದಂಬರಿ.

ಇದನ್ನು ಕನ್ನಡಕ್ಕೆ ಅನುವಾದಿಸಿರುವ ಚಂದ್ರಕಾಂತ ಪೋಕಳೆ’ಯವರಿಗೆ ವಿಶೇಷ ಧನ್ಯವಾದಗಳು.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಅಂತರಂಗ

ನಿಂತಾಗ ಬುಗುರಿಯ ಆಟ..!

Published

on

  • ಹಿರಿಯೂರು ಪ್ರಕಾಶ್

ಹೇ..ಸಾವೇ ನೀನೆಂತಹಾ ಕ್ರೂರಿ ! ನೀನು‌ ಕ್ರೂರ, ಘೋರ ಎನ್ನುವುದು ಗೊತ್ತಿತ್ತು. ಆದರೆ‌ ನೀನಿಂಥ ಸ್ವಾರ್ಥಪೂರಿತ ಕ್ರೂರಿಯೆನ್ನುವುದು , ಕಿಂಚಿತ್ತೂ ಕರುಣೆಯಿಲ್ಲದ ಮಾರಿಯೆನ್ನುವುದು ಗೊತ್ತಿರಲಿಲ್ಲ !. ಈ ಪ್ರಪಂಚದಲ್ಲಿ ಜನಿಸಿದ ಪ್ರತೀ ಜೀವಿಯೂ ಅಸುನೀಗಲೇ ಬೇಕು ನಿಜ. ಅದಕ್ಕೆ ಭೇಧ ಭಾವವಿಲ್ಲ.

ಆದರೆ ಈ ನಾಡಿನ ಸಂಗೀತಪ್ರಿಯರೆಲ್ಲರೂ ನಿರ್ವಿವಾದವಾಗಿ, ನಿರುಮ್ಮಳವಾಗಿ, ನಿಷ್ಕಲ್ಮಶವಾಗಿ , ನಿತ್ಯ ನಿರಂತರವಾಗಿ ಪ್ರೀತಿಸುತ್ತಿದ್ದ ಒಂದು ಅಮೂಲ್ಯ ಹಿರಿಯ ಜೀವವನ್ನು ಇನ್ನಷ್ಟು ಕಾಲ ಹೀಗೆ ಪ್ರೀತಿಸುವ ಹೃದಯಗಳ ಎದೆಚಿಪ್ಪಿನಲ್ಲಿ ಉಳಿಸುವ ಒಂದು ಔದಾರ್ಯತೆಯ ಧಾರಾಳತೆ ತೋರಬಹುದಿತ್ತು. ಆದರೆ ಈ ಜಗತ್ತಿನ ಎಲ್ಲಾ ಒಳ್ಳೆಯದನ್ನು, ಒಳ್ಳೆಯ ವ್ಯಕ್ತಿಗಳನ್ನು ಆತುರಾತುರವಾಗಿ‌ ನಿನ್ನಲ್ಲಿ ಲೀನವಾಗಿಸಿಕೊಳ್ಳುವ ನಿನ್ನ ನಿರಂತರ ಕೆಟ್ಟ ಬುದ್ದಿಗೆ ‌ಇಂದು ಗಾನಲೋಕದ ಗಾರುಡಿಗ, ಸ್ವರ ಸಾಮ್ರಾಟ, ಅಜಾತಶತ್ರು, ಕೋಟಿ ಕೋಟಿ ಸಂಗೀತಪ್ರಿಯರ ಮನಸುಗಳಲ್ಲಿ ಸ್ಥಿರವಾಗಿ ನೆಲೆಯೂರಿರುವ , ಭಾಷಾತೀತ, ಸೀಮಾತೀತ ಸಹೃದಯಿ, ಸ್ನೇಹಮಯೊ ಡಾ. ಎಸ್.ಪಿ. ಬಾಲಸುಬ್ರಹ್ಮಣ್ಯಂ ರವರನ್ನೂ ಬಲಿಯಾಗಿಸಿ ರುವುದು ಮಾತ್ರ ಕೋಟಿ ಕೋಟಿ ಸುಮಧುರ ಮನಸುಗಳ ಹೃದಯಕ್ಕೆ ಕೊಳ್ಳಿಯಿಟ್ಟಂತಾಗಿದೆ.

ಶುಕ್ರವಾರ ಮಧ್ಯಾಹ್ನ‌ ಬಂದೆರಗಿದ ಅರಗಿಸಿಕೊಳ್ಳಲಾಗದ‌ ಈ ಸುದ್ದಿ ಅವರನ್ನು ಮೆಚ್ಚುವವರ ಮನಸಿನಾಳದಲ್ಲಿದ್ದ ದುಃಖದ ಮಡುವನ್ನು‌ ಛಿದ್ರಗೊಳಿಸಿ ನೋವಿನಲೆಗಳ ತರಂಗಗಳು ಒತ್ತರಿಸಿ ಹೊರ ಬರುವಂತೆ ಮಾಡಿದೆ. ಹೃದಯಗಳು ಭಾರವೆನಿಸಿ ಕಣ್ಣುಗಳು ಕಂಬನಿಯ ಬಿಂದುಗಳಿಂದ ಅರಳುಗಟ್ಟಿ ಆರ್ದ್ರವಾಗುತ್ತಿವೆ. ಬಾಲುರವರ ನಿರ್ಗಮನದಿಂದ ಉಂಟಾಗಿರುವ ಸಂಗೀತಲೋಕದ ಶೂನ್ಯತೆಯನ್ನು ವರ್ಣಿಸಲು ಈ ಸಂಗೀತದ ನಿರಕ್ಷರಕುಕ್ಷಿಗೆ ಪದಗಳೇ ಹೊಳೆಯುತ್ತಿಲ್ಲ.

ಮನದ‌ ವೇದನೆಯನ್ನು ಅಕ್ಷರಗಳಲ್ಲಿ ಕಟ್ಟಿಕೊಡಲಾಗದಂತೆ ಭಾವನೆಗಳ ಜೊತೆಗೆ ಬೆರಳುಗಳೂ ಮುಷ್ಕರ ಹೂಡಿದಂತಿವೆ. ಹೀಗಾಗಿ ಜಗತ್ತಿನಲ್ಲಿ ಅತಿಯಾಗಿ ಸಂಭ್ರಮಿಸುವ ಘಟನೆಗಳಿಗೆ ಅಥವಾ ಅತಿಯಾಗಿ ದುಃಖಪಡುವ ಸನ್ನಿವೇಶಗಳಿಗೆ ತುತ್ತಾದಾಗ ಮನದಲ್ಲಿ ಉಲ್ಬಣಿಸುವ ಭಾವನೆಗಳಿಗೆ ಅಕ್ಷರರೂಪ ಕೊಡಲಾಗದೇ ಒದ್ದಾಡುತ್ತೇವೆ. ಅಂತಹಾ ವೇದನೆ ತುಂಬಿದ ಶೂನ್ಯತೆಯ ಭಾವದ ವಾತಾವರಣದಲ್ಲಿಂದು ಬಾಲುರವರನ್ನು ಕಳೆದುಕೊಂಡ ಕೋಟಿ ಕೋಟಿ ಸಂಗೀತ ಪ್ರೇಮಿಗಳು ತೊಳಲಾಡುತ್ತಿದ್ದಾರೆ.

ಕಳೆದ ತಿಂಗಳ ಐದನೇ ತಾರೀಖಿನಂದು ಕೋವಿಡ್ ಪಾಸಿಟೀವ್ ಬಂದಿರುವುದರಿಂದ ಆಸ್ಪತ್ರೆಗೆ ದಾಖಲಾಗುತ್ತಿದ್ದೇನೆಂದು, ತಮಗೆ ಕೇವಲ ಶೀತ ಮತ್ತು ಜ್ವರವಿರುವುದರಿಂದ ಆದಷ್ಟು ಶೀಘ್ರವಾಗಿ ಗುಣಮುಖರಾಗಿ ಬರುತ್ತೇನೆಂದು ಫೇಸ್ ಬುಕ್ ನಲ್ಲಿ ಅವರೇ ಹೇಳಿಕೊಂಡು‌ ಚೆನ್ನೈನ‌ ಎಮ್‌ಜಿ ಎಮ್ ಆಸ್ಪತ್ರೆಗೆ ದಾಖಲಾಗಿದ್ದರು. ಅವರು ಹಾಗೆ ಹೇಳುವಾಗ ಅವರ‌ ಮಾತುಗಳಲ್ಲಿ ಮತ್ತೇ ನಮ್ಮನ್ನೆಲ್ಲಾ ಕಾಣುವ ಅದಮ್ಯ ಆತ್ಮವಿಶ್ವಾಸವಿತ್ತು.

ತಾವು ಕೊರೊನಾಗೆ ತುತ್ತಾಗುವ ಮುನ್ನ ಕೊರೋನಾ ಪೀಡಿತರಿಗಾಗಿ ಒಂದೊಂದು ಹಾಡನ್ನು ಹಾಡುವ ಮೂಲಕ ಹಣ ಸಂಗ್ರಹಿಸಿ ಕೊಟ್ಟಿದ್ದ ಹೃದಯವಂತ. ಆಸ್ಪತ್ರೆಗೆ ಸೇರಿದ ಆರಂಭದಲ್ಲಿ ಅವರ ಸ್ಥಿತಿ ತೀರಾ ಬಿಗಡಾಯಿಸಿ ಅವರನ್ನು ICU ಗೆ ಶಿಫ಼್ಟ್ ಮಾಡಿ ಜೀವ ರಕ್ಷಕ ಉಪಕರಣಗಳನ್ನು ಅಳವಡಿಸಿದ್ದರು. ಅಂದಿನಿಂದಲೂ ಅವರ ಆರೋಗ್ಯದ ಕುರಿತಾದ ಅಭೂತಪೂರ್ವ ಕಾಳಜಿ ದೇಶದ ಎಲ್ಲೆಡೆಯಿಂದ ವ್ಯಕ್ತವಾಗಿ ಅವರು ಶೀಘ್ರವಾಗಿ ಗುಣಮುಖರಾಗಲೆಂದು ಲಕ್ಷಾಂತರ ಮಂದಿ ಪ್ರಾರ್ಥಿಸುತ್ತಲೇ ಬಂದಿದ್ದರು.

ಎಲ್ಲ ಸಹೃದಯರ ಪ್ರಾರ್ಥನೆ ಪಲಿಸಿತೋ ಎಂಬಂತೆ ಕಳೆದ ವಾರವಷ್ಟೇ ಬಾಲು ರವರ ಆರೋಗ್ಯದಲ್ಲಿ ಸುಧಾರಣೆ ಕಂಡುಬರುತ್ತಿದೆಯೆಂಬ ಸುದ್ದಿ ನೋಡಿ ಮನಸ್ಸು ಹಗುರವಾಗಿತ್ತು. ಅವರಿಗೆ ಕೊರೋನಾ ನೆಗೆಟೀವ್ ಎಂಬ‌ ಸುದ್ದಿ ನಮ್ಮೆಲ್ಲರ ಮನದಲ್ಲಿ ಮತ್ತಷ್ಟು ಸ್ಪಷ್ಟ ಭರವಸೆಯನ್ನೂ ಮೂಡಿಸಿ ಕೋಟ್ಯಾಂತರ ಅಭಿಮಾನಿಗಳ ಪ್ರಾರ್ಥನೆಯನ್ನು ಭಗವಂತ ಈಡೇರಿಸಿಬಿಟ್ಟ ಎಂಬ‌ ತೃಪ್ತಿಯ ಸೆಲೆಯಲ್ಲೇ ಇದ್ದವರಿಗೆ ಇಂದು ಅವರಿಲ್ಲ ಎಂಬ ಕೆಟ್ಟ ಸುದ್ದಿ ಅರಗಿಸಿಕೊಳ್ಳಲು ಕಷ್ಟವಾಗುತ್ತಿರುವುದಷ್ಟೇ ಅಲ್ಲ, ಅದರಿಂದ ಹೊರಬರಲಿಕ್ಕೂ ಆಗುತ್ತಿಲ್ಲ..!

ಹೌದು… ಈ‌ ವ್ಯಕ್ತಿಯನ್ನು ಜನ ಯಾಕಿಷ್ಟು ಅನ್ ಕಂಡೀಷನಲ್ ಆಗಿ ಪ್ರೀತಿಸುತ್ತಾರೆ ? ತನ್ನ ಬಗೆಗೆ ಒಂದಿನಿತೂ ಅಪಸ್ವರ ಕೇಳದ ಹಾಗೆ ಬಾಳಿ ಬದುಕಿದ ಅವರ ಯಶಸ್ಸಿನ ಗುಟ್ಟಾದರೂ ಏನು ? ಹುಟ್ಟಿದ್ದು ಆಂಧ್ರದ ಚಿತ್ತೂರು, ಮಾತೃಭಾಷೆ ತೆಲುಗಾದರೂ ಭಾಷಾತೀತವಾಗಿ ಇವರ ಸ್ವರ ಮಾಂತ್ರಿಕತೆಯ‌ ಮೋಡಿಗೆ , ಅವರ ವ್ಯಕ್ತಿತ್ವದ ಸಮ್ಮೋಹನಕ್ಕೆ ಕೋಟ್ಯಾಂತರ ಮಂದಿ ಒಳಗಾಗಬೇಕಾದರೆ ಅದೆಂತಹಾ ದಿವ್ಯ ತಪಸ್ಸಿನ ಫಲ ಇವರದು ?

ತಾನು ಹುಟ್ಟಿದ್ದು ತೆಲುಗು ನೆಲದಲ್ಲಾದರೂ ತನಗೆ ಅನ್ನ‌ ನೀಡಿ ” ಕೈ ಹಿಡಿದವರು ಕೈ ಬಿಡದವರು ಕನ್ನಡಿಗರು ” ಎಂದು ಕರುನಾಡನ್ನು ಕನ್ನಡಿಗರನ್ನು ಸದಾ ಎದೆ ತುಂಬುವಂತೆ ಹಾಡಿ ಹೊಗಳಿ ರಂಜಿಸುತ್ತಿದ್ದ ಇವರನ್ನು ಕನ್ನಡಿಗರಲ್ಲ ಎನ್ನಲು ಸಾಧ್ಯವೇ ? ದಕ್ಷಿಣ ಭಾರತದ ಅನೇಕ ಹೀರೋಗಳ ಶರೀರಕ್ಕೆ ಎಸ್.ಪಿ.ಯವರ ಶಾರೀರವೇ ಬೇಕು ! ಅವರಿಲ್ಲದೇ ನಟನೆಯೇ ಇಲ್ಲವೆಂದ ಅನೇಕ ಹೀರೋಗಳೂ ಇದ್ದರು.

ತಾನು ದೇಶವೇ ಮೆಚ್ಚುವ ಪ್ರಸಿದ್ಧಿಯಾದ ಗಾಯಕನಾದರೂ , ಹತ್ತಿರ ಹತ್ತಿರ ಅರ್ಧ ಲಕ್ಷದಷ್ಟು ಹಾಡುಗಳನ್ನು ಎಲ್ಲಾ ಭಾಷೆಗಳಲ್ಲಿ ಹಾಡಿದ್ದ ಸಂಗೀತ ಲೋಕದ ನಿಬ್ಬೆರಗಿನ ಪ್ರತಿಭೆಯ ಕಣಜವಾದರೂ ತಾನು ಶಾಸ್ತ್ರೀಯವಾಗಿ ಸಂಗೀತವನ್ನು ಅಭ್ಯಾಸ ಮಾಡಿಲ್ಲವೆಂದು ವಿನಯಪೂರ್ವಕವಾಗಿಯೇ ಎಲ್ಲರೆದುರು ಒಪ್ಪಿಕೊಳ್ಳುತ್ತಿದ್ದ ಇವರ ಹೃದಯ ವೈಶಾಲ್ಯತೆ ಯಾರಿಗಿರಲು ಸಾಧ್ಯ ?

1979 ರಲ್ಲಿ ಎಸ್ ಪಿ.ಬಿ ಯವರಿಗೆ ಬಾರಿಗೆ ಸಂಗೀತಮಯ ಶಂಕರಾಭರಣಂ ತೆಲುಗು ಚಿತ್ರಕ್ಕಾಗಿ ಮೊಟ್ಟಮೊದಲ ರಾಷ್ಟ್ರ ಪ್ರಶಸ್ತಿ ಬಂದಾಗ ” ತನಗೆ ಕರ್ನಾಟಕ ಸಂಗೀತದ ಬಗ್ಗೆ ಏನೂ ಗೊತ್ತಿಲ್ಲವೆಂದೇ ಮುಕ್ತವಾಗಿ ಹೇಳಿದ್ದರು.

ನಂತರ 1981 ರಲ್ಲಿ ಹಿಂದಿಯ ” ಏಕ್ ದೂಜೆಕೆ ಲಿಯೇ” ಚಿತ್ರಕ್ಕಾಗಿ ಎರಡನೇ ಬಾರಿಗೆ ರಾಷ್ಟ್ರ ಪ್ರಶಸ್ತಿ ಬಂದಾಗ ” ತನಗೆ ಹಿಂದಿ ಭಾಷೆ ಬರುವುದಿಲ್ಲ ಎಂದೇ ವಿನಯ ಹಾಗೂ ಸರಳತೆಯನ್ನು‌ ಮೆರೆದಿದ್ದರು. ಈ ಮಾತುಗಳಲ್ಲಿ ಅವರ ವಿನಯ‌, ವಿಧೇಯತೆಯನ್ನು ಗುರುತಿಸಬಹುದಾಗಿತ್ತು.

ಬಾಲುರವರು ಚಿಕ್ಕ ಮಕ್ಕಳೊಂದಿಗೆ ತಾನೂ ಮಗುವಾಗಿ, ಹೊಸ ಗಾಯಕರ ಪ್ರತಿಭೆಗಳಿಗೆ ಸಾಣೆ ಹಿಡಿಯುವ ಗುರುವಾಗಿ, ವಾದ್ಯವೃಂದದ ನೆಚ್ಚಿನ ಗಾಯಕನಾಗಿ, ಸಹ ಗಾಯಕ ಗಾಯಕಿಯರಿಗೆ ಸ್ಪೂರ್ತಿಯ ಚಿಲುಮೆಯಾಗಿ, ತನ್ನ ಮಕ್ಕಳ ವಯಸ್ಸಿನ ಗಾಯಕರೂ ನಾಚುವಂತಹಾ ಸಿರಿಕಂಠವನ್ನು ಹೊಂದಿ, ಹಿರಿಯರಲ್ಲಿ ಗೌರವ , ಕಿರಿಯರಲ್ಲಿ ಸ್ನೇಹ ಪ್ರೀತಿ ತೋರುತ್ತಿದ್ದ ಸಹೃದಯಿಯಾಗಿ, ಕುಟುಂಬದ ಕಣ್ಮಣಿಯಾಗಿ, ಗುರುವಾಗಿ, ಮಾರ್ಗದರ್ಶಿಯಾಗಿ, ಹಿತೈಷಿಯಾಗಿ, ಸಭ್ಯ ನಾಗರಿಕನಾಗಿ, ಮಾನವೀಯ ಅಂತಃಕರಣ ವುಳ್ಳ ವ್ಯಕ್ತಿಯಾಗಿ, ಸಂಗೀತ ಜ್ಞಾನವಿಲ್ಲದ ನನ್ನಂತಹ ಲಕ್ಷಾಂತರ ಮಂದಿಗೂ ಸಂಗೀತದ ಬಗೆಗೆ ಒಲವು, ಭಾವುಕತೆ ಮೂಡಿಸಿ, ಇಡೀ ಸಂಗೀತ ಬದುಕಿನ ” ಸರಿಗಮಪದನಿಸ” ವನ್ನೇ ರಾಗ ತಾಳ ಪಲ್ಲವಿಯ ಕ್ರಮಬದ್ದತೆಯಿಂದ ಹಾಗೂ ನಾದ ಲಯಗಳ ಲಾಸ್ಯದಿಂದ ಶ್ರುತಿ ಬದ್ಧವಾಗಿ ನುಡಿಸಿ, ನಮಿಸಿ, ಮೆರೆಸಿ- ಹರಸಿದ್ದು ಸಾಮಾನ್ಯವಲ್ಲ.! ಇದು ಸಾಧಾರಣ ವ್ಯಕ್ತಿಯ ಪರಿಧಿಗೆ ನಿಲುಕುವಂತಹದ್ದಲ್ಲ.

ಪ್ರಪಂಚದ ಶ್ರೇಷ್ಠ ಗಾಯಕರಲ್ಲೊಬ್ಬರಾದ
” ಶ್ರೀಪತಿ ಪಂಡಿತಾರಾಧ್ಯುಲ ಬಾಲಸುಬ್ರಹ್ಮಣ್ಯಂ “….. ನಮ್ಮ ನಿಮ್ಮೆಲ್ಲರ ನೆಚ್ಚಿನ SPB, ಅಥವಾ ಪ್ರೀತಿಯ ಬಾಲು ಸರ್ ರವರ ಸಾಧನೆ‌ ಕುರಿತುಬರೆಯಲು ಹೊರಟರೆ ಅದೇ ಒಂದು ಗ್ರಂಥದಂತೆ !

ಅವರು ಹುಟ್ಟಿದ್ದು 04.06.1946 ರಲ್ಲಿ . 74 ವರ್ಷದ ಬದುಕಿನಲ್ಲಿ ಅವರು ಹಾಡಲು ಶುರು ಮಾಡಿದ್ದು ತಮ್ಮ ಇಪ್ಪತ್ತನೆಯ ವಯಸ್ಸಿನಲ್ಲಿ ! ಬಹುಭಾಷಾ ಗಾಯಕ , 40000 ಕ್ಕೂ ಹೆಚ್ಚು ಹಾಡುಗಳ ಒಡೆಯ ! ಅತಿ ಹೆಚ್ಚು ಸಂಗೀತ ನಿರ್ದೇಶಕರೊಡನೆ ಕೆಲಸ ಮಾಡಿದ ದಾಖಲೆ ! ಪದ್ಮಶ್ರೀ- ಪದ್ಮ ವಿಭೂಷಣ, ಸೇರಿದಂತೆ ಅತಿ ಹೆಚ್ಚು ಪ್ರಶಸ್ತಿಗಳನ್ನು ಪಡೆದ ಏಕೈಕ ಗಾಯಕ ! ಒಂದೇ ದಿನದಲ್ಲಿ ಇಪ್ಪತ್ತೊಂದು ಗೀತೆಗಳನ್ನು ಹಾಡಿ ರೆಕಾರ್ಡ್ ಮಾಡಿದ ಗಾನ ಗಾರುಡಿಗ ! ಇಪ್ಪತ್ತೈದಕ್ಕೂ ಹೆಚ್ಚು ಬಾರಿ ಆಂಧ್ರದ ನಂದಿ ಅವಾರ್ಡ್ ಪಡೆದ ಏಕೈಕ ಗಾನ ದಿಗ್ಗಜ.

ಕರ್ನಾಟಕ ಶಾಸ್ತ್ರೀಯ, ಹಿಂದುಸ್ತಾನಿ, ಘಜ಼ಲ್,ಪಾಶ್ಚಾತ್ಯ, ಮೆಲೋಡಿ, ಅಬ್ಬರದ ಸ್ಥಾಯಿಯ ಹಾಡುಗಳು, ಬೇರೆ ಬೇರೇ ನಟರಿಗೆ ಅವರ ಧ್ವನಿಗನುಸಾರವಾಗಿ ಹಾಡುವ ಅಪರೂಪದ Voice Modulation , ಕೇವಲ ಗಾಯನವಲ್ಲದೇ ಅಭಿನಯ, ಸಂಗೀತ ನಿರ್ದೇಶನ, ವಾಯ್ಸ್ ಡಬ್ಬಿಂಗ್, ಚಿತ್ರ ನಿರ್ಮಾಣ, ನಿರ್ದೇಶನ, ಅನೇಕ ರಿಯಾಲಿಟಿ ಷೋ ಗಳಿಗೆ ತೀರ್ಪುಗಾರ, ಗಿನ್ನೆಸ್ ದಾಖಲೆ ನಿರ್ಮಿಸಿದ ಏಕೈಕ ಗಾಯಕ…….. ಮುಖ್ಯವಾಗಿ ಸಮಾಜಮುಖಿ ಚಿಂತಕ….. ಹೀಗೆ ಅವರ ಬಗ್ಗೆ ಹೇಳಲು ಹೊರಟರೆ ಅದಕ್ಕೆ ಆದಿ- ಅಂತ್ಯವೆಂಬುದೇ ಇರುವುದಿಲ್ಲ..!

ಇಂತಹಾ ಒಬ್ಬ ಸಂಗೀತ ಕ್ಷೇತ್ರದ ಯುಗಪುರುಷನ ಗಾಯನವನ್ನೂ ಮೀರಿದ ದೊಡ್ಡತನವೆಂದರೆ ಅದು ಅವರಲ್ಲಿನ ಸಂಸ್ಕಾರ, ಸರಳತೆ, ಸದ್ಗುಣ, ವಿಧೇಯತೆಗಳ ಅದ್ಭುತವಾದ ಮೇರು ವ್ಯಕ್ತಿತ್ವ…. ಎಲ್ಲಕ್ಕಿಂತ ಮುಖ್ಯವಾಗಿ ಕನ್ನಡದ ಮೇಲಿನ ಅವರ ಅತೀವ ಪ್ರೇಮ ಹಾಗೂ ಕನ್ನಡಿಗರ ಬಗೆಗಿನ ಅವರ ಸಾಟಿಯಿಲ್ಲದ ನಿಷ್ಕಲ್ಮಶವಾದ ಪ್ರೀತಿ. ಬಾಲು ಸಾರ್ ಹಿಮಾಲಯದೆತ್ತರದಷ್ಟು ಮೇರು ಪ್ರತಿಭೆಯಾದರೂ ಅವರದು ” ನನಗೇನೂ ಗೊತ್ತಿಲ್ಲ, ನಾನೇನೂ ಕಲಿತಿಲ್ಲ” ಎಂಬ ವಿನೀತ ಭಾವ.

ಅವರ ಇಳಿ ವಯಸ್ಸಿನಲ್ಲೂ ಅವರ ಕಂಚಿನ ಕಂಠದ ಶಕ್ತಿ, ಮುಕ್ಕಾಗದ ಮಾಧುರ್ಯ, ಶ್ರುತಿ ತಪ್ಪದ ಶಾರೀರ, ಶಾರೀರದಂತೆಯೇ ಆಕರ್ಷಕ ಶರೀರ , ಇನ್ನೂ ಇಪ್ಪತ್ತರ ಅವರ ಬತ್ತದ , ಬಾಡದ ಉತ್ಸಾಹ. ಇವೆಲ್ಲವೂ ಎಸ್.ಪಿ.ಬಿ ಯವರನ್ನು ಸಂಗೀತಲೋಕದ ದೇವರಂತೆಯೇ ಭಾಸವಾಗುವಂತೆ ಮಾಡುತ್ತಿದ್ದವು !! ಒಂದೇ ಮಾತಿನಲ್ಲಿ ಹೇಳುವುದಾದರೆ ಬಾಲು ಸರ್, ಸಂಗೀತ ಸರಸ್ವತಿಯ ವರಪುತ್ರ ! ಇಂತಹಾ ಗಾನ ಸಾಮ್ರಾಟನ ಅವಸಾನ ಸಂಗೀತ ಲೋಕಕ್ಕೆ ನಿಜಾರ್ಥದ ಭರಿಸಲಾಗದ ನಷ್ಟ !

ಮರೆಯುವ ಮುನ್ನ

ಬಾಲು ರವರಿಗಿಂತ ಒಳ್ಳೆಯ ಸಂಗೀತಗಾರ, ಹಿನ್ನಲೆ ಗಾಯಕ ನಮ್ಮ ನಡುವೆ ಇದ್ದಿರಬಹುದೇನೋ ಗೊತ್ತಿಲ್ಲ ! ಆದರೆ ಅವರಂತಹ ಸರಳ, ಸದ್ವೀನೀತ,ಸದ್ಗುಣ ಸಂಪನ್ನ, ಸಜ್ಜನ, ಸಂಯಮಿ, ಸಂಗೀತ ಸಾಕಾರ ಮೂರ್ತಿ, ಸಾತ್ವಿಕ. ಮತ್ತೊಬ್ಬರಿರಲು ಖಂಡಿತಾ ಸಾಧ್ಯವಿಲ್ಲವೆಂದರೆ ಅದು ಅತಿಶಯವಲ್ಲ. ಎಸ್.ಪಿ.ಬಿ ಯವರ ಸಂಗೀತ ಬದುಕಿನ ಬಣ್ಣದ ಬುಗುರಿಯ ಆಟ ಇಂದು ನಿಂತಿದೆ. ಆದರೆ ನೆನಪಿರಲಿ , ಇದು ಕೇವಲ ಭೌತಿಕವಾಗಿ ನಿಂತ ಆಟವಷ್ಟೇ !

ತಮ್ಮ ಅಪೂರ್ವವಾದ ಸ್ವರ ಸಂಪತ್ತಿನಿಂದ , ಆಕರ್ಷಕ ವ್ಯಕ್ತಿತ್ವದಿಂದ, ಎಲ್ಲರಲ್ಲೂ ಒಳ್ಳೆಯದನ್ನೇ ಕಾಣುತ್ತಿದ್ದ ಅವರ ಸಹೃದಯ ಸವಿ ಸ್ನೇಹದ ಸಿಂಚನದಿಂದ, ಸಂಗೀತಲೋಕಕ್ಕೆ ನೀಡಿದ ಬೆಲೆಕಟ್ಟಲಾಗದ ಕೊಡುಗೆಯಿಂದ ,ಎಲ್ಲಕ್ಕಿಂತ ಹೆಚ್ಚಾಗಿ ಜನ್ಮ ಜನ್ಮಗಳು ಅಳಿದರೂ ಕಳೆದರೂ ಸದಾ ಉಳಿಯುವಂತಹಾ ಹಾಡುಗಳನ್ನು ಎಲ್ಲಾ ಭಾಷೆಯಲ್ಲೂ ಕಟ್ಟಿಕೊಟ್ಟ ಅಸಾಧಾರಣ ಸೇವೆಯಿಂದ , ಡಾ.ಎಸ್.ಪಿ.ಬಾಲಸುಬ್ರಹ್ಮಣ್ಯಂ ಎಂಬ ಧೀಮಂತ ವ್ಯಕ್ತಿ, ಸಂಗೀತ ಲೋಕದ ಶಕ್ತಿ ನಮ್ಮೆಲ್ಲರ ಹೃನ್ಮನಗಳಲ್ಲಿ ಸದಾ ಅಮರರಾಗಿಯೇ ಇರುತ್ತಾರೆ.

ಹೇ….ವಿಧಿಯೇ… ಬಾಲುವಿನ ದೇಹವನ್ನು ಮಾತ್ರ ನೀನು ಮಣ್ಣಾಗಿಸಬಹುದು, ಕಣ್ಮರೆಯಾಗಿಸಬಹುದು..! ಆದರೆ ಅವರ ಕಂಚಿನ ಕಂಠದಿಂದ ಹೊರಬಂದ ಸಾವಿರ ಸಾವಿರ ಹಾಡುಗಳನ್ನಾಗಲೀ ಅವರ ವ್ಯಕ್ತಿತ್ವವನಾಗಲೀ ಅಥವಾ ಅವರನ್ನು ತಮ್ಮ ಉಸಿರಿರುವತನಕವೂ ಪ್ರೀತಿಸುವ, ಆರಾಧಿಸುವ, ಮೆಚ್ಚುವ ಕೋಟಿ ಕೋಟಿ ಸಂಗೀತ ಪ್ರೇಮಿಗಳ ಹೃದಯದಲ್ಲಿ ಹುದುಗಿರುವ ಅವರ ಬಗೆಗಿನ ಪ್ರೀತ್ಯಾಭಿಮಾನದ, ಎಂದೂ ಬಾಡದ ಭಾವನೆಗಳನ್ನು ಮಣ್ಣಾಗಿಸಲಿಕ್ಕೆ.

ನಿನಗೆ ಸಾಧ್ಯವೇ..? ನೆವರ್….!

ಹೋಗಿ ಬನ್ನಿ ಬಾಲು ಸಾರ್ ! ಮರುಜನ್ಮದಲ್ಲಿ ಕನ್ನಡ ಮಣ್ಣಿನಲ್ಲಿಯೇ ಹುಟ್ಟಬೇಕೆನ್ನುವ ನಿಮ್ಮ ಅದಮ್ಯ ಆಸೆಗೆ ಆರುಕೋಟಿ ಕನ್ನಡಿಗರ ಒತ್ತಾಸೆಯಿದೆ, ಪ್ರಾರ್ಥನೆಯಿದೆ ಹಾಗೂ ಸಹೃದಯರ ಮನದಾಳದ ಆಲಾಪನೆಯ ಆರಾಧನೆಯಿದೆ.

ಅಕ್ಷರಗಳ ಅಶ್ರುತರ್ಪಣದೊಂದಿಗೆ..

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading
Advertisement

Title

ಅಂತರಂಗ47 mins ago

ಮತ್ತೊಂದು ಜೀವ ಮತ್ತದೇ ಬೇಸರ ಇನ್ನೆಷ್ಟು ದಿನ

 ನಾ ದಿವಾಕರ ಉತ್ತರ ಪ್ರದೇಶ ಭಾರತದ ಅತ್ಯಾಚಾರ ಪ್ರದೇಶ ಆಗಿದೆ. ಯೋಗಿಯ ರಾಮರಾಜ್ಯದಲ್ಲಿ ಸೀತೆಯರಿಗೆ ರಕ್ಷಣೆಯಿಲ್ಲದಂತಾಗಿದೆ. ಈಗ ಮತ್ತೋರ್ವ ಯುವತಿ ಮನೀಷಾ ವಾಲ್ಮೀಕಿ ಅತ್ಯಾಚಾರಕ್ಕೊಳಗಾಗಿ ಹತ್ಯೆಗೀಡಾಗಿದ್ದಾಳೆ. ದಲಿತ...

ದಿನದ ಸುದ್ದಿ9 hours ago

ಮನಿಷಾ ಅತ್ಯಚಾರ-ಕೊಲೆ : ಆದಿತ್ಯನಾಥನ ಸರ್ಕಾರದಲ್ಲಿ ಹೆಚ್ಚುತ್ತಿವೆ ಅಪರಾಧಗಳು

ಸುದ್ದಿದಿನ ಡೆಸ್ಕ್ : ಉತ್ತರ ಪ್ರದೇಶದ ಹತ್ರಾಸ್ ನಗರದಲ್ಲಿ 19 ವರ್ಷದ ಮನಿಷಾ ವಾಲ್ಮೀಕಿ ಎಂಬ ಯುವತಿಯ ಮೇಲೆ ನಾಲ್ಕು ಮಂದಿ ಸವರ್ಣೀಯ ಯುವಕರಿಂದ ಅತ್ಯಾಚಾರಕ್ಕೊಳಗಾಗಿದ್ದ ಆಕೆ...

ದಿನದ ಸುದ್ದಿ19 hours ago

ಕೊರೋನ ಕಾಲದಲ್ಲಿ ಹೃದಯವನ್ನು ಕಾಪಾಡಿ..!

ಶ್ರೀನಿವಾಸ ಕಕ್ಕಿಲಾಯ ಕೊರೋನ ಸೋಂಕಿನ ನೆಪದಲ್ಲಿ ಆಗಿರುವ ಸಮಸ್ಯೆಗಳಿಗೆ ಲೆಕ್ಕವಿಲ್ಲ. ಕೊರೋನ ಸೋಂಕಿಗೆ ಹೊರತಾದ ಇತರ ಸಮಸ್ಯೆಗಳನ್ನು ಹೊಂದಿರುವವರಿಗೆ, ಅದರಲ್ಲೂ, ಹೃದ್ರೋಗ, ಪಾರ್ಶ್ವವಾಯು, ಕ್ಯಾನ್ಸರ್ ಆದವರಿಗೆ, ತುರ್ತು...

ದಿನದ ಸುದ್ದಿ20 hours ago

ಪವರ್ ಟಿವಿ ಪ್ರಸಾರ ಸ್ಥಗಿತ : ರಾಜ್ಯ ಸರ್ಕಾರದ ವಿರುದ್ಧ ದಾವಣಗೆರೆ ಕಾರ್ಯನಿರತ ಪತ್ರಕರ್ತರ ಸಂಘ ಆಕ್ರೋಶ

ಸುದ್ದಿದಿನ,ದಾವಣಗೆರೆ : ಪವರ್ ಟಿವಿ ಮೇಲೆ ದಬ್ಬಾಳಿಕೆ ಹಿನ್ನಲೆ ದಾವಣಗೆರೆಯಲ್ಲಿ ಕಾರ್ಯನಿರತ ಪತ್ರಕರ್ತರ ಸಂಘದಿಂದ ಪ್ರತಿಭಟನೆ ನಡೆಸಲಾಯಿತು. ನಗರದ ಉಪವಿಭಾಗ ಕಚೇರಿ ಮುಂಭಾಗ ಪ್ರತಿಭಟನೆ ನಡೆಸಿದ ಕಾರ್ಯನಿರತ...

ದಿನದ ಸುದ್ದಿ1 day ago

ಮಾಧ್ಯಮ ಸ್ವಾತಂತ್ರ್ಯದ ಗುಂಗಿನಲ್ಲಿ

ನಾ ದಿವಾಕರ ಮಾಧ್ಯಮ ಸ್ವಾತಂತ್ರ್ಯದ ಬಗ್ಗೆ ಮಾತನಾಡಲು ಹಿಂಜರಿಯುವಷ್ಟು ಮಟ್ಟಿಗೆ ಸುದ್ದಿ ಮಾಧ್ಯಮಗಳು ತಮ್ಮ ಬೌದ್ಧಿಕ ನೆಲೆಯನ್ನು ಕಳೆದುಕೊಂಡಿವೆ. ಯಾವುದೇ ಸಂದರ್ಭದಲ್ಲೂ ಅಭಿವ್ಯಕ್ತಿ ಸ್ವಾತಂತ್ರ್ಯದ ಪರವಾಗಿ ನಿಲ್ಲದೆ...

ದಿನದ ಸುದ್ದಿ1 day ago

ಸುದ್ದಿಮನೆಯ ಪ್ರಾಮಾಣಿಕತೆ, ಸರ್ಕಾರದ ಭ್ರಷ್ಟಾಚಾರ

ನಾ ದಿವಾಕರ ಕನ್ನಡದ ಸುದ್ದಿಮನೆಗಳು ಎಷ್ಟರ ಮಟ್ಟಿಗೆ ವಿಶ್ವಾಸಾರ್ಹತೆ ಕಳೆದುಕೊಂಡಿವೆ ಎಂದರೆ ಅವುಗಳು ಬಿತ್ತರಿಸುವ ವಾಸ್ತವಗಳನ್ನೂ ಜನರು ನಂಬುವುದಿಲ್ಲ. ತಮ್ಮ ಟಿ ಆರ್ ಪಿ ಹೆಚ್ಚಿಸಿಕೊಳ್ಳಲು ಅಧಿಕಾರ...

ದಿನದ ಸುದ್ದಿ2 days ago

ಟಿ. ನರಸೀಪುರ : ಕರ್ನಾಟಕ ಬಂದ್ ಗೆ ಉತ್ತಮ ಪ್ರತಿಕ್ರಿಯೆ

ಸುದ್ದಿದಿನ,ಟಿ. ನರಸೀಪುರ: ರೈತ-ಕಾರ್ಮಿಕ ವಿರೋಧಿ ಕಾಯ್ದೆಗಳನ್ನು ಜಾರಿಗೆ ತರುತ್ತಿರುವ ಕೇಂದ್ರ ಹಾಗೂ ರಾಜ್ಯ ಸರ್ಕಾರದ ದೋರಣೆಯನ್ನು ಖಂಡಿಸಿ ಕರ್ನಾಟಕ ಬಂದ್‍ಗೆ ಕರೆ ಕೊಟ್ಟಿದ್ದ ಹಿನ್ನಲೆ ಪಟ್ಟಣದಲ್ಲಿ ಉತ್ತಮ...

ದಿನದ ಸುದ್ದಿ2 days ago

ಎಲ್ಲ ರೀತಿಯಿಂದ ದೊಡ್ಡವರು ‘ಜಿ.ಎಸ್.ಆಮೂರ’

ಜಿ ಎಸ್ ಆಮೂರ ಎಲ್ಲ ರೀತಿಯಿಂದಲೂ ದೊಡ್ಡವರು. ಕಳೆದ ಮೇ ತಿಂಗಳಲ್ಲಿ 95 ಮುಗಿಸಿ ನೂರರೆಡೆಗೆ ಹೆಜ್ಜೆ ಹಾಕುತ್ತಿದ್ದರು. ಕನ್ನಡಕ್ಕೆ ಇಂಗ್ಲಿಷ್ ಮೇಷ್ಟ್ರುಗಳ ಲಿಂಕ್ (ಸಂಬಂಧ, ಕೊಡುಗೆ,...

ದಿನದ ಸುದ್ದಿ2 days ago

ರೂತ್ ಗ್ರಿನ್ಸ್ ಬರ್ಗ್ : ಸಾವಿನಲ್ಲೂ ಪಡೆದ ಸ್ತ್ರೀ ಸಮಾನತೆ..!

ಸಿ.ಎಸ್.ದ್ವಾರಕಾನಾಥ್ ಇದೇ ಸಪ್ಟೆಂಬರ್ 18 ನೇ ತಾರೀಖು ಬೆಳಿಗ್ಗೆ ಆರು ಗಂಟೆಗೆಲ್ಲ ಅಮೆರಿಕದಿಂದ ರೆಡ್ಡಿ ಪೋನ್ ಮಾಡಿ ಸುಮ್ಮನೇ ಒಂದೇ ಸಮ ಬೈಯ್ಯತೊಡಗಿದ!? ಇಲ್ಲಿನ ಬೆಳಿಗ್ಗೆ ಅಮೆರಿಕದಲ್ಲಿ...

ದಿನದ ಸುದ್ದಿ2 days ago

ದಾವಣಗೆರೆ | ಸಿಎಂ‌‌ ಯಡಿಯೂರಪ್ಪ ಫೋಟೋ ಗೆ ಚಪ್ಪಲಿಯಿಂದ ಹೊಡೆಯುವುದರ ಮೂಲಕ ರೈತ ಸಂಘಟನೆಗಳ ಆಕ್ರೋಶ : ವಿಡಿಯೋ ನೋಡಿ

ಸುದ್ದಿದಿನ, ದಾವಣಗೆರೆ : ಎಪಿಎಂಸಿ, ಭೂಸುಧಾರಣೆ ಕಾಯ್ದೆ ತಿದ್ದುಪಡಿ ವಿರೋಧ ಬಂದ್‌ ಹಿನ್ನೆಲೆ ಸೋಮವಾರ ನಗರದಲ್ಲಿ ರೈತ ಸಂಘಟನೆಗಳು ಪ್ರತಿಭಟನೆ ನಡಿಸಿದವು. ಸಿಎಂ ಯಡಿಯೂರಪ್ಪ ಅವರ ಫೋಟೋಗೆ...

Trending