Connect with us

ಲೈಫ್ ಸ್ಟೈಲ್

ಮೂಕಜೀವಿಗಳ ಪಾಡು ಕೇಳೋರು ಯಾರು..?

Published

on

ಪ್ಲಾಸ್ಟಿಕ್ ಘನತ್ಯಾಜ್ಯ ಮತ್ತಿತರ ಅಪಾಯಕಾರಿ ತ್ಯಾಜ್ಯಗಳ ತಿಪ್ಪೆಯಲ್ಲಿರುವ ಈ ಮೂಕದನಗಳು ನಾನು ವಾಸವಿರುವ ಬೆಂಗಳೂರು ವಿವಿಯ ಜ್ಞಾನಭಾರತಿ ಪಕ್ಕದ ಜಗಜ್ಯೋತಿನಗರ ಬಡಾವಣೆ ಸೇರಿದಂತೆ ಮರಿಯಪ್ಪನಪಾಳ್ಯ – ಭುವನೇಶ್ವರಿ ನಗರ – ನಾಗದೇವನಹಳ್ಳಿ ಬಡಾವಣೆಗಳಲ್ಲಿ ಬೀಡಾಡಿಗಳಾಗಿವೆ. ಕೆಂಗೇರಿ ಔಟರ್ ರಿಂಗ್ ರೋಡಿನಲ್ಲಿ ಮತ್ತು ರೈಲ್ವೆ ಅಳಿಗಳಲ್ಲಿ ಅಪಘಾತಕ್ಕೀಡಾಗಿ ಅನೇಕ ದನಗಳು ಅಸುನೀಗಿವೆ. ರಸ್ತೆಗಳಲ್ಲಿ ಮತ್ತು ಪಾದಚಾರಿ ರಸ್ತೆಗಳಲ್ಲಿ ಅಡ್ಡ ನುಗ್ಗುವ ಇವು ಪ್ರಯಾಣಿಕರಿಗೆ ತೊಂದರೆದಾಯಕವಾಗಿ ಪರಿಣಮಿಸುತ್ತಲೂ ಇವೆ.

ಕಳೆದ ಹತ್ತು ವರ್ಷಗಳಲ್ಲಿ ಕಡಿಮೆ ಎಂದರೂ ಐದಾರು ದನಗಳು ಅಪಘಾತಕ್ಕೀಡಾಗಿರುವುದನ್ನು ನಾನು ನೋಡಿದ್ದೇನೆ. ಕೆಲವು ಕಾಲು ಮುರಿದು, ಕೊಂಬು ಮುರಿದು, ಮೈಮೇಲೆ ಗಾಯಗಳಾಗಿ ನರಳಿ ಸತ್ತಿದ್ದರೆ ಮತ್ತೆ ಕೆಲವು ಪ್ಲಾಸ್ಟಿಕ್ ತ್ಯಾಜ್ಯವನ್ನು ಸೇವಿಸಿ ಸತ್ತುಹೋಗಿವೆ. ಈ ದನಗಳ ಮಾಲೀಕರು ಯಾರೆಂಬುದು ನನಗೆ ಈವರೆಗೆ ಯಾರಿಂದಲೂ ತಿಳಿದುಕೊಳ್ಳಲಾಗಿಲ್ಲ. ಯಾವುದೇ ದನಕ್ಕೆ ಹಗ್ಗ ಮೂಗದಾರ ಕೊರಳದಾರ ಮೊಕಾಡ ಇರುವುದಿಲ್ಲ.

ಇಂತಹ ದನಗಳಲ್ಲಿ ನಾನು ಗುರುತಿಸಿದ ಕೆಲವು ಹಸುಗಳು ಕರುಗಳು ಹೋರಿಗಳು ಒಂದೊಂದೇ ಕಾಣೆಯಾಗುತ್ತಿರುತ್ತವೆ. ಯಾವುದೋ ಜಾನುವಾರು ಚೋರರಿಂದ ಇವು ಕಳುವಾಗುತ್ತಿರಬಹುದು ಅನ್ನಿಸುತ್ತಿದೆ. ಈ ದನಗಳು ಮೇವು ನೀರಿಗಾಗಿ ಅಲೆದಾಡುವಾಗ ಕೆಲವೊಮ್ಮೆ ಅಂಗಡಿಗಳ ವಸ್ತುಗಳಿಗೆ ಬಾಯಾಕುತ್ತವೆ. ಮನೆಗಳ ಮುಂದಿರುವ ಮರಗಿಡಗಳಿಗೆ ಬಾಯಾಕುತ್ತವೆ. ಈ ಮೂಕದನಗಳ ಮೇಲೆ ಕರುಣೆ ಇಲ್ಲದ ಜನ ತುಂಡುಕೋಲು ಪ್ಲಾಸ್ಟಿಕ್ ಪೈಪು ಕಬ್ಬಿಣದ ಕಂಬಿ ಮುಂತಾದ ವಸ್ತುಗಳಿಂದ ನಿರ್ದಯವಾಗಿ ಬಾರಿಸಿ ಓಡಿಸುತ್ತಾರೆ. ಆಸಿಡ್ ಎರಚಿರುವ ಉದಾಹರಣೆಗಳೂ ಇವೆ.

ಈಗ ನಾನು ಹೇಳಹೊರಟಿರುವ ಸಂಗತಿ ಏನೆಂದರೆ, ಕಳೆದ ಮಳೆಗಾಲದಲ್ಲಿ ಈ ಭಾಗದಲ್ಲಿ ಸಮೃದ್ಧಿಯಾಗಿ ಮಳೆಬಾರದ ಕಾರಣದಿಂದ ಈಗ ಬೇಸಿಗೆಯ ರಣ ಬಿಸಿಲಿನ ತಾಪ ಮತ್ತು ನೀರಿನ ತತ್ವಾರ ಭಯಾನಕವಾಗಿದೆ. ವಾರಕ್ಕೆರಡು ಸಲವೋ ಅಥವಾ ಮೂರು ಸಲವೋ ನೀರು ಸರಬರಾಜು ಮಂಡಲಿಯವರು ವಿತರಿಸುವ ನೀರು ಗೃಹ ಬಳಕೆಗೂ ಸಾಲದಾಗಿ ಈ ಬಡಾವಣೆಗಳ ಜನರಿಗೆ ಕುಡಿಯುವ ನೀರಿಗೆ ಭೀಕರ ಸಮಸ್ಯೆ ಎದುರಾಗಿದೆ. ಮಾತು ಬಲ್ಲ ಮನುಷ್ಯರಾದ ನಮ್ಮ ಪರಿಸ್ಥಿತಿಯೇ ಹೀಗಿರುವಾಗ ಮೂಕಜೀವಿಗಳಾದ ಈ ಬೀಡಾಡಿ ದನಗಳು, ಬೀದಿ ನಾಯಿಗಳು, ಪಕ್ಷಿ ಸಂಕುಲ, ಅಳಿಲು ಹಾವು ಹಲ್ಲಿ ಹೋತಿ ಕೋತಿ ಕಪ್ಪೆ ಹುಳುಉಪ್ಪಟೆ ಮುಂತಾದ ಸಣ್ಣಪುಟ್ಟ ಜೀವಿಗಳ ಪಾಡೇನು? ಅವುಗಳಿಗೆ ಕುಡಿಯುವ ನೀರು ಮತ್ತು ಅಹಾರ ಎಲ್ಲಿ ದೊರೆಯುತ್ತದೆ? ಪ್ಲಾಸ್ಟಿಕ್ ತ್ಯಾಜ್ಯದ ತಿಪ್ಪೆಯನ್ನು ಆಹಾರಕ್ಕಾಗಿ ಆಶ್ರಯಿಸಿರುವ ಈ ಮೂಕಜೀವಿಗಳ ಪಾಡು ಘನಘೋರ ನರಕವಾಗಿ ಮಾರ್ಪಟ್ಟಿದೆ.

ವಿಸರ್ಜಿತ ಕೊಳೆತ ತರಕಾರಿ, ಕಸ, ಪ್ಲಾಸ್ಟಿಕ್, ಕೊಳಕು ಪೇಪರ್ ತಿಂದು ವಿಚಿತ್ರ ಕಾಯಿಲೆಗಳಿಗೆ ಗುರಿಯಾಗಿ ಬಳಲುವುದು ಒಂದು ಕಡೆಯಾದರೆ, ಈ ದನಗಳಿಗೆ ಕುಡಿಯಲು ನೀರು ಸಿಗದೆ ಮೂಕವಾಗಿ ಗೋಳಿಡುತ್ತಿರುವ ಕರುಣಾಜನಕ ಸ್ಥಿತಿ ಮತ್ತೊಂದು ಕಡೆಗೆ ಕಾಣಿಸುತ್ತಾ ಕರುಳು ಹಿಂಡಿದಂತಾಗುತ್ತಿದೆ. ಇಲ್ಲಿನ ನಿವಾಸಿಗಳು ಕಸ ವಿಲೇವಾರಿಯ ಗಾಡಿಯವರಿಗೆ ತಮ್ಮ ಮನೆಗಳ ತ್ಯಾಜ್ಯಗಳನ್ನು ನೀಡುತ್ತಿರುವುದರಿಂದ ಈ ಜೀವಿಗಳಿಗೆ ತ್ಯಾಜ್ಯಾಹಾರಗಳೂ ಸಿಗದಂತಾಗಿದೆ. ಇಂತಹ ಮೂಕಜೀವಿಗಳ ಬಗ್ಗೆ ದಯಾದರ್ಶ ಕಾರುಣ್ಯವುಳ್ಳ ಜನ ತಮ್ಮ ಮನೆಯ ಮತ್ತು ನೆರೆಹೊರೆಯ ಮನೆಗಳ ಉಳಿಕೆ ಆಹಾರ ತ್ಯಾಜ್ಯ ಮತ್ತು ನೀರನ್ನು ಒದಗಿಸಿದರೆ ಇಂತಹ ಗೊಟ್ಟು ಕಾಲದಲ್ಲಿ ಈ ಜೀವಿಗಳನ್ನು ಕಾಪಾಡಿದ ಸಾರ್ಥಕತೆಯಾದರೂ ಸಿಕ್ಕೀತು.

ನಾನು ಮತ್ತು ನನ್ನ ಕುಟುಂಬದವರು ತರಕಾರಿ ತ್ಯಾಜ್ಯ, ಹಣ್ಣುಗಳ ತ್ಯಾಜ್ಯ, ಉಳಿದ ಆಹಾರ ಮುಂತಾದ ಪದಾರ್ಥಗಳನ್ನು ಒಂದು ಡಬ್ಬದಲ್ಲಿ ಶೇಖರಿಸಿ ನಮ್ಮ ಮನೆ ಮುಂದಕ್ಕೆ ಬರುವ ಬೀಡಾಡಿ ದನಗಳಿಗೂ ಬೀದಿ ನಾಯಿಗಳಿಗೂ ಒದಗಿಸುತ್ತಿದ್ದೇವೆ. ನಾನು 1992 ರಲ್ಲಿ ಬೆಂಗಳೂರು ವಿಶ್ವವಿದ್ಯಾಲಯದ ಜ್ಞಾನಭಾರತಿಯಲ್ಲಿ ಸ್ನಾತಕೋತ್ತರ ಪದವಿ ವ್ಯಾಸಂಗ ಮಾಡುತ್ತಿದ್ದ ಕಾಲದಲ್ಲಿ ಜ್ಞಾನಭಾರತಿಯ ವಿಶಾಲ ಕ್ಯಾಂಪಸ್ ದಟ್ಟವಾದ ಹಸಿರು ಮರಗಳಿಂದ ಕಂಗೊಳಿಸುತ್ತಿತ್ತು. ನಂತರದ ಕಾಲದಲ್ಲಿ Institute for Socio Economic Change ( ISEC ), National Law School of India University (NLSOIU), National Academic Accreditation Council (NAACK), ಇಂದಿರಾಗಾಂಧಿ ಕಲಾಗ್ರಾಮ, ರಾಷ್ಟ್ರೀಯ ನಾಟಕ ಶಾಲೆ- NSD (National School of Drama), ಕುವೆಂಪು ಭಾಷಾಭಿವೃದ್ಧಿ ಪ್ರಾಧಿಕಾರ ಇನ್ನೂ ಮುಂತಾದ ಇಲಾಖೆಗಳ ಕಛೇರಿಗಳು ಜ್ಞಾನಭಾರತಿಯ ಕ್ಯಾಂಪಸ್ಸಿನೊಳಕ್ಕೆ ಪ್ರವೇಶಿಸಿದವು. ಅಪಾರ ಕಾಡು ನಾಶವಾಗಿ ಕಛೇರಿಗಳ ಭವ್ಯ ಕಾಂಕ್ರೀಟು ಕಟ್ಟಡಗಳು ಎದ್ದು ನಿಂತವು, ಇದರ ಜೊತೆಗೆ ಭೂಗಳ್ಳರ ಒತ್ತುವರಿಯಿಂದ ಹಾಗೂ ಮರಗಳ್ಳರಿಂದ ಜ್ಞಾನಭಾರತಿಯ ಆವರಣದ ಅಪಾರ ಪ್ರಮಾಣದ ಕಾಡು ನಾಶವಾಗಿ ಹೋಯಿತು. ಅಮೂಲ್ಯ ಸಸ್ಯ ಪ್ರಭೇದಗಳು ನಾಶವಾಗಿಹೋದವು.

ನಾನು ವಿದ್ಯಾರ್ಥಿಯಾಗಿದ್ದ ದಿನಗಳಲ್ಲಿ ಇಲ್ಲಿನ ವೃಷಭಾವತಿ ನದಿಯ ನೀರು ಇವತ್ತಿನಂತೆ ತೀರಾ ಕೆಟ್ಟಿರಲಿಲ್ಲ. ಜ್ಞಾನಭಾರತಿ ಕಾಡಿನಲ್ಲಿದ್ದ ಅಳಿಲು ಆಮೆ ಗುಬ್ಬಿ ಗೊರವಂಕ ನರಿ ಹಾವು ಹಲ್ಲಿ ಹೋತಿ ಕೋತಿ ಮುಂತಾದ ಜೀವಿಗಳಲ್ಲದೆ ನೆರೆಯ ಹಳ್ಳಿಗಳ ರೈತಾಪಿಗಳ ದನಕರು ಕುರಿಮೇಕೆ ಮುಂತಾದ ಮೂಕಜೀವಿಗಳಿಗೆ ಇಲ್ಲಿ ನೀರಿನ ಒಡ್ಡುಗಳಿದ್ದವು, ಸಣ್ಣ ಸಣ್ಣ ಕಟ್ಟೆ ಕುಂಟೆಗಳಿದ್ದವು. ಆಗಿನ ಕಾಲದಲ್ಲಿ ಜ್ಞಾನಭಾರತಿಯ ಆವರಣದ ಕಾಡಿನಲ್ಲಿ ಕಾಣಿಸದಿದ್ದ ನವಿಲುಗಳ ಒಂದು ಗುಂಪು ಈಗ್ಗೆ ಕಳೆದ ನಾಲ್ಕು ವರ್ಷಗಳ ಹಿಂದೆ ಬನ್ನೇರುಘಟ್ಟ ಕಾಡಿನಿಂದ ಬಂದು ವಂಶಾಭೀವೃದ್ದಿ ಮಾಡಿಕೊಂಡು ಮೂವತ್ತಕ್ಕೂ ಹೆಚ್ಚು ನವಿಲುಗಳು ಇಲ್ಲಿಯೇ ನೆಲೆಸಿವೆ. ನಾನು ಬಾಡಿಗೆ ಹಿಡಿದು ಕಳೆದ ಹನ್ನೊಂದು ವರ್ಷಗಳಿಂದ ವಾಸವಿರುವ #388, 1 ನೇ ಮುಖ್ಯರಸ್ತೆ, ಜಗಜ್ಯೋತಿನಗರ, ಜ್ಞಾನಭಾರತಿ, ಬೆಂಗಳೂರು ಇಲ್ಲಿನ ಮನೆಯ ಎದುರಿಗೇ ಜ್ಞಾನಭಾರತಿ ಕ್ಯಾಂಪಸ್ಸಿನ ಕಾಂಪೌಂಡ್ ಗೋಡೆಯಿದೆ. ಪ್ರತೀ ದಿನ ನಮ್ಮ ಮನೆಯ ಮುಂದಿರುವ ಕಾಂಪೌಂಡ್ ಗೆ ಹೊಂದಿಕೊಂಡ ಮರಗಳ ನಡುವೆ ಈ ನವಿಲುಗಳು ಕೂಗುತ್ತಾ ಗರಿಬಿಚ್ಚಿ ನರ್ತಿಸುವುದನ್ನು ನಾವು ನೋಡುತ್ತಿದ್ದೇವೆ. ಈ ನವಿಲುಗಳು ಮತ್ತು ಶ್ರೀಗಂಧದ ಮರಗಳು ಚೋರರ ಕೈಗೆ ಸಿಕ್ಕಿರುವುದು ಸುಳ್ಳಲ್ಲ. ಇವುಗಳ ರಕ್ಷಣೆಗೆ ಯಾರು ಹೊಣೆ?

ವೃಷಭಾವತಿ ನದಿಯು ಇಂದು ಕೊಳಚೆ ಚರಂಡಿಯಾಗಿ ರೂಪಾಂತರವಾಗಿದ್ದು ನದಿ ಎಂಬ ಹೆಸರು ಈಗ ಉಳಿದಿಲ್ಲ. ಹಿಂದೆ ಇದ್ದ ಕೆರೆ ನೀರಿನ ನಾಲೆ ಕಾಲುವೆಗಳೆಲ್ಲವೂ ಇಂದು ಕೊಳಚೆ ಮೋರಿಗಳಾಗಿ ನೀರು ವಿಷ ತ್ಯಾಜ್ಯದಿಂದ ತುಂಬಿಹೋಗಿದೆ, ಸುತ್ತಮುತ್ತ ಹತ್ತಿರದಲ್ಲಿರುವ ಕೆರೆಗಳಲ್ಲಿ ಇದೇ ವಿಷತ್ಯಾಜ್ಯದ ನೀರು ತುಂಬಿಕೊಂಡು ಗಬ್ಬೆದ್ದು ನಾರುತ್ತಿವೆ. ಇಲ್ಲಿನ ಯಾವ ನೀರೂ ಈ ಜೀವಿಗಳಿಗೆ ಕುಡಿಯಲು ಯೋಗ್ಯವಾಗಿಲ್ಲ. ಕ್ರಿಕೆಟ್ ಗೆಲುವು, ಗಣಪತಿ ಉತ್ಸವ, ದೀಪಾವಳಿ, ಹುಟ್ಟಿದ ಹಬ್ಬ, ರಾಜ್ಯೋತ್ಸವ, ರಂಜಾನ್, ಕ್ರಿಸ್ಮಸ್ ಮುಂತಾದ ಆಚರಣೆಗಳನ್ನು ಆಚರಿಸಲು ವಿಷಕಾರಕ ರಾಸಾಯನಿಕಗಳ ಪಟಾಕಿಗಳನ್ನು ಸುಡುವ ಹುಚ್ಚರು, ಗಾಳಿ ನೀರು ಮಣ್ಣು ಮೌನ ಎಲ್ಲವನ್ನೂ ಮಲಿನಗೊಳಿಸುವ ಕೇಡುಗಳಿಗೆ ಹೆಚ್ಚು ಕೊಡುಗೆ ನೀಡುತ್ತಿದ್ದಾರೆ. ಕೈಗಾರಿಕಾ ತ್ಯಾಜ್ಯಗಳ ವಿಲೇವಾರಿಗೆ ಇಲ್ಲಿನ ನದಿ ಮತ್ತು ನಾಲೆಗಳೇ ಆಸರೆಯಾಗಿವೆ. ಇಷ್ಟರ ನಡುವೆಯೂ ಶ್ರೀಮಂತರ ಮಹಲುಗಳಲ್ಲಿ ಅನಗತ್ಯವಾಗಿ ನೀರು ಪೋಲಾಗಿ ಚರಂಡಿಗೆ ಹರಿದುಹೋಗುತ್ತಿದೆ. ಅನಗತ್ಯವಾಗಿ ನೂರಾರು ವಿದ್ಯುತ್ ದೀಪಗಳು ಅಲಂಕಾರಿಕ ದೀಪಗಳು ಉರಿಯುತ್ತಿರುತ್ತವೆ. ಹೋಸ್ ಪೈಪುಗಳನ್ನು ಹಿಡಿದು ಮನೆ ಮುಂದಿನ ಉದ್ಯಾನಕ್ಕೆ, ಅಲಂಕಾರಿಕ ಸಸ್ಯಗಳಿಗೆ ನೀರಾಯಿಸುವ, ಕಾರುಗಳನ್ನು ತೊಳೆಯಲು, ಮನೆ ಆವರಣ ತೊಳೆಯಲು ಅಪಾರ ಪ್ರಮಾಣದ ನೀರನ್ನು ಬಳಸಿ ಚರಂಡಿಗೆ ಹರಿದುಹೋಗುತ್ತಿರುವುದನ್ನು ನೋಡಿದರೆ ಅಂಥವರ ಸಿರಿವಂತಿಕೆ ಅಸಹ್ಯ ಹುಟ್ಟಿಸುತ್ತಿದೆ. ಮೂಕಜೀವಿಗಳಿಗೆ ನೀರು ಆಹಾರ ಒದಗಿಸದ ಈ ಶ್ರೀಮಂತ ಪಾಪಿಗಳು ಹೇಗಾದರೂ ನೆಮ್ಮದಿಯಾಗಿ ಉಸಿರಾಡುತ್ತಿದ್ದಾರೋ ನನಗೆ ತಿಳಿಯುತ್ತಿಲ್ಲ.

ಕರುಣಾಳು ಗೆಳೆಯರೇ ನಿಮ್ಮಲ್ಲಿ ನನ್ನ ಪ್ರಾರ್ಥನೆ ಏನೆಂದರೆ, ನಾವು ನಮ್ಮ ಸಹಮಾನವರೊಂದಿಗೆ ಸೌಹಾರ್ದ ಸಾಮರಸ್ಯಗಳಿಂದ ಬದುಕುತ್ತಿರುವಂತೆಯೇ ನಮ್ಮ ಸಹಜೀವಿಗಳಿಗೆ ನೀರು ಆಹಾರ ಒದಗಿಸುವುದರೊಂದಿಗೆ ಸಾಮರಸ್ಯದಿಂದ ಸಹಬಾಳ್ವೆ ನಡೆಸೋಣ.

-ಡಾ.ವಡ್ಡಗೆರೆ ನಾಗರಾಜಯ್ಯ
8722724174

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

ಲೈಫ್ ಸ್ಟೈಲ್

ಕಿವಿಯಲ್ಲಿ ಫ್ಲವರ್ ; ಟ್ಯಾಟೂ ಜಿವಲ್ಲೆರೀ ಟ್ರೆಂಡಿಂಗ್..!

Published

on

ತ್ತೀಚಿನ ಗ್ಲಾಮರ್ ಯುಗದಲ್ಲಿ,  ಇಂಸ್ಟಂಟ್ ಮತ್ತು ಅಚ್ಚರಿ ಹುಟ್ಟಿಸುವಂತಹ ಚಿತ್ರ ವಿಚಿತ್ರ ಟ್ರೆಂಡ್ ಗಳು ಇಂಸ್ಟಾಗ್ರಾಂ ಟ್ವಿಟ್ಟರ್, ಗಳಲ್ಲಿ ಸುದ್ದಿ ಮಾಡುತ್ತಿದೆ. ಹೆಣ್ಣು ಮಕ್ಕಳ ಆಭರಣ ಪ್ರೇಮ ಇಂದು ನಿನ್ನೆಯದಲ್ಲ. ಆಭರಣಕ್ಕೆ ಪರ್ಯಾಯ ಪದವೇ ಹೆಣ್ಣು ಅನ್ನುವಷ್ಟರ ಮಟ್ಟಿಗೆ ಹೆಂಗಳೆಯರ ಆಭರಣ ಪ್ರೀತಿ ಲೋಕಾರೂಢಿಯಲ್ಲಿ ಕಂಡು ಬರುತ್ತದೆ.

ಆದರೆ ಇತ್ತೀಚೆಗೆ ಕಂಡು ಬರುತ್ತಿರುವ ಫ್ಯಾಷನ್ ಟ್ರೆಂಡ್ ಗಳು ಈ ಲೋಕಾರೂಢಿಯ ನಾನ್ನುಡಿಯನ್ನು ಸುಳ್ಳಾಗಿಸಿದೆ. ಆಧುನಿಕ ಫ್ಯಾಷನ್ ಯುಗದಲ್ಲಿ, ಟ್ಯಾಟೂ ಕ್ರೇಜ್ ಹೆಚ್ಚಿದ್ದು, ದುಬಾರಿ
ಆಭರಣಗಳನ್ನು ಸೈಡಿಗೆ ಸೇರಿಸಿದೆ.

ಟ್ಯಾಟೂ ಜಿವಲ್ಲೆರೀ, ಸದ್ಯ ಸೋಷಿಯಲ್ ಮೀಡಿಯಾ ದಲ್ಲಿ ವೈರಲ್ ಹಾಗೂ ಟ್ರೆಂಡ್ ಸೆಟ್ಟರ್ ಆಗಿ ಮಿಂಚುತ್ತಿದೆ. ಚಿನ್ನ ಬೆಳ್ಳಿ ವಜ್ರದ ಆಭರಣಗಳಿಗೆ ಸೆಡ್ಡು ಹೊಡೆದು ನಿಂತಿದೆ ಈ ನೂತನ ಟ್ಯಾಟೂ ಜಿವಲ್ಲೆರೀ ಟ್ರೆಂಡ್ !

ಕಿವಿಯಲ್ಲಿ ಮಿಂಚುವ ಕಿವಿ ಓಲೆಗಳು ಈ ಟ್ರೆಂಡ್ ಗೆ ವಾಶ್ ಔಟ್ ಆಗಿವೆ! ಕಿವಿಯ ಮೇಲೆ ಸುಂದರ ವಾಗಿ ಮೂಡಿ ಬರುತ್ತಿದೆ ಕಲರ್ಫುಲ್ ಫ್ಲವರ್ ಟ್ಯಾಟೂ.. ಬಣ್ಣದ ಹೂಗಳು, ಚಿಟ್ಟೆ, ಎಲೆ-ಬಳ್ಳಿ ಗಳು ಟ್ಯಾಟೂ ಇಯರ್ ಖಫ್ ಮತ್ತು ಇಯರ್ ರಿಂಗ್ ಗಳನ್ನು ರೀಪ್ಲೇಸ್ ಮಾಡಿರುವುದಂತೂ ಸತ್ಯ.

ಅಂತೆಯೇ, ಮೇಲ್ಕುತ್ತಿಗೆ, ಕೈ ತೋಳು, ಕಾಲ್ಗೆಜ್ಜೆ, ಕೈ ಬಳೆ, ಎಂಗೇಜ್ಮೆಂಟ್ ರಿಂಗ್ ಟ್ಯಾಟೂ ಯುವಪೀಳಿಗೆ ಯಲ್ಲಿ ಭಾರೀ ಕ್ರೇಜ್ ಹುಟ್ಟುಹಾಕಿದೆ.

ಚಿತ್ರಶ್ರೀ ಹರ್ಷ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಲೈಫ್ ಸ್ಟೈಲ್

ಪಕ್ಷಿ ಪರಿಚಯ | ಬೇಲಿ ಚಟಕ

Published

on

ಫೋಟೋ : ಭಗವತಿ‌ ಎಂ.ಅರ್ / ಗಂಡು ಬೇಲಿ ಚಟಕ

ಬೇಲಿ ಚಟಕವು (Pied Bush chat) ಗುಬ್ಬಚ್ಚಿಯಂತೆಯೇ ಸಣ್ಣ ಗಾತ್ರದ ಪಕ್ಷಿ. ಸಾಮಾನ್ಯವಾಗಿ ಬೇಲಿಗಳಲ್ಲಿ ಕುರುಚಲು ಗಿಡಗಳಿರುವ ಕಡೆ, ಬಾಲ ಕುಣಿಸುತ್ತಾ ಓಡಾಡುತ್ತಿರುತ್ತವೆ. ಮುಳ್ಳುಗಿಡಗಳ ತುದಿಯಲ್ಲಿ, ವಿರಳ ರೆಂಬೆಗಳಿರುವ ಗಿಡದ ತುದಿಯಲ್ಲಿ ಕೂತು ಬಾಲ ಕುಣಿಸುತ್ತಾ ಅತ್ತೀಂದಿತ್ತ ತಲೆಯನ್ನು ಅಲ್ಲಾಡಿಸುತ್ತಾ ಚಿಟಗುಡುತ್ತದೆ. ಸದಾ ಟುವಟಿಕೆಯಿಂದಿರುವ ಹಕ್ಕಿ ಇದು. ಇವೂ ಕೂಡ ಕೀಟಾಹಾರಿ ಹಕ್ಕಿಗಳ ಸಾಲಿಗೆ ಸೇರುತ್ತವೆ. ಹಾಗಾಗಿಯೇ ಪೊದೆಗಳಿರುವಲ್ಲಿ, ಹೆಚ್ಚಾಗಿ ನೆಲದ ಮೇಲೆ ಆಹಾರ ಹುಡುಕುತ್ತಾ ಇರುತ್ತವೆ.

ಹೆಣ್ಣು ಬೇಲಿ ಚಟಕ

ಗಂಡು ಬೇಲಿಚಟಕದ ಮೈಯ ಹೆಚ್ಚು ಭಾಗ ಕಪ್ಪು ಬಣ್ಣದಾಗಿದ್ದು, ರೆಕ್ಕೆಯ ಮೇಲೆ, ಕೆಳ ಹೊಟ್ಟೆಯ ಭಾಗ ಬಿಳಿಯ ಬಣ್ಣದಾಗಿರುತ್ತವೆ. ನೋಡಲು ಸಪೂರವಾಗಿದ್ದು, ಮೋಟು ಬಾಲ ಹೊಂದಿದೆ. ಪಕ್ಷಿ ಲೋಕದಲ್ಲಿ ಸಾಮಾನ್ಯವಾಗಿ ಗಂಡುಗಳೇ ಹೆಚ್ಚು ಸುಂದರ. ಆದರೆ ಹೆಣ್ಣು ಬೇಲಿಚಟಕವು ಗಂಡಿಗಿಂತ ನೋಡಲು ಮುದ್ದಾಗಿರುತ್ತವೆ.ಮೈ ಪೂರಾ ಕಂದು ಬಣ್ಣದಾಗಿದ್ದು, ಬಾಲದ ಭಾಗ ಇಟ್ಟಿಗೆಯ ಬಣ್ಣವಿರುತ್ತದೆ. ಸಾಮಾನ್ಯವಾಗಿ ಸಿಗುವ ಈ ಹಕ್ಕಿ ಎನ್ನುವ ಕಾರಣಕ್ಕೆ ಬಹುತೇಕರ, ಛಾಯಾಗ್ರಾಹಕರ ಅವಜ್ಞೆಗೆ ಗುರಿಯಾಗಿರುವ ಇವು ತನ್ನ ಪಾಡಿಗೆ ಊರೂರು ತಿರುಗುತ್ತಾ ಇರುತ್ತವೆ!

ಭಗವತಿ ಎಂ.ಆರ್
ಛಾಯಾಗ್ರಾಹಕಿ, ಕವಯಿತ್ರಿ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಲೈಫ್ ಸ್ಟೈಲ್

ಗಣೇಶ ಬಂದ ನೈಲ್ ಆರ್ಟ್ ಅಲ್ಲೂ ಕ್ರಿಯೇಟಿವಿಟಿ ಕಂಡ..!

Published

on

ಗಣೇಶ ಹಬ್ಬದ ಸಡಗರದಲ್ಲಿ ಮೈಮರೆತಿರರುವ ಹೆಂಗಳೆಯರ ಸಂಭ್ರಮ ಕ್ಕೆ ಸಾಥ್ ನೀಡಲು ಈ ಬಾರಿ ವಿಶೇಷ ನೈಲ್ ಆರ್ಟ್ ಒಂದು ಗರಿಗೆದರಿದೆ. ಗಣೇಶ ಹಬ್ಬದ ಸಂಭ್ರಮಾಚರಣೆ ಮತ್ತಷ್ಟು ರಂಗು ತುಂಬಲು”ಗಣೇಶ ನೈಲ್ ಆರ್ಟ್” ಸೋಷಿಯಲ್ ಮೀಡಿಯಾ ದಲ್ಲಿ ವೈರಲ್ ಆಗಿದೆ.

ಪ್ರತಿ ಹಬ್ಬಕ್ಕೂ ಒಂದೊಂದು ಬಗೆಯ ಹೊಸ ಟ್ರೆಂಡ್ ಸೃಷ್ಟಿಸುವ ನೈಲ್ ಆರ್ಟ್ ತಗ್ಙರು, ಗಣೇಶ ಸ್ಟಿಕರ್ ಬಳಸಿ ಹೊಸಾ ನೈಲ್ ಆರ್ಟ್ ಟ್ರೆಂಡ್ ಮಾಡಿದ್ದಾರೆ.

ಮಕ್ಕಳು, ಕಾಲೇಜು ಕನ್ಯೆಯರು, ಮಹಿಳೆಯರು ಸೇರಿದಂತೆ ಎಲ್ಲಾ ವಯೋಮಾನದವರಿಗೂ ಒಪ್ಪುವಂತಿದ್ದು, ಮಾರುಕಟ್ಟೆಯಲ್ಲಿ ಈ ಗಣೇಶ ನೈಲ್ ಆರ್ಟ್ ಭಾರೀ ಬೇಡಿಕೆ ಗಿಟ್ಟಿಸಿಕೊಂಡಿದೆ. ನಿಮ್ಮ ಫೇವರಿಟ್ ನೈಲ್ ಕಲರ್ಗೆ ಮ್ಯಾಚ್ ಆಗುವ ಗಣೇಶ ಸ್ಟಿಕರ್ ಬಳಸಿ ಗಣೇಶ ಚತುರ್ಥಿ ಸಂಭ್ರಮ ಕ್ಕೆ ನಿಮ್ಮ ಕ್ರಿಯಾತ್ಮಕತೆಯ ಲೇಪನ ನೀಡಿ.

ಕೇವಲ ಸ್ಟಿಕರ್ಗಷ್ಟೇ ಸೀಮಿತವಾಗಿರದೆ, ನೈಲ್ ಆರ್ಟ್ ಪೆನ್ ಮೂಲಕ, ವಿಫ್ನ ನಿವಾರಕ  ಗಣೇಶನ ಹಲವಾರು ಭಂಗಿಗಳಲನ್ನು ಕಣ್ಣು ಕೋರೈಸುವ ರೀತಿಯಲ್ಲಿ ರಚಿಸಲಾಗಿದೆ.

ಚಿತ್ರಶ್ರೀ ಹರ್ಷ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading
Advertisement

Trending