Connect with us

ಲೋಕಾರೂಢಿ

ಸಮರ್ಥ ನಾಯಕತ್ವಕ್ಕಾಗಿ ಜವಾಬ್ದಾರಿ ನಿರ್ವಹಣೆ

Published

on

ಕೇಂದ್ರ ಸರ್ಕಾರದ ಸಾಧನೆ ಶೂನ್ಯ” ಎಂದು ಬೊಬ್ಬಿರಿಯುವವರ ಮಾತುಗಳಿಗೆ ನನ್ನ ಸಹಮತವಿಲ್ಲ. ಸಾಧನೆಯನ್ನು ಅಭಿವೃದ್ಧಿ ಎಂದು ಬಣ್ಣಿಸಬಹುದಾದರೆ ಖಂಡಿತವಾಗಿಯೂ ಹಲವಾರು ಅಭಿವೃದ್ಧಿ ಕಾರ್ಯಗಳು ಕಳೆದ ಐದು ವರ್ಷಗಳಲ್ಲಿ ಆಗಿದೆ. ಅದೇ ರೀತಿ ಈ ಹಿಂದಿನ ಸರ್ಕಾರ ಸಾಧನೆಗಳನ್ನು ಮಾಡಿಲ್ಲವಾ? ಅದಕ್ಕೂ ಮೇಲಿನದೇ ಉತ್ತರ ನನ್ನದು.

ಅಭಿವೃದ್ಧಿಗಳಾಗುವುದು ಇದ್ದಕ್ಕಿದ್ದಂತೆ ಅಲ್ಲ, ಹಿಂದಿನ ಸರ್ಕಾರಗಳೂ ಒಂದಷ್ಟು ಪ್ರಯತ್ನ ಮಾಡಿದ್ದನ್ನು ಮುಂದುವರೆಸಿ ಈಗಿನ ಸರ್ಕಾರ ಅದಕ್ಕೊಂದು ರೂಪು ಕೊಟ್ಟಿರುತ್ತದೆ. ಪ್ರತಿಯೊಂದು ಸರ್ಕಾರದ ಕೆಲಸ ದೇಶದ ಸಮಗ್ರ ಕಟ್ಟುವಿಕೆ. ಅದರಲ್ಲಿ ನಿಷ್ಕ್ರಿಯವಾಗಿದ್ದ ಸರ್ಕಾರಗಳು ಯಾವುದೂ ಇಲ್ಲ.

ಮೇಲಿನ ವಿಷಯವನ್ನು ಪಕ್ಕಕ್ಕಿಟ್ಟು ಲೋಕಸಭಾ ಕ್ಷೇತ್ರಗಳ ವ್ಯಾಪ್ತಿಗೆ ಬರುವುದಾದರೆ, ಪ್ರತಿಯೊಂದು ಲೋಕಸಭಾ ಕ್ಷೇತ್ರಗಳ ಜನಪ್ರತಿನಿಧಿಯಾಗಿ ಆಯ್ಕೆಯಾಗುವ ವ್ಯಕ್ತಿಯು ಆಯಾ ಪ್ರದೇಶದ ಜನರ ಆಶೋತ್ತರಗಳಿಗೆ, ಸಮಸ್ಯೆಗಳಿಗೆ ಧನಿಯಾಗಬೇಕಾದವನು. ಚುನಾವಣೆ ಎದುರಿಸುವ ಪೂರ್ವದಲ್ಲಿ ತನ್ನ ಕನಸುಗಳೇನು, ಪ್ರದೇಶದ ಅಭಿವೃದ್ಧಿಗೆ ತನ್ನ ಚಿಂತನೆಗಳೇನು, ಇಲ್ಲಿಂದ ಪ್ರಮುಖವಾಗಿ ಹೊರಡಿಸಬೇಕಾದ ಧ್ವನಿಯೇನು ಎಂಬೆಲ್ಲ ಮಾಹಿತಿಗಳನ್ನು ಜನರೆದುರು ತೆರೆದಿಡಬೇಕು.

ಅದನ್ನು ಹೊರತುಪಡಿಸಿ, ತನ್ನ ಮುಖಂಡರ-ನಾಯಕರ ಹೆಸರನ್ನು ಹೇಳಿ, ರಾಷ್ಟ್ರೀಯ ಮಟ್ಟದ ಸಾಧನೆಗಳನ್ನು ಬಿಂಬಿಸಿ ತನಗೆ ಮತ ನೀಡಿ ಎಂದು ಕೇಳುವುದಿದೆಯಲ್ಲ, ಅದು ತನ್ನಲ್ಲಿರುವ ಜೊಳ್ಳನ್ನು ತಾನೇ ತೆರೆದಿಟ್ಟಂತೆ. ಬಿಜೆಪಿಯವರಾದರೆ ಮೋದಿಯ ಹೆಸರನ್ನು ಹೇಳುತ್ತಾ, ಕಾಂಗ್ರೆಸ್‍ನವರಾದರೆ ರಾಹುಲ್ ಗಾಂಧಿ, ಇಂದಿರಾ ಗಾಂಧಿ, ರಾಜೀವ್ ಗಾಂಧಿ ಎಂದು ಬಡಬಡಿಸುತ್ತಾ, ಇನ್ಯಾವುದೋ ಪಕ್ಷದವರಾದರೆ ಕೇಂದ್ರದಲ್ಲಿರುವವರನ್ನು ಸೋಲಿಸಬೇಕೆಂದು ಹೇಳುತ್ತಾ ಮತಯಾಚನೆ ಮಾಡುವುದು ನಿಜಕ್ಕೂ ಬಾಲಿಶ. ಅದರಲ್ಲೂ ಎದುರಾಳಿಯನ್ನು ಹೀನಾಮಾನವಾಗಿ ಬಯ್ಯುತ್ತಾ, ತಮ್ಮ ಕೊಳಕು ನಾಲಿಗೆಯನ್ನು ಚಾಚುವ ಅಭ್ಯರ್ಥಿಗಳು ತಮ್ಮ ‘ನಾಯಕತ್ವ’ದ ಗುಣವನ್ನು ಹರಾಜಿಗಿಟ್ಟುಬಿಡುತ್ತಾರೆ.

ನಾಳೆಯ ದಿವಸ ಕೇಂದ್ರಕ್ಕೆ ಸ್ಥಳೀಯ ಸಮಸ್ಯೆಗಳು ಅರಿವಾಗಬೇಕಾದಲ್ಲಿ ಅದನ್ನು ಸಮರ್ಥವಾಗಿ ತಲುಪಿಸಬೇಕಾದದ್ದು ಸಂಸದರ ಕೆಲಸ. ಆದರೆ ಸಂಸದರಿಗೇ ಸ್ಥಳೀಯ ಸಮಸ್ಯೆಗಳ ಬಗ್ಗೆ ಯೋಚನೆ ಇಲ್ಲವೆಂದಾದಲ್ಲಿ ಇನ್ನೆಲ್ಲಿಯ ಮಾತು? ರಾಷ್ಟ್ರೀಯ ನಾಯಕರ ಹೆಸರನ್ನು ಹೇಳಿ ಆರಿಸಿ ಬಂದಮೇಲೆ ಅಷ್ಟರ ಮಟ್ಟಿಗೆ ಅಧಿಕಾರ ವಹಿಸಿಕೊಂಡ ನೆಮ್ಮದಿ ಜನಪ್ರತಿನಿಧಿಗಳನ್ನು ನಿರಾಳ ಮಾಡಿಬಿಡುತ್ತದೆ. ಇನ್ನೈದು ವರ್ಷ ಹಾಗೇ ಹೀಗೇ ತಳ್ಳಿದಲ್ಲಿ ಮತ್ತೆ ಚುನಾವಣೆಗೆ ಸಿದ್ಧರಾದರಾಯಿತು.

ಮತದಾರರು ಮಾಡುವ ತಪ್ಪು ಇದು. ಕೇವಲ ಪಕ್ಷದ ಬೆಂಬಲಕ್ಕೋಸ್ಕರವೋ ಅಥವಾ ರಾಷ್ಟ್ರೀಯ ನಾಯಕರೊಬ್ಬರಿಗೋಸ್ಕರವೋ ಸ್ಥಳೀಯ ಪ್ರತಿನಿಧಿಗಳನ್ನು ಪ್ರಶ್ನೆ ಮಾಡುವುದನ್ನು ನಿರ್ಲಕ್ಷಿಸಿಬಿಡುತ್ತಾರೆ. ಮತಯಾಚನೆಗೆ ಬಂದವರಲ್ಲಿ “ನಿಮ್ಮ ಯೋಚನೆಗಳೇನು?” ಎಂದು ಕೇಳುವುದನ್ನು ಮರೆತುಬಿಡುತ್ತಾರೆ. ಈ ತಪ್ಪು ಮುಂದಿನ ಐದು ವರ್ಷಗಳವರೆಗೆ ಮತದಾರರ ಗೊಣಗುವಿಕೆಗೆ ಕಾರಣವಾಗುತ್ತದೆ. ಕೇಂದ್ರದಲ್ಲಿ ಯಾವುದೇ ಒಂದು ಪಕ್ಷ ಬಹುಮತದಿಂದ ಆಯ್ಕೆಯಾಗುವುದು ಎಷ್ಟು ಮುಖ್ಯವೋ, ಅದೇ ರೀತಿ ಸ್ಥಳೀಯ ನಾಯಕರೂ ಸಮರ್ಥರಾಗಿರುವುದು ಕೂಡ ಅಷ್ಟೇ ಮುಖ್ಯ. ನಾಳೆಯ ದಿನ ಸಮಸ್ಯೆಗಳನ್ನು ಮತದಾರ ಹೇಳಿಕೊಳ್ಳಬೇಕಾಗಿರುವುದು ಸ್ಥಳೀಯ ಸಂಸದರಲ್ಲಿ. ಮತದಾನ ನಮ್ಮ ಕರ್ತವ್ಯ, ಕರ್ತವ್ಯ ಲೋಪವಾಗದಂತೆ ನಡೆದುಕೊಳ್ಳುವುದು ಪ್ರತಿಯೊಬ್ಬ ಮತದಾರರ ಜವಾಬ್ದಾರಿ. ಜವಾಬ್ದಾರಿಯನ್ನು ಸಮರ್ಥವಾಗಿ ನಿರ್ವಹಿಸಿ ಸಮರ್ಥ ನಾಯಕತ್ವವನ್ನು ಪಡೆಯುವುದು ನಮ್ಮೆಲ್ಲರ ಹಕ್ಕು.

ಕಿರಣ್ ಭೈರುಂಬೆ

ಸುದ್ದಿದಿನ.ಕಾಂ|ವಾಟ್ಸಾಪ್|9986715401

ಲೋಕಾರೂಢಿ

ಮನುಕುಲದ ಉಳಿವಿಗೆ ಮಾನವ ಪ್ರೇಮದ ಸಂಕಲ್ಪ

Published

on

  • ಗಂಗಾಧರ ಬಿ ಎಲ್ ನಿಟ್ಟೂರ್

ನಿಜ ನಾವೀಗ ಸಂದಿಗ್ಧ ಮತ್ತು ಸಂಕಟದ ಪರಿಸ್ಥಿತಿಯಲ್ಲಿದ್ದೇವೆ. ಹೌದು, ಇದು ನಮಗಷ್ಟೇ ಅಲ್ಲ ಇಡೀ ಲೋಕಕ್ಕೇ ಬಂದೆರಗಿರುವ ಕಂಟಕ. ಆದರೆ ಈ ಸಮಯದಲ್ಲಿ ನಾವು ಈ ವಿಷಮ ಪರಿಸ್ಥಿತಿಯನ್ನು ಗೆಲ್ಲುವ ಸಂಕಲ್ಪ ಮಾಡಬೇಕಿದೆ, ಪರಿಹಾರ ಕಂಡುಕೊಳ್ಳುವ ಪ್ರಯತ್ನ ಮತ್ತು ಆ ಆಲೋಚನೆಯನ್ನು ಮಾತ್ರ ಮಾಡಬೇಕಿದೆ. ಮುಂಜಾಗ್ರತಾ ಕ್ರಮಗಳನ್ನು ಅನುಸರಿಸಬೇಕಿದೆ ಹೊರತು ಆ ವೈರಸ್ ನ ಭಯವನ್ನು ಉಲ್ಬಣಗೊಳಿಸುವ ಕಾರ್ಯವನ್ನಲ್ಲ.

ಇದು ಎಲ್ಲಿಂದ ಬಂತು, ಯಾರಿಂದ ಹರಡಿತು ಎಂಬುದನ್ನೇ ಚರ್ಚಿಸುತ್ತಾ ಥೂ ಅವರಿಗೆ ಹಾಗಾಗಲಿ ಹೀಗಾಗಲಿ ಎಂದು ದೂರಿದರೆ ಬಂದಿದ್ದೇನು ಫಲ ? ಆ ದೂರು ದುಮ್ಮಾನಗಳು ಈಗ ಅಗತ್ಯವೇ ? ಅದರಿಂದ ಕೊರೋನಾ ತೊಲಗಿ ಬಿಡುವುದೇ ಅಥವಾ ಸೋಂಕಿತರ ಸೋಂಕು ನಿವಾರಣೆಯಾಗಲಾದರೂ ಸಾಧ್ಯವೇ ?

ಅದರ ಬದಲು ವಿಶ್ವ ಪ್ರೇಮ, ಮಾನವ ಪ್ರೇಮ ಎಂದು ಉದ್ದುದ್ದ ಭಾಷಣದಲ್ಲಿ, ಬರಹದಲ್ಲಿ ಇಲ್ಲಿಯವರೆಗೂ ನಾವು ಹೇಳುತ್ತಾ, ಬರೆಯುತ್ತಾ ಸಾಗಿದ್ದೆವೆಲ್ಲಾ ಅದನ್ನು ಈಗ ಇಂತಹ ವಿಷಮ ಪರಿಸ್ಥಿತಿಯಲ್ಲಿ ಕಾರ್ಯಗತಗೊಳಿಸುವ ಕಿಂಚಿತ್ತಾದರೂ ಪ್ರಯತ್ನ ಮಾಡೋಣ. ಅದಕ್ಕಾಗಿ ನಾವು ಮಾಡಬೇಕಾದ ಒಂದೇ ಒಂದು ಕೆಲಸವೆಂದರೆ ಶುದ್ಧ ಸಂಕಲ್ಪ. ಹೌದು, ಆತ್ಮೀಯರೇ ಈಗ ಹೇಗೂ ನಾವು ಹೊರ ಹೋಗದೆ ಮನೆಯಲ್ಲೇ ಕೂತು ಕಾಲ ನೂಕುತ್ತಿದ್ದೇವೆ.

ಪ್ರತಿದಿನ ಬೆಳಿಗ್ಗೆ ಮತ್ತು ಸಂಜೆ ಅಥವಾ ರಾತ್ರಿ ಮಲಗುವ ವೇಳೆ ಮನಸ್ಸನ್ನು ತಿಳಿಯಾಗಿಸಿಕೊಂಡು ಪರಿಶುದ್ಧ ಹೃದಯದಿಂದ ” ಶೀಘ್ರ ಈ ಪರಿಸ್ಥಿತಿಯಿಂದ ನಾವೆಲ್ಲಾ ಪಾರಾಗುತ್ತೇವೆ. ಈ ಗೊಂದಲ ಆತಂಕದ ಪರಿಸ್ಥಿತಿಯಿಂದ ಪಾರಾಗಿ ಮತ್ತೆ ಇಡೀ ಜಗತ್ತು ಸಹಜ ಸ್ಥಿತಿಗೆ ಮರಳುತ್ತದೆ. ನಾವು ನಂಬಿದ ದೈವ ಅಥವಾ ಪ್ರಕೃತಿ ನಮಗೆ ಪರಿಹಾರ ಮಾರ್ಗವನ್ನು ತೆರೆಯುತ್ತದೆ. ಶೀಘ್ರಾತಿ ಶೀಘ್ರ ಜನಜೀವನ ಮತ್ತೇ ಸಹಜ ಸ್ಥಿತಿಗೆ ಬರಲಿದೆ. ” ಎಂಬಿತ್ಯಾದಿ ಶುಭ ಭಾವನೆ, ಶುಭಾಭಿಲಾಷೆಯ ಸಂಕಲ್ಪದೊಂದಿಗೆ ದಿನದ ಆದಿ ಅಂತ್ಯವನ್ನು ಮೂಲತ್ವಕ್ಕೆ ಸಮರ್ಪಿಸೋಣ.

“ಬಾಯಲ್ಲಿ ಆಡಿದ್ದು ಬೆನ್ನಿಗೆ ಮೂಲ” ಎಂಬ ಗಾದೆ ಕೇಳಿರಬಹುದಲ್ಲವೇ. ಅಂದರೆ ” ನಾವು ಈಗ ಏನಾಗಿದ್ದೇವೋ, ನಮಗೆ ಏನು ಲಭಿಸಿದೆಯೋ, ನಮ್ಮ ಕಷ್ಟ ನಷ್ಟ ಎಲ್ಲದಕ್ಕೂ ನಮ್ಮ ಯೋಚನೆಗಳೇ ಕಾರಣ ಎಂಬುದು ಅದರ ಅರ್ಥ. ” ಆದಾಗ್ಯೂ ಎಲ್ಲರೂ ಇಂತಹದ್ದೇ ಆಲೋಚನೆ ಮಾಡಿರಲಿಕ್ಕಿಲ್ಲ ಎಂಬ ಅಂಶ ನಿಜವಾದರೂ ಒಳಿತಿಗಾಗಲಿ ಕೆಡುಕಿಗಾಗಲಿ ಬಹುಪಾಲು ಜನರ ಆಲೋಚನೆಯ ಪ್ರತಿಫಲವಾಗಿ ಅದರ ಫಲವನ್ನು ಎಲ್ಲರೂ ಅನುಭವಿಸಬೇಕಾದ ಪರಿಸ್ಥಿತಿ ಉಂಟಾಗುವುದು ಮಾತ್ರ ದುರ್ದೈವವೇ ಸರಿ. ಆದರೆ ಈಗ ನಾವು ಆಡುವ ಮಾತು ಅದು ಪರಿಹಾರದ ಮೂಲಕ್ಕೆ ತಲುಪಲಿ. ಒಳಿತಿನ ಫಲ ಕೊಡುವಂತಾಗಲಿ. ಶೀಘ್ರ ಪರಿಹಾರ ಲಭಿಸುವಂತಾಗಲಿ. ಕೋಟಿ ಕೋಟಿ ಸಂಖ್ಯೆಯಲ್ಲಿರುವ ನಮ್ಮೆಲ್ಲರ ಸಂಕಲ್ಪವೂ ಒಂದೇ ಆದಲ್ಲಿ, ಶುಭಾಕಾಂಕ್ಷೆಯೇ ಆಗಿದ್ದಲ್ಲಿ ಅಂತಹದ್ದೇ ಪ್ರತಿಫಲ ದೊರೆಯುವುದರಲ್ಲಿ ಸಂದೇಹವೇ ಇಲ್ಲ ಅಲ್ಲವೇ !?

ನಿಜವಾಗಿಯೂ ನಮ್ಮೊಳಗೆ ಮಾನವ ಪ್ರೇಮ ಇದ್ದಲ್ಲಿ ಅದು ಮಾನವನೆದೆಗೆ ತಲುಪಲಿ. ಕೊರೋನಾ ಯಾರ ಶ್ವಾಸಕೋಶವನ್ನೂ ಭೇಧಿಸದಂತೆ ಆ ನಿರ್ಮಲ ಪ್ರೇಮ ಅಡ್ಡಗೋಡೆಯಾಗಿ ರಕ್ಷಣಾ ಕವಚ ನಿರ್ಮಿಸಲಿ. ನಮ್ಮ ಕುಟುಂಬದ ಅಥವಾ ಪ್ರೀತಿ ಪಾತ್ರ ವ್ಯಕ್ತಿಗಳು ಮಾತ್ರವಲ್ಲದೆ ಇಡೀ ಮನುಕುಲದ ಉಳಿವಿಗೆ ಆ ನಮ್ಮ ಸಂಕಲ್ಪ ಸೇತುವಾಗಲಿ. ಪರಿಶುದ್ಧ ಭಾವನೆಗೂ ಒಂದು ಸಶಕ್ತತೆ ಮತ್ತು ಬಲವಿದೆ ಎಂಬುದು ಸಾಬೀತಾಗಲಿ.

ಇದು ಸಾಧ್ಯವೇ ಎಂದು ಯೋಚಿಸುವ ಬದಲು, ಇದರಿಂದ ಏನಾದೀತು ಎಂದು ಮೂಗು ಮುರಿಯುವ ಬದಲು ಇದು ಸಾಧ್ಯ, ಸಾಧ್ಯವಾಗಬೇಕು, ಸಾಧ್ಯವಾಗುತ್ತದೆ ಎಂಬ ಶುಭ ನಿರೀಕ್ಷೆಯೊಂದಿಗೆ ಒಮ್ಮೆ ಮಾಡಿಯೇ ನೋಡುವ ಮನಸ್ಸು ಮಾಡಿ ಬಿಡೋಣ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಲೋಕಾರೂಢಿ

ಭಾವಾವೇಶದ ಆರ್ಭಟವೂ ಸುಳ್ಳು ಸುದ್ದಿಯ ಕಾಟವೂ

Published

on

  • ನಾ. ದಿವಾಕರ

ಇಂದು ಮಧ್ಯಾಹ್ನ (ಬುಧವಾರ 01 ನೇ ತಾರೀಖು)  ಕೆಲಸದ ನಿಮಿತ್ತ ಸ್ನೇಹಿತರ ಮನೆಗೆ ಹೋಗಿದ್ದೆ. (ಏಕೆ ಹೋಗಿದ್ದಿರಿ ಎನ್ನಬೇಡಿ, ಮಾಸ್ಕ್ ಧರಿಸಿ ಹೋಗಿದ್ದೆ ಅವರೂ ಮಾಸ್ಕ್ ಧರಿಸಿದ್ದರು-ಸುರಕ್ಷಿತ ವಲಯ ಎಂದಿಟ್ಟುಕೊಳ್ಳಿ) ಅಲ್ಲಿ ಮಾತಿನ ನಡುವೆಯೇ ಅವರು ನೋಡುತ್ತಿದ್ದ ಪಬ್ಲಿಕ್ ಟಿವಿ ಸುದ್ದಿವಾಹಿನಿಯನ್ನು ನೋಡುವ ಅನಿವಾರ್ಯ ಸಂದರ್ಭ. ಮಧ್ಯಾಹ್ನವಲ್ಲವೇ, ಊಟ ನಿದ್ರೆಯ ಹೊತ್ತು. ರೋಚಕತೆ ಇರಬೇಕು. ಹಾಗಾಗಿ ಒಬ್ಬ ನಿರೂಪಕಿಯಿಂದ ಚೀನಾ ಕುರಿತ ರೋಚಕ, ರೋಮಾಂಚಕ ಸುದ್ದಿ ಬಿತ್ತರವಾಗುತ್ತಿತ್ತು.

ಈಗ ಭಾರತದ ಮಾಧ್ಯಮಗಳಿಗೆ ಮುಸ್ಲಿಮರ ಹೊರತಾಗಿ ಮತ್ತೊಂದು ಶತ್ರು ಹುಟ್ಟಿಕೊಂಡಿದ್ದರೆ ಅದು ಚೀನಾ. ಏಕೆಂದರೆ ಅದು ಕಮ್ಯುನಿಸ್ಟ್ ರಾಷ್ಟ್ರ ಎನ್ನುವ ಭ್ರಮೆ. ಚೀನಾ ಎಷ್ಟರ ಮಟ್ಟಿಗೆ ಕಮ್ಯುನಿಸ್ಟ್ ರಾಷ್ಟ್ರ ಎನ್ನುವುದು ಕಮ್ಯುನಿಸ್ಟರಿಗೇ ಗೊತ್ತು ಬಿಡಿ. ಆದರೂ ಅಲ್ಲಿ ಕಮ್ಯುನಿಸ್ಟ್ ಪಕ್ಷದ ಆಡಳಿತ ಇದೆ. ಕಮ್ಯುನಿಸಂ ಕುರಿತು ಗಂಧ ಗಾಳಿ ಅರಿಯದ ಟಿವಿ ನಿರೂಪಕರಿಗೆ ಚೀನಾ ಸರ್ಕಾರವನ್ನು ಹೀಯಾಳಿಸಿ, ಜರೆಯಲು ಕಮ್ಯುನಿಸಂ ಕುರಿತು ಪರಿಜ್ಞಾನ ಇರಬೇಕೆಂದಿಲ್ಲ. ಸಂಪಾದಕರು ಬರೆದುಕೊಟ್ಟದನ್ನು ಮತ್ತೆ ಮತ್ತೆ ಹೇಳುತ್ತಿದ್ದರೆ ಸಾಕು. ಕನ್ನಡ ಮಾಧ್ಯಮಗಳನ್ನು ನೋಡುವವರಿಗೆ ಇದು ಹೊಸತೇನಲ್ಲ.

ಆ ನಿರೂಪಕಿಯ ಮತ್ತು ವಾಹಿನಿಯ ಮುಖ್ಯ ಉದ್ದೇಶ ಚೀನಾ ದೇಶವನ್ನು ಖಳನಾಯಕನಂತೆ ಬಿಂಬಿಸುವುದು. ಚೀನಾ ಸುಳ್ಳು ಹೇಳುತ್ತಿದೆ ಎಂದು ನಿರೂಪಿಸುವುದು ಮತ್ತು ಕೊರೋನಾ ಹರಡುವುದಕ್ಕೆ ಚೀನಾ ಏಕೈಕ ಕಾರಣ ಎಂದು ಘೋಷಿಸುವ ಮೂಲಕ “ಭರತ ಪ್ರೇಮ”ವನ್ನು ಸಾಬೀತುಪಡಿಸುವುದು. ಆಕೆಯ ಸುದ್ದಿಯಂತೂ ರೋಚಕವಾಗಿತ್ತು. ವೂಹಾನ್ ಪ್ರಾಂತ್ಯದಲ್ಲೇ ಕೊರೋನಾ ವೈರಾಣುವಿಗೆ 40 ಸಾವಿರ ಜನ ಬಲಿಯಾಗಿದ್ದಾರೆ, ಚೀನಾದಲ್ಲಿ ಈವರೆಗೆ ಮೂರು ಲಕ್ಷ ಜನ ಕೊರೋನಾದಿಂದ ಸತ್ತಿದ್ದಾರೆ. ಪ್ರತಿದಿನ 1200 ಶವಗಳನ್ನು ಸುಡಲಾಗುತ್ತಿದೆ, ಆಸ್ಪತ್ರೆಗಳಲ್ಲಿ ಹೆಣದ ರಾಶಿಗಳೇ ಬಿದ್ದಿವೆ. ಚೀನಾ ಈ ಮಾಹಿತಿಯನ್ನು ಜಗತ್ತಿಗೆ ನೀಡದೆ ಮುಚ್ಚಿಡುವ ಮೂಲಕ ವಂಚನೆ ಮಾಡುತ್ತಿದೆ, ಇತ್ಯಾದಿ ಇತ್ಯಾದಿ.

ಏರು ದನಿಯ ನಿರೂಪಣೆಯಲ್ಲಿ ಇದ್ದ ಕೃತ್ರಿಮವನ್ನು ಗಮನಿಸುವುದು ಕಷ್ಟವೇನಿರಲಿಲ್ಲ. ಮತ್ತು ಈ ಉಗ್ರ ಭಾಷಣದ ನಡುವೆ ತೋರಿಸುತ್ತಿದ್ದ ಚಿತ್ರಗಳು ಬಹುಶಃ ಟೈವಾನ್, ಹಾಂಕಾಂಗ್‍ನಲ್ಲಿ ತಯಾರಿಸಲಾಗುವ ಚಲನಚಿತ್ರಗಳ ತುಣುಕುಗಳಂತಿತ್ತು. ಚೀನಾದ ಆಸ್ಪತ್ರೆಯಲ್ಲಿ ರೋಗಿಗೆ ಚಿಕಿತ್ಸೆ ನೀಡುತ್ತಿರುವ ವೈದ್ಯರ ತಂಡವನ್ನು ಚಿತ್ರೀಕರಿಸುವುದು ಎಂತಹ ಸಾಹಸ ಎನ್ನುವುದು ಎಲ್ಲರಿಗೂ ತಿಳಿದಿದ್ದೇ. ಈ ಸುದ್ದಿ ಸಮರ್ಥನೆಗೆ ಒಬ್ಬ ಚೀನಾದ ರಾಜಕಾರಣಿಯ ಮಾತುಗಳು. ಅವರ ಹೆಸರು ಮಾತ್ರ ಎಲ್ಲಿಯೂ ಕಾಣಲಿಲ್ಲ. ಆದರೂ ಪಬ್ಲಿಕ್ ಟಿವಿಯಲ್ಲಿ ಚಲನಚಿತ್ರದ ತುಣುಕುಗಳನ್ನೇ ನೈಜ ಚಿತ್ರಗಳಂತೆ ತೋರಿಸುತ್ತಿದ್ದುದು ಮೇಲ್ನೋಟಕ್ಕೆ ಸ್ಪಷ್ಟವಾಗಿತ್ತು.

ಒಂದು ಗಂಟೆಯ ಕಾರ್ಯಕ್ರಮದಲ್ಲಿ ಹೇಳಿದ್ದು ಹತ್ತು ಸಾಲುಗಳು, ಹತ್ತು ಬಾರಿ ಹೇಳಿದ್ದನ್ನೇ ಹೇಳುವ ಮೂಲಕ ಚೀನಾ ವಂಚಕ ದೇಶ ಎಂಬ ನಿಟ್ಟುರಿಸಿನೊಂದಿಗೆ ನಿರೂಪಕಿ ನಿರ್ಗಮಿಸಿದ್ದರು.
ಮನೆಗೆ ಬಂದು ವೆಬ್ ತಾಣದಲ್ಲಿ ಶೋಧಿಸಿದೆ. ಎಲ್ಲಿಯೂ ಈ ರೀತಿಯ ಸುದ್ದಿ ಕಾಣಲಿಲ್ಲ. ಗಾಳಿಸುದ್ದಿಯೂ ಸಹ ವೆಬ್ ತಾಣದಲ್ಲಿ ರಾರಾಜಿಸುವ ಇಂದಿನ ದಿನಗಳಲ್ಲಿ ಈ ಸುದ್ದಿಯೂ ಎಲ್ಲೋ ಒಂದು ಕಡೆ ಕಾಣಬೇಕಿತ್ತಲ್ಲವೇ. ಎಲ್ಲಿಯೂ ದೊರೆಯಲಿಲ್ಲ ಆಗ ನನಗನಿಸಿದ್ದು, ನಮ್ಮ ಕನ್ನಡ ಮಾಧ್ಯಮಗಳ ವ್ಯಸನ ಯಾವ ಹಂತ ತಲುಪಿದೆ, ಸುದ್ದಿ ವ್ಯಸನದ ಜೊತೆಗೆ ರೋಚಕತೆಯ ವ್ಯಸನವೂ ಸೇರಿಕೊಂಡು ಕನ್ನಡ ವಾಹಿನಿಗಳು ತಮ್ಮ ಸ್ವಂತಿಕೆಯನ್ನೇ ಕಳೆದುಕೊಂಡು ಬೆತ್ತಲಾಗಿವೆ ಎನಿಸಿಬಿಟ್ಟಿತು.

ಚೀನಾ=ಮುಸ್ಲಿಂ ಸೂತ್ರ ಎಷ್ಟು ಪರಿಣಾಮಕಾರಿಯಾಗಿ ಮಾಧ್ಯಮಗಳನ್ನು ಆವರಿಸಿದೆ ಎಂದು ಅರಿವಾಯಿತು. ಒಂದು ವೇಳೆ ಪಬ್ಲಿಕ್ ಟಿವಿಯ ಈ ಸುದ್ದಿ ಸತ್ಯವೇ ಆಗಿದ್ದರೆ ಸಾಕ್ಷಿ ಪುರಾವೆಗಳೊಂದಿಗೆ ಸಾಬೀತುಪಡಿಸಿ, ಅಂತಾರಾಷ್ಟ್ರೀಯ ನ್ಯಾಯ ಮಂಡಲಿಯ ಮುಂದೆ ಸಾಬೀತುಪಡಿಸಿ, ಚೀನಾ ಸರ್ಕಾರವನ್ನು ಕಟಕಟೆಯಲ್ಲಿ ನಿಲ್ಲಿಸಲಿ. ಅಡ್ಡಿಯಿಲ್ಲ. ಚೀನಾ ಯಾರಿಗೂ ಡಾರ್ಲಿಂಗ್ ಅಲ್ಲ. ತಪ್ಪು ಮಾಡಿ ಶಿಕ್ಷೆ ಅನುಭವಿಸಿದರೆ ಯಾವ ದೇಶದ ಕಮ್ಯುನಿಸ್ಟರೂ ವಿರಹ ವೇದನೆಯಿಂದ ಆತ್ಮಹತ್ಯೆ ಮಾಡಿಕೊಳ್ಳುವುದಿಲ್ಲ.

1970ರ ದಶಕದ ಚೀನಾದ ಮಳೆ ಭಾರತದ ಛತ್ರಿ ಎನ್ನುವ ಲೇವಡಿಯ ಮಾತು ಇಂದು ಹಳಸಿ ಕೊಳೆತುಹೋದ ಸರಕು. ಚೀನಾದಲ್ಲಿ ಆಡಳಿತ ನಡೆಸುವ ಕಮ್ಯುನಿಸ್ಟ್ ಪಕ್ಷ ಯಾವ ದೇಶದ ಕಮ್ಯುನಿಸ್ಟ್ ಪಕ್ಷಕ್ಕೂ ಸೂತ್ರಧಾರಿಯೂ ಅಲ್ಲ, ಮಾರ್ಗದರ್ಶಿಯೂ ಅಲ್ಲ. ಮಾರ್ಕ್ಸ್ ವಾದಿಗಳಿಗೆ ಇದು ಪ್ರಸ್ತುತವೂ ಅಲ್ಲ. ಆದರೆ ಯಾವುದೇ ಸಾಕ್ಷ್ಯಾಧಾರಗಳಿಲ್ಲದೆ, ದಾಖಲೆ ಪುರಾವೆಗಳಿಲ್ಲದೆ ಒಂದು ಗಂಟೆಯ ಕಾಲ ಜನಸಾಮಾನ್ಯರ ದಿಕ್ಕುತಪ್ಪಿಸಿ, ಲಾಭ ಪಡೆಯುವ ಪಬ್ಲಿಕ್ ಟಿವಿ ತಾನು ನೀಡುವ ಸುದ್ದಿ ಸುಳ್ಳಾಗಿದ್ದರೆ ಜನರ ಮುಂದೆ ಮಂಡಿಯೂರಬೇಕಲ್ಲವೇ ? ಸವಾಲು ಸ್ವೀಕರಿಸಲೇಬೇಕೆಂದಿಲ್ಲ. ವಿವೇಚನೆ ಮತ್ತು ವಿವೇಕ ಬಳಸಿ ಸುದ್ದಿ ಬಿತ್ತರಿಸಿದರೆ ಜಗತ್ತಿಗೂ ಒಳಿತು, ಜನತೆಗೂ ಒಳಿತು.

ಮಧ್ಯಾಹ್ನದ ನಿದ್ರೆಯನ್ನು ಮುಗಿಸಿ ಸೆಕೆ ತಡೆಯಲಾರದೆ ಅಕ್ಕನೊಂದಿಗೆ ಮೊಬೈಲ್‍ನಲ್ಲಿ ಮಾತನಾಡುತ್ತಾ ಕಾಂಪೌಂಡಿನಲ್ಲಿ ನಿಂತಿದ್ದೆ. ಮಡದಿ ಮನೆಯೊಳಗೆ ಟಿವಿ ನೋಡುತ್ತಿದ್ದಳು. ಹಠಾತ್ತನೆ ಸೂರು ಕಿತ್ತು ಹೋಗುವಂತೆ ಅರಚಾಡುವ ಸದ್ದು ಟಿವಿಯಲ್ಲಿ ಕೇಳಿಸಿತು. ಸುದ್ದಿವಾಹಕನ ದನಿ ಎಷ್ಟು ಭೀಕರವಾಗಿತ್ತೆಂದರೆ, ಬಹುಶಃ ಯಾವುದೇ ಪ್ಯಾನಲ್ ಚರ್ಚೆಯಲ್ಲಿ ಜಗಳವಾಗುತ್ತಿದೆ ಎಂದು ಭಾವಿಸಿದೆ. ಇಂದಿನ ದಿನಗಳಲ್ಲಿ ಇದು ಸಾಮಾನ್ಯ ಸಂಗತಿ ಅಲ್ಲವೇ. ಆದರೂ ಏಕೆ ಇಷ್ಟೊಂದು ಜೋರುದನಿಯಲ್ಲಿ ಮಾತನಾಡುತ್ತಿದ್ದಾರೆ ಎಂದು ಒಳಬಂದು ನೋಡಿದೆ. ಬಿ ಟಿವಿಯಲ್ಲಿ ಸ್ಫೋಟಕ ಬ್ರೇಕಿಂಗ್ ಸುದ್ದಿ ಪ್ರಸಾರವಾಗುತ್ತಿತ್ತು. ಅರಚಾಡುತ್ತಿದ್ದ, ಸೂರು ಕಿತ್ತು ಹೋಗುವ ಹಾಗೆ ಕಿರುಚುತ್ತಿದ್ದ ನಿರೂಪಕ “ ವೈರಸ್ ಟೆರರಿಸಂ ” ಕುರಿತು ಮಾತನಾಡುತ್ತಿದ್ದುದನ್ನು ಕಂಡೆ. ಅವರ ಏರು ದನಿ ಹೇಗಿತ್ತೆಂದರೆ ಇನ್ನು ಕೆಲ ಕ್ಷಣಗಳಲ್ಲೇ ಜಟಾಪಟಿ ಯುದ್ಧವೇ ಆರಂಭವಾಗುತ್ತದೆ ಎನ್ನುವಂತಿತ್ತು.

ಯಾರನ್ನು ಪ್ರಶ್ನಿಸುತ್ತಿದ್ದರೋ ಗೊತ್ತಾಗಲಿಲ್ಲ, ನಿಜಾಮುದ್ದಿನ್ ತಬ್ಲೀಗಿ ಜಮಾತ್ ಧಾರ್ಮಿಕ ಸಮ್ಮೇಳನ ಅವರ ಕೆಂಗಣ್ಣಿಗೆ, ಜೋರು ಬಾಯಿಗೆ ಸಿಲುಕಿಬಿಟ್ಟಿತ್ತು.
ನಿಜ ನಿಜಾಮುದ್ದಿನ್ ಧಾರ್ಮಿಕ ಸಮ್ಮೇಳನವನ್ನು ಆಯೋಜಿಸಿದ್ದು ತಪ್ಪು ಆದರೆ ಅನುಮತಿ ನೀಡಿದ್ದೂ ತಪ್ಪಲ್ಲವೇ ? ಈ ಸಮ್ಮೇಳನದಲ್ಲಿ ಭಾಗವಹಿಸಿದ್ದವರಿಂದ ಕೊರೋನಾ ಸೋಂಕು ಹರಡಿರುವುದೂ ಸತ್ಯ. ಕೊರೋನಾ ಸೋಂಕಿತರು ಇದನ್ನು ಬಯಸಿರಲಿಲ್ಲ. ಧಾರ್ಮಿಕ ನಾಯಕರ ಮೌಢ್ಯಕ್ಕೆ ಬಲಿಯಾಗಿಯೂ ನೂರಾರು ಜನ ಸೋಂಕಿತರಾಗಿದ್ದಾರೆ.

ಈ ಸೋಂಕಿತರನ್ನು ಮಾನವೀಯ ದೃಷ್ಟಿಯಿಂದ ನೋಡುವ ವ್ಯವಧಾನ ಮತ್ತು ಸಂವೇದನೆ ಮಾಧ್ಯಮಗಳಿಗೆ ಇರಬೇಕಲ್ಲವೇ ? ಬಿ ಟಿವಿ, ಸುವರ್ಣ ವಾಹಿನಿಯವರಿಗೆ ಸೋಂಕಿತರು ಶಂಕಿತರಂತೆಯೂ, ಕೊರೋನಾದಿಂದ ಭೀತಿಗೊಳಗಾದವರು ಭಯೋತ್ಪಾದಕರಂತೆಯೂ ಕಾಣುತ್ತಿರುವುದು ದುರಂತ. ವೈರಸ್ ಟೆರರಿಸಂ ಕುರಿತು ಗಂಟೆಗಟ್ಟಲೆ ಬಿತ್ತರಿಸುವ ಮಾಧ್ಯಮಗಳ ಬಳಿ, ನಿಜಾಮುದ್ದಿನ್ ಸಮ್ಮೇಳನದ ಹಿಂದೆ ಯಾವುದಾದರೂ ಪಿತೂರಿ ಇರುವ ಸಾಕ್ಷಿ ಪುರಾವೆಗಳಿವೆಯೇ ? ಇದ್ದರೂ ಇಲ್ಲಿ ವಿಚಾರಣೆ ನಡೆಸಿ ತೀರ್ಪು ನೀಡಬೇಕಿರುವುದು ನ್ಯಾಯಾಂಗವೋ ಮಾಧ್ಯಮದ ನಿರೂಪಕರೋ? ಯಾವುದೇ ಸಾಕ್ಷ್ಯಾಧಾರಗಳಿಲ್ಲದೆ ನೂರಾರು, ಸಾವಿರಾರು ಅಮಾಯಕರನ್ನು ಭಯೋತ್ಪಾದಕರಂತೆ ಬಿಂಬಿಸುವ ನೀಚತನ ಏಕೆ ? ಇದು ಮಾಧ್ಯಮ ನೀತಿ ಸಂಹಿತೆಗೆ ಬಗೆಯುವ ದ್ರೋಹ ಅಲ್ಲವೇ ?
ಇರಲಿ, ಮಾಧ್ಯಮದ ಕೆಲಸವೇ ಸಾರ್ವಜನಿಕ ವಿಷಯಗಳನ್ನು ಬಗೆದು ನೋಡುವುದು.

ಆದರೆ ಬಗೆಯುವಾಗಲೂ ಸಂಯಮ ಇರಬೇಕಲ್ಲವೇ ? ಸುದ್ದಿಯನ್ನು ಬಗೆದು ನೋಡುವುದೆಂದರೆ ವೈದ್ಯರು ನಡೆಸುವ ಹೃದಯ ಶಸ್ತ್ರ ಚಿಕಿತ್ಸೆಯಂತಿರಬೇಕೇ ಹೊರತು ಉಗ್ರನರಸಿಂಹ ಹಿರಣ್ಯ ಕಷಿಪುವಿನ ಎದೆ ಬಗೆದಂತೆ ಇರಕೂಡದು. ಇರಲಿ ಬಿಡಿ, ಕನ್ನಡ ಸುದ್ದಿವಾಹಿನಿಗಳಿಗೆ ಇದು ಅರ್ಥವಾಗಲಿಕ್ಕಿಲ್ಲ. ಆದರೆ ವೈರಸ್ ಟೆರರಿಸಂ ಎಂದು ಸುದ್ದಿ ಬಿತ್ತರಿಸುವ ಮುನ್ನ ಮಾಧ್ಯಮದ ನಿರೂಪಕರು ತಮ್ಮ ಸ್ವಂತಿಕೆ ಮತ್ತು ಘನತೆ ಉಳಿಸಿಕೊಳ್ಳುವ ರೀತಿಯಲ್ಲಿ ಕೊಂಚ ಮಟ್ಟಿಗಾದರೂ ಸಂಯಮದಿಂದಿರಬೇಕಲ್ಲವೇ. ಮೈಮೇಲೆ ದೆವ್ವ ಬಂದವರಂತೆ ಅರಚಾಡುವುದು, ಅಂಡು ಸುಟ್ಟ ಬೆಕ್ಕಿನಂತೆ ಕುಳಿತಲ್ಲೇ ಕೂರಲಾಗದೆ ಸುದ್ದಿ ಹೇಳುವುದು ನೋಡುಗರನ್ನು ಗಲಿಬಿಲಿಗೊಳಿಸುತ್ತದೆ.

ನೋಡುಗರ ದಾರಿ ತಪ್ಪಿಸುತ್ತದೆ. ಮಾಧ್ಯಮಗಳ ಮೂಲ ಉದ್ದೇಶ ಏನು ? ದೇಶದಲ್ಲಿ ಏನು ನಡೆಯುತ್ತಿದೆ, ಹೇಗೆ ನಡೆಯುತ್ತಿದೆ ಮತ್ತು ಏಕೆ ನಡೆಯುತ್ತಿದೆ ಎಂದು ವರದಿ ಮಾಡುವುದು. ಕೊರೋನಾದಂತಹ ವಿಷಯಗಳು ಬಂದಾಗ ಕೊಂಚ ಮಟ್ಟಿಗೆ ಪರಿಶೋಧ ಅಗತ್ಯ. ಅದರೆ ಈ ಪರಿಶೋಧದೊಡನೆ ಅಧ್ಯಯನಶೀಲತೆ ಮತ್ತು ವ್ಯವಧಾನವುಳ್ಳ ಸಂಶೋಧನೆಯೂ ಅಗತ್ಯ ಅಲ್ಲವೇ ? ಇದು ಇಲ್ಲವಾದರೆ ಟಿವಿ ಸ್ಟುಡಿಯೋಗಳು ದೆವ್ವದ ಕೋಣೆಗಳಾಗುತ್ತವೆ. ಮಾಧ್ಯಮದ ಸ್ಟುಡಿಯೋಗಳೇ ನ್ಯಾಯಾಲಯದ ಕಟಕಟೆಯಾದರೆ ಸುದ್ದಿ ನಿರೂಪಕರೇ ನ್ಯಾಯಾಧೀಶರಾಗಿಬಿಡುತ್ತಾರೆ.

ಈ ಅಪಾಯವನ್ನು ಸರ್ಕಾರಗಳು ಏಕೆ ಗಮನಿಸುತ್ತಿಲ್ಲ ? ಲಗಾಮಿಲ್ಲದ ಕುದುರೆಯಂತೆ ಮಾಧ್ಯಮಗಳು ಸುದ್ದಿ ಬಿತ್ತರಿಸುತ್ತಿರುವಾಗ, ಸರ್ಕಾರಗಳು ತಮ್ಮ ಪಕ್ಷ ಹಿತಾಸಕ್ತಿಯನ್ನು ಬದಿಗಿಟ್ಟು, ಸಾಮಾಜಿಕ ಸ್ವಾಸ್ಥ್ಯವನ್ನು ಕಾಪಾಡುವತ್ತ ಗಮನಹರಿಸಬೇಕಲ್ಲವೇ ? ಕೊರೋನಾ ವೈರಾಣುವಿನ ದಾಳಿಗೆ ತತ್ತರಿಸುತ್ತಿರುವ ಜನಸಾಮಾನ್ಯರಲ್ಲಿ ಮಾನವೀಯ ಸಂವೇದನೆ ಮತ್ತು ಸಂಯಮ ಹೆಚ್ಚಾದಷ್ಟೂ ಸಮಾಜದ ಸ್ವಾಸ್ಥ್ಯ ಸುಸ್ಥಿರವಾಗಿರಲು ಸಾಧ್ಯ. ಇದನ್ನು ಹೆಚ್ಚಿಸುವ ಹೊಣೆಗಾರಿಕೆ ನಾಗರಿಕ ಸಮಾಜದ ಮೇಲಿರುವಂತೆಯೇ, ಮಾಧ್ಯಮ ಲೋಕದ ಮೇಲೂ ಇರುತ್ತದೆ.

ಮಾರಣಾಂತಿಕ ವೈರಾಣುವಿನ ನಡುವೆ ಆತಂಕದಿಂದ ಬದುಕುತ್ತಿರುವ ಜನಸಾಮಾನ್ಯರ ಮನದಾಳದಲ್ಲಿ ದ್ವೇಷದ ಬೀಜ ಬಿತ್ತುವ ಕೆಲಸ ಮಾಧ್ಯಮಗಳದ್ದಲ್ಲ. ಮಾಧ್ಯಮಗಳಿಗೆ ಯಾವುದೇ ನಿರ್ದಿಷ್ಟ ಸೈದ್ಧಾಂತಿಕ ಭೂಮಿಕೆ ಅಗತ್ಯವಿರುವುದಿಲ್ಲ. ಆದರೆ ವಾಸ್ತವವನ್ನು ಬಿಂಬಿಸುವ ವಸ್ತುನಿಷ್ಠ ನೆಲೆಗಟ್ಟು ಅತ್ಯಗತ್ಯವಾಗಿರುತ್ತದೆ. ಪತ್ರಿಕೋದ್ಯಮದ ಮೌಲ್ಯಗಳು ಅವಶ್ಯವಾಗಿರುತ್ತವೆ. ಕನ್ನಡದ ಸುದ್ದಿವಾಹಿನಿಗಳು ತಮ್ಮ ನೈತಿಕ ಹೊಣೆಗಾರಿಕೆ ಮತ್ತು ಉತ್ತರದಾಯಿತ್ವವನ್ನು ಅರಿತು ಕಾರ್ಯನಿರ್ವಹಿಸಿದರೆ ನೋಡುಗರಿಗೂ ಒಳಿತು, ಸಮಾಜಕ್ಕೂ ಒಳಿತು.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಲೋಕಾರೂಢಿ

ಅರ್ಥವ್ಯವಸ್ಥೆ ಗಂಭೀರ ಸ್ಥಗಿತತೆಯತ್ತ ಜಾರುತ್ತಿದೆ : ಮೋದಿ ಅಂಡ್ ಕೊ ಗೆ ಇದರ ಪರಿವೆಯೂ ಇಲ್ಲ

Published

on

  • ಸರಕಾರ ಅಂಕಿ-ಅಂಶಗಳಲ್ಲಿ ಏನೇ ಕಸರತ್ತು ಮಾಡಿದರೂ, 2019-20ರ ಹಣಕಾಸು ವರ್ಷದ ಜಿಡಿಪಿ ವೃದ್ಧಿದರ 5ಶೇ.ಕ್ಕಿಂತ ಹೆಚ್ಚಾಗುವ ಸಾಧ್ಯತೆ ಇಲ್ಲ ಎಂದು ಈಗ ರಾಷ್ಟ್ರೀಯ ಅಂಕಿ-ಅಂಶಗಳ ಕಚೇರಿ (ಎನ್‌ಎಸ್‌ಒ) ಹೇಳುತ್ತಿದೆ. ಇದು ಕಳೆದ 11 ವರ್ಷಗಳಲ್ಲೇ ಅತೀ ಕಡಿಮೆ ವೃದ್ಧಿದರ. ವಿವಿಧ ಹಣಕಾಸು ಸಂಸ್ಥೆಗಳ ಈ ಕುರಿತ ಅಂದಾಜುಗಳು ಇನ್ನೂ ಕೆಳಮಟ್ಟದಲ್ಲಿ ಇವೆ. ನಮ್ಮ ಮೇಲೀಗ ಒಂದು ಗಂಭೀರ ಆರ್ಥಿಕ ಸ್ಥಗಿತತೆಯ ಹೊರೆ ಬಿದ್ದಿದೆ. ಇದನ್ನು ನಿವಾರಿಸಿಕೊಳ್ಳಬೇಕಾದರೆ, ನವ-ಉದಾರವಾದದ ಒಪ್ಪಿಗೆಯನ್ನು ಲೆಕ್ಕಿಸದೆ, ಅದನ್ನು ಮೀರಿ ಬಹಳ ದೂರ ಹೋಗುವ ಒಂದು ಶಕ್ತಿಶಾಲೀ ಹಣಕಾಸು ಮಧ್ಯಪ್ರವೇಶವನ್ನು ಮಾಡಬೇಕಾಗುತ್ತದೆ. ಬೇಸರದ ಸಂಗತಿಯೆಂದರೆ ಮೋದಿ ಮತ್ತು ಕಂಪನಿಗೆ ಇದರ ಯೋಚನೆಯೂ ಇಲ್ಲ.

ಪ್ರೊ. ಪ್ರಭಾತ್ ಪಟ್ನಾಯಕ್
ಅನುವಾದ : ಕೆ.ವಿ

ಭಾರತೀಯ ಅರ್ಥವ್ಯವಸ್ಥೆಯನ್ನು ಕುರಿತ ಅಂಕಿ-ಅಂಶಗಳು ಅವನ್ನು ಅಂದಾಜು ಮಾಡುವ ವಿಧಾನಗಳಲ್ಲಿ ಮಾಡುತ್ತಿರುವ ಬದಲಾವಣೆಗಳಿಂದಾಗಿ ಹೆಚ್ಚೆಚ್ಚು ತಬ್ಬಿಬ್ಬುಗೊಳಿಸುವಂತದ್ದಾಗಿ ಬಿಡುತ್ತಿವೆ. ಅಲ್ಲದೆ, ಈ ಅಂಕಿ-ಅಂಶಗಳು ಅರ್ಥವ್ಯವಸ್ಥೆ ಸರಿಯಾಗಿ ಕೆಲಸ ಮಾಡುತ್ತಿಲ್ಲ ಎಂದು ತೋರಿಸಿದಾಗಲೆಲ್ಲ ಬಿಜೆಪಿ ಸರಕಾರ ಅದನ್ನು ಬಚ್ಚಿಟ್ಟು ಬಿಡುತ್ತದೆ. ಆದರೆ ಭಾರತದ ಅರ್ಥವ್ಯವಸ್ಥೆ ಒಂದು ಗಂಭೀರ ಸ್ಥಗಿತತೆಯ ಸ್ಥಿತಿಗೆ ಜಾರುತ್ತಿದೆ ಎಂಬುದನ್ನು ಕಾಣದಂತೆ ಮಾಡುವುದು ಯಾವುದರಿಂದಲೂ ಸಾಧ್ಯವಿಲ್ಲ.

ಈ ಹಣಕಾಸು ವರ್ಷದ 3ನೇ ತ್ರೈಮಾಸಿಕದ(ಅಕ್ಟೋಬರ್-ಡಿಸೆಂಬರ್) ಜಿಡಿಪಿ ಕಳೆದ ವರ್ಷದಲ್ಲಿ ಈ ಅವಧಿಯಲ್ಲಿನ ಬೆಳವಣಿಗೆಗೆ ಹೋಲಿಸಿದರೆ 4.7ಶೇ.ದಷ್ಟು ಮಾತ್ರ ಬೆಳೆದಿದೆ. ಎರಡನೇ ತ್ರೈಮಾಸಿಕದಲ್ಲಿ ಈ ಬೆಳವಣಿಗೆ ದರ 4.5ಶೇ. ಇತ್ತು. 2019-20ರ ಹಣಕಾಸು ವರ್ಷದ ಜಿಡಿಪಿ ವೃದ್ಧಿದರ 5ಶೇ.ಕ್ಕಿಂತ ಹೆಚ್ಚಾಗುವ ಸಾಧ್ಯತೆ ಇಲ್ಲ ಎಂದು ಈಗ ರಾಷ್ಟ್ರೀಯ ಅಂಕಿ-ಅಂಶಗಳ ಕಚೇರಿ (ಎನ್‌ಎಸ್‌ಒ)ಯ ನಂಬಿಕೆ. ವಿವಿಧ ಹಣಕಾಸು ಸಂಸ್ಥೆಗಳ ಈ ಕುರಿತ ಅಂದಾಜುಗಳು ಇನ್ನೂ ಕೆಳಮಟ್ಟದಲ್ಲಿ ಇವೆ.

5ಶೇ. ಎಂದೇ ಇಟ್ಟುಕೊಂಡರೂ, ಇದು ಕಳೆದ 11 ವರ್ಷಗಳಲ್ಲೇ ಅತೀ ಕಡಿಮೆ ವೃದ್ಧಿದರ. ಜಿಡಿಪಿಯನನು ಅಂದಾಜು ಮಾಡುವ ಹೊಸ ವಿಧಾನ ವೃದ್ಧಿದರವನ್ನು ಗಂಭೀರವಾಗಿ ಮೇಲಂದಾಜು ಮಾಡುತ್ತದೆ ಎಂಬುದೀಗ ಬಹಳ ಸ್ಪಷ್ಟವಾಗಿರುವ ಸಂಗತಿ. ನಿಜ ಹೇಳಬೇಕೆಂದರೆ, ಆರ್ಥಿಕ ಮಂದಗತಿ ಆರಂಭವಾಗುವ ಮೊದಲಿನ ಅವಧಿಯಲ್ಲಿ 7ಶೇ. ವೃದ್ಧಿದರ ಇತ್ತು ಎಂದು ಹೇಳಿಕೊಂಡಿದ್ದರೂ ನಿಜವಾದ ವೃದ್ಧಿದರ ಸುಮಾರು 4.5ಶೇ.ದಷ್ಟು ಇದ್ದಿರಬಹುದು ಎಂದು ಮಾಜಿ ಮುಖ್ಯ ಆರ್ಥಿಕ ಸಲಹೆಗಾರರೊಬ್ಬರು ಸೂಚಿಸಿದ್ದರು. ಇದರ ಅರ್ಥ,5ಶೇ. ಅಧಿಕೃತ ವೃದ್ಧಿದರ ವಾಸ್ತವವಾಗಿ ಅದಕ್ಕಿಂತ ಕಡಿಮೆ, ಬಹುಶಃ ಸುಮಾರು 3ರಿಂದ 3.5ಶೇ. ದಾಟಲಾರದ ದರವನ್ನು ಸೂಚಿಸುತ್ತಿರಬಹುದು. ಇದನ್ನು ಈ ಹಿಂದಿನ ದಿನಗಳಲ್ಲಿ ‘ಹಿಂದೂ ವೃದ್ಧಿ ದರ’ ಎಂದು ಕುಚೋದ್ಯ ಮಾಡಲಾಗುತ್ತಿತ್ತು.

ಹಿಂದುತ್ವ ಶಕ್ತಿಗಳ ಉಚ್ಛ್ರಾಯ ವೃದ್ಧಿದರವನ್ನೂ ಕೂಡ ಹಿಂದೂಕರಿಸಿದಂತೆ ಕಾಣುತ್ತದೆ! ಆದರೆ ಈ 3.5ಶೇ. ವೃದ್ಧಿ ಮತ್ತು ಆ ಹಳೆಯ ದಿನಗಳ 3.5ಶೇ.ದ ನಡುವೆ ಕೆಲವು ಮಹತ್ವದ ವ್ಯತ್ಯಾಸಗಳಿವೆ. ಅವುಗಳಲ್ಲಿ ಕನಿಷ್ಟ ಮೂರನ್ನು ಗಮನಿಸಲೇ ಬೇಕಾಗಿದೆ.

ಮೊದಲನೆಯದಾಗಿ, ಆ ಹಳೆಯ ದಿನಗಳ 3.5ಶೇ. ಜಿಡಿಪಿ ವೃದ್ಧಿದರದೊಂದಿಗೆ ಅದಕ್ಕಿಂತ ಬಹಳ ಹೆಚ್ಚಿನ ಉದ್ಯೋಗ ವೃದ್ಧಿ ದರಗಳು ಇರುತ್ತಿದ್ದವು. ಏಕೆಂದರೆ ಆಗ ಶ್ರಮವನ್ನು ಹೊರಹಾಕುವ ತಂತ್ರಜ್ಞಾನ-ಸಂರಚನಾ ಬದಲಾವಣೆಗಳನ್ನು ತರುವುದರ ಮೇಲೆ ನಿರ್ಬಂಧಗಳಿದ್ದವು.

ಎರಡನೆಯದಾಗಿ, ಆದಾಯ ವಿತರಣೆಯಲ್ಲಿನ ಅಸಮಾನತೆ ಈ ದಿನಗಳಲ್ಲಿ ಹೆಚ್ಚುತ್ತಿರುವಂತೆ ಆ ಕಾಲದಲ್ಲಿ ಇರಲಿಲ್ಲ. ನಿಜಸಂಗತಿಯೆಂದರೆ, ಪಿಕೆಟಿ ಮತ್ತು ಚಾನ್ಸೆಲ್ ಆದಾಯ ತೆರಿಗೆ ದತ್ತಾಂಶಗಳ ಆಧಾರದಲ್ಲಿ ಅಂದಾಜು ಮಾಡಿರುವಂತೆ 1980ರ ದಶಕದ ಆರಂಭದಲ್ಲಿ ಅತ್ಯಂತ ಮೇಲಿನ 1ಶೇ. ಕುಟುಂಬಗಳ ಪಾಲು ೬ಶೇ.ದಷ್ಟು ಕಡಿಮೆ ಮಟ್ಟದಲ್ಲಿತ್ತು. ಅದೀಗ 2013-14 ರವೇಳೆಗೆ 22ಶೇ.ಕ್ಕೆ ಜಿಗಿದಿದೆ. 1922ರಲ್ಲಿ ಭಾರತದಲ್ಲಿ ಆದಾಯ ತೆರಿಗೆಯನ್ನು ಆರಂಭಿಸಿದ ನಂತರ ಎಂದೂ ಅದು ಈ ಮಟ್ಟಕ್ಕೆ ಏರಿರಲಿಲ್ಲ.

ಮೂರನೆಯದಾಗಿ, ಕೃಷಿಯಲ್ಲಿ, ಅದರಲ್ಲೂ ಆಹಾರಧಾನ್ಯಗಳ ಗಮನಾರ್ಹ ವೃದ್ಧಿದರ ಒಟ್ಟಾರೆ ವೃದ್ಧಿದರವನ್ನು ಉಳಸಿಕೊಂಡು ಬರುತ್ತಿತ್ತು. ಈ ಮೂಲಕ ವಸಾಹತುಶಾಹೀ ಆಳ್ವಿಕೆಯ ಕೊನೆಯ ಅರ್ಧ ಶತಮಾನದಲ್ಲಿದ್ದ ತೀವ್ರ ಬರದ ಪ್ರವೃತ್ತಿ ಬದಲಾಗಿ ತಲಾ ಆಹಾರ ಧಾನ್ಯಗಳ ಉತ್ಪಾದನೆ ಮತ್ತು ಲಭ್ಯತೆ ಗಮನಾರ್ಹವಾಗಿ ಹೆಚ್ಚಿದ್ದವು. ತಲಾ ಲಭ್ಯತೆ 1900ರಲ್ಲಿ 200 ಕೆ.ಜಿ. ಇದ್ದದ್ದು ಸ್ವಾತಂತ್ರ್ಯದ ವೇಳೆಗೆ 140 ಕೆ.ಜಿ.ಗೆ ಇಳಿದಿತ್ತು. 1980ರ ದಶಕದ ವೇಳೆಗೆ ಅದು 180 ಕೆ.ಜಿ. ಬಳಿ ತಲುಪಿತ್ತು. ಆನಂತರ ಮತ್ತೆ ಇಳಿದಿದೆ.

ಬೇರೆ ಮಾತುಗಳಲ್ಲಿ ಹೇಳುವುದಾದರೆ, ಉದಾರೀಕರಣದ ಹಿಂದಿನ ಅವಧಿಯಲ್ಲಿ ಜಿಡಿಪಿ ವೃದ್ಧಿದರ ಕಡಿಮೆಯಿದ್ದರೂ, ವಿತರಣೆಯಲ್ಲಿನ ಅಸಮಾನತೆ ಕಡಿಮೆಯಿತ್ತು, ಮತ್ತು ಹಸಿವನ್ನು, ನವ-ಉದಾರವಾದ ಶಿಖರಕ್ಕೇರಿದ್ದ ಅವಧಿಗಿಂತಲೂ ಹೆಚ್ಚಿನ ಪ್ರಮಾಣದಲ್ಲಿ ಶಮನ ಗೊಳಿಸಿತ್ತು. ಈಗ ಮಂದಗತಿಯನ್ನು ಕಾಣುತ್ತಿರುವಾಗಲಂತೂ ಹೇಳುವಂತೆಯೆ ಇಲ್ಲ.

2018-19ರಲ್ಲಿ ವೃದ್ಧಿ ದರ 6.1ಶೇ. ಎಂದು ಅಂದಾಜು ಮಾಡಲಾಗಿತ್ತು. ಇದಕ್ಕೆ ಹೋಲಿಸಿದರೆ 2019-20ರ ಮಂದಗತಿಯ ಬೆಳವಣಿಗೆಗೆ ಮುಖ್ಯವಾಗಿ ಕಾರಣ ಕೃಷಿಯೇತರ ವಲಯದಲ್ಲಿನ ಮಂದಗತಿ. ಕೃಷಿವಲಯದಲ್ಲಿನ ವೃದ್ಧಿ ದರ 2019-20ರಲ್ಲಿ ಹಿಂದಿನ ವರ್ಷದಲ್ಲಿ ಇದ್ದಷ್ಟೇ ಇರುತ್ತದೆ ಎಂದು ಅಂದಾಜು ಮಾಡಲಾಗಿದೆ. ಅಂದರೆ ಕಳೆದ ವರ್ಷ 2.88ಶೇ. ಇದ್ದರೆ ಈ ವರ್ಷ 2.9ಶೇ. ಇರಬಹುದು. ಅಂದರೆ ಸುಮಾರಾಗಿ ಸ್ಥಿರವಾಗಿದೆ. ಬೇರೆ ವಲಯಗಳಲ್ಲಿ ಮಾತ್ರ ವೃದ್ಧಿದರ ಮಂದಗತಿಗಿಳಿದಿದೆ, ಇದರಿಂದಾಗಿ ಒಟ್ಟಾರೆ ವೃದ್ಧಿದರ 5ಶೇ.ಕ್ಕೆ ಇಳಿಯಬಹುದೆಂದು ಹೇಳಲಾಗುತ್ತಿದೆ. ವಿಶೇಷವಾಗಿ ಎದ್ದು ಕಾಣುತ್ತಿರುವ ಸಂಗತಿಯೆಂದರೆ ಕೈಗಾರಿಕಾ ವೃದ್ಧಿ, ಅದರಲ್ಲೂ ತಯಾರಿಕಾ ವಲಯದ ಬೆಳವಣಿಗೆ ನಿಧಾನಗೊಳ್ಳುತ್ತಿದೆ.

ಸರಕಾರ ಕೈಗಾರಿಕಾ ವೃದ್ಧಿ ದರ ಸುಮಾರು 2ಶೇ.ದಷ್ಟಿರಬಹುದು ಎಂದು ನಿರೀಕ್ಷಿಸುತ್ತಿದೆ. ಆದರೆ ಎರಡನೇ ಮತ್ತು ಮೂರನೇ ತ್ರೈಮಾಸಿಕದಲ್ಲಿ ವಾಸ್ತವವಾಗಿ ವೃದ್ಧಿದರ ನಕಾರಾತ್ಮಕವಾಗಿತ್ತು. ಹೀಗಿರುವಾಗ 2ಶೇ. ವೃದ್ಧಿಯ ಸಂಭವವೂ ಬಹಳ ಕಡಿಮೆ. ಕೃಷಿ ವಲಯದ ವೃದ್ಧಿದರ ಬದಲಾಗದಿರುವಾಗ ಕೈಗಾರಿಕಾ ವಲಯದಲ್ಲಿ ಮಂದಗತಿ ಮೇಲ್ನೋಟಕ್ಕೆ ವಿಚಿತ್ರವೆನಿಸಬಹುದು. ಆದರೆ ಇದಕ್ಕೆ ಮೂರು ಮೂಲ ಕಾರಣಗಳಿವೆ.

ಒಂದು, ಕೃಷಿ ವೃದ್ಧಿ ದರ ಮತ್ತು ಗ್ರಾಮೀಣ ಬಳಕೆ ಖರ್ಚುಗಳ ವೃದ್ಧಿ ದರ ಎರಡೂ ಒಂದೇ ಅಲ್ಲ. ಕೃಷಿ ವೃದ್ಧಿ ದರ ಹೆಚ್ಚಿದ್ದಾಗಲೂ ಗ್ರಾಮೀಣ ಬಳಕೆ ಖರ್ಚುಗಳ ಏರಿಕೆಯಲ್ಲಿ ಮಂದಗತಿ ಕಾಣ ಬಹುದು. ಇದಕ್ಕೆ 2017-18 ಒಂದು ಒಳ್ಳೆಯ ಉದಾಹರಣೆ. ಅದು ಬಂಪರ್ ಬೆಳೆ ಬಂದ ವರ್ಷವಾಗಿತ್ತು. ಆದರೂ ರಾಷ್ಟ್ರೀಯ ಸ್ಯಾಂಪಲ್ ಸರ್ವೆ ದತ್ತಾಂಶಗಳ ಪ್ರಕಾರ ಆ ವರ್ಷ ಗ್ರಾಮೀಣ ಭಾರತದಲ್ಲಿ ತಲಾ ನಿಜ ವೆಚ್ಚ 2011-12ಕ್ಕೆ ಹೋಲಿಸಿದಾಗ ಬಹಳ ಕಮ್ಮಿಯಿತ್ತು, ಸುಮಾರು ೮ಶೇ.ದಷ್ಟು. ಇದು ಕೃಷಿ ವೃದ್ಧಿ ಅಂದಾಜುಗಳಲ್ಲಿನ ದೌರ್ಬಲ್ಯಗಳಿಂದ ಆಗಿರಬಹುದು, ಅಥವ ಹೆಚ್ಚು ಮಹತ್ವದ್ದೆಂದರೆ, ರೈತರು ಮತ್ತು ಕೃಷಿ ಕೂಲಿಕಾರರ ಜೀವನ ವೆಚ್ಚ ಸೂಚ್ಯಂಕ ನಿಜ ಚಿತ್ರವನ್ನು ಇದ್ದುದಕ್ಕಿಂತ ಬಹಳ ಕೆಳಗಿನ ಮಟ್ಟದಲ್ಲಿ ಲೆಕ್ಕ ಹಾಕಿರುವುದರಿಂದಾಗಿ ಇರಬಹುದು. ಏಕೆಂದರೆ ಅದು ಶಿಕ್ಷಣ ಮತ್ತು ಆರೋಗ್ಯಪಾಲನೆಯ ಖಾಸಗೀಕರಣದಿಂದಾಗುವ ವೆಚ್ಚದ ಹೆಚ್ಚಳದ ಪರಿಣಾಮಗಳನ್ನು ಗಮನಕ್ಕೆ ತಗೊಂಡಿಲ್ಲ.

ಎರಡು, ಒಂದು ನವ-ಉದಾರವಾದಿ ಅರ್ಥವ್ಯವಸ್ಥೆಯಲ್ಲಿ ಹೊರಗಣ ಮಾರುಕಟ್ಟೆಯ ಪಾತ್ರ ಆಂತರಿಕ ಮಾರುಕಟ್ಟೆಗೆ ಹೋಲಿಸಿದರೆ ಬಹಳಷ್ಟು ಹೆಚ್ಚುತ್ತದೆ. ಏಕೆಂದರೆ, ಅಂತರ್ರಾಷ್ಟ್ರೀಯ ಸ್ಪರ್ಧಾತ್ಮಕತೆಯನ್ನು ಉತ್ತಮ ಪಡಿಸುವುದಕ್ಕಾಗಿ ಕೂಲಿ/ಸಂಬಳಗಳನ್ನು ಕೆಳಮಟ್ಟದಲ್ಲಿ ಇಡುವುದರ ಪರಿಣಾಮವಾಗಿ ಆಂತರಿಕ ಮಾರುಕಟ್ಟೆಯ ಮೇಲೆ ಉದ್ದೇಶಪೂರ್ವಕವಾಗಿಯೇ ನಿರ್ಬಂಧ ಉಂಟಾಗುತ್ತದೆ. ಇದು ಭಾರತೀಯ ಅರ್ಥವ್ಯವಸ್ಥೆಯಲ್ಲಿ ಚಟುವಟಿಕೆಯ ಮಟ್ಟದ ಮೇಲೆ ವಿಶ್ವ ಆರ್ಥಿಕ ಬಿಕ್ಕಟ್ಟು ಹೇಗೆ ಪರಿಣಾಮ ಬೀರುತ್ತದೆ ಎಂಬುದಕ್ಕೆ ದಾರಿ ಒದಗಿಸುತ್ತದೆ. ರಫ್ತು ವೃದ್ಧಿ ನಿಜವಾಗಿಯೂ ನಿಧಾನಗೊಂಡಿದೆ. ಇದು ಕೈಗಾರಿಕಾ ವಲಯವೂ ಸೇರಿದಂತೆ ಒಟ್ಟು ಅರ್ಥ ವ್ಯವಸ್ಥೆಯ ಮೇಲೆ ಹಲವಾರು ರೀತಿಗಳಲ್ಲಿ ಪರಿಣಾಮ ಬೀರಿದೆ.

ಇಲ್ಲಿ ಭಾರತದ ಅರ್ಥವ್ಯವಸ್ಥೆಯ ಒಂದು ವಿಲಕ್ಷಣತೆಯನ್ನು ಗಮನಿಸಬೇಕು. ಜಾಗತಿಕ ಸರಕು ಮತ್ತು ಬಂಡವಾಳ ಹರಿವಿಗೆ ತನ್ನನ್ನು ‘ತೆರೆದು’ಕೊಳ್ಳುವ ಮೂಲಕ ಭಾರತದ ಹಲವಾರು ಸೇವಾವಲಯದ ಉತ್ಪನ್ನಗಳ, ವಿಶೇಷವಾಗಿ ಐಟಿ-ಸಂಬಂಧಿತ ಸೇವೆಗಳ ರಫ್ತುಗಳು ಹೆಚ್ಚುವುದು ನಿಜವಾಗಿಯೂ ಸಾಧ್ಯವಾಗಿದೆ. ಆದರೆ ಕೈಗಾರಿಕಾ ವಲಯಕ್ಕೆ ಸಂಬಂಧಿಸಿದಂತೆ ಈ ರೀತಿ ‘ತೆರೆದಿಟ್ಟಿದ್ದ’ರಿಂದ ಭಾರತೀಯ ಅರ್ಥವ್ಯವಸ್ಥೆಗೆ ಯಾವುದೇ ನಿವ್ವಳ ಪ್ರಯೋಜನ ಆಗಿಲ್ಲ, ತದ್ವಿರುದ್ಧವಾಗಿ, ನಿವ್ವಳವಾಗಿ ನಕಾರಾತ್ಮಕ ಪರಿಣಾಮವೇ ಉಂಟಾಗಿರಬಹುದು. ನಿಜ ಹೇಳಬೇಕೆಂದರೆ ಕೈಗಾರಿಕಾ ವೃದ್ಧಿದರ ಇಡೀ ನವ-ಉದರವಾದೀ ಅವಧಿಯಲ್ಲಿ, ಅದಕ್ಕೆ ಮೊದಲಿದ್ದ ನಿರ್ಬಂಧಗಳ ಅವಧಿಗಿಂತ ಹೆಚ್ಚೇನೂ ಇರಲಿಲ್ಲ.

ಭಾರತೀಯ ಕೈಗಾರಿಕೆಗಳಿಗೆ ಆಂತರಿಕ ಮಾರುಕಟ್ಟೆಯಲ್ಲಿ, ಪೂರ್ವ ಏಷ್ಯಾದ, ಅದರಲ್ಲೂ ಚೀನಾದ ಸ್ಪರ್ಧೆಯನ್ನು ಎದುರಿಸಿ ನಿಲ್ಲಲು ಕಷ್ಟವೆನಿಸಿದ್ದು ಒಂದೆಡೆಯಾದರೆ, ರಫ್ತು ಮಾರುಕಟ್ಟೆಯಲ್ಲೂ ಬಹಳೇನೂ ಮುಂದೊತ್ತಲು ಆಗಲಿಲ್ಲ. ಬೇರೆ ಮಾತುಗಳಲ್ಲಿ ಹೇಳುವುದಾದರೆ, ಅರ್ಥವ್ಯವಸ್ಥೆಯನ್ನು ತೆರೆದಿಟ್ಟ ಪರಿಣಾಮವಾಗಿ ಕೆಲವು ಸೇವೆಗಳಿಗೆ ಉತ್ತೇಜನೆ ಸಿಕ್ಕಿದರೂ, ಕೈಗಾರಿಕಾ ಬೆಳವಣಿಗೆಯನ್ನು ದಬಾಯಿಸಿಟ್ಟಂತಾಯಿತು.

ಈಗ ನವ-ಉದಾರವಾದಕ್ಕೆ ಮುಂದೆ ದಾರಿಗಾಣದೆ ಜಾಗತಿಕ ಆರ್ಥಿಕ ವ್ಯವಸ್ಥೆ ಒಂದು ಮಂದಗತಿಯ ಅವಧಿಯನ್ನು ಪ್ರವೇಸಿಸಿರುವಾಗ, ಈ ಕೈಗಾರಿಕಾ ದಬಾವಣೆ, ಒಂದು ಕೈಗಾರಿಕಾ ಹಿನ್ನಡೆಯಾಗಿ ಪರಿವರ್ತನೆಗೊಂಡಿದೆ, ಅತ್ತ ಸೇವಾವಲಯಕ್ಕಿದ್ದ ಉತ್ತೇಜನೆ ಕೊನೆಗೊಳ್ಳುತ್ತಿದೆ. ಇದು ಒಟ್ಟು ಅರ್ಥವ್ಯವಸ್ಥೆಯನ್ನು ಒಂದು ಸುದೀರ್ಘವಾದ ಸ್ಥಗಿತತೆಯ ಅವಧಿಯತ್ತ ನೂಕುತ್ತಿದೆ. ಇಲ್ಲಿಯೇ ಕೈಗಾರಿಕಾ ಸ್ಥಗಿತತೆಯ ಮೂರನೆಯ ಅಂಶ ಕೆಲಸ ಮಾಡಲಾರಂಭಿಸಿರುವುದು. ಇದು ಹೂಡಿಕೆಯಲ್ಲಿ ಕಡಿತಕ್ಕೆ ಸಂಬಂಧಪಟ್ಟ ಅಂಶ. ಈ ಹೂಡಿಕೆ ಇಳಿಕೆ ಕೈಗಾರಿಕಾ ಸ್ಥಗಿತತೆಯ ಕಾರಣವೂ ಹೌದು, ಪರಿಣಾಮವೂ ಹೌದು. ಈ ಹೂಡಿಕೆ ಕಡಿತ ಬಂಡವಾಳ ಸರಕು ವಲಯವನ್ನಂತೂ ಬಹಳವಾಗಿ ತಟ್ಟಿದೆ.

ಭಾರತದ ಅರ್ಥವ್ಯವಸ್ಥೆಗೆ ಹೇಗೆ ಮತ್ತೆ ಜೀವ ತುಂಬುವುದು ಎಂಬುದರ ಒಂದೇ ಒಂದು ಹೊಳಹು ಕೂಡ ಬಿಜೆಪಿ ಸರಕಾರಕ್ಕೆ ಇಲ್ಲ ಎಂದು ಬೇರೆ ಹೇಳಬೇಕಾಗಿಲ್ಲ. ಅದು ಕೊಟ್ಟ ಕಾರ್ಪೊರೇಟ್ ತೆರಿಗೆಗಳ ಕಡಿತ, ಮೊದಲೇ ನಿರೀಕ್ಷಿಸದಂತೆ, ಖಾಸಗಿ ಕಾರ್ಪೊರೇಟ್ ಹೂಡಿಕೆಯಲ್ಲಿ ಒಂದಿನಿತೂ ವ್ಯತ್ಯಾಸವನ್ನು ತಂದಿಲ್ಲ. ಏಕೆಂದರೆ, ಇಂತಹ ಹೂಡಿಕೆಗಳು ಮಾರುಕಟ್ಟೆಯ ಬೆಳವಣಿಗೆ ಎಷ್ಟರ ಮಟ್ಟಿಗೆ ಆಗುತ್ತದೆ ಎಂಬ ನಿರೀಕ್ಷೆಯನ್ನು ಅವಲಂಬಿಸಿರುತ್ತವೆ. ಮಾರುಕಟ್ಟೆಯ ವೃದ್ಧಿಯನ್ನು ಚುರುಕುಗೊಳಿಸದೇ ಇರುವ ವರೆಗೆ, ಎಷ್ಟೇ ತೆರಿಗೆ ಕಡಿತಗಳನ್ನೂ ಕೊಟ್ಟರೂ, ಹೆಚ್ಚಿನ ಹೂಡಿಕೆಗಳೇನೂ ಆಗುವುದಿಲ್ಲ. ತದ್ವಿರುದ್ಧವಾಗಿ, ಇಂತಹ ಕಡಿತಗಳಿಂದಾಗಿ ಹಣಕಾಸು ಕೊರತೆಯ ಗುರಿಯನ್ನು ತಲುಪುವುದಕ್ಕಾಗಿ ಸರಕಾರದ ವೆಚ್ಚಗಳಲ್ಲಿ ಇಳಿಕೆಯಾದರೆ, ಆಗ ಉತ್ಪಾದನಾ ಸಾಮರ್ಥ್ಯದಬಳಕೆಯೂ ಇಳಿಯುತ್ತದೆ, ಖಾಸಗಿ ಕಾರ್ಪೊರೇಟ್ ಹೂಡಿಕೆಗಳೂ ಇಂತಹ ಕಡಿತಗಳಿಂದಾಗಿ ಇಳಿಯುತ್ತವೆ.

ಅದರ ಇತರ ಕ್ರಮಗಳು, ಜಿಎಸ್‌ಟಿ ದರಗಳಲ್ಲಿ ಕೈಯಾಡಿಸುವುದು, ಮತ್ತು ಮೇಕ್ ಇನ್ ಇಂಡಿಯಾ ಪ್ರಚಾರ ಕೂಡ ಅಷ್ಟೇ ದೋಷಪೂರ್ಣವಾಗಿವೆ. ಇದರಿಂದೇನೂ ನೆರವು ಸಿಗುವುದಿಲ್ಲ. ಮತ್ತು ಇದರಿಂದ ರೆವಿನ್ಯೂ ಆದಾಯಗಳು ಕಡಿಮೆಯಾದರೆ ಮತ್ತು ಅದರಿಂದಾಗಿ, ಮತ್ತೆ ಹಣಕಾಸು ಕೊರತೆಯ ಗುರಿಯನ್ನು ತಲುಪಲಿಕ್ಕಾಗಿ ವೆಚ್ಚಗಳಲ್ಲಿ ಕಡಿತವಾದರಂತೂ, ನೆರವಿನ ಬದಲು ತೊಂದರೆಯೇ ಉಂಟಾಗುತ್ತದೆ.

ಇನ್ನು, ‘ಮೇಕ್ ಇನ್ಇಂಡಿಯಾ’ದ ಬಗ್ಗೆ ಹೇಳುವುದಾದರೆ, ಜಾಗತಿಕ ಅರ್ಥಿಕ ಬಿಕ್ಕಟ್ಟಿನಿಂದಾಗಿ ಹೆಚ್ಚೇನೂ ಹೂಡಿಕೆಗಳು ನಡೆಯದೇ ಇರುವಾಗ, ಭಾರತದೊಳಕ್ಕೆ ಹೆಚ್ಚಿನ ಹೂಡಿಕೆಗಳನ್ನು ಪಡೆಯುವ ನಿರೀಕ್ಷೆ ಇಟ್ಟುಕೊಳ್ಳುವಂತಿಲ್ಲ. ಈಗ ಸಿಎಎ ಮತ್ತು ಎನ್‌ಆರ್‌ಸಿ ಉಂಟು ಮಾಡಿರುವ ಸಾರ್ವತ್ರಿಕ ಸಾಮಾಜಿಕ ಅಸಂತೃಪ್ತಿ, ಅದಕ್ಕೂ ಮೇಲಾಗಿ ಮುಸ್ಲಿಮರ ವಿರುದ್ಧ ಹತ್ಯಾಕಾಂಡ, ಇಂತಹ ಹೂಡಿಕೆಗಳನ್ನು ಆಕರ್ಷಿಸುವ ಬದಲು, ಹೊಡೆದೋಡಿಸುತ್ತದಷ್ಟೇ.

(‘ಜನಶಕ್ತಿ’ ವಾರಪತ್ರಿಕೆಯಲ್ಲಿ ಪ್ರಕಟವಾದ ಲೇಖನ)

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading
Advertisement

Title

ಸಿನಿ ಸುದ್ದಿ6 hours ago

ಕನ್ನಡದ ಹಾಸ್ಯ ದಿಗ್ಗಜ ಬುಲೆಟ್ ಪ್ರಕಾಶ್ ಇನ್ನಿಲ್ಲ..!

ಸುದ್ದಿದಿನ,ಬೆಂಗಳೂರು : ಸ್ಯಾಂಡಲ್ ವುಡ್ ನ ಹಾಸ್ಯ ನಟ ಬುಲೆಟ್ ಪ್ರಕಾಶ್ (45)ಇಂದು ಕಿಡ್ನಿ ವೈಫಲ್ಯದಿಂದ ಮೃತರಾಗಿದ್ದಾರೆ. ಇತ್ತೀಚೆಗೆ ಬುಲೆಟ್ ಪ್ರಕಾಶ್ ಅನಾರೋಗ್ಯದಿಂದ ಬಳಲುತ್ತಿದ್ದು, ಚಿಕಿತ್ಸೆ ಮೂಲಕ...

ಅಂತರಂಗ10 hours ago

ಅರಿಮೆಯ ಅರಿವಿರಲಿ-9 : ಆತ್ಮರತಿ

ಯೋಗೇಶ್ ಮಾಸ್ಟರ್ ಅವನು ಲ್ಯಾಕೋನಿಯಾದ ಬೇಟೆಗಾರ. ಅವನಿದ್ದದ್ದು ಪುರಾತನ ಗ್ರೀಸಿನಲ್ಲಿರುವ ಥಿಸ್ಪಿಯೇ ಪ್ರಾಂತ್ಯ. ಅವನೋ ಕಟ್ಟುಮಸ್ತಾದ ಮೈಕಟ್ಟಿನವ, ಸುಂದರ ಮುಖದವ. ಅವನೂ ಸುಂದರ. ಅವನಿಗೂ ಸುಂದರವಾದ ವಿಷಯಗಳಲ್ಲಿ...

ಲೈಫ್ ಸ್ಟೈಲ್11 hours ago

‘ಕಲ್ಲಂಗಡಿ ಸಿಪ್ಪೆ ದೋಸೆ, ತೆಳ್ಳವು’ ಮಾಡಿ ಸವಿಯಿರಿ..!

ಶಶಿಕಲಾ ಸುನೀಲ್ ಬೇಕಾಗುವ ಸಾಮಗ್ರಿಗಳು ದೋಸೆ ಅಕ್ಕಿ – 2 ಕಪ್ ಮೆಂತ್ಯ – 1 ಸ್ಪೂನ್ ತೆಂಗಿನತುರಿ – 1 ಹಿಡಿ ಕಲ್ಲಂಗಡಿಯ ಸಿಪ್ಪೆ 10...

ಲೈಫ್ ಸ್ಟೈಲ್12 hours ago

‘ಕೊರೊನ’ ಇದು ಪ್ರಕೃತಿ ಸೃಷ್ಟಿಸೋ ಅವತಾರ..! HANDS UP  ಮಾನವನೇ..!

“ಮಾನವ ಸಂಕುಲದ ನಾಗಲೋಟಕ್ಕೊಂದು ಮಾರಕ ತಡೆ” “LOCK DOWN : ಇದೊಂದು ಆತ್ಮ ವಿಮರ್ಶೆಯ ಸಮಯ.” ಡಾ. ಬಿನಯ್ ಕುಮಾರ್ ಸಿಂಗ್ , ಸನ್‍ಶೈನ್ ಪುರಂತರ ಆಸ್ಪತ್ರೆ,...

ಅಂತರಂಗ2 days ago

ಅರಿಮೆಯ ಅರಿವಿರಲಿ-8 : ಶೀಲ ಅಶ್ಲೀಲ

ಯೋಗೇಶ್ ಮಾಸ್ಟರ್ ಶೀಲದ ಗೀಳಿನ ಸಿನಿಮಾಗಳು ಶೀಲ ಅಶ್ಲೀಲದರಿಮೆ (Madonna/Whore Complex)ನಮ್ಮ ಭಾರತೀಯ ಸಿನಿಮಾಗಳಲ್ಲಿ ಚೆನ್ನಾಗಿ ಅರ್ಥವಾಗುತ್ತದೆ. ಪಾಪ, ಅವರಾದರೋ ಹೊಸದನ್ನೇನೂ ಸೃಷ್ಟಿಸಿ ತೋರುವುದಲ್ಲ. ಸಮಾಜದಲ್ಲಿ ಸಾಮಾನ್ಯವಾಗಿರುವ...

ಭಾವ ಭೈರಾಗಿ2 days ago

ಕವಿತೆ | ನೆನಪ ಹಿಂಬಾಲಿಸಿ ಬಂದವಳು

  ಅಪೂರ್ವ ಜಗದೀಶ್ ನಡೆವ ದಾರಿಯಲಿ ನಾ ಎಡವಿದಾಗಲೆಲ್ಲ ಕಿಸೆಯಲ್ಲಿನ ನೆನಪುಗಳು ರಸ್ತೆಯ ತುಂಬೆಲ್ಲ ನಕ್ಷತ್ರಗಳಂತೆ ಹರಡಿಬಿಡುವವು. ಹುಚ್ಚಿಯಂತೆ ಅವುಗಳನ್ನೆಲ್ಲ ಒಂದೊಂದಾಗಿ ಹೆಕ್ಕಿ ಮತ್ತೆ ಕಿಸೆಗೆ ತುಂಬಿಸಿಕೊಳ್ಳುತ್ತೇನೆ....

ಲೈಫ್ ಸ್ಟೈಲ್2 days ago

‘ಗೋಲ್ಗಪ್ಪಾ, ಪಾನಿಪುರಿ, ಗಪ್ ಚುಪ್’ ರೆಸಿಪಿ ಇಲ್ಲಿದೆ ಮಾಡಿ ನೋಡಿ..!

ಶಶಿಕಲಾ ಸುನೀಲ್ ಬೇಕಾಗುವ ಸಾಮಗ್ರಿಗಳು ಚಿರೋಟಿ ರವೆ – 2 ಕಪ್ ಮೈದಾ – 3 ಸ್ಪೂನ್ ಅಡಿಗೆ ಸೋಡಾ – ಚಿಟಕೆ ಆಲೂಗಡ್ಡೆ – 3...

ಲೋಕಾರೂಢಿ2 days ago

ಮನುಕುಲದ ಉಳಿವಿಗೆ ಮಾನವ ಪ್ರೇಮದ ಸಂಕಲ್ಪ

ಗಂಗಾಧರ ಬಿ ಎಲ್ ನಿಟ್ಟೂರ್ ನಿಜ ನಾವೀಗ ಸಂದಿಗ್ಧ ಮತ್ತು ಸಂಕಟದ ಪರಿಸ್ಥಿತಿಯಲ್ಲಿದ್ದೇವೆ. ಹೌದು, ಇದು ನಮಗಷ್ಟೇ ಅಲ್ಲ ಇಡೀ ಲೋಕಕ್ಕೇ ಬಂದೆರಗಿರುವ ಕಂಟಕ. ಆದರೆ ಈ...

ದಿನದ ಸುದ್ದಿ3 days ago

ಆತ್ಮೀಯ ಮುಸ್ಲಿಂ ಗೆಳೆಯರಿಗಾಗಿ, ಗೌರವಪೂರ್ವಕವಾಗಿ..!

ವಿವೇಕಾನಂದ. ಹೆಚ್.ಕೆ. ಹೌದು, ನಿಮಗೆ ತ್ರಿವಳಿ ತಲ್ಲಾಖ್ ವಿಷಯದಲ್ಲಿ, ಬಾಬರಿ ಮಸೀದಿ ವಿವಾದದ ತೀರ್ಪಿನ ವಿಷಯದಲ್ಲಿ, ಗೋ ಮಾಂಸ ನಿಷೇಧದ ವಿಚಾರದಲ್ಲಿ, ಸಿಎಎ – ಎನ್ ಆರ್...

ಅಂತರಂಗ3 days ago

ಅರಿಮೆಯ ಅರಿವಿರಲಿ-7 : ಕುಮಾರ ಕಾಮ

ಯೋಗೇಶ್ ಮಾಸ್ಟರ್ ಹಗ್ಗದ ಕೊನೆಗಳು ಪ್ರೇಮ ಮತ್ತು ಕಾಮಗಳ ನಡುವೆ ಅದೆಷ್ಟೇ ಅಂತರವನ್ನು ಕಾಯ್ದುಕೊಂಡಿದ್ದರೂ, ಅಥವಾ ವ್ಯತ್ಯಾಸವನ್ನು ಕಂಡುಕೊಂಡಿದ್ದರೂ ಅವೆರಡೂ ಕೆಲವೊಮ್ಮೆ ಬೆರೆತುಕೊಂಡುಬಿಡುತ್ತವೆ. ಕಾರಣ ಈವೆರಡೂ ಒಂದೇ...

Trending