Connect with us

ಭಾವ ಭೈರಾಗಿ

ಭರವಸೆಯಿಲ್ಲದ ಜೀವನ..!?

Published

on

ಒಂದು ಅಂದಾಜಿನಂತೆ ಹಿಂದಿನ ಕಾಲದಲ್ಲಿ ಮನುಷ್ಯನ ಆಯಸ್ಸು ಸರಾಸರಿ ನೂರು ವರ್ಷ ಇತ್ತು. ಅದು ಕ್ರಮೇಣ ಎಂಬತ್ತು ವರ್ಷವಾಗಿ, ಈಗ ಸುಮಾರು ಅರವತ್ತೈದು ವರ್ಷ ಎಂದು ಅಂದಾಜಿಸಿರುತ್ತಾರೆ. ಇದಕ್ಕೆ ಕಾರಣ ಏನು ಎಂದು ನೋಡಿದರೆ, ಈಗಿನ ಕಾಲದಲ್ಲಿನ ಆಹಾರ ಪದ್ದತಿ, ಒತ್ತಡದ ಯಾಂತ್ರಿಕ ಜೀವನ, ಕಂಡು ಕೇಳರಿಯದ ಖಾಯಿಲೆಗಳು, ಅನಿರೀಕ್ಷಿತ ಸಾವುಗಳು ಹೀಗೆ ಹಲವಾರು ಕಾರಣಗಳಿಂದ ಮನುಷ್ಯನ ಆಯಸ್ಸು ಇಷ್ಟೇ ಎಂದು ಹೇಳಲು ಬರುವುದಿಲ್ಲ, ಮನುಷ್ಯ ಬರುಬರುತ್ತಾ ಅಲ್ಪಾಯುಷ್ಯ ಜೀವಿಯಾಗುತ್ತಾ ಬಂದಿದ್ದಾನೆ ಎಂದರೆ ಅತಿಶಯೋಕ್ತಿಯಲ್ಲ.

ಮೊದಲಿಗೆ ಆಹಾರ ಪದ್ದತಿಗೆ ಬರುವುದಾದರೆ, ಹಿಂದಿನ ಕಾಲದಲ್ಲಿ ಹಿರಿಯರು ಮಾಡುತ್ತಿದ್ದ ವಿಧ ವಿಧವಾದ ಅಡುಗೆಗಳಲ್ಲಿ ಬೇಳೆ ಕಾಳುಗಳು, ಸೊಪ್ಪು, ವಿಟಮಿನ್ ಭರಿತ ಆಹಾರಗಳಿರುತ್ತಿದ್ದವು. ರಾಗಿ ರೊಟ್ಟಿ, ಮುದ್ದೆ, ಇದಕ್ಕೆ ತಕ್ಕಂತೆ ಹಸುವಿನ ತುಪ್ಪ, ವಿಧ ವಿಧವಾದ ತರಕಾರಿಗಳ ಪಲ್ಯಗಳು ಹೀಗೆ ಅನೇಕ ರೀತಿಯ ಆಹಾರವನ್ನು ತಯಾರಿಸಿ ತಿನ್ನುತ್ತಿದ್ದರು, ಅದರಂತೆ ಕೆಲಸವನ್ನು ಸಹ ಮಾಡುತ್ತಿದ್ದರು. ಇದಕ್ಕೆ ಒಂದು ಗಾದೆ ಇದೆ” ಹಿಟ್ಟಂ ತಿಂದಂ ಬೆಟ್ಟಂ ಕಿತ್ತಿಟ್ಟಂ” ಎಂದು ಅಂದರೆ ಮುದ್ದೆ ತಿಂದರೆ ಬೆಟ್ಟವನ್ನೂ ಸಹ ಕಿತ್ತಿಡಬಹುದಾದ ಶಕ್ತಿ ಬರುತ್ತದೆ ಎಂದು ನಮ್ಮ ಹಿರಿಯರು ಹೇಳುತ್ತಿದ್ದರು. ಅವರಿಗೆ ಅಷ್ಟಾಗಿ ಯಾವ ಖಾಯಿಲೆಯೂ ಬರುತ್ತಿರಲಿಲ್ಲ. ಬಂದರೂ ಇವರ ದೇಹದಲ್ಲಿದ್ದ ರೋಗ ನಿರೋಧಕ ಶಕ್ತಿ ಇವರನ್ನು ರಕ್ಷಿಸುತ್ತಿತ್ತು. ಇದರಿಂದ ಹಿಂದಿನವರು ಹೆಚ್ಚಿನ ಕಾಲ ಬದುಕಲು ನೆರವಾಗುತ್ತಿತ್ತು. ಆದರೆ ಈಗಿನ ಕಾಲದಲ್ಲಿ ಆಹಾರ ಪದ್ದತಿಯೇ ಬೇರೆಯಾಗಿದೆ ಅದರಲ್ಲೂ ಆಹಾರ ತಿನ್ನುವುದೂ ಸಹ ಸಾಕಷ್ಟು ಬದಲಾಗಿದೆ. ಈಗಿನ ಕಾಲದಲ್ಲಿ ಕೆಲವು ಸತ್ವವಿಲ್ಲದ ಆಹಾರದಲ್ಲಿ ಹೊಟ್ಟೆ ಮಾತ್ರ ತುಂಬುತ್ತದೆ. ನಮ್ಮ ಶರೀರಕ್ಕೆ ಬೇಕಾದ ವಿಟಮಿನ್‍ಗಳು ಸಿಗುವುದೇ ಇಲ್ಲ. ಎಲ್ಲವೂ ಆಧುನಿಕ ವೈಜ್ಞಾನಿಕ ಪದ್ದತಿಯಿಂದ ತಯಾರಾದ ಪದಾರ್ಥಗಳು, ತರಕಾರಿ, ಹಣ್ಣುಗಳು, ಬೆಳೆ ಜಾಸ್ತಿ ಬರಲಿ ಎಂದು ಆಧುನಿಕ ವೈಜ್ಞಾನಿಕ ಪದ್ದತಿಯಂತೆ ವ್ಯವಸಾಯ ಮಾಡುವುದು ಅನಿವಾರ್ಯವಾಗಿದೆ. ಏಕೆಂದರೆ ಬೆಳೆಯುತ್ತಿರುವ ಜನಸಂಖ್ಯೆಗೆ ಅನುಗುಣವಾಗಿ ಬೆಳೆಯನ್ನು ಬೆಳೆಯಬೇಕಾಗಿರುವುದರಿಂದ, ಆಧುನಿಕ ವ್ಯವಸಾಯ ಒಂದು ವರವೆಂದೇ ಹೇಳಬಹುದು. ಆದರೆ ಒಂದು ಕೊಟ್ಟು ಇನ್ನೊಂದನ್ನು ಕಿತ್ತುಕೊಳ್ಳುವಂತೆ, ಆಹಾರವೇನೋ ಹೆಚ್ಚಿಗೆ ಬೆಳೆಯಬಹುದು ಆದರೆ ಅದರಲ್ಲಿ ಸತ್ವಾಂಶದ ಕೊರತೆ ಇರುವುದು ಎದ್ದು ಕಾಣುತ್ತದೆ.

ಆಹಾರದಲ್ಲೇ ಸತ್ವವಿಲ್ಲವೆಂಬುದು ಒಂದಾದರೆ ಅದನ್ನು ತಿನ್ನುವುದೇ ಬೇರೆ ರೀತಿಯದು. ಬೇಗ ಎದ್ದು ಕೆಲಸಕ್ಕೆ ಹೋಗುವವರು, ಮನೆಯಲ್ಲಿ ಬೆಳಗ್ಗೆ ಎಷ್ಟು ತಾನೇ ತಿನ್ನಲು ಸಾಧ್ಯ? ಆಫೀಸಿಗೆ ವೇಳೆ ಆಯಿತೆಂದು ಕೆಲವರು, ಬಸ್ಸು ಸಿಗುತ್ತದೋ ಇಲ್ಲವೋ ಎಂದು ಕೆಲವರು, ಸ್ವಂತ ವಾಹನ ಇದ್ದಲ್ಲಿ, ಹೋಗಬಹುದಾದರೂ ಟ್ರಾಫಿಕ್ ಕಿರಿ ಕಿರಿಯಿಂದ ತಪ್ಪಿಸಿಕೊಳ್ಳಲು ಬೇಗನೇ ಹೊರಡಲೇ ಬೇಕು, ಮಾಡಿರುವ ಅಡುಗೆಯಲ್ಲಿ ಅಲ್ಪ ಸ್ವಲ್ಪ ತಿಂದು ಅದನ್ನೇ ಮದ್ಯಾಹ್ನದ ಊಟಕ್ಕೆಂದು ಡಬ್ಬಿಗೆ ಸ್ವಲ್ಪ ಹಾಕಿಕೊಂಡು ಹೋಗಬೇಕಾದ ಪರಿಸ್ಥಿತಿ, ಅಷ್ಟು ಬೇಗನೆ ಎಲ್ಲಾ ಅಡುಗೆಯನ್ನು ಮಾಡಲು ಸಾಧ್ಯವೇ? ಏನು ಆಗಿರುವುದೋ ಅದನ್ನೇ ತಿಂದು ಅದನ್ನೇ ತೆಗೆದುಕೊಂಡು ಹೋಗುವುದು ರೂಢಿಯಾಗಿದೆ. ಇನ್ನು ರಜೆ ಬಂದರೆ, ಇನ್ನೊಂದು ರೀತಿಯಂತೆ ನಡೆವಳಿಕೆ ಇದೆ. ದಿನವೂ ಮನೆಯಲ್ಲಿ ಅಡುಗೆ ಮಾಡಿ, ಸಾಕಾಗಿ ಹೋಗಿದೆ, ವಾರಕ್ಕೊಮ್ಮೆಯಾದರೂ ಮನೆಯಲ್ಲಿ ಅಡುಗೆ ಮಾಡದೆ ಹೋಟೆಲ್ಲಿಗೆ ಹೋಗೋಣ ಎಂದು ತೀರ್ಮಾನಿಸುವವರೂ ಎಷ್ಟೋ ಮಂದಿ ಇದ್ದಾರೆ. ಇದರಿಂದ ದೇಹಕ್ಕೆ ಬೇಕಾಗುವಷ್ಟು ವಿಟಮಿನ್‍ಗಳು, ಸಿಗುವುದೇ ಇಲ್ಲ. ಇದರಿಂದ ರೋಗ ನಿರೋಧಕ ಶಕ್ತಿ ಬರುವುದಾದರೂ ಹೇಗೆ? ಇದರಿಂದ ಅನೇಕ ರೀತಿಯ ಖಾಯಿಲೆಗಳು ಬಂದು ಆಯಸ್ಸು ಮುಗಿಯುವ ಮುನ್ನ ಜೀವನ ಯಾತ್ರೆ ಮುಗಿಸುವವರು ಎಷ್ಟೋ ಮಂದಿ ಇದ್ದಾರೆ. ಇದರ ಜೊತೆಗೆ ಈಗಿನ ಕಾಲದಲ್ಲಿ ಮಕ್ಕಳು ಜಂಕ್ ಆಹಾರ ತಿಂದು ಸರಿಯಾಗಿ ಊಟ ಮಾಡುವುದೇ ಇಲ್ಲ. ಇದರಿಂದ ರೋಗ ನಿರೋಧಕ ಶಕ್ತಿ ಎಲ್ಲಿಂದ ಬರಬೇಕು? ಇದರ ಜೊತೆಗೆ ಕೆಲವರು ಮದ್ಯಪಾನ ತಂಬಾಕು ಸೇವನೆ ಇತ್ಯಾದಿಗಳ ದುಷ್ಚಟದಿಂದ ನೋಡುವುದಕ್ಕೆ ಮನುಷ್ಯನಾಗಿರುತ್ತಾನಷ್ಟೇ ಆದರೆ ಆರೋಗ್ಯವಂತನಾದ ಮನುಷ್ಯನು ಆಗಿರುವುದಿಲ್ಲ. ಮರದ ಒಳಗೆಲ್ಲಾ ಗೆದ್ದಲು ಹಿಡಿದು, ಮೇಲ್ನೋಟಕ್ಕೆ ಮರವು ಮಾತ್ರ ಬಹಳ ಚೆನ್ನಾಗಿ ಕಾಣುತ್ತಿರುತ್ತದೆ. ಆದರೆ ಗೆದ್ದಲು ಹಿಡಿದು ಯಾರಿಗೂ ತಿಳಿಯವುದಿಲ್ಲ. ಆ ಮರವು ಯಾವಾಗ ಬೇಕಾದರೂ ಬೀಳಬಹುದು. ನೋಡಿದವರು ಮರ ಎಷ್ಟು ಚೆನ್ನಾಗಿತ್ತು ಸ್ವಲ್ಪ ಜೋರಾಗಿ ಗಾಳಿ ಬೀಸಿದ್ದಕ್ಕೆ ಬಿದ್ದು ಹೋಯಿತು ಎನ್ನುತ್ತಾರೆ. ಮನುಷ್ಯನ ದೇಹದ ಸ್ಥಿತಿಯೂ ಇದೇ ರೀತಿ ಆಗಿದೆ. ಮನುಷ್ಯ ಹೊರಗೆ ನೋಡಲು ಬಹಳ ಚೆನ್ನಾಗಿರುತ್ತಾನೆ ಆದರೆ ಇವನ ದೇಹದೊಳಗೆ ಇರುವ ಖಾಯಿಲೆಗಳು ಗೊತ್ತಾಗುವುದೇ ಇಲ್ಲ. ಇದರಿಂದ ಒಂದು ಸಣ್ಣ ಖಾಯಿಲೆ ಬಂದರೂ ಮನುಷ್ಯ ಯಾವಾಗ ಬೇಕಾದರೂ ಸಾಯಬಹುದು. ನೋಡಿದವರಿಗೆ ಎಷ್ಟು ಚೆನ್ನಾಗಿದ್ದ ಒಂದು ಸಣ್ಣ ಜ್ವರ ಬಂದಿದ್ದಕ್ಕೆ ಸತ್ತು ಹೋದನಲ್ಲಾ ಎಂದು ಹೇಳುವ ಪ್ರಸಂಗಗಳು ಉಂಟು. ಒಳಗಿನ ಖಾಯಿಲೆ ಯಾರಿಗೂ ತಿಳಿಯವುದಿಲ್ಲ. ಗೆದ್ದಿಲು ಮರದ ಒಳಗೆ ತಿನ್ನುವ ರೀತಿ ಮನುಷ್ಯನ ದೇಹದ ಒಳಗೆ ಖಾಯಿಲೆ ಬಂದು ಯಾವಾಗ ಬೇಕಾದರೂ ಸಾಯಬಹುದು. ಕಟ್ಟು ನಿಟ್ಟಿನ ಆಹಾರ ಪದ್ದತಿ ಅನುಸರಿಸಿದರೆ ಹಾಗೂ ದುಷ್ಚಟಗಳಿಂದ ದೂರ ಇದ್ದರೆ ಮಾತ್ರ ಇದಕ್ಕೆಲ್ಲಾ ಪರಿಹಾರ ಸಿಗಬಹುದು.

ಒತ್ತಡದ ಯಾಂತ್ರಿಕ ಜೀವನದಿಂದ ಮನುಷ್ಯನು ಅರ್ಧ ಆಯಸ್ಸಿಗೆ ಹೊರಟು ಹೋಗುತ್ತಾನೆ. ಯಾವಾಗಲೂ ಟೆನ್ಷನ್ ಆದರೆ, ದೇಹಕ್ಕೆ ಆರಾಮ ಸಿಗುವುದಾದರೂ ಎಲ್ಲಿ? ಬೆಳಿಗ್ಗೆ ಬೇಗ ಹೋಗಬೇಕೆಂಬ ಆತುರ, ಕಛೇರಿಯಲ್ಲಿ ಕೆಲಸ ಆಗಲಿಲ್ಲವೆಂಬ ದುಗುಡ, ಕೆಲವು ಕಡೆ ನೀಡಿರುವ ನಿರ್ದಿಷ್ಟ ಕೆಲಸವನ್ನು ಪೂರ್ಣಗೊಳಿಸಬೇಕೆಂಬ ಷರತ್ತು, ಇದರಿಂದ ಒತ್ತಡಗಳು ಉಂಟಾಗಿ ಅನೇಕ ಖಾಯಿಲೆಗಳು ಬಂದು ಅರ್ಧ ಆಯಸ್ಸಿಗೆ ಹೋಗಲು ಕಾರಣವಾಗುತ್ತದೆ. ಕಂಡು ಕೇಳರಿಯದ ಖಾಯಿಲೆಗಳು, ಕೆಲವು ಖಾಯಿಲೆಗಳು ನಮ್ಮ ಆಹಾರ ಪದ್ದತಿಯಿಂದ ಬಂದರೆ, ಇನ್ನೂ ಕೆಲವು ಖಾಯಿಲೆಗಳು ಹೊರಗಿನ ಕೀಟಗಳು ಸೊಳ್ಳೆಗಳಿಂದ ಬರುತ್ತವೆ. ಇಲ್ಲಿವರೆವಿಗೂ ಕಂಡು ಕೇಳರಿಯದ ಭಯಂಕರ ಖಾಯಿಲೆಗಳು, ಡೆಂಗ್ಯೂ, ಹಕ್ಕಿಜ್ವರ, ಹೆಚ್.1 ಎನ್ 1 ಹಂದಿ ಜ್ವರ ಹೀಗೆ ಅನೇಕ ರೀತಿಯ ಖಾಯಿಲೆಗಳಿಗೆ ಮನುಷ್ಯನು ತುತ್ತಾಗುತ್ತಿದಾನೆ. ವೈಜ್ಞಾನಿಕವಾಗಿ ಔಷದಿಗಳನ್ನು ಎಷ್ಟೇ ಕಂಡು ಹಿಡಿದರೂ ಅದಕ್ಕೆ ತಕ್ಕಂತೆ ಮಾನವನಿಗೆ ಸವಾಲಾದಂತೆ ಅನೇಕ ಖಾಯಿಲೆಗಳು ಹೊಸದಾಗಿ ಹುಟ್ಟಿಕೊಂಡಿವೆ. ಇದರಿಂದ ಮನುಷ್ಯ ಕೃಷನಾಗಿ, ಆಯಸ್ಸು ಮುಗಿಯುವ ಮೊದಲೇ ಹೊರಟು ಹೋಗುವ ಅಪಾಯ ಎದುರಾಗುತ್ತಿದೆ.

ನಗರಗಳ ಜೀವನಕ್ಕೆ ಬಂದರೆ, ಅತಿಯಾದ ವಾಹನಗಳು, ವಾಹನಗಳು ಉಗಳುವ ಹೊಗೆಯಿಂದ ಬರುವ ಖಾಯಿಲೆಗಳು, ಇದರಿಂದಲೂ ಮನುಷ್ಯನ ಆಯಸ್ಸು ಕಡಿಮೆಯಾದಂತೆ ಆಗಿದೆ. ಇನ್ನು ವಾಹನಗಳಲ್ಲಿ ಪ್ರಯಾಣ ಮಾಡುವುದು ಒಬ್ಬರು ತನ್ನ ಪಾಡಿಗೆ ಸರಿಯಾಗಿ ಹೋಗುತ್ತಿದ್ದರೂ ಸಹ ಬೇರೆಯವರು ಬಂದು ಅಪಘಾತ ಮಾಡುವುದು. ಇದರಿಂದ ಆರೋಗ್ಯವಾಗಿದ್ದರೂ ಬೇಗನೇ ಮೃತರಾಗುತ್ತಾರೆ. ವಾಹನ ಅಪಘಾತಗಳಿಂದಲೂ ಎಷ್ಟೋ ಜನರ ಜೀವವೇ ಹೋಗಿದೆ. ಹೋಗುತ್ತಲೂ ಇದೆ. ಇದರ ಜೊತೆಗೆ ತಮ್ಮದೇ ಆದ ನಿರ್ಲಕ್ಷತನ ಅತಿವೇಗವಾಗಿ ಹೋಗಬೇಕೆನ್ನುವ ಕೆಟ್ಟ ಗುಣ. ಸ್ವಲ್ಪ ತಾಳ್ಮೆಯಿಂದ ನಿಧಾನವಾಗಿ ಹೋದರೆ ಸುರಕ್ಷಿತವಾಗಿ ಮನೆಯನ್ನು ತಲುಪಬಹುದು. ವಾಹನಗಳಿಂದ ಸ್ವಲ್ಪ ಅಜಾಕರೂಕರಾದರೂ ಅಪಾಯ ಕಟ್ಟಿಟ್ಟ ಬುತ್ತಿ.

ಇದರ ಜೊತೆಗೆ ಜೀವನದಲ್ಲಿ ನಿರಾಸೆಯಾದರೆ, ಪ್ರೇಮ ವೈಫಲ್ಯವಾದರೆ, ಪರೀಕ್ಷೆಗಳಲ್ಲಿ ಅನುತ್ತೀರ್ಣರಾದರೆ, ಅಥವಾ ಜೀವನದಲ್ಲಿ ತಮ್ಮದೇ ಆದ ಸಮಸ್ಯೆ, ಹಣಕಾಸಿನ ಸಮಸ್ಯೆ ಇದರಿಂದ ತಮ್ಮ ಜೀವವನ್ನು ತಾವೇ ತೆಗೆದುಕೊಳ್ಳಲು ಆತ್ಮಹತ್ಯೆಯಂತ ಮಾರ್ಗಕ್ಕೆ ಮೊರೆಹೋಗುವುದು. ಮನುಷ್ಯನ ಜೀವ ಅತ್ಯಮೂಲ್ಯವಾದದ್ದು, ಇದನ್ನು ಹಾಳುಮಾಡಿಕೊಳ್ಳಬಾರದೆಂಬುದನ್ನು ಮರೆತು ಎದುರಿಸಲು ಧೈರ್ಯವಿಲ್ಲದೆ ಅಥವಾ ಬೆಂಬಲಿಗರು ಇಲ್ಲದೆ, ತಮ್ಮ ಪ್ರಾಣವನ್ನು ತಾವೇ ತೆಗೆದುಕೊಳ್ಳುವವರು ಉಂಟು. ಇದರ ಜೊತೆಗೆ ದ್ವೇಷಕ್ಕಾಗಿ, ಆಸ್ತಿಗಾಗಿ, ಬೇರೆ ರೀತಿಯ ಸಣ್ಣ ಸಣ್ಣ ಕಾರಣಗಳಿಗೆ ಬೇರೆಯವರ ಜೀವದ ಬೆಲೆಯನ್ನೇ ಅರ್ಥ ಮಾಡಿಕೊಳ್ಳದೆ ಜೀವವನ್ನು ತೆಗೆಯುವುದು. ಪ್ರಕೃತಿ ವಿಕೋಪಗಳಿಂದಲೂ ಎಷ್ಟೋ ಜನರ ಆಯುಷ್ಯ ಅರ್ಧದಲ್ಲೇ ಮುಗಿಯುತ್ತದೆ. ಚಂಡಮಾರುತ, ಭೂಕಂಪ, ಮಳೆ ಸಿಡಿಲು ಇನ್ನೂ ಹೀಗೆ ಅನೇಕ ಪೃಕೃತಿ ವಿಕೋಪದಿಂದ ಮನುಷ್ಯನ ಜೀವವು ಹೋಗುವ ಸಂಭವ ಉಂಟು. ಪ್ರಕೃತಿ ವಿಕೋಪ ಯಾವಾಗ ಬೇಕಾದರೂ ಸಂಭವಿಸಬಹುದು. ಇದಕ್ಕೆ ಕಾಲ ವೇಳೆ ಯಾವುದೂ ಇಲ್ಲ. ಇದಕ್ಕೆಲ್ಲಾ ಹವಾಮಾನ ವೈಪರೀತ್ಯ. ಮನುಷ್ಯನ ದುಡುಕು ನಿರ್ಧಾರ, ಜೀವನ ನಡವಳಿಕೆ ಆಹಾರ ಸೇವನೆ, ದುಷ್ಚಟಗಳು ಇತ್ಯಾದಿಗಳೇ ಕಾರಣವಾಗಿದೆ. ತನ್ನ ಸ್ವಾರ್ಥಕ್ಕಾಗಿ ಕಾಡುಗಳಲ್ಲಿರುವ ಮರಗಳನ್ನು ಕಡಿದು, ಹಸಿರು ಕಾಡನ್ನು ಕಾಂಕ್ರೀಟ್ ಕಾಡು ಮಾಡಿದರೆ ಹವಾಮಾನ ಅಸಮತೋಲನ ಉಂಟಾಗಿ ಪ್ರಕೃತಿ ವಿಕೋಪಕ್ಕೆ ತಿರುಗಿ ಮನುಷ್ಯನ ಜೀವವನ್ನೇ ಬಲಿ ಪಡೆಯುತ್ತಿರುವ ಸನ್ನಿವೇಶಗಳು ಉಂಟಾಗುತ್ತಿದ್ದು ಪ್ರಳಯದ ಭೀತಿ ಅವರಿಸಿದೆ.

ಎನ್.ಮುರಳೀಧರ್
ಕಾವ್ಯನಾಮ : ಮುರಳಿಮಂಗಲಧರೆ
ನೆಲಮಂಗಲ
9902772278

ಭಾವ ಭೈರಾಗಿ

ಕವಿತೆ | ನೀ ಎಂಥ ಮಕ್ಳಿಗೆ ಜನ್ಮ ಕೊಟ್ಟೆ ನನ್ನವ್ವ..?

Published

on

  • ಮಹೇಶ ಶಿಂಗೆ

ಯ್ಯೋ ನನ್ನವ್ವ
ಎಂಥ ಗತಿ ಬಂತು ನಿನಗವ್ವ
ರಸ್ತೆ ಮಧ್ಯೆ ನಿನ ಬಟ್ಟೆ ಬಿಚತಾರವ್ವ.
ಅತ್ಯಾಚಾರಗೈದು,
ಮತ್ತೆ
ಭಾರತ ಮಾತಾ ಕೀ ಜೈ
ಅನ್ತಾರವ್ವ.

ದೇಶಭಕ್ತಿ ಬರೀ ತೊರಿಕೆ
ಆಗೊಯಿತವ್ವ
ಇಲ್ಲಿ ಅತ್ಯಾಚಾರ ಮಾಡಿದ್ರೆ
ನಡೆಯತ್ತವ್ವ
ಆದ್ರೆ
ಭಾರತ ಮಾತಾ ಕಿ ಜೈ
ಅಂತ ಹೇಳಲೇ ಬೇಕವ್ವ
ಹೇಳದಿದ್ರೇ ನನ್ನವ್ವ,
ದೇಶದ್ರೋಹಿ ಪಟ್ಟ
ಕಟ್ಟ ಬಿಡ್ತಾರವ್ವ.

ಇದೆಂತ ಮಕ್ಳನ
ಹೆತ್ತಿದೆ?
ನೀ ಹೇಳವ್ವ
ಅತ್ಯಾಚಾರಿಗೂ ಧರ್ಮದ
ಲೇಬಲ್ ಹಚ್ಚಿ,
ಬ್ಯಾಟರಿ ಹಿಡ್ದು ಹುಡುತಿದ್ದಾರವ್ವ.

ಅವಳು..
ಇವಳು…ಎನ್ನದೇ
ಮುದುಕಿ..
ಸಣ್ಮಕಳು ಅಂತ ಬಿಡದೇ,
ಜೊಲ್ಲು ನಾಯಿಯ ಚಟದ
ಕಾಮುಕರು
ರಸ್ತೆ ಮೇಲೆ
ನಿನ್ನ ಬೆತ್ತಲೆ ದೇಹ
ತಿಂದು ಬಿಸಾಕಿ ಬಿಡ್ತಾರವ್ವ..
ಅವ್ವ ನನ್ನವ್ವ
ನೀ ಹೆಂಥಾ ಮಕ್ಳಿಗೆ
ಜನ್ಮ ಕೊಟ್ಟೆ
ನೀ ಹೇಳವ್ವ?

ಅಣ್ಣ ಬಿಡಣ್ಣ
ದಮ್ಮಯ್ಯ ಬಿಡಣ್ಣ
ನಿನ್ನ ತಂಗಿ
ಅಂತ ತಿಳಿದಾದರೂ
ಸರಿ
ಬಿಡಣ್ಣ …
ನಿನ ಕೈ ಮುಗಿತಿನಿ
ನಿನ ಕಾಲಿಗೂ ಬಿಳ್ತಿನಿ
ನನ್ನ ಹಾಳು
ಮಾಡಬೇಡಣ್ಣ..
ಅಣ್ಣ..ಅಣ್ಣ…
ಅಂತ ಕಿರುಚಿದರೂ
ಗೋಗರೆದರೂ
ಮರುಗಿದರೂ
ಕರಗರೂ
ಆ ನೀಚ ನಿನ ಮಕ್ಳು
ಕಾಮುಕರು
ಅವ್ವ ನನ್ನವ್ವ
ನೀ ಹೆಂಥ
ಮಕ್ಳಿಗೆ ಜನ್ಮ ಕೊಟ್ಟೆ?
ನೀ ಹೇಳವ್ವ.

ಹೆಣ್ಣೆಂದರೆ
ಹಣ್ಣಂತ ತಿಳಿದರೆ..?
ಎಲ್ಲೆಂದರಲ್ಲಿ
ಕಾಣಿದರೆ ..
ಕಲ್ಲು ಬಿಸಾಕಿ
ಕೆಡವಿ ಸಿಪ್ಪೆ ಸುಲಿದು
ತಿಂದು ಬಿಡುವರೆ..?
ಎದೆ ಹಾಲ ಕುಡಿಸೊ
ತಾಯಿನೂ
ದಿಟ್ಟಿಸಿ ನೋಡುವ
ಮಕ್ಳನ ಹೆತ್ತ ಬಿಟ್ಟೆನವ್ವ.
ಅವ್ವ ನೀನ ಮೊಲೆಗೆ
ಜೋತು ಬಿದ್ದು
ಭಾರತ ಮಾತಾ ಕೀ ಜೈ
ಅಂತ
ಹೇಳ್ತಿದ್ದಾರವ್ವ..

ಅಂಜಿಕೆ ಮನದಲ್ಲಿ
ಮನೆ ಮಾಡಿ ಸುಡುತ್ತಿದೆ
ನನಗಿಗವ್ವ..
ನಿನ್ನಂಥೆ
ನನ್ನ ಹೆತ್ತ ತಾಯಿ ಹೆಣ್ಣವ್ವ..
ನನ್ನ ಒಡಹುಟ್ಟಿದವಳೂ
ನಿನ್ನಂಥೆ ಮುದ್ದು ಮುದ್ದಾಗಿದ್ದಾಳವ್ವ..
ನನ್ನ ಜೀವನ ಅರ್ಧಾಂಗಿ
ಅವಳೂ ನಿನ್ನಂಥೆ ಹೆಣ್ಣು ಕೇಳವ್ವ
ಪುಟ್ಟ ಪುಟ್ಟ ಹೆಜ್ಜೆಯ
ಗೆಜ್ಜೆಯ ನಾದ
ತಂದ,
ಮನೆಗೆಲ್ಲ ಸ್ವರ್ಗ ತಂದ
ನನ್ನ ಮುದ್ದಿನ ಮಗಳೂ ಹೆಣ್ಣು
ನೋಡವ್ವ..
ಕಣ್ಣು ಕಳೆದುಕೊಂಡು
ಇರಲು ಹೆಂಗೆ ಸಾಧ್ಯ ಐತಿ ಹೇಳವ್ವ…..?
ಅವ್ವ
ನೀ ಹೆಂಥ ಮಕ್ಳಿಗೆ
ಜನ್ಮ ಕೊಟ್ಟೆ
ಹೇಳವ್ವ..?

ಅತ್ಯಾಚಾರಿಗೂ ಧರ್ಮದ ಲೇಬಲ್ ಹಚ್ಚಿ
ಬ್ಯಾಟರಿ ಹಿಡ್ದು
ಅಧರ್ಮಿಯನನ್ನ ಹುಡುಕುತಿದ್ದಾರವ್ವ
ನೀ ಆ ವೇಳೆಗೆ ಪಟ್ಟ
ಯಾತನೆ ಎಲ್ಲ ಮರೆತು
ಧರ್ಮದ ಬ್ಯಾನರ ಹಿಡಿದೇ ಹೊಡದಾಡತಿದ್ದಾರವ್ವ.

ಅವ್ವ ನೀ ಹೆಂಥ ಮಕ್ಳಿಗೆ ಜನ್ಮ ಕೊಟ್ಟೆ
ನೀ ಹೇಳವ್ವ..?

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಭಾವ ಭೈರಾಗಿ

ಎಂದೂ ಮುಗಿಯದ ಪ್ರೀತಿಯ ಪಯಣ ಈ‌ ಗೆಳೆತನ..!

Published

on

ಕತ್ತಲೆಯಲ್ಲಿ ಕರಗುವ ಕನಸಿಗೆ ಬೆಳಕ ತರುವುದು ಗೆಳೆತನ. ನೋಯುವ ನೋವಿನ ಮನಸಿಗೆ ಒಲವ ತುಂಬುವುದು ಈ ಗೆಳೆತನ. ಬೆಂಕಿಯಂತೆ ಬೇಯುವ ಭಾವನೆಗೆ ಜೀವ ತುಂಬುವುದು ಗೆಳೆತನ. ಏಕಾಂತದಲ್ಲಿರುವ ಒಂಟಿತನಕ್ಕೆ ಹೊಸತನವೇ ಈ ಗೆಳೆತನ..!!

ಹೌದು..ನನ್ನ ಈ ಗೆಳೆತನ ಏಳು ನಿಮಿಷದಲ್ಲಿ ಏಳು ಹೆಜ್ಜೆಯನ್ನಿಟ್ಟು ಸಂಸಾರ ನಡೆಸಿದ ಹಾಗಲ್ಲ. ಪತಿ ಪತ್ನಿಯರಷ್ಟೇ ಅಲ್ಲ ಸಪ್ತಪದಿ ತುಳಿದು ಜೀವನಕ್ಕೆ ಕಾಲಿಡುವುದು. ನಮ್ಮ ಈ ಗೆಳೆತನದಲ್ಲು ಏಳು ವರ್ಷಗಳ ಕಾಲ ಏಳು ಹೆಜ್ಜೆಯನ್ನಿಟ್ಟು, ಪ್ರೀತಿ, ವಿಶ್ವಾಸ, ನೋವು, ಅಸುಹೆ ಹೀಗೆ ಎಲ್ಲದರ ನಡುವೆ ನಂಬಿಕೆಯೆಂಬ ಮೂರು ಗಂಟನ್ನು ಹಾಕಿಸಿಕೊಂಡು, ನಮ್ಮದು ಏಳೇಳು ಜನ್ಮಗಳ ಅನುಬಂಧವೆಂದು ಹಾಡಿ ನಲಿದವರು. ನಮ್ಮ ಭಾಂದವ್ಯ ನೋಡಿ ಕಾಲೇಜು ಅಧ್ಯಪಕರೆ ತ್ರಿಮೂರ್ತಿಗಳೆಂಬ ಪಟ್ಟವನ್ನು ಮುಡಿಸಿದ್ದಾರೆ. ಅನೇಕ ಸ್ನೇಹಿತರು ಮರುಗಿದವರಿದ್ದಾರೆ, ನಮ್ಮ ನಡುವೆ ಜಗಳ ತಂದಿಟ್ಟು ತಮಾಷೆ ನೋಡಿದವರು ಇದ್ದಾರೆ.. ಜಗಳವಾದಾಗ ವಿಚ್ಚೆದನ ಪತ್ರವನ್ನು ಬರೆದು ಮೂರು ತಿಂಗಳ ಕಾಲ ಮಾತಾಡೊದ್ದನ್ನ ನಿಲ್ಲಿಸಿದ್ದು ಉಂಟು.

ಪ್ರೇಮಿಗಳಲ್ಲಿ ಹೇಗೆ ನನ್ನವಳೆಂಬ ಸ್ವಾರ್ಥ ತುಳುಕಾಡುತ್ತೋ ಹಾಗೆ ನಮ್ಮಲ್ಲೂ ಸಹ. ನಮ್ಮನ್ನ ಬಿಟ್ಟು ಯಾರಾತ್ರನಾದ್ರು ಅತೀ ಹೆಚ್ಚು ಮಿಂಗಲ್ ಆದ್ವೋ ಮುಗಿತು ಆವತ್ತೆ ಪ್ರಾರಂಭವಾಯ್ತು ಅಂತ ಈ ಮುನಿಸು. ಅಬ್ಬಾ! ಈ ಮುನೇಶ್ವರ ಏನಾದ್ರು ಒಬ್ಬರಲ್ಲಿ ಮನೆ ಮಾಡಿದ್ನೋ ಆ ದಿನವೇ ಮೂಡ್ ಔಟ್ ಆಗಿಬಿಡ್ತಿತ್ತು. ಇವರ ಬಗ್ಗೆ ಹೇಳಬೇಕೆಂದರೆ, ಒಬ್ಬಳು ವಿಜಯಲಕ್ಷ್ಮಿ ತಾಯಿಯ ಹಾಗೆ ಪ್ರೀತಿಸಿ ಮುದ್ದಿಸುವವಳು, ಇನ್ನೊಬ್ಬಳು ಮಾಲತಿ ಸದಾ ನನ್ನಲ್ಲಿರುವ ತಪ್ಪುಗಳನ್ನು ತಿದ್ದಿ ಬುದ್ದಿ ಹೇಳುವವಳು.

ಕೊಟ್ಟು ಕೊಳ್ಳುವುದುಂಟು, ಹೇಳಿ ಕೇಳುವ ಗುಟ್ಟುಂಟು
ಜೊತೆಗೆ ತಿನ್ನುವ, ತಿನ್ನಿಸಿ ಮೆಲ್ಲುವ ತುಂಟಾಟವುಂಟು
ದೇಹವೆರಡರ ನಡುವೆ ಜೀವ ಒಂದಾಗಿರುವ ನಂಟು
ಪ್ರೀತಿ ಸ್ನೇಹದ ಬೆರಗಿನ ಅಂಟು, ನೂರೆಳೆಯ ಗಂಟು
ನಾ ತಪ್ಪು ಮಾಡಿದಾಗ ಇವರಿಬ್ಬರು ನಯವಾಗಿಯೋ ಮೆಲುಸಾಗಿಯೋ, ಬಿರುಸಾಗಿಯೋ ಗಡುಸಾಗಿಯೋ ಕಟುವಾಗಿಯೋ ಇದ್ದುದ್ದನ್ನು ಇದ್ದಂತೆ ಸಮಯೋಚಿತವಾಗಿ ತಿಳಿಹೇಳಿ, ತಪ್ಪು ದಾರಿ ಹಿಡಿಯದ ಹಾಗೆ ನೋಡಿಕೊಂಡವರು.

ಮಕ್ಕಳಿಗೆ ಅ,ಆ ಕಲಿಸಿದಂತೆ ನನ್ನ ಬರಹದಲ್ಲಿ ಆಗುತ್ತಿದ್ದ ತಪ್ಪುಗಳನ್ನು ಸಾಕಾಷ್ಟು ತಿದ್ದುಪಡಿಮಾಡಿದವರು. ನೊಂದಾಗ ತೊಡೆಯ ಮೇಲೆ ಮಲಗಿಸಿಕೊಂಡು ತಲೆಸವರಿ ಸಮಾಧಾನ ಮಾಡುವವರು. ಕೈತುತ್ತು ತಿನ್ನಿಸಿ ಅಮ್ಮನ ಪ್ರೀತಿಯನ್ನು ತೋರಿಸಿದವರು.

ಇಷ್ಟೆಲ್ಲಾ ಆದರೂ ಸಹ ಪರೀಕ್ಷೆ ಎಂದು ಬಂದರೆ ಪೈಪೋಟಿ ಬೀಳುತ್ತಿದದ್ದು ಅನ್ಯದವರೊಡನೆ ಅಲ್ಲಾ.. ಬದಲಾಗಿ ನಮ್ಮೂವರ ನಡುವೆಯೇ ಹೆಚ್ಚು. ಒಮ್ಮೆ ನನ್ನ ಗೆಳತಿ ವಿಜಯಲಕ್ಷ್ಮೀ ನನಗಿಂತ ಒಂದು ಮಾಕ್ರ್ಸ್ ಹೆಚ್ಚಿಗೆ ತೆಗೆದಿದ್ದಕ್ಕೆ ಸರ್‍ನೊಂದಿಗೆ ಬರೋಬರಿ ಮೂರು ತಾಸು ಜಗಳ ಮಾಡಿ ನಾಲ್ಕು ದಿನ ಮಾತು ಬಿಟ್ಟಿದನ್ನ ನೆನಪಿಸಿಕೊಂಡರೆ ಇವಾಗ್ಲು ನಗು ಬರುತ್ತದೆ. ಅದೇ ನಾವು ಒಮ್ಮೆ ಡಿಗ್ರಿ ಓದುವಾಗ ಏನು ಓದಿಲ್ಲವೆಂದು ಒಬ್ಬರಿಗೊಬ್ಬರು ಕಾಪಿ ಹೊಡೆದು ಸೇಮ್ ಮಾಕ್ರ್ಸ್ ಗಿಟ್ಟಿಸಿಕೊಂಡಿದ್ದು ಉಂಟು. ತರಗತಿಯಲ್ಲಿ ನಾವು ಮಾಡಿದ ತರಲೆಗಳು, ತುಂಟಾಟಗಳನ್ನ ಇವಾಗ್ಲು ನಮ್ಮ ಪ್ರಾಧ್ಯಾಪಕರು ನೆನಪಿಸುತ್ತಾರೆ.

ಹೀಗೆ ಹೇಳುತ್ತಾ ಹೋದರೆ ಈ ಲೇಖನಕ್ಕೆ ಅಂತಿಮವೆಂಬುದೆ ಇರುವುದಿಲ್ಲ. ಕೊನೆಯದಾಗಿ ಈ ನನ್ನ ಮುದ್ದು ಗೆಳತಿಯರ ಬಗ್ಗೆ ಹೇಳಬೇಕೆಂದರೆ, ನಮ್ಮ ಈ ಗೆಳೆತನ ದೇವರು ಬರೆದ ಸ್ನೇಹದ ದಾರ, ದಾರಕ್ಕೆ ಬೆಸೆದ ಭಾವನೆಗಳ ಹಾರ, ಭಾವನೆಗಳ ಜೊತೆಗೆ ಎಂದೆದೂ ಮುಗಿಯದ ಈ ಪ್ರೀತಿಯ ಪಯಣ.

ಪ್ರೀತಿ.ಟಿ.ಎಸ್
ಪತ್ರಿಕೋದ್ಯಮ ವಿದ್ಯಾರ್ಥಿನಿ
ದಾವಣಗೆರೆ ವಿಶ್ವವಿದ್ಯಾಲಯ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಭಾವ ಭೈರಾಗಿ

ಪ್ರಪಂಚದ ಸಾಮರಸ್ಯವೇ ಭಾವೈಕತೆಯ ಸಂಗಮ

Published

on

  • ಸುಮ ಜಿ. ಬತ್ತಿಕೊಪ್ಪ ಆನಂದಪುರಂ

ನಾದಿಕಾಲದಿಂದಲೂ ದೇಶಗಳ ನಡುವೆ ವ್ಯಾಪಾರ ವ್ಯವಹಾರ ವಿಷಯಗಳಲ್ಲಿ ಮತ್ತು ಸಾರ್ವಭೌಮತ್ವಕ್ಕಾಗಿ ಘರ್ಷಣೆಗಳು ನಡೆಯುತ್ತಲೇ ಇವೆ. ಇದೇ ವೇಳೆ ಪರಸ್ಪರ ಮಿತೃತ್ವದ ಮೂಲಕ ದೇಶಗಳನ್ನು ಬೆಸೆಯುವ ಕಾರ್ಯ ಸಹ ನಡೆಯುತ್ತಿವೆ. ದೇಶಗಳ ವಿಸ್ತರಣೆಗೆ ಅಪಾರ ಪ್ರಮಾಣದ ಸೈನಿಕ ಶಕ್ತಿಯನ್ನು ಕಳೆದುಕೊಂಡು ಕೊನೆಗೆ ಸೋತು ಸುಣ್ಣವಾಗಿ ಒಪ್ಪಂದಗಳ ಮೂಲಕ ಮಿತ್ರರಾಗಿರುವುದನ್ನು ಮತ್ತು ದೇಶ ದೇಶಗಳ ನಡುವೆ ಸಾಮರಸ್ಯವನ್ನ ಬೆಸೆದಿರುವುದನ್ನು ಇತಿಹಾಸದ ಪುಟಗಳಿಂದ ತಿಳಿಯಬಹುದಾಗಿದೆ.

ಸರ್ವಾಧಿಕಾರತ್ವ, ರಾಜಕೀಯ ಅಸ್ಥಿರತೆ, ಪ್ರತಿಷ್ಠೆ , ಸಂಪತ್ತಿನ ದಾಹ ಮದವೇರಿದಾಗಲೇ ಮಹಾ ಯುದ್ಧಗಳು ನಡೆದು ಅಪಾರ ಪ್ರಮಾಣದ ಮಾನವ ಹಾನಿ, ನಾಶನಷ್ಟ ಉಂಟಾಗಿರುವುದನ್ನು ಕಾಣಬಹುದು. ಇಂತಹ ಮನುಷ್ಯ ಕುಲದ ಘನ ಘೋರ ಘಟನೆಗಳು ಮರುಕಳಿಸದಂತೆ ಮಾಡಲು, ವೈವಿಧ್ಯತೆಗಳಿದ್ದರೂ, ಜನರ ಮನಸ್ಸುಗಳಲ್ಲಿ ಪರಸ್ಪರರ ಭಾವ, ವೇಷ, ಆಹಾರ ಮತ್ತು ಭೌಗೋಳಿಕ ಸಂಸ್ಕೃತಿ ಬಗ್ಗೆ ಪ್ರೀತಿ ಸಾಮರಸ್ಯವನ್ನು ತುಂಬುವುದೆ ನವೆಂಬರ್-29 ಅಂತರರಾಷ್ಟ್ರೀಯ ಸಾಮರಸ್ಯ ದಿನ ಮಹತ್ವವಾಗಿದೆ.

ಯೇಸು ಕ್ರಿಸ್ತ, ಮಹಮ್ಮದ ಪೈಗಂಬರ್ ಭಗವಾನ ಬುದ್ಧ ಬೇರೆ ಬೇರೆ ಭೌಗೋಳಿಕ ಹಿನ್ನಲೇ ಇದ್ದರೂ ಅವರು ವಿಶ್ವ ತುಂಬ ಹಂಚಿದ ಕರುಣೆ ಪ್ರೀತಿ ಮೈತ್ರಿ ಸಹೋದರತ್ವವನ್ನೂ ಇಂದು ಪ್ರಪಂಚದ ಪಸರಿಸಬೇಕಿದೆ. ಪ್ರಾಕೃತವಾಗಿ ಭಿನ್ನವಾಗಿದ್ದರು ಮನುಷ್ಯನ ಮನಸ್ಸು ಒಂದೆಯೇ ಅಗಿದೇ ಎಂಬುದು ಈ ಮಹಾನ್ ವ್ಯಕ್ತಿಗಳಿಂದ ತಿಳಿಯಬಹುದಾಗಿದೆ.
ಅಂತರಿಕವಾಗಿ ನಮ್ಮ ದೇಶದ ಒಳಗೂ ವಿವಿಧ ಮತ, ಧರ್ಮ ಜಾತಿ, ವಿಭಿನ್ನ ರೀತಿಯ ಭಾವ ಇದ್ದರೂ ಕಲೆ, ಸಾಹಿತ್ಯ, ಸಾಂಸ್ಕೃತಿಕ ಭಾವೈಕತೆಯೇ ನಮ್ಮ ಭಾರತ ದೇಶದ ಹಿರಿಮೆ.

ವಿಶಿಷ್ಠ ರಾಜಕೀಯ ಆರ್ಥಿಕ ಸಾಮಾಜಿಕ ಸಾಂಸ್ಕೃತಿಕವಾಗಿ ವಿವಿಧ ದೇಶ ವಿದೇಶಗಳ ನಡುವೆ ತನ್ನ ಏಕತೆಗೆ ದಕ್ಕೆಯಾಗದ ರೀತಿಯಲ್ಲಿ ಸಾಮರಸ್ಯವನ್ನ ಬೆಸೆಯುತ್ತಿದೆ. ಪ್ರಪಂಚದಲ್ಲಿಯೇ ಆನೇಕ ಧರ್ಮಗಳಿರುವ ಏಕೈಕ ದೇಶ ಭಾರತ.ಅನಾದಿಕಾಲದಿಂದಲೂ ಈ ಕಾಲದವರೆಗೂ ಬೌದ್ಧ, ಜೈನ , ಹಿಂದೂ, ಮುಸ್ಲಿಂ, ಕ್ರೈಸ್ತ, ಸಿಖ್ ಧರ್ಮಗಳ ಅದೆನೇ ಆಚಾರ ವಿಚಾರಗಳ ನಡುವೆ ಭಿನ್ನಭಿಪ್ರಾಯಗಳಿದ್ದರು ಪರಸ್ಪರ ಸಹೋದರರಂತೆ ಒಗ್ಗಟ್ಟಿನಿಂದ ಸ್ವತಂತ್ರವಾಗಿ ಬದುಕುತ್ತಿದ್ದಾರೆ.

ಭಾರತ ಸಂವಿಧಾನವು ಸಹ ನಮ್ಮ ದೇಶಕ್ಕೆ ಮತ್ತಷ್ಟು ಮೆರಗು ನೀಡಿದೆ. ಏಕೆಂದರೆ ದೇಶ ವಿದೇಶಿ ರಾಜರ ಆಕ್ರಮಣ ದಾಳಿ ಮತ್ತು ಬ್ರೀಟಿಷರ ದಾಸ್ಯದಲ್ಲಿದ್ದ ದೇಶ ಇಂದು ಸ್ವಾತಂತ್ರ್ಯ ಪಡೆದು ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಸಂವಿಧಾನ ರಚಿಸಿ ಸರ್ವರಿಗೂ ಸಮ ಪಾಲು ಸಮ ಬಾಳು ನೀಡಿ ಪ್ರತಿಯೊಬ್ಬ ಭಾರತಿಯ ನಾಗರಿಕರನ್ನು ಗೌರವಿಸಿದೆ. ಪ್ರತಿಯೊಂದು ಧರ್ಮ ಮತ ಜಾತಿ ಮತ್ತು ಭಾವಗಳಿಗೆ ಸಮಾನವಾಗಿ ಕಾನೂನುತ್ಮಾಕ ರಕ್ಷಣೆ ನೀಡಿ ಪ್ರಜ್ಞಾವಂತರನ್ನಾಗಿಸಿದೆ. ಯಾವುದೆ ಧರ್ಮಗಳ ಭಾವನಾತ್ಮಕ ಭಾವನೆಗಳಿಗೆ ಧಕ್ಕೆಯಾಗದಂತೆ ಧಾರ್ಮಿಕ ಸ್ವಾತಂತ್ರ್ಯ ನೀಡಿದೆ.

ಕೆಲವೇ ತಿಂಗಳ ಹಿಂದೆ ಭಾರತ ಮತ್ತು ಪಾಕಿಸ್ತಾನದ ನಡುವೆ ಉಂಟಾದ ಗಡಿ ಭಾಗದ ವಿಸ್ತಾರಣೆ ಅಕ್ಷರ ಸಹ ಯುದ್ಧ ಸ್ಥಿತಿಯನ್ನ ನಿರ್ಮಾಣವಾಗಿತ್ತು ಇಂತಹ ಸಂದರ್ಭದಲ್ಲಿ ಅಂತರಾಷ್ಟ್ರೀಯ ವಿಶ್ವ ಸಂಸ್ಥೆ ಮತ್ತು ದೇಶ ವಿದೇಶಗಳ ಮಾತುಕತೆಗಳಿಂದ ಭಾರತ ಪಾಕಿಸ್ತಾನದ ನಡುವೆ ಬಹುಬೇಕು ಸಾಮರಸ್ಯವನ್ನ ಬೆಸೆಯಲಾಯಿತು. ಇತ್ತಿಚಿಗೆ ಸುಪ್ರಿಂ ಕೋರ್ಟ್ ನೀಡಿದ ಐತಿಹಾಸಿಕ ಬಾಬರಿ ಮಸಿದಿ ಮತ್ತು ರಾಮ ಮಂದಿರ ತೀರ್ಪಿಗೆ ದೇಶ ಸ್ಪಂದಿಸಿದ ರೀತಿ ಭಾರತದ ಸಾಮರಸ್ಯಕ್ಕೆ ಸಾಕ್ಷಿಯಾಗಿದೆ. ಒಟ್ಟಾರೆಯಾಗಿ ಪರಸ್ಪರ ದೇಶ ವಿದೇಶಗಳ ನಡುವೆ ಗೌರವಯುತವಾಗಿ ಮೈತ್ರಿಯಿಂದ ಬಾಳಿ ಬದುಕಬೇಕಿದೆ ಮತ್ತು ಮುಂದಿನ ತಲೆಮಾರುಗಳಿಗೆ ಸ್ಪೂರ್ತಿ ಅಗಬೇಕಿದೆ.

ನವೆಂಬರ್ 29ರಂದು ಅಂತಾರಾಷ್ಟ್ರೀಯ ಸಾಮರಸ್ಯ ದಿನಾಚರಣೆ ಅಂಗವಾಗಿ ಲೇಖನ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading
Advertisement

Trending