Connect with us

ಅಂತರಂಗ

ಮೋಹನಸ್ವಾಮಿ ರಂಗಪ್ರಯೋಗ

Published

on

ಅಲ್ಲಾ, ಈ ಹುಡುಗ- ಹುಡುಗ ಸಂಬಂಧ, ಹುಡುಗಿ- ಹುಡುಗಿ ಸಂಬಂಧ ಆಥವಾ ಇಂಗ್ಲಿಷಿನಲ್ಲಿ ಅಂತೀವಲ್ಲ ಗೇ- ಲೆಸ್ಬಿಯನ್ ಸಂಬಂಧ ನಿಜಕ್ಕೂ ಹೇಗಿರತ್ತೆ? ಅದು ಬರೀ ಕಾಮವಾ? ಪ್ರೇಮವೂ ಹೌದ? ಈ ಎಲ್ಲಾ ಪ್ರಶ್ನೆಗಳು ಆಗಾಗ ನನ್ನ ಮನಸಿನಲ್ಲಿಯೂ ಕೊರೀತಿದ್ದುದು ನಿಜ. ಈ ಬಗ್ಗೆ ಕೆಲವು ಲೇಖನ ಓದಿ ಯೋಚಿಸಿದ್ದರೂ ಮನಸನ್ನು ತಾಕಿರಲಿಲ್ಲ. ಹಿಜಡಾಗಳ ಬದುಕಿನ ಬಗ್ಗೆಯಾದರೂ ಇತ್ತೀಚಿನ ದಿನಗಳಲ್ಲಿ ಬಂದ ಕೆಲವು ಆತ್ಮಕತೆಗಳು, ಸಿನಿಮಾ ನೋಡಿ ತಿಳಿದಿತ್ತು. ಗೇ- ಲೆಸ್ಬಿಯನ್ ಕುರಿತ ಸಿನಿಮಾಗಳನ್ನ ಇದುವರೆಗೆ ನೋಡುವ ಅವಕಾಶವೂ ಆಗಿರಲಿಲ್ಲ.

ಇವತ್ತು “ಮೋಹನಸ್ವಾಮಿ” ಎಂಬ ರಂಗಪ್ರಯೋಗ ನೋಡಿದ ಮೇಲೆ ನನ್ನ ಪ್ರಶ್ನೆಗೆ ಕೆಲ ಉತ್ತರ ಸಿಕ್ಕಿದರೆ ಮತ್ತಷ್ಟು ಪ್ರಶ್ನೆಗಳು‌ ಹುಟ್ಟಿಕೊಂಡು ಈಗ ವಸುಧೇಂದ್ರ ಅವರ “ಮೋಹನಸ್ವಾಮಿ” ಕೈಲಿಡಿದುಕೊಂಡಿದ್ದೇನೆ. ಮಣಿಪಾಲದ ‘ಮಿಲ್ಪ” ಸಾಹಿತ್ಯ ವೇದಿಕೆ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಗೆಳೆಯ ಮಹದೇವ ಹಡಪದ ಅವರ ಆಟ-ಮಾಟ ರಂಗ ತಂಡದ ‘ಮೋಹನಸ್ವಾಮಿ’ ನನ್ನಂತೆಯೇ ಇನ್ನೂ ಹಲವರ ಮನಸ್ಸು ಕದಲಿಸಿತು.

ಮೋಹನಸ್ವಾಮಿ ಒಬ್ಬ ಗೇ. ತನ್ನ ಸಂಗಾತಿ ಕಾರ್ತಿಕನೊಂದಿಗಿನ ಅವನ ಸಂಬಂಧ ಹೊರ ಪ್ರಪಂಚದ ಬಹುತೇಕರ ಸಂಬಂಧಗಳ ವ್ಯಾಕರಣಕ್ಕೆ ಭಿನ್ನವಾದುದು. ಆ ಸಂಬಂಧದಲ್ಲಿ ಇರುವ ಅವರಿಗೆ ಅದು ತೀರಾ ಸಹಜವಾದುದು. ಒಬ್ಬ ಹುಡುಗ ಹುಡುಗಿಯ ನಡುವಿನ ಒಂದು ಸಂಬಂಧ ಯಾವೆಲ್ಲಾ ಮಜಲುಗಳನ್ನು ಹೊಂದಿರಲು ಸಾಧ್ಯವೋ ಆ ಎಲ್ಲವೂ ಇದೆ. ಅಲ್ಲಿ ಕಾಮ ಇದೆ. ಆದರೆ ಅದು ಮಾತ್ರವಲ್ಲ. ಕಾರ್ತಿಕ “ನನ್ನವನು” ಎಂಬ ಗಾಢ ಪೊಸೆಸಿವ್ ತುಡಿತವಿದೆ, ಕಾರ್ತಿಕನ ಮತ್ತು ತನ್ನ ನಡುವಿನ ಈ ಪ್ರೇಮಸಂಬಂಧವನ್ನು ಶ್ರೀ ಕೃಷ್ಣನೇ ಕಾಪಾಡುತ್ತಾನೆ, ಕಾಪಾಡಬೇಕು ಎಂಬ ಆಶೆಯಿದೆ. ಕಾರ್ತಿಕನ ಇಷ್ಟ ಕಷ್ಟ, ಬೇಕು ಬೇಡಗಳನ್ನು ಅರಿತು ಆತನನ್ನು “ಸಂತೋಷಪಡಿಸಿ” ತಾನೂ ಸಂತೋಷಪಡಬೇಕು ಎಂಬ ಸೇವಾ ಭಾವನೆಯಿದೆ.

ಕೊನೆಗೆ ಕಾರ್ತಿಕ ಸ್ಪರ್ಶಕ್ಕೆ ತೀವ್ರವಾಗಿ ತುಡಿಯುವ, ಅದರಿಂದ ಅಷ್ಟೇ ಪುಳಕಗೊಳ್ಳುವ “ಗೇ ಮನಸು” ಕೂಡಾ ಇದೆ. ಅಲ್ಲಿ ಶೃಂಗಾರವಿದೆ, ವಿರಹವಿದೆ, ಕೋಪ ತಾಪ, ಗಂಡಿನ ಪ್ರತಾಪವೂ ಇದೆ, ಹೆಣ್ಣಿನದೇ ಎನಿಸಿ ಬಿಡುವ ಸಂಕಟವೂ ಇದೆ… ಯಾಕೆ ಅದು ನಮಗೆ ಹೆಣ್ಣಿನದೇ ಎನಿಸುತ್ತದೆ ಎಂದರೆ ಇದುವರೆಗೆ ನಮ್ಮ ಪ್ರಜ್ಞೆಯಲ್ಲಿರುವ ತಿಳಿವಿನ ಮಿತಿಯೇ ಇರಬೇಕು!
ಇಂತಹ ಒಂದು ಕಥಾವಸ್ತುವನ್ನು ರಂಗಕ್ಕೆ ಮಹದೇವನ ಪ್ರಯತ್ನಕ್ಕೆ ಮೆಚ್ಚುಗೆ ಹೇಳಲೇಬೇಕು. ಗೇ ಒಬ್ಬನ ತುಮುಲಗಳನ್ನು ಕಥೆ ಹೇಳುವ ಶೈಲಿಯಲ್ಲಿ ರಂಗರೂಪಕ್ಕೆ ತರುವುದು ಸವಾಲಿನ ಕೆಲಸವೇ ಸರಿ.

ಈಗಾಗಲೇ ಹಲವಾರು ವರ್ಷಗಳಿಂದ ಈ ಕಥೆ ಹೇಳುವ ರಂಗಶೈಲಿಯಲ್ಲಿ ಸಾಕಷ್ಟು ಪಳಗಿರುವ ಮಹದೇವ ಮೋಹನಸ್ವಾಮಿಯನ್ನು ಪ್ರೇಕ್ಷಕರ ಹೃದಯಕ್ಕೇ ಇಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಒಂದು ಹಂತದಲ್ಲಿ ಅಂತೂ ಮೋಹನ ಸ್ವಾಮಿ ತನ್ನ ಇನಿಯನಿಂದ ದೂರ ಆಗುವಾಗ ಉಂಟಾಗುವ ಆತಂಕ, ದುಃಖಗಳ ಭಾವ ತೀವ್ರತೆಯಂತೂ ತಲ್ಲಣ ಉಂಟು ಮಾಡುತ್ತದೆ. ಅವರ ಅಭಿನಯದ ಜೊತೆಯಲ್ಲಿ ರಂಗದ ಮೇಲೆ ಕಾಣಿಸುವ ಮತ್ತೊಂದು ಪಾತ್ರ ಅದು ಮೋಹನಸ್ವಾಮಿಯ alter ego. (ಸಂಗಮೇಶ ಸೊರಗಾಂವಿ) ಈ ಪಾತ್ರ ಮುಖ್ಯ ಪಾತ್ರಕ್ಕೆ ಪೂರಕವಾಗಿ ಪರಿಣಾಮಕಾರಿಯಾಗಿ ಮೂಡಿಬಂದಿದೆ. ರಂಗದ ಮೇಲಿನ ಒಂದು ಪೇಂಟಿಂಗ್ ಸಹ ಇಡೀ ಕಥೆಯ ಹಂದರವನ್ನು ಪರಿಣಾಮಕಾರಿಯಾಗಿ ಧ್ವನಿಸುತ್ತದೆ. ಕೃಷ್ಣನ ಕೊಳಲು, ನವಿಲುಗರಿಗಳೂ ಅಷ್ಟೇ…. ಒಂದು ಹಂತದಲ್ಲಿ ಮೋಹನಸ್ವಾಮಿ ಕೃಷ್ಣನಿಗೇ ಶಾಪ ನೀಡುತ್ತಾನೆ.

ನಿನ್ನ ಹನ್ನೊಂದನೆಯ ಅವತಾರವಾಗಿ ನೀನೂ ಗೇಯಾಗಿ ಅವತಾರ ತಾಳು, ಆಗ ನಿನಗೆ ನನ್ನ ನೋವು ಅರ್ಥವಾಗುತ್ತದೆ, ಹದಿನಾರು ಸಾವಿರ ಹೆಂಗಳೆಯರ ಸಹವಾಸ ಮಾಡಿದ ನಿನಗೆ ಒಬ್ಬ ಹೆಣ್ಣಿನ ಸಹವಾಸ ಮಾಡಲಾಗದ ನನ್ನ ನೋವೇನೆಂದು ತಿಳಿಯುತ್ತದೆ…” ಎಂಬ ಮೋಹನಸ್ವಾಮಿಯ ಮಾತು ಕೇಳುತ್ತಾ, ನನಗೆ ರೇವತಿಯವರ “ಬದುಕು ಬಯಲು” ಆತ್ಮಕಥೆಯಲ್ಲಿ ಸಹ ದೊರೈಸ್ವಾಮಿ (ರೇವತಿ) ಸಮಯಾಪುರ ದೇವಸ್ಥಾನದಲ್ಲಿ ತನ್ನ ತಲೆ ಬೋಳಿಸುವಾಗ, “ಅಮ್ಮಾ ನನಗ್ಯಾಕೆ ಈ ಸಂಕಟ? ಯಾಕೆ ಇಂತ ಪರೀಕ್ಷೆಗೆ ನನ್ನ ಒಳಪಡಿಸ್ತಿದೀಯ? ನಿನ್ನ ನಂಬಿದವರಿಗೆ ಎಲ್ಲವನ್ನೂ ನೀನು ಕೊಡ್ತೀಯ ಅಂತಾರೆ. ಆದರೆ ನನಗೆ ನೀನು ಕೊಟ್ಟಿರೋದು ನೀನು ಬರೀ ನೋವನ್ನಷ್ಟೆ. ನಾನು ಮಾಡಿರೋ ತಪ್ಪಾದರೂ ಏನು? ಗಂಡಸಿನ ರೂಪದಲ್ಲಿ ಹೆಣ್ಣಿನ್ ಭಾವನೆ ತುಂಬಿ ಸೃಷ್ಟಿ ಮಾಡಿರೋಳು ನೀನೇ. ನಿನ್ನ ತಪ್ಪಿಗೆ ನಿನ್ನದೇ ದೇವಸ್ಥಾನದಲ್ಲಿ ನನಗೆ ಶಿಕ್ಷೆಯಾಗುತ್ತಿದೆ. ನೀನು ಹೆಣ್ಣಲ್ವ? ಇನ್ನೊಂದು ಹೆಣ್ಣಿನ ಭಾವನೆ ನಿನಗೆ ಅರ್ಥ ಆಗಲ್ವ? ನಿನಗೆ ಕನಿಕರ ಇಲ್ವಾ? ಮುಂದಿನ ವರ್ಷ ಇದೇ ದಿನದ ಹೊತ್ತಿಗೆ ನಿನ್ನ ಹಾಗೆ ನನ್ನನ್ನೂ ಹೆಣ್ಣಾಗಿ ಮಾಡ್ಬೇಕು. ಆಗಲಿಲ್ಲ ಆಂದ್ರೆ ಪೂರ‍್ತಿ ಗಂಡಸಾಗಿಯಾದ್ರೂ ಮಾಡೇ…..” ಎಂದು ದೇವಿಗೆ ಇಷ್ಟೇ ಹತಾಶೆ, ನೋವಿನಿಂದ ತನ್ನ ಸಂಕಟವನ್ನು ತೋಡಿಕೊಳ್ಳುವ ದೃಶ್ಯ ತಟಕ್ಕನೆ ನೆನಪಾಯಿತು.

ಮೋಹನಸ್ವಾಮಿಯ ಶಾಪ ಕೃಷ್ಣನಿಗೆ ತಟ್ಟದೇ ಇದ್ದರೂ ಪ್ರೇಕ್ಷಕರನ್ನಂತೂ ಕಲಕದೇ ಇರದು.
ಸಲಿಂಗ ಪ್ರೇಮಿಗಳ ಸಂಬಂಧಗಳ ಆಳ, ಅಗಲಗಳ ಊಹೆಯೂ ಇಲ್ಲದವರಿಗೆ ‘ಮೋಹನ ಸ್ವಾಮಿ’ ಒಂದು ಬಗೆಯ ಶಾಕ್ ನೀಡುತ್ತದಾದರೆ ಇಂತಹ ಒಂದು ಪ್ರಜ್ಞಾಸ್ಥಿತಿಯನ್ನು ಹಂಚಿಕೊಳ್ಳುವವರಿಗೆ ತಮ್ಮದೇ ಅಭಿವ್ಯಕ್ತಿಯೆನಿಸಿ ಇಂತಹ ಒಂದು ಅಭಿವ್ಯಕ್ತಿಗಾದದರೂ ಸಮಾಜದಲ್ಲಿ ಅವಕಾಶವಿದೆಯಲ್ಲಾ ಎನಿಸದಿರದು. ನೆನ್ನೆಯಷ್ಟೇ ಸುಪ್ರೀ ಕೋರ್ಟಿನ ತೀರ್ಪು ಇಂತಹ ಸೊ ಕಾಲ್ಡ್ ಅಸಹಜವಾದ ಆದರೆ ಈ ಬಗೆಯ ಸಂಬಂಧಗಳಲ್ಲಿರುವ ಆಯಾ ಜನರಿಗೆ ಸಹಜವಾಗಿಯೇ ಇರುವ ಸಂಬಂಧಗಳನ್ನು ಮಾನ್ಯ ಮಾಡಿದೆ. ಸಲಿಂಗ ಪ್ರೇಮ ಸಹ ಸಂವಿಧಾನ ಬದ್ಧವೇ ಹೊರತು ಅದನ್ನು ಕಾನೂನು ಬಾಹಿರ ಎಂದು ನೋಡುವ ಅಮಾನವೀಯತೆಯನ್ನು ಸಮಾಜ ಬಿಡಬೇಕು ಎಂಬ ಸಂದೇಶವನ್ನು ಅದು ಸ್ಪಷ್ಟವಾಗಿ ನೀಡಿದೆ. ಇದಕ್ಕೆ ನಿರೀಕ್ಷಿತವಾಗಿಯೇ ಧರ್ಮಗಳ ಗುತ್ತಿಗೆದಾರರು ಏಕಪ್ರಕಾರವಾಗಿ ತಮ್ಮ ಅಸಹನೆ ಹೊರಹಾಕಿರುವುದೂ ವರದಿಯಾಗಿದೆ. ಆದರೆ ಇಂತಹ ವಿಷಯಗಳ ಬಗ್ಗೆ’ ಮೋಹನಸ್ವಾಮಿ’ಯಂತ ಕೃತಿ, ರಂಗಪ್ರಯೋಗಗಳು ಸಮಾಜಕ್ಕೆ ಅತ್ಯಗತ್ಯ ತಿಳಿವು ನೀಡಬಲ್ಲವು, ಸಮಾಜದ ಸಹನಾಬಲವನ್ನು ಹೆಚ್ಚಿಸಬಲ್ಲವು. ನಾಡಿನ ಪ್ರತಿಭಾವಂತ ರಂಗ ನಿರ್ದೇಶಕ ಮತ್ತು ನಟ
ಮಹದೇವ ಹಡಪದ ಮತ್ತು ತಂಡದ ಈ ಪ್ರಯೋಗ ನಾಡಿನಾದ್ಯಂತ ಹೆಚ್ಚು ಪ್ರಯೋಗ ಕಾಣುವಂತಾಗಬೇಕು.

  • ಹರ್ಷಕುಮಾರ್ ಕುಗ್ವೆ, ಪತ್ರಕರ್ತರು, ಉಡುಪಿ

ಅಂತರಂಗ

ಕುಲದೀಪ್ ನಯ್ಯರ್ : ಮರು ಓದಿನ ಅನಿವಾರ್ಯತೆ

Published

on

ನ್ನೇನು ಫೋನ್ ಸಂಭಾಷಣೆ ಮುಕ್ತಾಯಗೊಳ್ಳಬೇಕು ಎನ್ನುವ ಹೊತ್ತಿಗೆ ಮಾತು ಕುಲದೀಪ್ ನಯ್ಯರ್ ಕುರಿತ ಪ್ರಸ್ತಾಪದ ಕಡೆಗೆ ಹೊರಳಿಕೊಂಡಿತು. ನನ್ನೊಂದಿಗೆ ಮಾತನಾಡುತ್ತಿದ್ದವರು ಕನ್ನಡದ ಖ್ಯಾತ ದಿನಪತ್ರಿಕೆಯೊಂದರಲ್ಲಿ ಕಾರ್ಯನಿರತನಾಗಿದ್ದ ಪತ್ರಕರ್ತ ಗೆಳೆಯ.

ಸದ್ಯದ ಪತ್ರಿಕಾರಂಗ ಕೆಲವು ವಿಲಕ್ಷಣ ವ್ಯಕ್ತಿತ್ವಗಳ ಕಾರಣಕ್ಕಾಗಿಯೇ ಹೇಗೆ ಕಲುಷಿಷತಗೊಳ್ಳುತ್ತಿದೆ ಎಂಬುದರ ಸುತ್ತ ಚರ್ಚೆ ನಡೆದಿತ್ತು. ಕುಲದೀಪ್ ನಯ್ಯರ್ ನಿಷ್ಠುರ ವ್ಯಕ್ತಿತ್ವದ ಬಗ್ಗೆ ಪ್ರಸ್ತಾಪಿಸಿದ ಆ ಗೆಳೆಯ ಅಂಥ ಹಿರಿಯ ಆದರ್ಶ ಜೀವಗಳೇ ಸದ್ಯದ ಪತ್ರಿಕಾರಂಗವನ್ನು ಸರಿಹಾದಿಯಲ್ಲಿ ಮುನ್ನಡೆಸಬಲ್ಲವು ಎಂಬ ಅಭಿಪ್ರಾಯವನ್ನೂ ವ್ಯಕ್ತಪಡಿಸಿದನು.

ತಾನು ಕಾರ್ಯನಿರ್ವಹಿಸುತ್ತಿರುವ ಪತ್ರಿಕೆಯ ಬೆಂಗಳೂರು ಕಛೇರಿಗೆ ನಯ್ಯರ್ ಭೇಟಿ ಕೊಟ್ಟ ವೇಳೆ ಸಂಪಾದಕರಿಗೆ ನೀಡಿದ ನಿಷ್ಠುರ ಸಲಹೆಯನ್ನು ನೆನಪಿಸಿಕೊಂಡನು. ಸಂಪಾದಕ, ಉಪ-ಸಂಪಾದಕರೊಂದಿಗಿನ ಸಭೆಯಲ್ಲಿ “ನೀವು ರೆಗ್ಯುಲರ್ ಆಗಿ ಏನನ್ನು ಬರೆಯುತ್ತೀರಿ?” ಎಂಬ ಪ್ರಶ್ನೆ ನಯ್ಯರ್ ಅವರಿಂದ ತೂರಿಬಂದಾಗ ಕೆಲವು ಹಿರಿಯರು ಮಾತ್ರ ರೆಗ್ಯುಲರ್ ಆಗಿ ಬರೆಯುತ್ತಿರುವುದಾಗಿ ತಿಳಿಸಿದ್ದರಂತೆ. ರೆಗ್ಯುಲರ್ ಆಗಿ ಬರೆಯದ ಹಿರಿಯರ ಕುರಿತು ಅಸಮಾಧಾನಗೊಂಡ ನಯ್ಯರ್ ಸಂಪಾದಕರೆಡೆಗೆ ಮುಖ ತಿರುಗಿಸಿ ಇಂಥವರನ್ನು ಇನ್ನೂ ಪತ್ರಿಕೆಯಲ್ಲಿ ಏಕೆ ಉಳಿಸಿಕೊಂಡಿದ್ದೀರಿ ಎಂದು ಕೇಳಿದ್ದರಂತೆ.

ಪತ್ರಕರ್ತರ ವೃತ್ತಿಬದ್ಧತೆ ಹೇಗಿರಬೇಕು ಎಂಬುದನ್ನು ಈ ಪ್ರಸಂಗ ಸ್ಪಷ್ಟಪಡಿಸುತ್ತದೆ. ಅಲ್ಲದೇ, ಕುಲದೀಪ್ ನಯ್ಯರ್ ಅವರ ವೃತ್ತಿಪರ ಶ್ರೇಷ್ಠತೆ ಏನೆಂಬುದನ್ನೂ ದೃಢೀಕರಿಸುತ್ತದೆ.

ಯಾವುದೇ ಕ್ಷೇತ್ರವೊಂದು ಹಿರಿಜೀವಗಳ ವೃತ್ತಿಪರ ಅನುಭವದ ಬೆಂಬಲದೊಂದಿಗೆ ಕ್ರಮಾನುಗತ ಬೆಳವಣಿಗೆಯನ್ನು ಕಂಡುಕೊಳ್ಳುತ್ತಿರುತ್ತದೆ. ವೃತ್ತಿಯನ್ನು ಆರಂಭಿಸಿದ ದಿನದಿಂದ ಹಿಡಿದು ಕೊನೆಯ ಕ್ಷಣಗಳವರೆಗೆ ವೃತ್ತಿನಿಷ್ಠ ನಿಲುವುಗಳೊಂದಿಗೆ ಕಾರ್ಯೋನ್ಮುಖವಾದ ಧ್ಯಾನಸ್ಥ ಶ್ರದ್ಧೆಯೇ ಮಾದರಿಗಳನ್ನು ರೂಪಿಸುತ್ತದೆ. ಅಂಥ ಮಾದರಿಗಳ ಹಾದಿಯಲ್ಲಿಯೇ ಹೊಸಪೀಳಿಗೆ ವೃತ್ತಿಪರ ಬದ್ಧತೆಯನ್ನು ಸಾಬೀತುಪಡಿಸಬೇಕಾಗುತ್ತದೆ. ಅದಕ್ಕನುಗುಣವಾಗಿ ಆ ನಿರ್ದಿಷ್ಟ ಕ್ಷೇತ್ರದಲ್ಲಿ ಪ್ರಯೋಗಗಳು ನಡೆಯುತ್ತವೆ. ಆ ಪ್ರಯೋಗಶೀಲತೆಗೆ ತಕ್ಕಂತೆಯೇ ವಲಯವೊಂದು ಸಮೃದ್ಧಗೊಳ್ಳುತ್ತದೆ. ಪತ್ರಿಕಾರಂಗವೂ ಹಾಗೆಯೇ.

ಹಿರಿಯ ಪತ್ರಕರ್ತರ ದೃಷ್ಟಿಕೋನಗಳು ಈ ರಂಗವನ್ನು ಪ್ರಬುದ್ಧಗೊಳಿಸಿವೆ. ಒಂದು ಕಾಲದಿಂದ ಮತ್ತೊಂದು ಕಾಲಕ್ಕೆ ಹೊರಳಿಕೊಳ್ಳುವಾಗ ಏರ್ಪಡುವ ಪಲ್ಲಟಗಳ ಸಾಕ್ಷಿಪ್ರಜ್ಞೆಗಳಾಗಿ ಅವು ಹೊಸ ಪೀಳಿಗೆಯ ಬರಹಗಾರರಿಗೆ ದಾರಿ ತೋರಿವೆ. ಕುಲದೀಪ್ ನಯ್ಯರ್ ಅಂಥ ದಿಗ್ದರ್ಶಕ ಪತ್ರಕರ್ತ.

ಕನ್ನಡವೂ ಸೇರಿದಂತೆ ಭಾರತದ ಪತ್ರಿಕಾರಂಗ ಕುಲದೀಪ್ ನಯ್ಯರ್ ಅವರನ್ನು ವರ್ತಮಾನದಲ್ಲಿ ಭಿನ್ನವಾಗಿ ಗ್ರಹಿಸಿಕೊಂಡು ಅಂಥ ಮಾದರಿಗಳ ಆಧಾರದಲ್ಲಿ ಹೊಸದೊಂದು ಸಕಾರಾತ್ಮಕ ಪಲ್ಲಟಗಳನ್ನು ಕಂಡುಕೊಳ್ಳುವ ಅನಿವಾರ್ಯತೆಯನ್ನು ಕಾಡಿಸಿಕೊಳ್ಳಬೇಕಿದೆ. ಕಳೆದ 18 ವರ್ಷಗಳಲ್ಲಿ ಕನ್ನಡದ ಪತ್ರಿಕಾ ಪರಂಪರೆಗೆ ತದ್ವಿರುದ್ಧದ ವಿಧ್ವಂಸಕ ನಡೆಗಳು ಇಲ್ಲಿಯ ಆರೋಗ್ಯಕರ ವಾತಾವರಣದ ಆವರಣವನ್ನು ಕಲುಕಿವೆ. ಈಗಲೂ ಕಲುಕುತ್ತಲೇ ಇವೆ. ಇಂಥ ಸಂದರ್ಭದಲ್ಲಿ ನಯ್ಯರ್ ಅವರ ವೃತ್ತಿಪರ ಕೊಡುಗೆಗಳು ಮರು ಓದಿಗೆ ಒಳಗಾಗಬೇಕಿದೆ.

ಹೊಸ ಪೀಳಿಗೆಯ ಪತ್ರಕರ್ತರು ನಯ್ಯರ್ ಅವರ ಮೌಲಿಕ ಬರಹಗಳೊಂದಿಗೆ ಸಂವಾದಿಸಿಕೊಳ್ಳಬೇಕಿದೆ. ಪ್ರಜಾವಾಣಿ ಅಂಕಣ ಬರಹಗಳ ಮೂಲಕ ಅವರ ಆಲೋಚನಾ ಕ್ರಮಗಳು ಕನ್ನಡಿಗರಿಗೆ ತಲುಪಿವೆ. ಈಗಾಗಲೇ ಆಗಿಹೋದ ಮತ್ತು ಸದ್ಯದ ಹಿರಿಯ ತಲೆಮಾರಿನವರಿಗೆ ನಯ್ಯರ್ ಅವರ ಬರಹದ ಸೊಗಡಿನ ಪರಿಚಯವಿದೆ. ಮಾಧ್ಯಮಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಬಿಸಿನೆತ್ತರುಕ್ಕಿಸಿಕೊಳ್ಳುತ್ತಿರುವ ಯುವಸಮೂಹವು ನಯ್ಯರ್ ಬರಹ ಪ್ರತಿಭೆಯ ಶಕ್ತತೆ ಮತ್ತು ಅದರ ಸಾರ್ವಕಾಲಿಕ ಮೌಲಿಕತೆಯನ್ನು ಅರ್ಥೈಸಿಕೊಳ್ಳಲೇಬೇಕಿದೆ.

ಕಳೆದ ದಶಕದ ಆರಂಭಿಕ ವರ್ಷಗಳಲ್ಲಿ ಕನ್ನಡದಲ್ಲಿ ಹೊಸ ಪತ್ರಿಕೆಗಳು ಆರಂಭಗೊಂಡಾಗ ಹಿಂದಿನಂತೆಯೇ ಓದುಗ ಸಮೂಹ ಬೆಂಬಲಕ್ಕೆ ನಿಂತಿತು. ಆದರೆ, ಹೊಸ ಪತ್ರಿಕೆಗಳು ನೂತನ ಪ್ರಯೋಗಗಳ ಆಮಿಷವೊಡ್ಡಿ ಅಕ್ಷರಗಳ ಮೂಲಕ ವಿಧ್ವಂಸಕ ನಡೆಗಳನ್ನೂ ಪ್ರದರ್ಶಿಸಿದವು. ನಿರ್ದಿಷ್ಟ ರಾಜಕೀಯದೊಂದಿಗಿನ ಮೂಲಭೂತವಾದಿ ದೃಷ್ಟಿಕೋನ, ಧಾರ್ಮಿಕ ಸಾಂಪ್ರದಾಯಿಕತೆಯ ವಿಕೃತಿಗಳ ವೈಭವೀಕರಣ, ಮನುಷ್ಯ-ಮನುಷ್ಯರ ನಡುವೆ ಧರ್ಮಗಳ ನೆಪದಲ್ಲಿ ವಿಷಬೀಜ ಬಿತ್ತುವ ಹುನ್ನಾರ, ಅಹಿಂಸೆಯನ್ನು ಪ್ರತಿಪಾದಿಸಿದ್ದ ದಾರ್ಶನಿಕರ ಅಪವ್ಯಾಖ್ಯಾನ, ಹಿಂಸೆಯ ಪರವಾಗಿ ನಿಲ್ಲುವ ನಿಲುವುಗಳ ಪ್ರತಿಪಾದನೆಯೊಂದಿಗೆ ಆ ವಿಧ್ವಂಸಕ ನಡೆಗಳಿದ್ದವು. ಅವುಗಳು ಆಕರ್ಷಕ ಭಾಷಾ ಶೈಲಿ ಮತ್ತು ಪ್ರಚೋದಕ ಭಾವುಕ ಸ್ವರೂಪಗಳೊಂದಿಗೆ ಓದುಗರನ್ನು ಸೆಳೆದುಕೊಂಡವು. ಅವುಗಳೇ ಜನಪ್ರಿಯಗೊಂಡು ಮಾರುಕಟ್ಟೆಯಲ್ಲಿ ಆಕರ್ಷಣೀಯ ಎಂದೆನ್ನಿಸಿದವು.

ಈಗಿನ ಹೊಸ ಪೀಳಿಗೆ ಯುದ್ಧದ ಪರವಾಗಿ ವೀರಾವೇಶದ ನುಡಿಗಳನ್ನಾಡುತ್ತಿರುವುದಕ್ಕೆ, ನಮ್ಮ ಅಸ್ತಿತ್ವಕ್ಕೆ ಹಿಂಸೆ ಅನಿವಾರ್ಯ ಎಂಬ ವಿತಂಡವಾದವನ್ನು ಮುಂದಿಡುತ್ತಿರುವುದಕ್ಕೆ ಮತ್ತು ದೇಶಭಕ್ತಿಯ ನೆಪದಲ್ಲಿ ವಿಚಾರವಂತರನ್ನು ದ್ವೇಷಿಸುತ್ತಿರುವುದಕ್ಕೆ ಹೊಸ ಪತ್ರಿಕೆಗಳ ಈ ವಿಧ್ವಂಸಕ ನಡೆಗಳೇ ಕಾರಣ.

ಇದಕ್ಕೂ ಮೊದಲು ಪರಿಸ್ಥಿತಿ ಇಷ್ಟು ವಿಷಮವಾಗಿರಲಿಲ್ಲ. ಸಮಾಜ ಹೀಗೆ ವಿಷಮಗೊಳ್ಳದಂತೆ ಎಚ್ಚರಿಕೆಯ ಹಾದಿಯನ್ನು ತೋರುವ ಪ್ರಜ್ಞಾಶೀಲ ಬರಹಗಳು ಪತ್ರಿಕೆಗಳಲ್ಲಿ ಪ್ರಕಟಗೊಳ್ಳುತ್ತಿದ್ದವು. ಪ್ರಜಾವಾಣಿ ಪತ್ರಿಕೆಯಲ್ಲಿ ಪ್ರಕಟವಾಗುತ್ತಿದ್ದ ನಯ್ಯರ್ ಅವರ ಅಂಕಣವು ಅಂಥ ಬರಹಗಳ ಸರಣಿಯಲ್ಲಿ ಪ್ರಸ್ತಾಪಿಸಲೇಬೇಕಾದ ಮಾದರಿಯಾಗಿ ಮುಖ್ಯವೆನ್ನಿಸುತ್ತದೆ. ಅಂತರರಾಷ್ಟ್ರೀಯ ರಾಜಕಾರಣವನ್ನು ಉದಾತ್ತ ದೃಷ್ಟಿಕೋನಗಳೊಂದಿಗೆ ವಿಶ್ಲೇಷಿಸುತ್ತಿದ್ದ ರೀತಿಯಿಂದಾಗಿ ಓದುಗರೊಳಗೆ ಅವರು ಯೋಚಿಸುವ ಸಂಯಮವನ್ನು ದಾಟಿಸುತ್ತಿದ್ದರು. ಎರಡು ದೇಶಗಳ ನಡುವೆ ನಡೆಯುವ ಸಂಘರ್ಷವನ್ನು ನೋಡುವ ಕ್ರಮಗಳು ಯಾವುದಾಗಿರಬೇಕು ಎಂಬುದನ್ನು ಅವರು ತೋರ್ಪಡಿಸುತ್ತಿದ್ದರು.

ವೈರತ್ವಕ್ಕಿಂತ ಸೌಹಾರ್ದದ ಮಾತುಕತೆಗಳು ಎರಡು ದೇಶಗಳನ್ನು ಶಾಂತಿಯ ಕಡೆಗೆ ಕರೆದೊಯ್ಯುತ್ತವೆ ಎಂಬ ಸತ್ಯವನ್ನು ಮನಗಾಣಿಸುತ್ತಿದ್ದರು. ಜಗತ್ತು ಮತ್ತು ದೇಶ – ಇವೆರಡನ್ನೂ ಮಾನವೀಯತೆ ಮತ್ತು ಶಾಂತಿಯ ಮೌಲ್ಯಗಳ ಕಣ್ಣಲ್ಲಿ ವ್ಯಾಖ್ಯಾನಿಸುವ ಅಪರೂಪದ ಬರಹಗಾರರಾಗಿ ಅವರು ಗಮನ ಸೆಳೆದಿದ್ದರು. ಈ ಕಾರಣಕ್ಕಾಗಿಯೇ ಅವರ ಬರಹಗಳ ಮರುಓದು ಅನಿವಾರ್ಯ ಎಂದೆನ್ನಿಸಿದೆ.

ಪತ್ರಿಕೆ ಮತ್ತು ಚಾನಲ್‍ಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಯುವಕರು ಯುದ್ಧದ ಪರವಾಗಿ ವಾದಿಸುವ ಜಾಯಮಾನ ರೂಢಿಸಿಕೊಂಡಿದ್ದಾರೆ. ಅಧಿಕಾರರೂಢ ಪಕ್ಷದ ನಾಯಕರ ಆರಾಧನೆಯನ್ನೇ ವೃತ್ತಿಪರ ಧರ್ಮ ಎಂದುಕೊಂಡಿದ್ದಾರೆ. ಪಾಕಿಸ್ತಾನದಂಥ ರಾಷ್ಟ್ರ ಶತೃರಾಷ್ಟ್ರ ಎಂದುಕೊಂಡು ಅದರ ವಿರುದ್ಧ ಯುದ್ಧ ಆಗಲೇಬೇಕು, ಆಗಲೇ ಬುದ್ಧಿ ಕಲಿಸಬಹುದು ಎಂಬ ಹಠದ ಧೋರಣೆಗಳೊಂದಿಗಿದ್ದಾರೆ. ಬುದ್ಧಿ ಮತ್ತು ಜೀವ- ಇವೆರಡನ್ನೂ ನಿರಾಕರಿಸುವ ಮೂಲಭೂತವಾದಿ ಪಡೆಗಳನ್ನು ಹಿಂದೆಂದಿಗಿಂತಲೂ ಹೆಚ್ಚಾಗಿ ನೆಚ್ಚಿಕೊಳ್ಳುತ್ತಿದ್ದಾರೆ. ಭಾವೋನ್ಮಾದದಲ್ಲಿ ಹೊಸ ಆಲೋಚನೆಗಳನ್ನು ತಿರಸ್ಕರಿಸುತ್ತಿದ್ದಾರೆ. ಇಂಥ ಸಂದರ್ಭದಲ್ಲಿ ನಯ್ಯರ್ ಅವರಂತಹ ಪತ್ರಕರ್ತರು ಬರೆದ ಬರಹಗಳು ಅವರನ್ನು ಸರಿಯಾದ ದಿಕ್ಕಿನಲ್ಲಿ ಮುನ್ನಡೆಸುತ್ತವೆ. ಆ ಬರಹಗಳ ಸಾರ್ವಕಾಲಿಕ ಶಕ್ತತೆಯೇ ನವಮನ್ವಂತರ ಸೃಷ್ಟಿಯ ಪ್ರಯೋಗಶೀಲತೆಗೆ ಪ್ರೇರಣೆ ನೀಡುತ್ತದೆ. ಇಲ್ಲದಿದ್ದರೆ ಪತ್ರಿಕೆಗಳು ಪೀಳಿಗೆಗಳ ದಾರಿ ತಪ್ಪಿಸುವ ಅಪಾಯಕಾರಿ ಕೃತ್ಯಗಳನ್ನು ಎಸಗುತ್ತವೆ. ಆ ಕೃತ್ಯ ಎಸಗುತ್ತಿರುವ ಕೆಲವು ಪತ್ರಿಕೆಗಳ ವಿಧ್ವಂಸಕ ನಡೆಗಳ ವಿರುದ್ಧ ನಿರಾಕರಣೆಯ ಆಂದೋಲನ ಜಾಗೃತಗೊಂಡು ಸಕಾರಾತ್ಮಕ ಮಾದರಿ ಪತ್ರಿಕಾರಂಗವನ್ನು ಕನ್ನಡದಲ್ಲಿ ಮರುಸ್ಥಾಪಿಸಲು ಕುಲದೀಪ್ ನಯ್ಯರ್ ಬರಹಗಳೂ ನೆರವಾಗುತ್ತವೆ. ಅಷ್ಟೇ ಅಲ್ಲ, ಅವುಗಳೊಂದಿಗಿನ ಆಪ್ತಸಂವಾದ ಕನ್ನಡದ ಪತ್ರಿಕಾಪ್ರಜ್ಞೆಗೆ ಹೊಸದೊಂದು ಸ್ವರೂಪವನ್ನೂ ತಂದುಕೊಡುತ್ತದೆ.

(ಲೇಖಕರು – ಡಾ.ಎನ್.ಕೆ.ಪದ್ಮನಾಭ, ಪ್ರಾಧ್ಯಾಪಕರು, ಎಸ್.ಡಿ.ಎಂ ಕಾಲೇಜು,ಉಜಿರೆ )

Continue Reading

ಅಂತರಂಗ

ನಿಬ್ಬೆರಗು ಮೂಡಿಸುವ ಇನಿದನಿಯ ಗಾನ ಕೋಗಿಲೆ ಜೆ.ಕೆ ಶಿವಕುಮಾರ್

Published

on

ವ್ಹಾ ,,, ಅನ್ನಲೇಬೇಕು

ವಾಹ್…! ಈ ಪ್ರಪಂಚದಲ್ಲಿ ಎಂತೆಂಥಾ ಅದ್ಭುತ ಕಲಾವಿದರು ಇದ್ದಾರೆ. ಅವರ ಕಲಾವಂತಿಕೆಯನ್ನು ಕಣ್ಣಾರೆ ಕಾಣುವುದು ಸಹ ಸೌಭಾಗ್ಯವೇ ಸರಿ. ಅದೊಂದು ಕಲೆಯೊಳಗಿನ ಕಲಾತ್ಮಕತೆಯ ದಿವ್ಯ ದರ್ಶನ – ದಿಗ್ಧರ್ಶನ ಎಂದರೂ ಅಚ್ಚರಿ ಏನಿಲ್ಲ.
ಇಂತಹ ಅಚ್ಚರಿಯ ಮೂಡಿಸುವ ಅಪರೂಪದ ಕಲಾವಿದರ ತಡಕಾಟದಲ್ಲಿ ತೊಡಗುವವರ ಕಣ್ಣೆದುರು ಗಾಡ್ ಗಿಫ್ಟ್ ಮೂಲಕ ನಿಬ್ಬೆರಗು ಮೂಡಿಸುತ್ತಾರೆ ದೇವನಗರಿಯ ಸಂಗೀತ ಕಲಾವಿದರಾದ ಶ್ರೀ ಜೆ.ಕೆ ಶಿವಕುಮಾರ್.

ಒಂದಷ್ಟು

ವೃತ್ತಿಯಲ್ಲಿ ಅಕೌಂಟೆಂಟ್ ಆಗಿ ಸೇವೆ ಸಲ್ಲಿಸಿ ಪ್ರಸ್ತುತ ವಿಶ್ರಾಂತ ಜೀವನ ನಡೆಸುತ್ತಿರುವ ಜೆ.ಕೆ ಶಿವಕುಮಾರ್ ಅವರು ದಾವಣಗೆರೆಯ ಪ್ರಸಿದ್ಧ ವರ್ತಕರಾದ ದಿ. ಜವಳಿ ಕೊಟ್ರಪ್ಪ ಅವರ 4ನೇ ಪುತ್ರರು. ಕೆ.ಟಿಜೆ ನಗರದ 16ನೇ ಕ್ರಾಸ್ ನಿವಾಸಿಯಾಗಿರುವ ಅವರು ಸುಮಾರು 35ಕ್ಕೂ ಅಧಿಕ ವರ್ಷಗಳಿಂದ ಹವ್ಯಾಸಿ ಕಲಾವಿದರಾಗಿ, ಸೃಜನಶೀಲ ಗಾಯಕರಾಗಿಯೂ ಸೇರಿದಂತೆ ಹತ್ತು ಹಲವು ಬಹುಮುಖ ಪ್ರತಿಭೆಯಿಂದ ರಾಜ್ಯಾದ್ಯಂತ ಇನಿದನಿಯ ಗಾನಕೋಗಿಲೆ ಎಂದೇ ಗುರುತಿಸಿಕೊಂಡಿದ್ದಾರೆ.

ಗಾಡ್ ಗಿಫ್ಟ್

ಹಾಡುವುದೆಂದರೆ ಸುಲಭದ ಮಾತಲ್ಲ. ಹೆಣ್ಣಿಗಾಗಲಿ ಗಂಡಿಗಾಗಲಿ ಅವರವರ ಧ್ವನಿಯಲ್ಲೇ ಆದರೂ, ಅದಕ್ಕೆ ಎಷ್ಟೇ ಪೂರ್ವಭ್ಯಾಸ ಇದ್ದರೂ ಸಂಗೀತ ಕಲೆ ಎಲ್ಲರಿಗೂ ಒಲಿಯುವಂತದ್ದಲ್ಲ. ಆದರೆ ಹೆಣ್ಣು ಮತ್ತು ಗಂಡು ಧ್ವನಿಯಲ್ಲಿ ಸರಾಗವಾಗಿ ಹಾಡಬಲ್ಲ ವಿಶಿಷ್ಟ ಕಲೆ ಶಿವಕುಮಾರ್ ಅವರಿಗೆ ಸಹಜವಾಗಿ, ಪ್ರಕೃತಿ ಮತ್ತು ದೇವರ ಕೊಡುಗೆಯಾಗಿ ಲಭಿಸಿದೆ. ಅವರು ಹಾಡಲು ನಿಂತರೆ ಪ್ರೇಕ್ಷಕರು ಮೂಕ ವಿಸ್ಮಿತರಾಗಿ ಆಲಿಸುತ್ತಾರೆ. ತಂತಾನೆ ಪ್ರೇಕ್ಷಕರಿಂದ ಹೊರಹೊಮ್ಮುವ ಕರತಾಡನ ಮುಗಿಲು ಮುಟ್ಟುತ್ತದೆ.
ಶಿವಕುಮಾರ್ ಅವರ ವಿಷಯದಲ್ಲಿ ಹೇಳಲೇಬೇಕಾದ ಅದ್ಭುತ ಸಂಗತಿ ಎಂದರೆ ಅವರು ಎಂದೂ ಸಂಗೀತ ಅಭ್ಯಾಸ ಮಾಡಿದವರಲ್ಲ. ಶಾಸ್ತ್ರೀಯವಾಗಿ ಕಲಿತವರಲ್ಲ. ರೇಡಿಯೋ, ಟೆಪ್‍ರೆಕಾರ್ಡರ್ ಟಿವಿಯಲ್ಲಿ ಹಾಡು ಕೇಳಿಸಿಕೊಳ್ಳುತ್ತಲೇ ಆ ಕಲೆಗೆ ಒಗ್ಗಿಕೊಂಡು – ಮೈಗೂಡಿಸಿಕೊಂಡವರು.


ಸುಮಾರು ವರ್ಷಗಳ ಹಿಂದೆ ಬೆಂಗಳೂರಿನಲ್ಲಿ ಖಾಸಗಿ ಕಂಪನಿಯೊಂದರಲ್ಲಿ ಖಾಸಗಿ ಕೆಲಸ ಮಾಡುತ್ತಿದ್ದ ಸಂದರ್ಭದಲ್ಲಿ ಆಕಸ್ಮಿಕವಾಗಿ ವೇದಿಕೆಯಲ್ಲಿ ತಮಗೆ ಸಿಕ್ಕ ಅವಕಾಶಗಳನ್ನು ಬಳಸಿಕೊಳ್ಳುತ್ತಿದ್ದ ಅವರು ನಂತರ ರಾಜ್ಯೋತ್ಸವದಂತಹ ಕಾರ್ಯಕ್ರಮಗಳಲ್ಲಿ ನಡೆಯುತ್ತಿದ್ದ ಆರ್ಕೆಸ್ಟ್ರಾಗಳಲ್ಲಿ ಹಾಡುವುದನ್ನು ರೂಢಿಸಿಕೊಂಡರು.
ಬಹುಮುಖ ಪ್ರತಿಭೆಯ ಗಾನಕೋಗಿಲೆ :
ಬೆಂಗಳೂರಿನ ಯಶವಂತಪುರದಲ್ಲಿ ಸವಾಲು ಎಂಬಂತೆ ಎದುರಾದ ಒಂದು ಪ್ರಸಂಗದಿಂದ ಅವರು ಹೆಣ್ಣು ಮತ್ತು ಗಂಡು ಧ್ವನಿಗಳೆರಡರಲ್ಲೂ ಹಾಡಲು ಪ್ರಾರಂಭಿಸಿದರು… ಹೀಗೆ ಆರಂಭವಾದ ಅವರ ಹಾಡುಗಾರಿಕೆಯ ಅಭಿಯಾನ ಇಂದಿಗೂ ಸಾಗುತ್ತಿದೆ. ಪ್ರಸ್ತುತ 57ರ ಹರೆಯದಲ್ಲೂ ಅವರ ಧ್ವನಿಯಲ್ಲಿ ಉಳಿದಿರುವ ಅದೇ ಮಾಧುರ್ಯ ಮತ್ತು ಉತ್ಸಾಹ ಪ್ರೇಕ್ಷಕ ವರ್ಗಕ್ಕೆ ಪವಾಡ ಸದೃಶ್ಯ ಎಂಬಂತೆ ಕಾಣುತ್ತಿದೆ. ಒಲವೇ ಜೀವನ ಸಾಕ್ಷಾತ್ಕಾರ…., ಸಿರಿವಂತನಾದರೂ ಕನ್ನಡ ನಾಡಲ್ಲೇ ಮೆರೆವೆ… ಎಂಬಿತ್ಯಾದಿ ಕನ್ನಡದ ಹಾಡುಗಳನ್ನು ಅವರು ಹಾಡುತ್ತಿದ್ದರೆ ಹೊತ್ತು ಹೋಗಿದ್ದೇ ಗೊತ್ತಾಗುವುದಿಲ್ಲ.
ಗಾಯನ ಅಷ್ಟೇ ಅಲ್ಲದೆ ಮಿಮಿಕ್ರಿ, ಅಭಿನಯ, ಜೋಕ್ಸ್ ಕಟ್ಟಿಂಗ್ ಇತ್ಯಾದಿ ಹಲವು ಹವ್ಯಾಸವುಳ್ಳ ಶಿವಕುಮಾರ್ ಅವರ ವ್ಯಕ್ತಿತ್ವ ಸೂಜಿಗಲ್ಲಿನಂತದ್ದು. ತಮ್ಮ ಬಳಿ ಇರುವವರನ್ನು ಆತ್ಮೀಯತೆಯಿಂದ ನಕ್ಕು ನಗಿಸುವ ಅವರು ಎಲ್ಲರ ಮನದಲ್ಲಿ ಸದಾ ಹಸಿರಾಗಿ ಉಳಿದು ಬಿಡುತ್ತಾರೆ. ಅಂತೆಯೇ ಅವರ ಇನಿದನಿಯ ಗಾಯನವೂ ಕೂಡ…. ಗೀತೆಗಳ ಆಯ್ಕೆಯ ಅವರ ಸೂಕ್ಷ್ಮತೆಯೇ ಅದಕ್ಕೆ ಕಾರಣ. ಹೆಚ್ಚಾಗಿ ಅವರು ಸಾಮಾಜಿಕ ಕಳಕಳಿ, ನಾಡು-ನುಡಿ, ದೇಶ ಪ್ರೇಮ -ದೇಶಭಿಮಾನ ಮೆರೆಯುವಂತಹ ಹಾಡುಗಳಿಗೆಯೇ ಧ್ವನಿಯಾಗಿದ್ದಾರೆ.

ಒಂದು ವಿಷಾದ

ಕೇಳುಗರ ಹೃದಯವನ್ನು ತಲ್ಲಣಗೊಳಿಸಿ ಪುಳಕಿತರನ್ನಾಗಿಸುವಂತೆ ರೋಚಕವಾಗಿ ಹಾಡಬಲ್ಲ ಈ ಅದ್ಭುತ ಗಾಯಕ ಗಾಯನವನ್ನೇ ತಮ್ಮ ವೃತ್ತಿಯಾಗಿಸಿಕೊಂಡಿದ್ದಲ್ಲಿ ಇಂದು ಸಿನಿಮಾ ರಂಗದಲ್ಲಿ ಅತ್ಯುನ್ನತ ಗಾಯಕರ ಪಟ್ಟಿಯಲ್ಲಿ ಗುರುತಿಸಿಕೊಳ್ಳಬಹುದಿತ್ತು, ಅಂತೆಯೇ ಕೋಟಿಗಟ್ಟಲೆ ಹಣವನ್ನೂ ಸಂಪಾದಿಸಿಬಹುದಿತ್ತು.
ಅದರಲ್ಲೂ ಶಿವಕುಮಾರ್ ಅವರು ಬೆಂಗಳೂರಲ್ಲಿ ಹಲವು ವರ್ಷಗಳ ಕಾಲ ತಂಗಿದ್ದಾಗ ಸಿನಿಮಾ ರಂಗದ ಅನೇಕ ದಿಗ್ಗಜರ ಪರಿಚಯವೂ ಆಗಿತ್ತು. ಹಲವರಿಗೆ ಇವರ ಕಲೆಯ ವೈಶಿಷ್ಟ್ಯತೆಯೂ ತಿಳಿದಿತ್ತು. ಸ್ವಾಭಿಮಾನದ ಕಾರಣ ಇವರಂತೂ ಯಾರಲ್ಲೂ ಅವಕಾಶಕ್ಕಾಗಿ ಬೇಡಿ ನಿಲ್ಲಲಿಲ್ಲ. ಆದರೆ ಅವರಲ್ಲಿ ಯಾರೊಬ್ಬರೂ ಸಹ ಗುರುತಿಸಿ ಪ್ರೋತ್ಸಾಹಿಸುವ ಮನಸ್ಸು ಮಾಡಲಿಲ್ಲ. ಶಾಸ್ತ್ರೀಯವಾಗಿ ಸಂಗೀತ ಕಲಿತಿಲ್ಲ ಎಂಬ ಒಂದೇ ಕಾರಣಕ್ಕಾಗಿ ಇವರ ಸಹಜ ಪ್ರತಿಭೆ ಮತ್ತು ಸಾಮಥ್ರ್ಯ ಬೆಳಕಿಗೆ ಬಾರದಾಯಿತು. ಕೈಗೆ ಬಂದ ಅದೆಷ್ಟೋ ಅವಕಾಶಗಳು ಸಹ ಕೈ ತಪ್ಪಿ ಹೋಗಿ ಮನಸ್ಸಿಗೆ ಘಾಸಿ ಕೂಡ ಮಾಡಿದ್ದವು. ಆದರೂ ಹಾಡುವುದು ಮಾತ್ರ ನಿಲ್ಲಲಿಲ್ಲ.

ಹ್ಯಾಟ್ಸಾಫ್

ಕಾಂಚಾಣ ಮತ್ತು ಕೀರ್ತಿಯ ಬೆನ್ನತ್ತಿ ಹೋಗದೆ, ಯಾವ ಸಂಭಾವನೆಯನ್ನೂ ಬಯಸದೆ ಕರೆದವರ ಆತ್ಮೀಯ ಆಹ್ವಾನಕ್ಕೆ ಒಲ್ಲೆನ್ನದೆ ಹೋಗಿ ಇತರರ ರಂಜಿಸುತ್ತಾ ಅದರಲ್ಲೇ ಆತ್ಮ ತೃಪ್ತಿ ಕಂಡುಕೊಳ್ಳುತ್ತಿರುವ ಶಿವಕುಮಾರ್ ಅವರ ವ್ಯಕ್ತಿತ್ವ ನಿಜಕ್ಕೂ ವಿಶೇಷವೇ ಸರಿ.
ಅಮೋಘ – ಅದ್ಭುತ ಕಲೆಗಳ ಸಾಕಾರ ಮೂರ್ತಿಯಂತಿರುವ ಶಿವಕುಮಾರ್ ಅವರದು ಸರಳತೆ, ಸಜ್ಜನಿಕೆಯೇ ಮೈದೆಳೆದಂತಿರುವ ವ್ಯಕ್ತಿತ್ವ. ತಮ್ಮ ಸಹೋದರ ಒಬ್ಬರಿಗೆ ಕಿಡ್ನಿ ದಾನ ಮಾಡುವ ಮೂಲಕ ಅವರ ಆರೋಗ್ಯದ ಕಾಳಜಿ ಹಾಗೂ ಸಹೃದಯತೆ ಮೆರದಿರುವ ಪುಣ್ಯಾತ್ಮ ಕೂಡ ಆಗಿದ್ದಾರೆ ಈ ಕಲಾವಿದ.

HATS OFF SIR

ಗಂಗಾಧರ ಬಿ.ಎಲ್ ನಿಟ್ಟೂರ್
ಮೊ.ಸಂ : 8867702396

Continue Reading

ಅಂತರಂಗ

ಮನಸೂರೆಗೊಳ್ಳುವ ಮಧುರ ಗಾಯಕಿ ‘ನವ್ಯಾ ಆರ್ ಭಟ್’

Published

on

ನವ್ಯಾ ಅರ್ ಭಟ್

ಮ್ಮೆ ಕೇಳಿದರೆ ಸಾಕು ಮತ್ತೆ ಮತ್ತೆ ಕೇಳಬೇಕಿನಿಸುವ ಆ ಹಾಡಿನ ಧ್ವನಿಗೆ ಯಾರಾದರೂ ತಲೆದೂಗಲೇಬೇಕು, ಮನಸಾರೆ ಮೆಚ್ಚಲೇಬೇಕು, ಮತ್ತೊಮ್ಮೆ ಕೇಳುವ ಮನಸ್ಸು ಮಾಡಲೇಬೇಕು. ಅಂತಹ ಮಧುರ ಇನಿ ದನಿಯ ಈ ಗಾನ ಕೋಗಿಲೆಯ ಬಗ್ಗೆ ನಿಮ್ಮ ಮುಂದೆ ಒಂದಷ್ಟು ಹೇಳಲೇಬೇಕು.

ಪ್ರಕೃತಿಯೇ ವರ

ಕೆಲವರಿಗೆ ಹಾಡುವ ಕಲೆ ಹವ್ಯಾಸವಾದರೆ, ಕೆಲವರಿಗೆ ಅಭ್ಯಾಸದ ಬಲದಿಂದ ಒಲಿಯಬಹುದೇನೋ !? ಕೆಲವರಿಗೆ ಜನ್ಮಗತವಾಗಿ ಬಂದರೂ ಅವರು ಮತ್ತು ಆ ಕಲೆ ಎರಡು ಸಹ ಬೆಳಕಿಗೆ ಬರುವುದು ಅಷ್ಟಕ್ಕಷ್ಟೇ. ಆದರೆ ಕೆಲವೇ ಕೆಲವರಿಗದು ಪ್ರಕೃತಿಯ ವರವಾಗಿ ಲಭಿಸಿರುತ್ತದೆ. ಹಾಗಾಗಿಯೇ ಏನೋ ಅವರು ಸುಮ್ಮನಿರಲು ಪ್ರಯತ್ನ ಪಟ್ಟರೂ ಆ ಕಲೆಯೇ ಅವರ ಬೆನ್ನು ಬಿದ್ದು ಅವರನ್ನು ಬೆಳಕಿಗೆ ತರುತ್ತದೆ. ಅಂತಹ ಅಪರೂಪದ ಸಾಲಿಗೆ ಸೇರುತ್ತಾರೆ ಹರಿಹರದ ನವ್ಯಾ ಆರ್ ಭಟ್. ಅವರ ಪಾಲಿಗೆ ಹಾಡುಗಾರಿಕೆ ಜನ್ಮಗತವೂ ಹಾಗೂ ಪ್ರಕೃತಿಯ ಕೊಡುಗೆಯೂ ಹೌದು.

ಮನೆಯೇ ಸಂಗೀತಾಲಯ

ನವ್ಯಾ ಅವರಿಗೆ ಮನೆಯೇ ಎಲ್ಲಾ. “ಮನೆಯೇ ಮೊದಲ ಪಾಠಶಾಲೆ ಜನನಿ ತಾನೇ ಮೊದಲ ಗುರು” ಎಂಬಂತೆ ಅವರೊಳಗಿನ ಆ ಸುಪ್ತ ಕಲೆಯ ಅನಾವರಣಕ್ಕೆ ಮೊಟ್ಟ ಮೊದಲು ಪ್ರೋತ್ಸಾಹಿಸಿ – ಪ್ರೇರಣೆ ನೀಡಿದ್ದು ಅವರ ತಾಯಿ ಶ್ರೀಮತಿ ಉಮಾ ಆರ್ ಭಟ್.
ಹರಿಹರದ ಖಾಸಗಿ ಶಾಲೆಯೊಂದರಲ್ಲಿ ಸಂಗೀತ ಶಿಕ್ಷಕಿಯಾಗಿರುವ ಉಮಾ ಭಟ್ ಅವರು ನುರಿತ ಗಮಕ ಕಲಾವಿದೆಯೂ ಹೌದು. ಹಾಗಾಗಿ ನವ್ಯಾ ಅವರಿಗೆ ಬಾಲ್ಯದಲ್ಲಿ ತಮ್ಮ ತಾಯಿಯವರಿಂದ ಪ್ರಥಮ ಸಂಗೀತ ಸಂಸ್ಕಾರ ಗಮಕ ಕಲೆಯ ಮೂಲಕವೇ ಆರಂಭವಾಯಿತು. ದಾವಣಗೆರೆಯ ಬಾಪೂಜಿ ಹೈಟೆಕ್ ಇನ್‍ಸ್ಟಿಟ್ಯೂಷನ್ ಆಫ್ ಟೆಕ್ನಾಲಜಿ ಕಾಲೇಜಿನಲ್ಲಿ ಬಿ.ಎಸ್ಸಿ ಓದುತ್ತಿರುವ ನವ್ಯಾ ಅವರಿಗೆ ಗಮಕವೆಂದರೆ ಈಗಲೂ ಅದೇ ಪ್ರೀತಿ. ಹಳೆಗನ್ನಡ ಪದ್ಯ ಅಥವಾ ಕಾವ್ಯ ವಾಚನದ ವಿಶಿಷ್ಠ ಶೈಲಿ ಎನಿಸಿರುವ ಗಮಕದಲ್ಲಿ ಹಾಡುವವರ ಸಂಖ್ಯೆ ಪ್ರಸ್ತುತ ದಿನಮಾನಗಳಲ್ಲಿ ವಿರಳವೇ ಸರಿ. ಬಾಲ್ಯದಲ್ಲೇ ದೊರೆತ ಸಂಸ್ಕಾರ, ಆಸಕ್ತಿ, ಅವಿರತ ಅಭ್ಯಾಸ ಹಾಗೂ ಪರಿಶ್ರಮದ ಫಲವಾಗಿ ಈ ವಿರಳ ಹಾಡುಗಾರಿಕೆಯ ಕಲೆಯಲ್ಲಿ ಈಗಾಗಲೇ ಸಾಕಷ್ಟು ನೈಪುಣ್ಯತೆ ಸಾಧಿಸಿದ್ದಾರೆ ನವ್ಯಾ.

ನವ್ಯಾ ಅವರ ತಂದೆ ರವಿ ಭಟ್ ಅವರು ಕೂಡ ಗಾಯಕರು. ಅವರಿಗೆ ಸಿನಿಮಾ ಹಾಡುಗಳನ್ನು ಹಾಡುವುದರಲ್ಲಿ ಅತಿಯಾದ ಆಸಕ್ತಿ. ಜೊತೆಗೆ ತಬಲ, ಕಾಂಗೋ ಮತ್ತು ಕೀ ಬೋರ್ಡ್ ಕೂಡ ನುಡಿಸುತ್ತಾರೆ. ಬಿಡುವು ದೊರೆತಾಗಲೆಲ್ಲಾ ತಮ್ಮ ವಿದ್ಯೆಯನ್ನು ಮಗಳಿಗೂ ಧಾರೆ ಎರೆಯುತ್ತಿದ್ದಾರೆ. ಇಷ್ಟೇ ಅಲ್ಲದೆ, ನವ್ಯಾ ಅವರ ಅಕ್ಕ ಕಾವ್ಯ ಶುಕ್ಲಾ ಸಹ ಸುಗಮ ಸಂಗೀತ ಗಾಯಕಿ. ನಿಜಕ್ಕೂ ನವ್ಯಾ ಅವರದು ಎಂತಹ ಅದೃಷ್ಟ … ! ಸಂಗೀತ ತರಬೇತಿಗಾಗಿ ಇತರೆಯವರಂತೆ ಎಲ್ಲೆಲ್ಲೋ ಅಲೆದಾಡುವ ಪಜೀತಿ ಅನುಭವಿಸದೆ ಮನೆಯಲಿಯೇ ನಾನಾ ಪ್ರಕಾರಗಳಲ್ಲಿ ಪರಿಣಿತಿ ಪಡೆಯುವ ಅವಕಾಶ ನವ್ಯಾ ಅವರಿಗೆ ಲಭಿಸಿದೆ.ನವ್ಯಾ ಅವರ ಕುಟುಂಬದ ಮತ್ತೊಂದು ವಿಶೇಷವನ್ನು ಇಲ್ಲಿ ಪ್ರಸ್ತಾಪಿಸಲೇಬೇಕಿದೆ. ಅವರ 73 ವರ್ಷದ ಅಜ್ಜಿ ( ತಂದೆಯ ತಾಯಿ ) ಶ್ರೀಮತಿ ಹೆಚ್.ರತ್ನಾವತಿಯವರ ಬತ್ತದ ಉತ್ಸಾಹ ನೋಡಿದರೆ ಅಚ್ಚರಿ ಎನಿಸುತ್ತದೆ. ತಮ್ಮ ಈ ಇಳಿ ವಯಸ್ಸಲ್ಲೂ ಸುಮ್ಮನೆ ಕೂರದೆ, ವಿಶ್ರಾಂತಿಯನ್ನು ಬಯಸದೆ ಒಂದಿಲ್ಲ ಒಂದು ಚಟುವಟಿಕೆಯಲ್ಲಿ ಮಗ್ನರಾಗಿರುತ್ತಾರೆ. ವಿಶೇಷವಾಗಿ ಹಪ್ಪಳ, ಸಂಡಿಗೆ, ಪೂಜೆಗಾಗಿ ಹತ್ತಿಯ ಬತ್ತಿ ಮಾಡುವ ಕಾರ್ಯದಲ್ಲಿ ತೊಡಗುವ ಅವರ ಕ್ರಿಯಾಶೀಲತೆ ನಿಜಕ್ಕೂ ಮಾದರಿಯೇ ಸರಿ. ಅವರ ಮತ್ತೊಬ್ಬ ಅಜ್ಜಿ ( ತಾಯಿಯ ತಾಯಿ ) ಶ್ರೀಮತಿ ಚಂದ್ರಲಾನಾಯಕ್ ಅವರು ಭಾಮಿನಿ ಮತ್ತು ವಾರ್ಧಕ ಷಟ್ಪದಿಯಲ್ಲಿ ಹರಿಹರೇಶ್ವರ ಮಹಿಮೆ ಹಾಗೂ ಶ್ರೀ ಚಂದ್ರಲಾ ಪರಮೇಶ್ವರಿ ಎಂಬ ಎರಡು ಕೃತಿಗಳನ್ನು ರಚಿಸಿದ್ದಾರೆ. ಅಕ್ಷರಶಃ ನವ್ಯಾ ಅವರ ಮನೆಯು ಸಾಹಿತ್ಯ ಮತ್ತು ಸಂಗೀತ ಲೋಕಗಳೆರಡರ ಸಂಗಮವಾಗಿದೆ.

ಸಂಗೀತ ಪಯಣ

ಬಾಲ್ಯದಿಂದಲೇ ಆರಂಭವಾದ ತಮ್ಮ ಸಂಗೀತ ಪಯಣದಲ್ಲಿ ನವ್ಯಾ ಅವರು ಈಗಾಗಲೇ ಸಾಕಷ್ಟು ಪಯಣಿಸಿದ್ದಾರೆ. ಹರಿಹರದ ಹಲವು ದೇವಸ್ಥಾನಗಳಲ್ಲಿ ಭಜನೆ, ಕೀರ್ತನೆ, ದೇವರನಾಮ ಹಾಡುವ ಮೂಲಕ ಬಾಲ್ಯದಲ್ಲೇ ಆರಂಭವಾದ ಅವರ ಹಾಡುಗಾರಿಕೆ ನಿರಂತರ ಸಾಗುತ್ತಿದೆ. ಶಿವಮೊಗ್ಗ, ಮಂಗಳೂರು ಸೇರಿದಂತೆ ರಾಜ್ಯದ ಮೂಲೆ – ಮೂಲೆಗಳಲ್ಲೂ ಸಹ ಅವರ ಸಂಗೀತ ಕಛೇರಿಯ ನಿನಾದ ಮೊಳಗಿದೆ. 2016 ರಲ್ಲಿ ಮಂತ್ರಾಲಯದ ಗುರು ರಾಘವೇಂದ್ರ ದೇವಾಲಯದಲ್ಲಿ ಅವರು ನೀಡಿದ ಗಮಕ ಕಾರ್ಯಕ್ರಮ ಸಂಗೀತ ಕ್ಷೇತ್ರದಲ್ಲಿ ಅವರನ್ನು ಮೇಲ್ಪಂಕ್ತಿಯಲ್ಲಿ ಗುರುತಿಸುವಂತೆ ಮಾಡಿದೆ. ಈ ಟಿವಿಯ ಎದೆ ತುಂಬಿ ಹಾಡುವೆನು, ಕಸ್ತೂರಿ ಟಿವಿಯ ಸಪ್ತಸ್ವರ, ಸುವರ್ಣ ಟಿವಿಯ ಲಿಟ್ಲ್ ಸ್ಟಾರ್ ಸಿಂಗರ್, ಉದಯ ಟಿವಿಯ ಸಂಗೀತ ಮಹಾಯುದ್ಧ ಹಾಗೂ ಹಾಡು ಬಾ ಕೋಗಿಲೆ, ಝಿ ಟಿವಿಯ ಸರಿಗಮಪ ಲಿಟ್ಲ್ ಚಾಂಪ್ಸ್, ಹರಿಹರದಲ್ಲಿ ಆಯೋಜಿಲಾಗಿದ್ದ ಚಂದನ ಟಿವಿಯ ಮಧುರ ಮಧುರವೀ ಮಂಜುಳಗಾನ ಹಾಗೂ ದಾವಣಗೆರೆಯ ಕನ್ನಡ ಮತ್ತು ಸಂಸ್ಕøತಿ ಇಲಾಖೆಯ ಹತ್ತು ಹಲವು ಸಂಗೀತ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿರುವ ನವ್ಯಾ ಅವರು ಹೋದೆಡೆಯಲ್ಲೆಲ್ಲಾ ಮಧುರ ಗಾಯಕಿ ಎಂದೇ ಗುರುತಿಸಿಕೊಂಡಿದ್ದಾರೆ. ಒಮ್ಮೆ ಅವರ ಧ್ವನಿಯನ್ನು ಕೇಳಿದವರು ಅವರ ಹೆಸರನ್ನು ಇಂದಿಗೂ ಮರೆತಿಲ್ಲ.

ಪ್ರಶಸ್ತಿ ಪುರಸ್ಕಾರಗಳ ಗರಿ

ಲೆಕ್ಕಕ್ಕಾಗಿ ಎಣಿಸುತ್ತಾ ಕೂತರೆ ಬಾಲ್ಯದಿಂದಲೂ ಹಾಡುತ್ತಿರುವ ಈ ಹಾಡು ಹಕ್ಕಿಗೆ ಮಾಧ್ಯಮಗಳಿಂದ ಹಾಗೂ ಸಾರ್ವಜನಿಕ ವಲಯಗಳಿಂದ ಸಂದಿರುವ ಪ್ರಶಸ್ತಿ ಪುರಸ್ಕಾರಗಳ ಸಂಖ್ಯೆ ಸಾವಿರಾರು ಆಗಬಹುದೇನೋ. ಆದರೆ ತನಗೆ ಈವರೆಗೆ ಕೊಡಮಾಡಿರುವ ಬಿರುದು, ಸನ್ಮಾನಗಳ ಬಗ್ಗೆ ತನ್ನೊಳಗೆ ಅಹಮಿಕೆ ತಲೆದೋರದಂತೆ ಸರಳತನ ರೂಡಿಸಿಕೊಂಡಿರುವ ನವ್ಯಾ ಅವರು ಹೇಳುತ್ತಾರೆ – “ಈಗ್ಗೆ ಸುಮಾರು 10 ವರ್ಷಗಳ ಹಿಂದೆ ಶ್ರೀಯುತ ಅಮರನಾರಾಯಣ್ ಅವರು ಜಿಲ್ಲಾಧಿಕಾರಿಯಾಗಿದ್ದ ಸಂದರ್ಭದಲ್ಲಿ, ಜಿಲ್ಲಾಡಳಿತ ಮತ್ತು ಕನ್ನಡ – ಸಂಸ್ಕøತಿ ಇಲಾಖೆಯ ಸಹಯೋಗದಲ್ಲಿ ಆಯೋಜಿಸಲಾಗಿದ್ದ ಸಂಗೀತ ಕಾರ್ಯಕ್ರಮವೊಂದನ್ನು ಅವರೊಂದಿಗೆ ತಾನೂ ಕೂಡ ಉದ್ಘಾಟನೆ ಮಾಡಿದ್ದು ಹಾಗೂ ಖಾಸಗಿ ಸಂಸ್ಥೆಯೊಂದರಿಂದ ಪಡೆದ – ಗಾನ ವಿಶಾರದೆ ಎಂಬ ಬಿರುದು ತಾನು ಪಡೆದ ಎಲ್ಲಾ ಪುರಸ್ಕಾರಗಳಿಗಿಂತ ಅತೀವ ಸಂತಸ ಮತ್ತು ಹೆಮ್ಮೆಯ ಭಾವ ಮೂಡಿಸಿದೆ. ನನಗಷ್ಟೇ ಸಾಕು”.

ಮಾದರಿ ಗುರಿ – ಆದರ್ಶ ಕನಸು

ಹಾಗೇ ನೋಡಿದರೆ ಈ ಜಗತ್ತಿನಲ್ಲಿ ಪ್ರತಿಯೊಬ್ಬ ಮನುಷ್ಯನಿಗೂ ಒಂದಲ್ಲ ಒಂದು ಕಲೆ ಇದ್ದೇ ಇರುತ್ತದೆ. ಕೆಲವರು ಬೆಳಕಿಗೆ ಬರುತ್ತಾರೆ. ಕೆಲವರು ಸಿಕ್ಕ ಅವಕಾಶಗಳನ್ನು ಸರಿಯಾಗಿ ಬಳಸಿಕೊಳ್ಳದೆ ದೂರ ಉಳಿಯುತ್ತಾರೆ. ಕೆಲವರು ಅವಕಾಶ ವಂಚಿತರಾದರೆ, ಮತ್ತೆ ಕೆಲವರು ಅವಕಾಶ ಪಡೆಯಲು ನಾನಾ ಸಾಹಸ ಮಾಡುತ್ತಾ ವಾಮಮಾರ್ಗಗಳ ಬೆನ್ನು ಕೂಡ ಬೀಳುತ್ತಾರೆ. ಇನ್ನು ಕೆಲವರಿಗಂತೂ ಅವಕಾಶಗಳು ಲಭಿಸುತ್ತಾ ಹೋದರೆ ಸಾಕು ಅವರ ವರ್ತನೆ ಮತ್ತು ವರಸೆಗಳೇ ಬೇರೆಯಾಗಿ ಬಿಡುತ್ತವೆ. ಇಂಥವರ ನಡುವೆ ನವ್ಯಾ ಅವರು ತಾವು ಕಟ್ಟಿಕೊಂಡಿರುವ ಕನಸು ಮತ್ತು ಗುರಿಯಿಂದಾಗಿಯೇ ವಿಭಿನ್ನ ಎನಿಸಿಕೊಳ್ಳುತ್ತಾರೆ. ಸಂಗೀತದ ಮೂಲಕ ಬುದ್ಧಿ ಮಾಂದ್ಯ ಮಕ್ಕಳ ಆರೋಗ್ಯ ಸುಧಾರಣೆ ಮಾಡಬೇಕು. ಸಮಾಜದ ಮುಖ್ಯ ವಾಹಿನಿಯಲ್ಲಿ ಅವರು ಸಹ ಇತರರಂತೆ ಸುಖಮಯ ಜೀವನ ನಡೆಸುವುದಕ್ಕಾಗಿ ತನ್ನ ಕಲೆ ಬಳಕೆಯಾಗಬೇಕು ಎಂದು ಬಯಸುತ್ತಾರೆ ನವ್ಯಾ. ಅಲ್ಲದೆ ತಮ್ಮ ಇಂಪಾದ ಈ ಧ್ವನಿಯು ನೊಂದವರಿಗೆ ಚೈತನ್ಯ ಶಕ್ತಿಯಾಗಬೇಕೆಂದು ಯೋಚಿಸುವ ನವ್ಯಾ ಅವರ ಚಿಂತನೆ ನಿಜಕ್ಕೂ ಇತರರಿಗೆ ಮಾದರಿಯೇ ಸರಿ.

ಶುಭ ನುಡಿ – ಶುಭಾರೈಕೆ

ಕೇಳುಗರ ಮನಸೂರೆಗೊಳ್ಳುವಂತೆ ತನ್ಮಯತೆಯಿಂದ ಹಾಡಿ ಇತರರನ್ನು ರಂಜಿಸುವ ಜೊತೆ ಸಮಾಜಕ್ಕೆ ಉತ್ತಮ ಸಂದೇಶ ನೀಡುವತ್ತ ಕೂಡ ಚಿತ್ತ ಹರಿಸಿರುವ ಓ ಮಧುರ ಗಾಯಕಿಯೇ ನಿಮಗಿದೋ ಶುಭವಾಗಲಿ ಆಲ್ ದಿ ಬೆಸ್ಟ್ ನವ್ಯಾ.

– ಗಂಗಾಧರ್ ಬಿ.ಎಲ್ ನಿಟ್ಟೂರ್
ಮೊ.ಸಂ : 8867702396

Continue Reading
Advertisement

Trending