Connect with us
http://www.suddidina.com/category/political-news

ಅಂತರಂಗ

ಪರೀಕ್ಷೆಗೆ ಪರಿಣಾಮಕಾರಿ ಓದು

Published

on

 

ವಿದ್ಯಾ ನಾಮನರಸ್ಯ ರೂಪಮಧಿಕಂ ಪ್ರಚ್ಛನ್ನ ಗುಪ್ತ ಧನಂ
ವಿದ್ಯಾಭೋಗಕರೀ ಯಶಃ ಸುಖಕರೀ ವಿದ್ಯಾ ಗುರುಣಾಂ ಗುರುಃ ||
ವಿದ್ಯಾಬಂಧು ಜನೋ ವಿದೇಶಗಮತೀ ವಿದ್ಯಾಪರಂ ದೈವತಂ |
ವಿದ್ಯಾ ರಾಜಸು ಪೂಜ್ಯತೀ ನಹಿ ಧನಂ ವಿದ್ಯಾವಿಹೀನಃ ಪಶುಃ ||

ವಿದ್ಯೆಯು ಮನುಷ್ಯನಿಗೆ, ಸ್ತ್ರೀಗೆ ಸೌಂದರ್ಯವಾಗಿದೆ. ಅದೊಂದು ದೊಡ್ಡ ಸಂಪತ್ತು, ಆದರೆ ಅದು ಹೊರಗೆ ಕಾಣಿಸದು. ವಿದ್ಯೆಯ ಬಲದಿಂದ ನಾವು ನಾನಾ ಬಗೆಯ ಸುಖ ಅನುಭವಿಸಬಹುದು. ಅದು ಯಶಸ್ವಿಗೆ ಮೂಲ ಕಾರಣವು. ಗುರುಗಳಲ್ಲಿ ಅದು ಶ್ರೇಷ್ಠ ಗುರು ಎನಿಸಿರುವುದು. ಪರ ನಾಡಿನಲ್ಲಿ ವಿದ್ಯೆಯೇ ಶ್ರೇಷ್ಠ ಗೆಳೆಯ. ವಿದ್ಯೆಯು ಶ್ರೇಷ್ಠ ದೇವತೆ. ರಾಜ ಮಹಾರಾಜರ ಸನ್ನಿಧಾನದಲ್ಲಿ ಸಂಪತ್ತಿಗೆ ಬೆಲೆಯಿಲ್ಲ. ಆದರೆ ಅದೇ ವಿದ್ಯೆ ದೊಡ್ಡ ಗುಣವಾಗಿ ಪರಿಣಮಿಸುವುದು.

ಹೀಗೆ ಪರಿಣಾಮಕಾರಿಯಾಗಿ ರೂಪಿಸಿಕೊಳ್ಳಬೇಕು.‌ಅತೀ ಹೆಚ್ಚು ಅಂಕ ಪಡೆಯುವ ದಿಸೆಯಲ್ಲಿ ಪರಿಣಾಮಕಾರಿ ಓದುವುದು ಬಹಳ ಮುಖ್ಯವಾದುದು. ಓದು ಶಿಕ್ಷಣದ ಹಾಗೂ ವ್ಯಕ್ತಿತ್ವ ರೂಪಿಸುವ ಅವಿಭಾಜ್ಯ ಅಂಗ. ವಿದ್ಯಾರ್ಥಿಯಾದವನು/ಆದವಳು ಸದಾ ಪುಸ್ತಕವನ್ನು ಓದುವ ಹವ್ಯಾಸ ಬೆಳೆಸಿಕೊಂಡಿರಬೇಕು. ಬಲವಂತ, ಕಷ್ಟಪಟ್ಟು ಹಾಗೂ ಒತ್ತಾಯಕ್ಕೆ ಓದುವುದು ಸಮಂಜಸವಲ್ಲ. ಇಷ್ಟಪಟ್ಟು ಓದಿದಾಗ ವಿಷಯವನ್ನು ಬೇಗ ಅರ್ಥಮಾಡಿಕೊಳ್ಳಬಹುದು.ಓದಿನಲ್ಲೂ ಸಂಪೂರ್ಣ ಮನಸ್ಸಿಟ್ಟು ಹೆಚ್ಚಿನ ಏಕಾಗ್ರತೆಯಿಂದ ಓದುವ ಅಭ್ಯಾಸವನ್ನು ಚಿಕ್ಕ ವಯೋಮಾನದಿಂದಲೇ ಬೆಳೆಸಿಕೊಳ್ಳಬೇಕು.

ವಿದ್ಯಾರ್ಥಿಗಳು ಗಮನಿಸಬೇಕಾದ ಅಂಶಗಳು

  1. ನೀವು ಓದುವ ಕೊಠಡಿ ಸಾಕಷ್ಟು ಗಾಳಿ, ಬೆಳಕಿನಿಂದ ಕೂಡಿರಲಿ. ಬಿಳಿಯ ಬೆಳಕು ಅವಶ್ಯಕ.
  2. ಮನಸ್ಸನ್ನು ಉದ್ರೇಕಿಸುವ ಭಾವಚಿತ್ರಗಳು ಬೇಡ.
  3. ವಿವಿಧ ವಿಷಯಕ್ಕೆ ಸಂಬಂಧಿಸಿದ ಚಾರ್ಟ್‍ಗಳಿರಲಿ. ಮನೆಯಲ್ಲಿ ಹಾಗೂ ಶಾಲೆಯಲ್ಲಿ ಅನುಸರಿಸಬೇಕಾದ ನಿರ್ವಹಣೆ ಪಟ್ಟಿ, ವೇಳಾ ಪಟ್ಟಿ ಇರಲಿ.
  4. ಪುಸ್ತಕಗಳನ್ನು ಕ್ರಮಬದ್ಧವಾಗಿ ಜೋಡಿಸಿಡಬೇಕು. ಎಲ್ಲಾ ಪುಸ್ತಕಗಳನ್ನು ಹರಡಿಕೊಂಡು ಓದುವುದು ಸೂಕ್ತವಲ್ಲ.
  5. ಓದಲು ಕುಳಿತುಕೊಳ್ಳುವ ಜಾಗ ಸ್ಥಿರವಾಗಿರಲಿ, ಪದೇ ಪದೇ ಬದಲಾಯಿಸುವುದು ಬೇಡ.
  6. ಓದುವ ಕೊಠಡಿಯಲ್ಲಿ ಟಿ.ವಿ., ರೇಡಿಯೋ, ಮೊಬೈಲ್, ಟೇಪ್‍ರೆಕಾರ್ಡರ್, ಫೋನ್ ಇವುಗಳಿಂದ ದೂರವಿರಿ.
  7. ನೀವು ಓದುವಾಗ ಬೇರೆ ಕೊಠಡಿಯಲ್ಲಿರುವ ಟಿ.ವಿ. ಅಥವಾ ರೇಡಿಯೋ, ಮೊಬೈಲ್ ಶಬ್ದ ಕೇಳದಂತೆ ಎಚ್ಚರವಹಿಸಿರಿ.
  8. ಕುಳಿತುಕೊಂಡು ಓದುವುದು ಸೂಕ್ತ. ಮಲಗಿ ಓದುವುದರಿಂದ ಬಹುಬೇಗ ನಿದ್ರೆಗೆ ಜಾರುತ್ತೀರಿ.
  9. ಬೆಳಗಿನ ಜಾವದ ಸಮಯದಲ್ಲಿ ಹೆಚ್ಚು ಓದುವುದು ಒಳ್ಳೆಯ ಅಭ್ಯಾಸ ಹಾಗೂ ವಿಷಯವನ್ನು ಬಹುಬೇಗ ಗ್ರಹಿಸಬಹುದು.
  10. ಒಮ್ಮೆ ಓದುವುದಕ್ಕೆ ಕುಳಿತರೆ ಕನಿಷ್ಠ ಅರ್ಧ ಗಂಟೆ/ ಒಂದು ಗಂಟೆ ಏಳದಂತೆ ಓದುವ ಅಭ್ಯಾಸ ಬೆಳೆಸಿಕೊಳ್ಳುವುದು ಸೂಕ್ತ.
  11. ತರಗತಿಯಲ್ಲಿ ಆದ ಪಾಠಗಳನ್ನು ಅಂದಿನ ದಿನದಂದೆ ಓದಿ ಬರೆಯಿರಿ.
  12. ಅರ್ಥವಾಗದೇ ಇರುವ ವಿಷಯಗಳನ್ನು ನಿಮ್ಮ ಗೆಳೆಯರ ಅಥವಾ ಶಿಕ್ಷಕರ ಜೊತೆ ಚರ್ಚಿಸಿ ತಿಳಿದುಕೊಳ್ಳಿ.
  13. ಯಾವ ವಿಷಯವೂ ಕಠಿಣವಲ್ಲ ಎಂಬುದಕ್ಕೆ ಮನವರಿಕೆ ಮಾಡಿಕೊಳ್ಳಿ.
  14. ಕಡಿಮೆ ಅಂಕ ಬಂದಿರುವ ವಿಷಯಗಳ ಮೇಲೆ ಹೆಚ್ಚು ಹೆಚ್ಚು ಏಕಾಗ್ರತೆಯಿಂದ ಓದಿ ಬರೆದು ಅಭ್ಯಾಸ ಮಾಡಿ.
  15. ಓದುವಾಗ ಆ ವಿಷಯಕ್ಕೆ ಸಂಬಂಧಿಸಿದಂತೆ ಸಣ್ಣ ಸಣ್ಣ ಟಿಪ್ಪಣಿ ಮಾಡಿಕೊಳ್ಳಿ.
  16. ಓದಬೇಕಾದ ದಿನಚರಿ, ಕಾಲ ನಿರ್ವಹಣಾ ಪಟ್ಟಿ ಹಬ್ಬ, ರಜಾ ದಿನವೂ ಅನುಸರಿಸಲ್ಪಡುವಂತೆ ಎಚ್ಚರಿಕೆ ವಹಿಸಿ. ಆ ದಿನ ಹಿಂದಿನ ವಾರದಲ್ಲಿ ಕಲಿಯುವಿಕೆಯಲ್ಲಿ ಆಗಿರಬಹುದಾದ ಕೊರತೆಯನ್ನು ಭರಿಸುವ ದಿನ ಎಂಬುದಾಗಿ ಭಾವಿಸುತ್ತ ಓದಿ ಬರೆಯುವ ಪರಿಪಾಠ ಬೆಳೆಸಿಕೊಳ್ಳಿ.
  17. ಕೀಳು ಅಭಿರುಚಿ, ಕಾಡು ಹರಟೆಯಲ್ಲಿ ತೊಡಗಬೇಡಿ
  18. ಪದ್ಯ, ಸೂತ್ರ, ಸಮೀಕರಣ ಇತ್ಯಾದಿಗಳನ್ನು ಬಾಯಿಪಾಠ ಅಥವಾ ಕಂಠಪಾಠ ಮಾಡಿ.

ಪರೀಕ್ಷೆ

ಪರೀಕ್ಷೆಗಳು ವಿದ್ಯಾಭ್ಯಾಸದ ಒಂದು ಭಾಗವೇ ಆಗಿದೆ. ಟೆಸ್ಟುಗಳು, ಚಿಕ್ಕ ಪರೀಕ್ಷೆಗಳು, ಅರ್ಧವಾರ್ಷಿಕ ಪರೀಕ್ಷೆಗಳು ಅಣಕು ಪರೀಕ್ಷೆಗಳು,ಫೈನಲ್ ಪರೀಕ್ಷೆಗಳು ಹೀಗೆ.. ವಿದ್ಯಾರ್ಥಿ ಅನೇಕ ಪರೀಕ್ಷೆಗಳನ್ನು ಎದುರಿಸಬೇಕು.

ಪಬ್ಲಿಕ್ ಪರೀಕ್ಷೆಯಿರುವ 10ನೇ ತರಗತಿ, ಪಿಯುಸಿ ವಿದ್ಯಾರ್ಥಿಗಳು ಮತ್ತು ಪೋಷಕರು ಅತೀ ಹೆಚ್ಚು ಕಾಳಜಿ ವಹಿಸುವ ಪ್ರಯತ್ನದಲ್ಲಿರುತ್ತಾರೆ. ಏಕೆಂದರೆ ಇದು ವಿದ್ಯಾರ್ಥಿಯ ದೆಶೆಯಲ್ಲಿ

ನೂರಕ್ಕೊಬ್ಬರು ವಿದ್ಯಾರ್ಥಿಗಳು ಪರೀಕ್ಷೆಗೆ ಒಂದೆರಡು ತಿಂಗಳು ಅಧ್ಯಯನ ಮಾಡಿ ಒಳ್ಳೆಯ ಅಂಕಗಳನ್ನು ಗಳಿಸಬಲ್ಲರು. ಆದರೆ ಉಳಿದ 98 ಸ್ಲೋ ಅಂಡ್ ಸ್ಟಡಿ, ವಿನ್ ದಿ ರೇಸ್ ನಿಧಾನವಾಗಿ ಅವಸರ ಮಾಡಿಕೊಳ್ಳದೆ, ಕ್ರಮಬದ್ಧವಾಗಿ ಅಧ್ಯಯನ ಮಾಡಿ, ಯಶಸ್ಸನ್ನು ಸಾಧಿಸಬಹುದು ಪ್ರಾರಂಭದಿಂದಲೇ ಓದಿದರೆ ಸಿದ್ಧತೆ ಮಾಡಿದರೆ, ಸಾಕಷ್ಟು ಸಮಯ ಸಿಗುತ್ತದೆ. ರಿಕಾಲ್ ಮತ್ತು ರಿಹರ್ಸಲ್ ಮಾಡಲು ಕಾಲಾವಕಾಶವಿರುತ್ತದೆ. ಮಾನಸಿಕ ಒತ್ತಡ ಕಂಡುಬರುವುದಿಲ್ಲ. ಮಧ್ಯೆ ಮಧ್ಯೆ ವಿಶ್ರಾಂತಿ ಮಾಡಲು ಸಮಯ ಸಿಗುತ್ತದೆ. ತಮ್ಮ ನಿರೀಕ್ಷಿತ ಗುರಿ ತಲುಪಲು ಸಹಾಯಕವಾಗುತ್ತದೆ. ಇಂತಹ ವಿಚಾರಗಳನ್ನು ಶಿಕ್ಷಕರು ಪಾಲಕರಿಗೆ ಪೋಷಕರು ವರ್ಗದವರಿಗೆ ಹಾಗೂ ವಿದ್ಯಾರ್ಥಿಗಳಿಗೆ ಮನವರಿಕೆ ಮಾಡಿ ತಿಳಿಸಬೇಕು. ಪ್ರತಿ ತಿಂಗಳಿಗೊಮ್ಮೆ ಶಿಕ್ಷಕರು ಪೋಷಕರ ಸಭೆ ಕರೆದು ತಮ್ಮ ಯೋಜನೆ, ಗುರಿ ಉದ್ದೇಶವನ್ನು ತಿಳಿಸುವುದು ಸೂಕ್ತ.

ಆಸಕ್ತಿಯಿಂದ ಪಾಠ ಕೇಳುವುದು

ವಿದ್ಯಾರ್ಥಿಗಳು ಒತ್ತಾಯಕ್ಕೆ ತರಗತಿಗಳಿಗೆ ಹೋಗಬಾರದು. ಶಿಕ್ಷಕರು ಹೇಳುವಂತಹ ಪಾಠವನ್ನು ಶ್ರದ್ಧೆಯಿಂದ ಆಲಿಸಿಕೊಳ್ಳಬೇಕು. ಅಲ್ಲದೆ ಅನುಮಾನದ ಅರ್ಥವಾಗದಂತಹ ವಿಷಯಗಳನ್ನು ಮುಕ್ತವಾಗಿ ಚರ್ಚಿಸಿ ಪರಿಹಾರವನ್ನು ಕಂಡುಕೊಳ್ಳಬೇಕು.ನುರಿತ ಶಿಕ್ಷಕರು ವಿದ್ಯಾರ್ಥಿಗಳಿಗೆ ವಿಭಿನ್ನ ಆಯಾಮಗಳಿಂದ, ಸರಳವಾಗಿ, ಆಕರ್ಷಕವಾಗಿ ಭೋದನೆ ಮಾಡಿ ಆಸಕ್ತಿಯನ್ನು ಕೆರಳಿಸುವಂತಿದ್ದರೆ. ಆದ್ದರಿಂದ ವಿದ್ಯಾರ್ಥಿಗಳು ಕಡ್ಡಾಯವಾಗಿ ತರಗತಿಗಳಿಗೆ ಹಾಜರಾಗುವುದರಿಂದ ಧನಾತ್ಮಕವಾದ ಅಂಶಗಳು ಹೆಚ್ಚುತ್ತವೆ.

ತರಗತಿಯಲ್ಲಿರುವಾಗ ನಮ್ಮ ಮನಸ್ಸು ಹಿಡಿದು ಏಕಾಗ್ರತೆಯಿಂದ ಪಾಠ, ಪ್ರವಚನದ ಕಡೆ ಸಾಗಬೇಕು. ಹಸಿವಿನಿಂದ ಪಾಠ ಕೇಳುವುದು ಕಲಿಕೆಗೆ ಭಂಗ ತರುತ್ತವೆ. ಅಲ್ಲದೆ ಅತೀ ಹೆಚ್ಚು ಊಟ ಮಾಡಿದರೆ ನಿದ್ರೆಗೆ ಜಾರುತ್ತಾರೆ. ಊಟ, ತಿಂಡಿ ಸಮ ಪ್ರಮಾಣದಲ್ಲಿ ಸೇವಿಸಿದಾಗ ಮನಸ್ಸು ಹತೋಟಿಯಲ್ಲಿದ್ದು ಕಲಿಕೆಗೆ ಪೂರಕವಾದ ಅಂಶಗಳನ್ನು ಒದಗಿಸುತ್ತದೆ. ಶಾಲಾ ಅಥವಾ ಕಾಲೇಜಿನಿಂದ ಮನೆಗೆ ಬಂದ ಮೇಲೆ ಮುಖ ತೊಳಿದು ದೈಹಿಕ ಶ್ರಮವಾಗುವಂತಹ ಆಟಗಳನ್ನು ಆಟವಾಡಿದಾಗ ಮನಸ್ಸು ಹಗುರವಾಗುತ್ತದೆ.

ನಂತರ ದೈನಂದಿನ ಪಾಠ ಪ್ರವಚನಗಳನ್ನು ನೆನಪು ಮಾಡಿಕೊಳ್ಳಿ. ಇಲ್ಲಿ ನೆನಪಾಗುವ ವಿಷಯವನ್ನು ಒಂದು ಕಡೆ ಬರೆಯಿರಿ. ಅಲ್ಲದೆ ನೆನಪಾಗದ ವಿಷಯವನ್ನು ಪಟ್ಟಿ ಮಾಡಿಕೊಂಡು ಅದಕ್ಕೆ ಸಂಬಂಧಿಸಿದ ನೋಟ್ಸ್ ಮತ್ತು ಪುಸ್ತಕಗಳಿಂದ ನೋಡಿ, ಪುನಃ ನೆನಪು ಮಾಡಿಕೊಳ್ಳಿ. ಅರ್ಥವಾಗದ ವಿಷಯವನ್ನು ಗುರುತು ಮಾಡಿಕೊಂಡು ನಿಮ್ಮ ಮಿತ್ರರು ಅಥವಾ ಶಿಕ್ಷಕರಿಂದ ಪರಿಹಾರ ಕಂಡುಕೊಂಡರೆ ಶಾಶ್ವತವಾಗಿ ಸ್ಮೃತಿಪಟಲದಲ್ಲಿ ಉಳಿಯುತ್ತದೆ. ಇದನ್ನು ದಿನನಿತ್ಯವೂ ಅಭ್ಯಾಸ ಮಾಡಿಕೊಳ್ಳುವುದು ಉತ್ತಮ.

ಮನೆಯ ಅಭ್ಯಾಸ

ಗೇಮ್ಸ್, ರೇಡಿಯೋ, ಟಿ.ವಿ.,ಮೊಬೈಲ್, ವೀಡಿಯೋ ಇವುಗಳಲ್ಲಿ ಹೆಚ್ಚು ಸಮಯವನ್ನು ವ್ಯರ್ಥ ಮಾಡದೆ ಇವುಗಳಿಂದ ದೂರವಿರುವುದು ಸೂಕ್ತ.

ಮನೆಯಲ್ಲಿ ಸೂಕ್ತವಾದ ಸ್ಥಳವನ್ನು ಆಯ್ಕೆ ಮಾಡಿಕೊಂಡು ಓದಿಗೆ ಭಂಗತರದಂತಹ ಸ್ಥಳದಲ್ಲ್ಲಿ ಕುಳಿತುಕೊಳ್ಳುವುದು ಸಹಾಯವಾಗುತ್ತದೆ. ಪದೇ ಪದೇ ಓದುವ ಸ್ಥಳವನ್ನು ಬದಲಾವಣೆ ಮಾಡಬಾರದು. ಆದರೆ ಓದುವ ಸಮಯ ಯಾವುದು ಪರಿಣಾಮಕಾರಿ, ಯಾವುದು ಅತ್ಯುತ್ತಮವೆಂದು ತುಂಬಾ ಪೋಷಕರು ಶಿಕ್ಷಕರನ್ನು ಕೇಳುವ ಪ್ರಶ್ನೆಯಾಗಿದೆ. ಆದರೆ ಯಾವುದು ಪರಿಣಾಮಕಾರಿ ಎಂದು ಯಾವಾಗ ಏಕಾಗ್ರತೆಯಿಂದ ಓದುತ್ತಾರೆಯೋ ಅದೇ ಸೂಕ್ತ ಸಮಯ. ನೀವು ಕುಳಿತುಕೊಳ್ಳುವ ಸಮಯ. ನಿತ್ಯ ಕುಳಿತುಕೊಳ್ಳುವ ಜಾಗ, ಪ್ರಶಾಂತವಾದ ಸ್ಥಳ, ಆಕರ್ಷಣೆಗೊಳ್ಳುವ ಮುಕ್ತವಾದ ಪ್ರದೇಶ, ಸಾಕಷ್ಟು ಗಾಳಿ, ಬೆಳಕು ಇರುವ ಪ್ರದೇಶವನ್ನು ಆಯ್ಕೆ ಮಾಡಿಕೊಂಡು ಅಭ್ಯಾಸ ಮಾಡಿ.

ಓದಿನ ವಿಧಾನ

ಏಕಾಗ್ರತೆಯಿಂದ ಓದಿ ಅರ್ಥವಾಗುವಂತೆ ಓದಿ, ಮನನ ಮಾಡಿಕೊಳ್ಳಿ. ಗಟ್ಟಿಯಾಗಿ ಅಥವಾ ಮನಸ್ಸಿನಲ್ಲಿಯೋ ಓದುತ್ತೀರೋ ಅದು ಓದುಗರಿಗೆ ಬಿಟ್ಟ ವಿಚಾರ. ಆದರೆ ಗಟ್ಟಿಯಾಗಿ ಓದಿದರೆ ಬಹು ಬೇಗ ಆಯಾಸವಾಗುವುದು ಸಹಜ. ಆದರೆ ಬಾಯಿಪಾಠ ಕಲಿಯುವುದರಿಂದ ಅಲ್ಪಾವಧಿ ನೆನಪಿನಲ್ಲಿ ಅದು ಉಳಿದು ಒಂದೆರಡು ದಿನಗಳಲ್ಲಿ ಮರೆಯುವುದು ಸಾಧ್ಯವಾಗುತ್ತದೆ. ಅರ್ಥ ಮಾಡಿಕೊಂಡು ಓದಿದಾಗ ದೀರ್ಘಾವಧಿ ನೆನಪಿನ ಸಂಗ್ರಹಕ್ಕೆ ಸೇರುತ್ತದೆ.

ಗುಂಪು ಅಧ್ಯಯನ

ಕೆಲವು ವಿದ್ಯಾರ್ಥಿಗಳು ಒಟ್ಟಿಗೆ ಸೇರಿ ಅಧ್ಯಯನ ಮಾಡಲು ಇಷ್ಟಪಡುತ್ತಾರೆ. ಇಬ್ಬರು, ಮೂವರು ಅಥವಾ ನಾಲ್ಕೈದು ಜನ ಸೇರಿ ಶಾಲೆ, ಮನೆ,ಟೆರಸ್‍ನಲ್ಲಿ ಅಧ್ಯಯನ ಮಾಡುತ್ತಾರೆ. ಒಬ್ಬರು ಗಟ್ಟಿಯಾಗಿ ಓದುವುದು, ಉಳಿದವರು ಕೇಳಿಸಿಕೊಳ್ಳುವುದು, ಒಬ್ಬರು ಅಧ್ಯಯನ ಮಾಡಿ ಭೋದಿಸುವುದು, ಪ್ರಶ್ನೆಗಳಿಗೆ ಉತ್ತರವನ್ನು ಕಂಡುಕೊಳ್ಳುವುದು, ಅರ್ಥವಾಗದ ವಿಷಯ ಚರ್ಚೆ ಮಾಡುವುದು.

ಅನುಕೂಲಗಳು

  • ಒಬ್ಬರು ಇನ್ನೊಬ್ಬರಿಗೆ ಪ್ರೇರಣೆಯಾಗುತ್ತಾರೆ.
  • ಕ್ರಮಬದ್ಧ ಅಧ್ಯಯನಕ್ಕೆ ಸಹಾಯಕಾರಿ
  • ಏಕಾಗ್ರತೆ ಹೆಚ್ಚಿಸುವುದು.
  • ಉತ್ಸಾಹದ ವಾತಾವರಣ ನಿರ್ಮಿಸುತ್ತದೆ.
  • ಕಲಿಕೆ ಮತ್ತು ನೆನಪು ಉತ್ತಮಗೊಳ್ಳುತ್ತವೆ.
  • ಪರಿಣಾಮಕಾರಿ ಕಲಿಕೆಗೆ ಈ ವಿಧಾನ ಅನುಸರಿಸಿ ಅನುಷ್ಠಾನಗೊಳಿಸಿ.
  • ಓದಲು ಸೂಕ್ತ ಸಮಯ ಮತ್ತು ಸ್ಥಳ ಆಯ್ಕೆ ಮಾಡಿ
  • ಏಕಾಗ್ರತೆಯಿಂದ 30 ನಿಮಿಷ ಓದಿ, ಓದಿದ್ದನ್ನು ಅರ್ಥ ಮಾಡಿಕೊಳ್ಳಿ.
  • ಏನನ್ನು ಓದಿದ್ದೇನೆ ಎಂಬುದರ ಸಾರಾಂಶವನ್ನು ಬರೆದುಕೊಳ್ಳಿ.
  • ಓದಿದ್ದನ್ನು ಮನಸ್ಸಿನಲ್ಲಿ ಮನನ ಮಾಡಿಕೊಳ್ಳಿ. ಓದಿದ ವಿಷಯವನ್ನು ಪ್ರತಿದಿನ, ಒಂದು ವಾರ ನಂತರ ತಿಂಗಳ ನಂತರ ಯಾವುದು ಮನಸ್ಸಿಗೆ ಬರುತ್ತಿದೆ ಹಾಗೂ ಯಾವುದೂ ಮನಸ್ಸಿನಲ್ಲಿ ಬರುವುದಿಲ್ಲವೆಂದು ಪಟ್ಟಿ ಮಾಡಿಕೊಂಡು ಪುನಃ ಅಧ್ಯಯನ ಮಾಡುವುದು.
  • ಪ್ರಶ್ನೆಗೆ ಸಂಬಂಧಿಸಿದಂತೆ ಮನೆಯಲ್ಲಿ ಕಾಲಮಿತಿಯಲ್ಲಿ ಉತ್ತರಿಸುವ ಅಭ್ಯಾಸ ಮಾಡಿ. ಇದರಲ್ಲಿ ಕಂಡು ಬರುವ ದೋಷಗಳನ್ನು ಸರಿಪಡಿಸಿಕೊಂಡರೆ ಗುಣಮಟ್ಟವನ್ನು ಹೆಚ್ಚಿಸಿಕೊಳ್ಳಬಹುದು.
  • ಶ್ರದ್ಧೆ, ಶ್ರಮ, ಕ್ರಮಬದ್ಧ ಅಧ್ಯಯನ ನಿರಂತರವಾಗಿರಲಿ.
  • ಆರೋಗ್ಯದ ಸುಧಾರಣೆ ಸಮಯಕ್ಕೆ ಸರಿಯಾಗಿ ಆಹಾರ, ನಿದ್ರೆ, ಯೋಗ, ಧ್ಯಾನದ ಅಭ್ಯಾಸವಿಟ್ಟುಕೊಳ್ಳುವುದು.

ಪರೀಕ್ಷಾ ಭಯ

  • ಪರೀಕ್ಷೆ ಹತ್ತಿರ ಬರುತ್ತಿದ್ದಂತೆ ಅನೇಕ ವಿದ್ಯಾರ್ಥಿಗಳಲ್ಲಿ ಆತಂಕ, ಭಯ ಪ್ರಾರಂಭವಾಗುತ್ತಿದೆ.
  • ನನ್ನ ಪರೀಕ್ಷಾ ಸಿದ್ಧತೆಗಳು ಕಡಿಮೆಯಾದವು ಎಂಬುದರ ಚಿಂತೆ
  • ನನ್ನಿಂದ ಬೇಗ ಕಲಿಯುವುದಕ್ಕೆ ಸಾಧ್ಯವಾಗುತ್ತಿಲ್ಲ. ಪರೀಕ್ಷಾ ಸಂದರ್ಭದಲ್ಲೂ ಎಲ್ಲಾ ವಿಷಯಗಳನ್ನು ಅಥವಾ ಪಾಠಗಳನ್ನು ಮುಗಿಸಲಿಕ್ಕೆ ಆಗುತ್ತೋ ಇಲ್ಲವೋ ಎಂಬುದರ ಭಯ.
  • ನನಗೆ ಪರೀಕ್ಷೆಗೆ ಪ್ರಶ್ನೆಗಳಿಗೆ ಪೂರ್ಣ ಉತ್ತರವನ್ನು ಬರೆಯಲಿಕ್ಕೆ ಆಗುತ್ತೋ ಅಥವಾ ಇಲ್ಲವೋ ಎನ್ನುವ ಆತಂಕ ಅಲ್ಲದೇ ಮೌಲ್ಯಮಾಪಕರು ಪೂರ್ತಿ ಅಂಕ ಕೊಡುತ್ತಾರೋ ಇಲ್ಲವೋ ಎಂಬುದು.
  • ನಾನು ಫೇಲಾದರೆ ಎಷ್ಟು ಅವಮಾನ ಅಲ್ಲದೆ ನನಗೆ ಯಾರೂ ಗೌರವ ಕೊಡುವುದಿಲ್ಲವೆಂಬುದು.
  • ನನ್ನ ಸ್ನೇಹಿತರು ಒಳ್ಳೆಯ ಕೋರ್ಸಿಗೆ ಸೀಟು ಪಡೆಯುತ್ತಾರೆ. ನನ್ನಿಂದ ಇದು ಸಾಧ್ಯನಾ ನಾನು ಹಿಂದೆ ಬೀಳುತ್ತೇನಾ ಎಂಬುದು.
  • ನನಗೆ ಭವಿಷ್ಯವಿಲ್ಲ ನನ್ನ ಪಾಲಕರಿಗೆ ನೋವು- ನಿರಾಶೆ ಇಂತಹ ನಕಾರಾತ್ಮಕ ಚಿಂತನೆಗಳು ಸದಾ ಕಿವಿಯಲ್ಲಿ ಗುನುಗುಡುತ್ತಿರುತ್ತವೆ. ಆಗ ಭಯ ಶುರುವಾಗುತ್ತವೆ.
  • ಮನಸ್ಸು ಸ್ಥಿರವಾಗಿರುವುದಿಲ್ಲ. ಹೃದಯದ ಬಡಿತ ಶುರುವಾಗುತ್ತದೆ.
  • ಹಸಿವು ಹೆಚ್ಚಾಗುವುದಿಲ್ಲ. ಆಹಾರವು ರುಚಿಕರ ಅನ್ನಿಸುವುದಿಲ್ಲ.
  • ನಿದ್ರೆಯಲ್ಲೂ ವ್ಯತ್ಯಾಸ ಕಂಡು ಬರುವುದು ಅಲ್ಲದೇ ಮಂಕು ಆವರಿಸುವುದು.
  • ಆತ್ಮವಿಶ್ವಾಸ ಕಡಿಮೆಯಾಗುತ್ತದೆ.
  • ಪದೇ ಪದೇ ಬಾತ್‍ರೂಂಗೆ ಹೋಗುವ ಮನಸ್ಸು.
  • ಜ್ವರ ಆವರಿಸಬಹುದು.
  • ಕೋಪ, ಸಿಟ್ಟು, ಜಗಳ ಪ್ರಾರಂಭವಾಗಬಹುದು.
  • ಹತಾಶ ಮನಸ್ಥಿತಿ ತಲುಪಬಹುದು.
  • ಒಂಟಿತನ ಇರಲು ಇಷ್ಟಪಡುವುದು.

ಇಂತಹ ಸಂಗತಿಗಳನ್ನು ಪರೀಕ್ಷೆಯ ಹಿಂದಿನ ದಿನದಲ್ಲೂ ಅತಿ ಹೆಚ್ಚು ಕಾಣಬಹುದು.ಆದ್ದರಿಂದ ಪೋಷಕರು, ಶಿಕ್ಷಕರು ಮಾರ್ಗದರ್ಶನ ಹಾಗೂ ಧೈರ್ಯ ತುಂಬಬೇಕಾಗುತ್ತದೆ.

  • ಪ್ರೇರೇಪಣೆ ನೀಡುವುದು

    ನೀನೊಬ್ಬ ಉತ್ತಮ ವಿದ್ಯಾರ್ಥಿ ಹಾಗೂ ನಿರಂತರ ಓದಿ ಅಭ್ಯಾಸ ಮಾಡಿದ್ದೀಯಾ ವರ್ಷಪೂರ್ತಿ ಓದಿದ್ದೀಯಾ ಅದ್ದರಿಂದ ಓದಿದಂತಹ ಪ್ರಶ್ನೆಗಳೇ ಪರೀಕ್ಷೆಯಲ್ಲಿ ಬರುತ್ತವೆಂಬುದನ್ನು ತಿಳಿಸುವುದು.

  • ಪರೀಕ್ಷೆ ಬರೆಯುವ ಮುನ್ನ ಫಲಿತಾಂಶದ ಬಗ್ಗೆ ತಲೆಕೆಡಿಸಿಕೊಳ್ಳಬಾರದು. ಸಮಾಧಾನ ಚಿತ್ತದಿಂದ ಪರೀಕ್ಷೆ ಎದುರಿಸು. ನಿನಗೆ ಯಶಸ್ಸು ಸಿಗುತ್ತದೆ.
  • ಕನಿಷ್ಠ ಆರು ತಾಸು ನಿದ್ರೆ
  • ಕರಿದ ಪದಾರ್ಥಗಳಿಂದ ದೂರವಿರುವುದು, ಮಾಂಸಹಾರ ಬೇಡ.
  • ಹಸಿ ತರಕಾರಿಗಳನ್ನು ಸೇವಿಸುವುದು.
  • ಪಾಯಸ, ಗಂಜಿ,ಖೀರು ಉತ್ತಮ
  • ಓದುವಾಗ ಆಗಾಗ್ಗೆ ತಣ್ಣೀರು / ಬಿಸಿನೀರು ಮುಖ ತೊಳೆದುಕೊಳ್ಳಿ.

ಪರೀಕ್ಷಾ ದಿನ

  • ಕನಿಷ್ಠ ಆರು ಗಂಟೆ ನಿದ್ರೆಯ ನಂತರ ಎದ್ದುಸ್ನಾನ ಮಾಡಿ ಪ್ರಾರ್ಥನೆ ಸಲ್ಲಿಸುವುದು. ತಂದೆ-ತಾಯಿಗಳ ಆಶೀರ್ವಾದ ಪಡೆದುಕೊಳ್ಳಿ.

    ಪರೀಕ್ಷೆ ಸಲಕರಣೆಗಳನ್ನು ಜೋಡಿಸಿಕೊಳ್ಳಿ.

  • ಹಾಲ್‍ಟಿಕೆಟ್, ಒಳ್ಳೆಯ ಗುಣಮಟ್ಟದ ಎರಡು ಹಗುರವಾದ ಉಪಹಾರ ಇತ್ಯಾದಿ ಮಾಡುವುದು
  • ಪರೀಕ್ಷಾ ಹಾಲ್‍ನಲ್ಲಿ ಅರ್ಧಗಂಟೆ ಮುಂಚಿತವಾಗಿ ಕುಳಿತುಕೊಳ್ಳುವುದು.
  • ಪರೀಕ್ಷಾ ಕೇಂದ್ರಕ್ಕೆ ಹೋಗಿ ಸ್ಥಳವನ್ನು ಗುರುತು ಮಾಡಿಕೊಳ್ಳುವುದು.
  • ವಿಷಯದ ಬಗ್ಗೆ ಚರ್ಚೆ ಬೇಡ ಮನಸ್ಸು ಪ್ರಶಾಂತವಾಗಿರಲಿ.
  • ಪರೀಕ್ಷಾ ಕೇಂದ್ರದಲ್ಲಿ ಅಭ್ಯಾಸ ಬೇಡ
  • ತಮ್ಮ ಜೇಬುಗಳಲ್ಲಿ ಯಾವುದೇ ಚೀಟಿ, ಮೊಬೈಲ್ ಇರಬಾರದು.
  • ಪರೀಕ್ಷೆಗೆ ಹೋಗುವ ಮುನ್ನ ಮೂತ್ರ ವಿಸರ್ಜನೆ ಮಾಡುವುದು.
  • ನಿಮ್ಮ ಸೀಟಿನಲ್ಲಿ ಕುಳಿತುಕೊಳ್ಳಿ. ಉಸಿರಾಟ ನಿಧಾನಗತಿಯಿರಲಿ.
  • ಪ್ರಶ್ನೆ ಪತ್ರಿಕೆ ಬಂದಾಗ ನಿಧಾನವಾಗಿ ಎಲ್ಲಾ ಪ್ರಶ್ನೆಗಳನ್ನು ನಿಧಾನವಾಗಿ ಒಂದೊಂದೇ ಅರ್ಥ ಮಾಡಿಕೊಳ್ಳುತ್ತಾ ಹೋಗಿ.
  • ಎಲ್ಲಾ ಪ್ರಶ್ನೆಗಳಿಗೂ ಉತ್ತರಿಸಲು ಪ್ರಯತ್ನಿಸಿ.
  • ಪ್ರಶ್ನೆ ಪತ್ರಿಕೆ ಕೊಟ್ಟಾಗ ಕೆಲವು ಪ್ರಶ್ನೆಗಳನ್ನು ನಿರೀಕ್ಷೆಯಿರುವುದಿಲ್ಲ ಅಂತಹ ಸಂದರ್ಭದಲ್ಲಿ ಗಾಬರಿ ಪಡಬೇಡಿ.
  • ಮೊದಲು ಸಂಪೂರ್ಣವಾಗಿ ಉತ್ತರ ಗೊತ್ತಿರುವ ಪ್ರಶ್ನೆಗಳಿಗೆ ಉತ್ತರ ಬರೆಯಿರಿ.
  • ಒಂದು ಪ್ರಶ್ನೆಗೆ ಉತ್ತರ ಬರೆದ ನಂತರ ಪೆನ್ಸಿಲ್‍ನಲ್ಲಿ ಒಂದು ಅಡ್ಡಲಾಗಿ ಗೆರೆ ಹಾಕುವುದು.
  • ಅಕ್ಷರ ಸ್ಫುಟವಾಗಿರಲಿ, ಯೋಚಿಸಿ ಬರೆಯಿರಿ.
  • ಒಂದು ಸಾಲಿಗೂ ಇನ್ನೊಂದು ಸಾಲಿಗೂ ಅಂತರವಿರಲಿ.
  • ಅಲ್ಪ ಸ್ವಲ್ಪ ಉತ್ತರ ಗೊತ್ತಿರುವ ಪ್ರಶ್ನೆಗಳನ್ನು ಕೊನೆಗೆ ಪ್ರಯತ್ನಿಸಿ, ಗೊತ್ತಿರುವ ಅಲ್ಪಸ್ವಲ್ಪ ಉತ್ತರ ಬರೆಯಿರಿ.

ಸಮಯ ಪಾಲನೆ ಮಾಡುವುದು

  • ಯಾವುದೇ ಪ್ರಶ್ನೆಗೆ ಉತ್ತರ ಬರೆಯಲು ಅವಶ್ಯಕತೆಗಿಂತ ಹೆಚ್ಚು ಸಮಯವನ್ನು ತೆಗೆದುಕೊಳ್ಳಬಾರದು.
  • ಕಡೆಯ ಹತ್ತು ನಿಮಿಷಯದಲ್ಲಿ ಪುನರಾವಲೋಕನ ಮಾಡುವುದು.
  • ಪ್ರಶ್ನೆಗಳ ಸಂಖ್ಯೆಯನ್ನು ಸರಿಯಾಗಿ ನಮೂದಿಸುವುದು.
  • ರಿಜಿಸ್ಟರ್ ನಂಬರ್ ಉತ್ತರ ಪತ್ರಿಕೆಗಳ ಕ್ರಮ ಸಂಖ್ಯೆಯನ್ನು ಹಾಕುವುದು.
  • ಇತರರು ಏನು ಮಾಡುತ್ತಿದ್ದಾರೆಂಬುದನ್ನು ಗಮನವಿರಬಾರದು.
  • ಪೂರ್ಣ ಬರೆಯುವವರಿಗೂ ಮುಗಿಯುವವರೆಗೂ ಏಕಾಗ್ರತೆಯಿಂದ ಉತ್ತರಿಸಬೇಕು.
  • ಹೊರ ಬಂದ ನಂತರ ಚರ್ಚೆ ಬೇಡ
  • ಮನೆಗೆ ಹೋಗಿ ವಿರಾಮವನ್ನು ತೆಗೆದುಕೊಳ್ಳುವುದು.

ಲೇಖಕರು : ಹಾಲೇಶ್ ಹೆಚ್.ಎಸ್., ಎಂ.ಎ., ಎಂ.ಇಡಿ, ಎಂ.ಸಿ.ಜೆ. ಡಿ.ಆರ್.ಆರ್. ಹೆಚ್.ಎಸ್., ಪಿ.ಬಿ. ರಸ್ತೆ, ದಾವಣಗೆರೆ 

 

 

 

 

 

ಅಂತರಂಗ

ನಿಮ್ಮಂಥ ಧ್ವನಿ ಸಂಸತ್ತಿನಲ್ಲಿ ಇರಬೇಕಿತ್ತು ಸರ್

Published

on

mallikarjun kharge_suddidina

ಮಲ್ಲಿಕಾರ್ಜುನ ಖರ್ಗೆ ಅವರ ತಂದೆ ಜವಳಿ ಮಿಲ್ ಕಾರ್ಮಿಕ. ಖರ್ಗೆ ಸೇರಿದಂತೆ ಆರು ಮಕ್ಕಳು. ಖರ್ಗೆಯವರೇ ಎಲ್ಲರಿಗಿಂತ ಕಿರಿಯರು. ಗುಡಿಸಲೇ ಅವರ ಮಹಲಾಗಿತ್ತು. ಅದು ಕೂಡ ಊರ ಹೊರಗಿತ್ತು. ಒಮ್ಮೆ ಆ ಊರಿನಲ್ಲಿ ಸಂಘರ್ಷ ಉಂಟಾಗಿತ್ತು. ದುಷ್ಕರ್ಮಿಗಳು ಖರ್ಗೆ ಅವರ ಗುಡಿಸಲಿಗೆ ಬೆಂಕಿ‌ ಇಟ್ಟರು. ಹಾಗೆ ಬೆಂಕಿಬಿದ್ದ ಸಂದರ್ಭದಲ್ಲಿ ಖರ್ಗೆ ಅವರ ತಾಯಿ ಮತ್ತು ಐವರು ಅಣ್ಣಂದಿರು ಗುಡಿಸಲಿನ ಒಳಗಿದ್ದರು.

ಆ ತಾಯಿ ತಾನೂ ಹೊರಬರಲಾರದೆ ಮಕ್ಕಳನ್ನೂ ಹೊರದಬ್ಬಲಾರದೆ ಸುಟ್ಟು ಬೂದಿಯಾದರು. ಈ ದೃಶ್ಯವನ್ನು ಖರ್ಗೆ ಕಣ್ತುಂಬಿಸಿಕೊಂಡಾಗ ಖರ್ಗೆ ಅವರ ವಯಸ್ಸು ಮೂರು ವರ್ಷ. ಎಷ್ಟೇ ಅತ್ತರೂ ಕೇಳುವವರಿರಲಿಲ್ಲ. ಅಪ್ಪ ಬರುವಷ್ಟರಲ್ಲಿ‌ ಕಣ್ಣೀರು ಬತ್ತೋಗಿತ್ತು. ಮಗನನ್ನು ತಬ್ಬಿಕೊಂಡು ಅಳುವುದರ ಹೊರತು ಅಪ್ಪನಿಗೆ ಏನೇನೂ ಉಳಿದಿರಲಿಲ್ಲ. ಕಡುಬಡವನಿಗೆ ಶವಸಂಸ್ಕಾರ ಮಾಡುವ ಕಷ್ಟವನ್ನು ಕೊಡದೆ ಭಗವಂತ ಪುಣ್ಯ ಕಟ್ಟುಕೊಂಡಿದ್ದ.

ಕೆಲ ವರ್ಷಗಳ ಬಳಿಕ ಶಾಲೆ ಸೇರಿದರು ಖರ್ಗೆ. ಅದು ಖರ್ಗೆ ಅವರ ತಂದೆ ಕೆಲಸಕ್ಕಿದ್ದ ಜವಳಿ ಮಿಲ್ ದೇಣಿಗೆಯಲ್ಲಿ ನಡೆಯುತ್ತಿದ್ದ ಶಾಲೆ. ಜವಳಿ ಮಿಲ್ ಮ್ಯಾನೇಜರ್ ಮಗ ಕೂಡ ಅದೇ ಶಾಲೆಯಲ್ಲಿ ಓದುತ್ತಿದ್ದ. ಆದರೆ ಆತನಿಗಾಗಿಯೇ ಎಂದು ಒಂದು ಬೆಂಚ್ ಇತ್ತು. ಒಮ್ಮೆ ತನ್ನ ಸಹಪಾಠಿಗೆ ಜಾಗ‌ ಸಿಗದಿದ್ದಾಗ ಖರ್ಗೆ ಆ ಮ್ಯಾನೇಜರ್ ಮಗನ ಬಳಿ ಜಗಳ ಮಾಡಿ ಆ ಬೇಂಚ್ ನಲ್ಲಿ ಕೂರಿಸಿದ್ದರು. ದೂರು ಶಿಕ್ಷಕ, ಮುಖ್ಯ ಶಿಕ್ಷಕ, ಮ್ಯಾನೇಜರ್ ಮತ್ತು ಮಿಲ್ ಮಾಲೀಕನವರೆಗೂ ಹೋಯಿತು. ಮ್ಯಾನೇಜರ್ ಖರ್ಗೆ ಅಪ್ಪನನ್ನು ಕರೆದು ಗದರಿದರು. ಕೆಲಸದಿಂದ ಕಿತ್ತಾಕುವುದಾಗಿ ಹೇಳಿದರು. ಉಳಿದಿದ್ದ ಏಕೈಕ ಜೀವದ ಕುಡಿಗೆ ಅಕ್ಕರೆಯಿಂದಲೇ ಬುದ್ದಿ ಹೇಳಿದ್ದರು ಖರ್ಗೆ ಅವರ ತಂದೆ.

ಕೆಲ ವರ್ಷಗಳ ಬಳಿಕ ಕಾಲೇಜು. ಶಾಲಾದಿನಗಳಂತೆ ಕಾಲೇಜಿನಲ್ಲೂ ಅನ್ಯಾಯದ ವಿರುದ್ಧ ಬಂಡಾಯ. ಎಷ್ಟರಮಟ್ಟಿಗೆ ಎಂದರೆ ದ್ವಿತೀಯ ಪಿಯೂಸಿಯಲ್ಲಿ ಇವರ ಶಿಕ್ಷಕರು ಉದ್ದೇಶಪೂರ್ವಕವಾಗಿ ಇವರ ಮಾರ್ಕ್ಸ್ ಕಟ್ ಮಾಡುವ ಮಟ್ಟಿಗೆ. ಇದರಿಂದಾಗಿ ಎಕನಾಮಿಕ್ಸ್ ನಲ್ಲಿ ಉನ್ನತ ವ್ಯಾಸಂಗ ಮಾಡುವ ಕನಸು ಭಗ್ನ. ಆಮೇಲೆ ಓದಿದ್ದ ಲಾ. ಲಾ ಓದು ಅಪ್ಪ ಕೆಲಸ ತೆಗೆದುಕೋಸರ್ಕಾರಿಮುಗಿಯುತ್ತಿದ್ದಂತೆಎಂದಿದ್ದರಂತೆ. ಅಷ್ಟೊತ್ತಿಗಾಗಲೇ ಯುವ ಕಾಂಗ್ರೆಸ್ ಸೇರಿದ್ದ ಖರ್ಗೆ ‘ನಾನೀಗಾಗಲೇ ರಾಜಕಾರಣ ಮತ್ತು ವಕೀಲಿಕೆ ಆರಂಭಿಸಿದ್ದೇನೆ.‌ ಸರ್ಕಾರಿ ಕೆಲಸ ಬೇಡ’ ಎಂದಿದ್ದರಂತೆ.

ಇದಾದ ಕೆಲ ವರ್ಷಗಳ ಬಳಿಕ ದೇವರಾಜ ಅರಸು ಕಣ್ಣಿಗೆ ಬಿದ್ದಿದ್ದ ಖರ್ಗೆ ಶಾಸಕರಾಗಿ ಶಿಕ್ಷಣ ಮಂತ್ರಿಯಾಗಿದ್ದರು. ಆಷ್ಟರಲ್ಲಿ ಮಾರ್ಕ್ಸ್ ಕಟ್ ಮಾಡಿದ್ದ ಶಿಕ್ಷಕ ಬಡ್ತಿ ಪಡೆದು ಶಿಕ್ಷಣ ಇಲಾಖೆಯ ಆಯಕಟ್ಟಿನ‌ ಜಾಗಕ್ಕೆ ಬಂದಿದ್ದರು‌. ಒಮ್ಮೆ ಸಭೆಯಲ್ಲಿ ಗುರು-ಶಿಷ್ಯರು ಮುಖಾಮುಖಿಯಾದರು. ಎಂದಿನಂತೆ ಆ ಶಿಕ್ಷಕ ಒಂದು ವರ್ಗದ ಪರ ವಕಾಲತ್ತು ವಹಿಸಿದರು. ಇನ್ನೊಬ್ಬ ಅಧಿಕಾರಿ ಆಕ್ಷೇಪಿಸಿದರು‌. ಇವರ ನಡುವಿನ ಘರ್ಷಣೆ ತಡೆಯಲು ಖರ್ಗೆ ‘ಇನ್ನು ಮೂರು ಮಾರ್ಕ್ಸ್ ಕೊಟ್ಟು ಬಿಟ್ಟಿದ್ದಿದ್ದರೆ ಹೀಗಾಗುತ್ತಿರಲಿಲ್ಲ ನೋಡಿ ಮೇಷ್ಟ್ಟ್ರೇ’ ಎಂದರು ಖರ್ಗೆ. ಯಾರಿಗೂ ಏನೂ ಅರ್ಥ ಆಗುವುದಿಲ್ಲ‌. ಖರ್ಗೆ ಬಿಡಿಸಿ ಹೇಳಿದ ಮೇಲೆ ಮೇಷ್ಟರ ಮುಖ ಚಿಕ್ಕದಾಗಿತ್ತು‌.

ಇದಾದ ಮೇಲೆ ದೇವರಾಜ ಅರಸು ಕಾಂಗ್ರೆಸ್ ನಿಂದ ದೂರವಾಗಿ ಸೋತಿದ್ದರು. ಖರ್ಗೆ ಮತ್ತೊಮ್ಮೆ ಮಂತ್ರಿಯಾಗಿದ್ದರು. ಅಚಾನಕ್ಕಾಗಿ ಒಮ್ಮೆ ಅರಸು ಅವರು ಖರ್ಗೆ ಚೇಂಬರ್ ಗೆ ಬಂದು ಖರ್ಗೆ ಅವರಿಗಾಗಿ ಕಾಯುತ್ತಾ ಕುಳಿತಿದ್ದರು. ಅರಸು ಅವರನ್ನು ಖರ್ಗೆ ತಮ್ಮ ಮಂತ್ರಿ ಕುರ್ಚಿಯಲ್ಲಿ ಕುಳಿತುಕೊಳ್ಳಲು ಕೇಳಿಕೊಂಡರಂತೆ. ‘ನೀನ್ನಂಥವರು ಇಂಥ ಚೇರಿನಲ್ಲಿ ಯಾವಾಗಲೂ ಕುಳಿತಿರಬೇಕು, ಕೂತ್ಕೊ’ ಎಂದಿದ್ದರಂತೆ. ಖರ್ಗೆ ಕಣ್ಞೀರಿಟ್ಟಿದ್ದರಂತೆ…

ಈಗ ಖರ್ಗೆ ಅವರಷ್ಟೇಯಲ್ಲ, ಬಹಳ ಜನಗಳ ಕಣ್ಣು ಒದ್ದೆಯಾಗಿವೆ. ಅರಸು ಕಂಡು ಕನಸು ಕಮರಿದೆ. ಖುದ್ದು ಅವರ ಬಾಯಲ್ಲೇ ಈ ಕಥನಗಳನ್ನು ಕೇಳಿದ್ದಾಗ ನಾನು ಕನಲಿದ್ದೆ. ಇಂಥ ಪರಿಸ್ಥಿತಿಯಲ್ಲಿ ಹಂಚಿಕೊಳ್ಳಲು ಬಹಳ ನೋವಾಗುತ್ತಿದೆ.

ನಿಮ್ಮಂಥ ಧ್ವನಿ ಸಂಸತ್ತಿನಲ್ಲಿ ಇರಬೇಕಿತ್ತು ಸರ್. ಈ ದೇಶ ನಿಮ್ಮನ್ನ ನೆನಪಿಸುತ್ತೆ.

ಧರಣೇಶ್ ಭೂಕನಕೆರೆ
News 18 Kannada ಸುದ್ದಿ ವಾಹಿನಿ
ದೆಹಲಿ ವರದಿಗಾರ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಅಂತರಂಗ

ನನ್ನ ಹಡೆದವ್ವ ಸೂಳೆ ಸಂಕೆವ್ವ

Published

on

ಜಗತ್ತಿನ ಅತ್ಯಂತ ವೈಚಾರಿಕತೆಯ ನೆಲೆಯಲ್ಲಿ ಸುಂದರ ಕಲ್ಯಾಣ ಸಮಾಜವನ್ನು ಕಟ್ಟಿದವರು ಅಪ್ಪ ಬಸವರಾಜರು. ಹೌದು, ಹಲವು ಜಿಡ್ಡುಗಟ್ಟಿದ ಆಚರಣೆಗಳ ಕಂಡು ಮನ ನೊಂದ ಬಸವರಸರು, ಹಿಡಿಯ ಸಮಾಜವನ್ನು ಒಮ್ಮತದಿಂದ ಕಂಡು ಹಿಡಿದಪ್ಪಿದ ಮಹಾ ಪ್ರವಾದಿಯಾಗಿದ್ದರು. ಜಾತೀಯತೆ, ಮೌಢ್ಯಕಂದಾಚಾರಗಳು, ಮೇಲು ಕೀಳೆಂಬ ಹೊಲಸು ಮನಸುಗಳ ಸುಟ್ಟು, ಸಮಾನತೆಯ ಸಮಾಜದ ಕನಸ ಕಂಡು ಸುಂದರವಾದ ಕಲ್ಯಾಣ ರಾಜ್ಯವ ನಿರ್ಮಾತರು ಅಪ್ಪ ಬಸವರಾಜರು.

ಒಮ್ಮೆ ಕಲ್ಯಾಣಪಟ್ಟಣದಲ್ಲಿ ಬಸವರಾಜರು ತಮ್ಮ ಕಾಯಕದಿಂದ ಮಹಾಮನೆಗೆ ತೆರಳುವಾಗ ಸುಂದರ ದೇಹದ ಸೂಳೆಯೊಬ್ಬಳು ಓಡೋಡಿ ಬಂದು ಬಸವಪ್ಪನ ಎದರು ನಿಂತು ಅಪ್ಪನ ಮುಖವ ನೋಡದೆ ಕಾಲ ಮುಟ್ಟದೇ ಆ ಪಾದಗಳನ್ನೇ ದಿಟ್ಟಿಸುತ್ತ ಬಿಕ್ಕಿ ಬಿಕ್ಕಿ ಅಳುತ್ತಾ ಹೀಗೆ ಹೇಳುತ್ತಾಳೆ.

ಹೇ ನನ್ನೊಡೆಯ ಬಸವರಾಜಾ, ಬಸವಪ್ಪ, ಬಸವಣ್ಣ, ಬಸವೇಶ, ಬಸವರಸ, ಬಸವ ದೊರೆ, ಬಸವ ವಸುದೀಶ, ಬಸವ ಕೃಪಾನಿಧಿ, ಬಸವ ಪರುಷನಿಧಿ, ಬಸವಯ್ಯ ಬಸವಯ್ಯ ಬಸವಯ್ಯಾ ಎನ್ನೊಡೆಯ ಸಂಗನ ಬಸವಣ್ಣನೇ ನಿಮ್ಮ ದಿಬ್ಯಾ ಪಾದಗಳಲ್ಲಿ ನನ್ನ ಶರಣು ಶರಣಯ್ಯಾ ಎಂದು ಅಳುತ್ತಲೇ ನಿಂತಾಗ ಅಪ್ಪನ ಮನ ಕರಗಿ, ನನ್ನವ್ವ ಯಾರವ್ವಾ ನೀನು ಏನಾಯಿತು ತಾಯಿ ಎಂದು ಕೇಳಲು, ಸಂಕೆವ್ವನ ಬಿಗಿದ ಗಂಟಲು ನೀರಾಗಿ ಜೋರಾಗಿ ಅಳುತ್ತಲೇ…..

ಹೇ ಬಸವರಾಜಾ..ನಾನೊಬ್ಬ ಸೂಳೆ ಅಪ್ಪಾ, ಸಂಕೆವ್ವ ಎಂದು ನನ್ನ ಹೆಸರು. ದಯಮಾಡಿ ಇನ್ನೆಂದು ಅವ್ವಾ ಎನ್ನದಿರು ಎಂದಾಗ ಅಪ್ಪ ಬಸವರಾಜರ ಮನ ತುಂಬಿ ಬಂದು ನನ್ನವ್ವಾ ಹಾಗೆನ್ನದಿರಿ ತಾಯಿ ಎನ್ನುತ್ತ ಸಂಕೆವ್ವಳ ಕೈಗಳ ಹಿಡಿದು ತಮ್ಮ ಹಣೆಯನಿಟ್ಟು, ನಾ ನಿಮ್ಮ ಮಗನೆಂದೇ ಭಾವಿಸು ತಾಯಿ ಎನ್ನುವಾಗ ಸಂಕೆವ್ವಳ ಎದೆ ಬಡಿತ ಜೋರಾಗಿ, ಬಸವ ಬಸವಾ ಎನ್ನಲು, ಆಗ ಬಸವಣ್ಣನವರು ಹೇಳುತ್ತಾರೆ, ನೋಡು ತಾಯಿ ನಾವೆಲ್ಲರೂ ನಿಜದೇವನ ಅಂಶಗಳೊಳಗೊಂಡ ಸಮಾನ ಜೀವಿಗಳು, ನಮ್ಮಲ್ಲಿ ಬೇಧವಿಲ್ಲ ತಾಯಿ, ನಾನು ನಿಮ್ಮ ಮಗನೆಂದು ಭಾವಿಸವ್ವಾ ಎನ್ನಲು ಸೂಳೆಯಾದ ಸಂಕೆವ್ವಳು ಒಡನೇ ಶರಣೆಯಾಗಿ ಬದಲಾಗುತ್ತಾಳೆ.

ನಂತರ ಅಪ್ಪ ಬಸವರಾಜರು ಹೇಳಿದಂತೆ ಅನುಭವ ಮಂಟಪಕ್ಕೆ ಬಂದು ಅಲ್ಲಿ ನೆರೆದಿದ್ದ ಸಕಲ ಶರಣ ಗಣಂಗಳ ಮುಂದೆ ತಲೆ ಬಾಗಿ ಶರಣೆಂದು ನಿಲ್ಲಲು ಅಲ್ಲಿನ ಶರಣರೆಲ್ಲರೂ ಅವಳನ್ನು ಶರಣು ಬಾ ತಾಯಿ ಎನ್ನುತ್ತ ಬರಮಾಡಿಕೊಂಡು ಅನುಭವ ಮಂಟಪದ ಸದಸ್ಯೆಯಾಗಿಸುತ್ತಾರೆ. ಅಲ್ಲಿ ಸೂಳೆ ಸಂಕೆವ್ವಳು ತನ್ನೊಳಗಿರುವ ಹಲವು ಸಂದೇಹಗಳನ್ನು ಶರಣರ ಮುಂದಿಟ್ಟ ಬಗೆಯಂತೂ ಬಲು ಅಪರೂಪ ಮತ್ತು ಜ್ಞಾನ ಪೂರಿತವಾಗಿತ್ತು. ಪಾಪ ಪುಣ್ಯಗಳು ಎಂದರೇನು, ಹಿಂದಣ ಜನ್ಮ ಎಂದರೇನು ಅವುಗಳ ನಿಲುವುಗಳೇನು ಎಂಬ ಅನೇಕಾನೇಕ ವಿಚಾರಗಳ ವಿಚಾರಿಸಿ ಅಂದಿನ ಅನುಭವವ ಅಲ್ಲಮರು ಹಲವು ಬೆಡಗಿನ ವಚನಗಳ ಮೂಲಕ ತಿಳಿಸುತ್ತಾರೆ.

ನಂತರದ ದಿನಗಳಲ್ಲಿ ಸೂಳೆ ಸಂಕೆವ್ವ ತಾಯಿಯು ತನ್ನೂರಿನ ಸುತ್ತಲೂ ಶರಣ ತತ್ವ ಪ್ರಚಾರಿಸುತ್ತಾ ವಚನಗಳ ಹಾಡುತ್ತಾ ಗುರು ಲಿಂಗ ಜಂಗಮ ದಾಸೋಹ ಕಾಯಕ ಗಳಲ್ಲಿ ತಲ್ಲೀನಳಾಗಿ ಜೀವಿಸುತ್ತಿರುವಾಗ ಒಮ್ಮೆ ಬ್ರಹ್ಮಣನೊಬ್ಬ ಇವಳಿಗೆ ಮನ ನೊಹಿಸಲೆಂದೇ ಗೇಲಿ ಮಾಡುತ್ತಾ… ದಾಸೆ ಸೂಳೆಯರೆಲ್ಲ ದಾಸೋಹ ಮಾಡುತ್ತಾ ದೇಹದಾ ದಾಹವ ತಣಿಸಲು ಬರುವಳೋ ಎಂದಾಗ ಅವ್ವ ಸಿಟ್ಟಿನಿಂದ ಒಂದು ವಚನ ಹೇಳುತ್ತಾಳೆ.

ಒತ್ತೆಯ ಹಿಡಿದು ಮುತ್ತೊತ್ತೆಯ ಹಿಡಿಯೆ
ಹಿಡಿದೆಡೆ ಬತ್ತಲೆ ನಿಲಿಸಿ ಕೊಲ್ಲುವರಯ್ಯಾ
ವ್ರತಹೀನನರಿದು ಬೆರೆದಡೆ
ಕಾದ ಕತ್ತಿಯಲ್ಲಿ ಕೈಕಿವಿ ಮೂಗ
ಕೊಯ್ವರಯ್ಯಾ ಒಲ್ಲೆನೊಲ್ಲೆ ಬಲ್ಲೆನಾಗಿ
ನಿಮ್ಮಾಣೆ ನಿರ್ಲಜ್ಜೇಶ್ವರಾ!!

ಎಂದು ಹೇಳಲು ಆ ವ್ಯಕ್ತಿಯು ಹೆದರಿ ಹೋಗುತ್ತಾನೆ.

ಹೀಗೆ ಅವ್ವ ಸಂಕೆವ್ವಳ ವಚನಗಳಲ್ಲಿ ಆತ್ಮವಿಶ್ವಾಸ, ದಿಟ್ಟ ನಿಲುವು, ಅಚಲ ಎದೆಗಾರಿಕೆ, ಕಾಯಕ ನಿಷ್ಠೆಯಿಂದ ಕೂಡಿದ್ದಾಗಿದ್ದು. ವಚನಗಳ ಅಂಕಿತವನ್ನು “ನಿರ್ಲಜ್ಜೇಶ್ವರಾ“.

ಸಮಾಜದ ಬಹಿಷ್ಕೃತ ಸಮೂಹದಲ್ಲಿದ್ದು ಸೂಳೆಯಾಗಿದ್ದರೂ ಅಪ್ಪ ಬಸವರಾಜರ ವಿಶಾಲ ತಾಯಿ ಹೃದಯದ ಪರಿಣಾಮ ಅತಿ ಶ್ರೇಷ್ಠ ಶರಣೆಯಾಗಿ ಹೊರಹೊಮ್ಮುತ್ತಾಳೆ “ನನ್ನ ಹಡೆದವ್ವ ಸೂಳೆ ಸಂಕೆವ್ವ”.

ಹೆಣ್ಣನ್ನು ವಸ್ತುವಿನಂತೆ ಮತ್ತು ತನ್ನ ಬಯಕೆಗಳ ತೀರಿಸಲೋಸುಗವಾಗಿ ಹುಟ್ಟಿರುವ ಜೀವಿಯಂತೆ ಉಪಯೋಗಿಸುತ್ತಿದ್ದ/ತ್ತಿರುವ ವಿಷಮ ಸಮಾಜವನ್ನು ತೊಡೆದು ಹಾಕಿದವರು ಬಸವಾದಿ ಶರಣರು.

ಸಾವಿರಾರು ದಶಕಗಳಿಂದಲೂ ಹೆಣ್ಣನ್ನು ಕೀಳಾಗಿ ಕಾಣುವ ಹಲವು ಧರ್ಮಗಳ ಒಮ್ಮೆಲೇ ಧಿಕ್ಕರಿಸಿ ಕ್ರಾಂತಿಕಾರಿ ಚಳುವಳಿಗೆ ನಿಂತವರು ನಮ್ಮ ಬಸವಾದಿ ಶರಣರು.

ಒಮ್ಮೆ ರಸೂಲ್ ಮುಹಮ್ಮುದ್(ಸ ಅ) ರಂತಹ ಮಹಾ ಪ್ರವಾದಿಗಳೂ ಸಹ ಒತ್ತಾಯದ ಮೇರೆಗೆ ಮುಟ್ಹಾ(ಮಟ್ಹ) ಎಂಬ ನೀತಿಯ ಜಾರಿಗೆ ತರಲು ಸಮ್ಮತಿ ನೀಡುತ್ತಾರೆ. ಜೀಸಸ್ ಎಂಬ ದೈತ್ಯಾಕಾರದ ಸಂತರೂ ಸಹ ಹೆಣ್ಣನ್ನು ಹಾಗೆ ಜೀವಿಸಲು ಅನುಮತಿಸುತ್ತಾನೆ. ಹಿಂದೂ ಧರ್ಮದಲ್ಲಿ ಇಂದಿಗೂ ಹೆಣ್ಣಿನ ಶೋಷಣೆ ನಿಂತಿಲ್ಲ. ಜಿನ ಧರ್ಮದವರಂತೂ ಹೆಣ್ಣು ಹಂದಿಯ ಜನ್ಮಾಂತರಿ ಅವಳಿಗೆ ಮುಕ್ತಿ ಇಲ್ಲ ಎಂದು ಖಡಾ ಖಂಡಿತವಾಗಿ ನುಡಿದರೆ ಬುದ್ದನ ಧಮ್ಮವೂ ಹೆಣ್ಣಿನಿಂದ ದೂರ ಉಳಿಯುವುದೇ ಸನ್ಯಾಸತ್ವದ ಮೊದಲ ಮೆಟ್ಟಿಲು ಎಂದು ಭೋದಿಸುತ್ತದೆ. ಸಿಖ್ ಧರ್ಮ ಸಹ ಹಿಂದೂ ಧರ್ಮದಂತೆ ನಡೆದುಕೊಳ್ಳುತ್ತದೆ.

ಎಲ್ಲಿ ನೋಡಿದರೂ ಹೆಣ್ಣು ಶೂದ್ರಾಳಾಗಿ ಪುರುಷ ಪ್ರಧಾನ ಸಮಾಜದಲ್ಲಿ ಶೋಷಿತಳಾಗಿ ಉಳಿದರೆ. ಶರಣರ ದೃಷ್ಟಿಯಲ್ಲಿ ಅವಳಲ್ಲಿನ ಮೀರಿದ ಘನವ ಹೀಗೆ ಕಾಣುತ್ತಾರೆ.

ಮೊಲೆ ಮೂಡಿ ಬಂದಡೆ ಹೆಣ್ಣೆಂಬರು
ಗಡ್ಡ ಮೀಸೆ ಬಂದಡೆ ಗಂಡೆಂಬರು
ಒಳಗೆ ಸುಳಿವ ಆತ್ಮ ಹೆಣ್ಣು ಅಲ್ಲ ಗಂಡೂ ಅಲ್ಲ ಕಾಣಾ ರಾಮನಾಥ!!

ಎನ್ನುತ್ತಾ ಎಲ್ಲ ಅಸಮಾನತೆಗಳ ಮೀರಿ ನಿಂದ ಮಹಾ ಜ್ಞಾನವನ್ನು ಸಮಾಜಕ್ಕೆ ಸಾರುತ್ತಾರೆ.
ಮುಂದೆ ಶರಣನಾದವನ ಛಲವು ಹೇಗಿರಬೇಕೆಂದು ಹೀಗೆ ಹೇಳುತ್ತಾರೆ.

ಕೆಳಗಿನ ವಚನವನ್ನು ಗಟ್ಟಿ ದ್ವನಿಯಲ್ಲಿ ಓದುವುದುತ್ತಮವು 

ಛಲಬೇಕು ಶರಣಂಗೆ ಪರಧನವನೊಲ್ಲೆನೆಂಬ
ಛಲಭೇಕು ಶರಣಂಗೆ ಪರಸತಿಯನೊಲೆನೆಂಬ
ಛಲಬೇಕು ಶರಣಂಗೆ ಪರದೈವವನೊಲೆನೆಂಬ
ಛಲಬೇಕು ಶರಣಂಗೆ ಲಿಂಗ ಜಂಗಮೊಂದೆಂಬ
ಛಲಬೇಕು ಶರಣಂಗೆ ಪ್ರಸಾದ ದಿಟವೆಂಬ
ಛಲವಿಲ್ಲದವರ ಮೆಚ್ಚ ನಮ್ಮ ಕೂಡಲ ಸಂಗಮ ದೇವಾ!!

ಹೀಗೆ ನುಡಿನಡೆಯಲ್ಲೂ ಒಂದಾದ ಶರಣರ ನೆನೆದು, ಸಕಲ ಜೀವಾತ್ಮರಿಗೂ ಲೇಸ ಬಯಸಿ, ಸಕಲರಿಗೂ ಸಮ ಬಾಳು, ಸಕಲರಿಗೂ ಸಮಾನತೆಯ ನೀಡಿ ಮಹಾನಮಾನವೀಯತೆಯ ಮೆರೆದ ಅಪ್ಪ ಬಸವರಾಜರಿಗೂ,ಅಪ್ಪ ಭೀಮರಾಯ ಅಂಬೇಡ್ಕರ್ ರಿಗೂ ಮತ್ತು ನಿಮ್ಮಗಳ ಮನದ ಮಹಾ ಮಾನವೀಯತೆಯ ಬೆಳಗಿಗೆ ನನ್ನ ಶರಣು ಶರಣಾರ್ಥಿಗಳು.

ದೀಪ್ತಿ ಎಸ್ ಪಾಟೀಲ್
ವಿದ್ಯಾರ್ಥಿನಿ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಅಂತರಂಗ

ಮಾತೃತ್ವ

Published

on

1905 ರಲ್ಲಿ ಆಕೆಯ ತಾಯಿ ನಿಧನಹೊಂದಿದ ನಂತರ ವೆಸ್ಟ್ ವರ್ಜಿನಿಯಾದ ಗ್ರಾಫ್ಟನ್ ಸೇಂಟ್ ಆಂಡ್ರ್ಯೂ ಮೆಥೋಡಿಸ್ಟ್ ಚರ್ಚ್ನಲ್ಲಿ 1908 ರಲ್ಲಿ ಅನ್ನಾ ಜಾರ್ವಿಸ್ ಎಂಬ ಮಹಿಳೆ ತನ್ನ ತಾಯಿಯ ಸ್ಮಾರಕವೊಂದನ್ನು ಏರ್ಪಡಿಸಿದರು.

ಯುನೈಟೆಡ್ ಸ್ಟೇಟ್ಸ್ನಲ್ಲಿ ತಾಯಿಯ ದಿನದಂದು ರಜಾದಿನವನ್ನಾಗಿ ಆಚರಿಸಲು ಆರಂಭದಲ್ಲಿ ನಿರಾಕರಿಸಲಾಯಿತು ಆದರೆ 1911 ರ ಹೊತ್ತಿಗೆ, ಶಾಂತಿ ಕಾರ್ಯಕರ್ತರಾಗಿದ್ದ ಜಾರ್ವಿಸ್ರ ಪ್ರಯತ್ನಗಳಿಗೆ ಕಾರಣವಾಗಿ, ಎಲ್ಲಾ ಯು.ಎಸ್. ರಾಜ್ಯಗಳು ರಜಾದಿನವನ್ನು ಆಚರಿಸಲು ಶುರುಮಾಡಿದವು.

ಅಮೇರಿಕನ್ ರಾಜನೀತಿತಜ್ಞ ಮತ್ತು ವಕೀಲ ವುಡ್ರೋ ವಿಲ್ಸನ್ ಮೇ ತಿಂಗಳಿನಲ್ಲಿ ಎರಡನೇ ಭಾನುವಾರ 1941 ರಲ್ಲಿ ಗೌರವಾನ್ವಿತ ತಾಯಂದಿರ ರಾಷ್ಟ್ರೀಯ ರಜಾದಿನವಾಗಿ ಘೋಷಣೆಗೆ ಸಹಿ ಹಾಕಿದರು.

ನಾವೆಲ್ಲರೂ ನಮ್ಮ ಜೀವನದಲ್ಲಿ – ‘ಮಾಮ್’, ‘ಮಾಮ್’, ‘ಮಾ’, ‘ಅಮ್ಮ ‘, ಈ ಅತ್ಯಂತ ಸುಂದರ ಆತ್ಮ ಧ್ವನಿಯ ಮಾತುಗಳು ಹೆಚ್ಚಿನ ಪ್ರೀತಿ ಕೊಡುತ್ತವೆ . ಅವಳು ತನ್ನ ಮಗುವಿಗೆ ದೇವರ ರೂಪ . ದೇವರು ಎಲ್ಲೆಡೆಯೂ ಇರಲು ಸಾಧ್ಯವಿಲ್ಲ , ಆದ್ದರಿಂದ ದೇವರು, ತನ್ನ ರೂಪಸ್ವರೂಪರಾದ ತಾಯಿಯನ್ನು ತನ್ನ ಎಲ್ಲಾ ಮಕ್ಕಳನ್ನು ಭೂಮಿಯ ಮೇಲೆ ರಕ್ಷಿಸಲು ಸೃಷ್ಟಿಸಿದನು. ನಾವು ಎಲ್ಲರೂ ಅವಳನ್ನು ಬಹುಕಾರ್ಯಕತೆಯ ದೇವತೆ ಎಂದು ಗುರುತಿಸಬಹುದು.

ತಾಯಂದಿರು ನಮ್ಮ ಅಸ್ತಿತ್ವದ ಸೃಷ್ಟಿಕರ್ತರಾಗಿದ್ದಾರೆ, ಅವರು ನಮ್ಮೊಳಗೆ ಸದ್ಗುಣಗಳನ್ನು ತುಂಬುತ್ತಾಳೆ.
ಇಡೀ ಕುಟುಂಬವನ್ನು ಒಟ್ಟಾಗಿ ಜೋಡಿಸುವ ಪ್ರಬಲ ಸ್ಟ್ರಿಂಗ್ ಎಂದು ನಾನು ಭಾವಿಸುತ್ತೇನೆ, ಅವಳು ಯಾವಾಗಲೂ ನಮ್ಮನ್ನು ಪ್ರೇರೇಪಿಸುತ್ತಾಳೆ ಮತ್ತು ನಮ್ಮ ಬಲವನ್ನು ನಿರ್ಮಿಸುತ್ತಾಳೆ ಮತ್ತು ಘನತೆ, ವಿಶ್ವಾಸ ಮತ್ತು ಶಕ್ತಿಯೊಂದಿಗೆ ಜಗತ್ತನ್ನು ಎದುರಿಸಲು ನಮಗೆ ಎಲ್ಲಾ ರೀತಿಯ ಸಹಾಯ ಮಾಡುತ್ತಾಳೆ. ನಮ್ಮನ್ನು ದೈಹಿಕವಾಗಿ ಮತ್ತು ಮಾನಸಿಕವಾಗಿ ನಿರ್ಮಿಸಲು ಮತ್ತು ಜಗತ್ತನ್ನು ಎದುರಿಸಲು ನಮ್ಮನ್ನು ಬಲಪಡಿಸುವಂತಹ ದೈವಶಕ್ತಿಯೇ, ನಮ್ಮ ತಾಯಿ !

“ಪ್ರತಿಯೊಬ್ಬ ಯಶಸ್ವೀ ವ್ಯಕ್ತಿಯ ಹಿಂದೆ, ಮಹಿಳೆ ಇರುತ್ತಾಳೆ “. ನಾನು ಈ ಉಲ್ಲೇಖವನ್ನು ಪ್ರಶಂಸಿಸುತ್ತೇನೆ ಮತ್ತು ಅದರ ಬಗ್ಗೆ ಎರಡನೇ ಚಿಂತನೆಯಿಲ್ಲದೆ ಹೇಳಬಹುದು ಆ ಮಹಿಳೆ ಇನ್ಯಾರೂ ಅಲ್ಲದೆ ‘ತಾಯಿಯಲ್ಲವೇ?’

ನಮ್ಮ ಅಂತಿಮ ದಿನದವರೆಗೂ ನಾವು ಈ ಜಗತ್ತಿನಲ್ಲಿ ಹಾದುಹೋಗುವ ದಿನದಿಂದ ನಾವು ಅನೇಕ ಸಂಬಂಧಗಳನ್ನು ಎದುರಿಸುತ್ತೇವೆ- ಕೆಲವರು ನಿಮ್ಮನ್ನು ಮೋಸಗೊಳಿಸುವರು, ಕೆಲವರು ನಮ್ಮನ್ನು ತಮ್ಮದೇ ಆದ ಸಲುವಾಗಿ ಮಾತ್ರ ಬಿಟ್ಟು ಬಿಡುತ್ತಾರೆ. ಆದರೆ ಯಾವುದೇ ಮಿತಿಯಿಲ್ಲದ, ಷರತ್ತುಬದ್ಹ ಪ್ರೀತಿಯಿಲ್ಲದ ಮತ್ತು ಯಾವುದೇ ಬಾಧ್ಯತೆಗಳಿಲ್ಲದ ಸಂಬಂಧವೇ “ಮಾತೃತ್ವ”

“ನಮ್ಮ ದೇಶದಲ್ಲಿ ವಿವಿಧ ಭಾಷೆಗಳಿವೆ, ಆದರೆ ಬೇರೆ ಬೇರೆ ಜನರು ತಾಯಿಯನ್ನು ಅಮ್ಮ ಎಂದಲೇ ಎಂದು ಕರೆಯುತ್ತಾರೆ. ಬೇರೆ ಬೇರೆ ಭಾಷೆಗಳನ್ನು ಹೊಂದಿದ ನಂತರವೂ ತಾಯಿಯನ್ನುಅಮ್ಮ ಎಂದು ಕರೆಯಲ್ಪಡುವುದು ವೈಶಿಷ್ಟ್ಯವಲ್ಲವೇ ”

ಮನನ್ ಜೈನ್
ದಾವಣಗೆರೆ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading
Advertisement

Trending