Connect with us

ಭಾವ ಭೈರಾಗಿ

ಕಾಳಾರಾಮ ದೇವಾಲಯ ಪ್ರವೇಶ ಮತ್ತು ಕುವೆಂಪು ‘ಜಲಗಾರ’ ನಾಟಕ : 90 ವರ್ಷಾಚರಣೆಯ ಹೊತ್ತಿನಲ್ಲಿ

Published

on

  • ಡಾ.ವಡ್ಡಗೆರೆ ನಾಗರಾಜಯ್ಯ

ನಾಸಿಕ್ ನಲ್ಲಿರುವ ಕಾಳಾರಾಮ ದೇವಸ್ಥಾನಕ್ಕೆ ಅಸ್ಪೃಶ್ಯರಿಗೆ ಪ್ರವೇಶ ದೊರಕಿಸಿಕೊಡುವ ಮೂಲಕ ಸಾಮಾಜಿಕ- ಧಾರ್ಮಿಕ ಸಮಾನತೆಗಾಗಿ ಆಗ್ರಹಿಸಿ ಭಾರತದಲ್ಲಿ ಡಾ,ಬಿ.ಆರ್. ಅಂಬೇಡ್ಕರ್ ಅವರು 1930 ರಲ್ಲಿ ನಡೆಸಿರುವ ಹೋರಾಟ ಇಂದಿಗೂ ಒಂದು ಮೈಲಿಗಲ್ಲು. ಈ ಚಳವಳಿಗೆ ಮಾರ್ಚ್ 2020 ಕ್ಕೆ ಬರೋಬ್ಬರಿ 90 ವರ್ಷಗಳಾಗುತ್ತವೆ.

ಇದೇ 1930 ರ ಸಮಯದಲ್ಲಿ ಕಾಕತಾಳೀಯ ಎಂಬಂತೆ ಕರ್ನಾಟಕದಲ್ಲಿ ವಿಶ್ವಮಾನವ ಕವಿ ಕುವೆಂಪು ಅವರು ತನ್ನ 24 ನೇ ವಯಸ್ಸಿನಲ್ಲಿ ರಚಿಸಿರುವ “ಜಲಗಾರ” ನಾಟಕದ ಪ್ರಕಟಣೆಗೂ 90 ವರ್ಷಗಳಾಗುತ್ತಿವೆ. ಕುವೆಂಪು ಅವರು ‘ಜಲಗಾರ’ ನಾಟಕದಲ್ಲಿ ಶಿವನನ್ನು ‘ಜಗದ ಜಲಗಾರ’ ಮಾಡುವುದರ ಮೂಲಕ ನಮಗೆ ‘ಅಸ್ಪೃಶ್ಯ ಶಿವ’ನ ದರ್ಶನ ಮಾಡಿಸಿದ್ದಾರೆ.

ಪುರೋಹಿತಶಾಹಿಯು ಅಸ್ಪೃಶ್ಯತೆ ಆಚರಣೆಯನ್ನು ಧಾರ್ಮಿಕ ಮತ್ತು ಸಾಮಾಜಿಕ ಹಕ್ಕು ನಿಷೇಧಗಳಿಂದ ಊರ್ಜಿತದಲ್ಲಿಟ್ಟಿರುತ್ತದೆ. ಇಂತಹ ಜಾತಿ ಅಹಂಕಾರವನ್ನು ಭಂಜಿಸುವ ಕೆಲಸವನ್ನು ಸಾಮಾಜಿಕ ಚಳವಳಿಗಾರನಾಗಿ ಚಳವಳಿಯ ಮೂಲಕ ಬಾಬಾ ಸಾಹೇಬರೂ ಮತ್ತು ಒಬ್ಬ ಯುವ ಬಂಡುಕೋರ ಕವಿಯಾಗಿ ‘ಜಲಗಾರ’ ನಾಟಕದ ಮೂಲಕ ಕುವೆಂಪು ಅವರೂ ಮಾಡಿ ತೋರಿಸಿದ್ದಾರೆ.

ಆ ಕಾಲಕ್ಕೆ ಗೊಡ್ಡು ಆಚರಣೆಗಳ ಪಾಲಕರಾಗಿದ್ದ ಪುರೋಹಿತಶಾಹಿಗಳಿಗೆ ಈ ಎರಡೂ ಘಟನೆಗಳು ಯಾವ ಪರಿ ತಾಕಿರಬಹುದೆಂದು ನಾನೀಗ ಕಲ್ಪಿಸಿಕೊಳ್ಳುತ್ತಿದ್ದೇನೆ. ವಿಶಾಲ ಭಾರತ ರಾಷ್ಟ್ರೀಯ ಮಟ್ಟದಲ್ಲಿ ಅಂಬೇಡ್ಕರ್ ರವರ ಸಾಮಾಜಿಕ ಚಳವಳಿಯ ದಂಗೆ ಹಾಗೂ ವಿಶಾಲ ಮೈಸೂರು ರಾಜ್ಯ ಮಟ್ಟದಲ್ಲಿ ಕುವೆಂಪು ಅವರ ಕ್ರಾಂತಿಕಾರಿ ಸಾಹಿತ್ಯ ದಂಗೆ ಏಕಕಾಲದಲ್ಲಿ ನಡೆದಿರುವುದು ಕಾಕತಾಳೀಯವೂ ವಿಸ್ಮಯಕಾರಕ ಸಂಗತಿಯೂ ಆಗಿದೆ.

“ಕಸ ಗುಡಿಸುವ ಜಲಗಾರನಿಗೆ ‘ಪೊರಕೆ ಆರತಿ’, ಗುಡಿಸುವುದು ದೇವರ ಪೂಜೆ, ‘ನನ್ನ ಶಿವ ಕೊಳೆತ ಕಸದೊಳಿಹನು, ಕಪ್ಪುರದೊಳಗಿಲ್ಲ’ ಎಂಬುದು, ಜಲಗಾರನು ತಾನು ಕಂಡುಕೊಂಡ ಶಿವದರ್ಶನ. ಶಿವನು ಜಗದ ಜಲಗಾರನಾಗಿ ಬಂದು ”ಬೀದಿಗುಡಿಸುವ ಬಡವನೆದೆಯಲ್ಲಿ ನಾನಿರುವೆ ಉಳುತಿರುವ ಒಕ್ಕಲಿಗನೆದೆಯಲ್ಲಿ ನಾನಿರುವೆ ಎಲ್ಲಿ ಹೊಲೆಯನು ತನ್ನ ಕಾರ್ಯದಲ್ಲಿ ತೊಡಗಿಹನೋ ಅಲ್ಲಿ ನಾನವನ ಪಕ್ಕದೊಳಿರುವೆ. ಕುಂಟರನು ಕುರುಡರನು ದೀನರನು ಅನಾಥರನು ಕೈ ಹಿಡಿದು ಪೊರೆಯುತಿಹನೆಡೆಯಿರುವೆ,” ಎಂದು ಹೇಳುವಾಗ ಕುವೆಂಪು ಅವರು, ಶರಣ ಮಾದಾರ ಧೂಳಯ್ಯನು ಅಟ್ಟೆಯ ಚುಚ್ಚುವ ಉಳಿಮೊನೆಯಲ್ಲಿ ಶಿವದರ್ಶನವನ್ನು ಕಂಡು ಕಾಯಕದ ನಡುವೆ ಸುಳಿದು ಅಡ್ಡಿಪಡಿಸಬೇಡವೆಂದು ಜಬರಿಸಿದ ಕಾಯಕಜೀವಿಯ ‘ಸಾಮಾಜಿಕ ಅಧ್ಯಾತ್ಮ’ದ ದರ್ಶನಾತ್ಮಕತೆಯನ್ನೇ ಜಲಗಾರನಲ್ಲಿ ತೋರಿಸಿಕೊಟ್ಟಿದ್ದಾರೆ.

ಅಂಬೇಡ್ಕರ್ ಮತ್ತು ಕುವೆಂಪು ಈ ಇಬ್ಬರನ್ನೂ ಹಿಂದೂಧರ್ಮ ವಿರೋಧಿಗಳು ಅರ್ಥಾತ್ ಬ್ರಾಹ್ಮಣಧರ್ಮ ವಿರೋಧಿಗಳು ಎಂದು ಕರೆದು ಹಣೆಪಟ್ಟಿ ಅಂಟಿಸುವ ಕೆಲಸವೂ ಕೆಲವು ಮನುವಾದಿ ಮನಸ್ಸುಗಳಿಂದ ನಡೆದದ್ದುಂಟು. ಅಂಬೇಡ್ಕರ್ ಅವರು ಇಂತಹ ಸಾಮಾಜಿಕ ಭೇದನ್ಯಾಯ ಸೃಷ್ಟಿಯ ರಚನೆಗಳಾದ ಗುಡಿಗೋಪುರ ಮಂದಿರ ಮಸೀದಿಗಳಿಗೆ ಅಸ್ಪೃಶ್ಯರು ಹೋಗಬಾರದೆಂದು, ಬದಲಾಗಿ ಅವರು ದೇಶವನ್ನು ಆಳುವ ರಾಜಕೀಯ ಚುಕ್ಕಾಣಿ ಹಿಡಿಯಬೇಕೆಂದು ಮುಂದಿನ ದಿನಗಳಲ್ಲಿ ಕರೆ ನೀಡುತ್ತಾರೆ. ಕುವೆಂಪು ಅವರೂ ಸಹ ‘ನೂರಾರು ದೇವತೆಗಳನ್ನು ನೂಕಾಚೆ ದೂರ’ ‘ಗುಡಿ ಚರ್ಚು ಮಂದಿರ ಮಸೀದಿ ಬಿಟ್ಟು ಹೊರಬನ್ನಿ’ ಎಂದು ಕರೆ ನೀಡುತ್ತಾರೆ.

ಕುವೆಂಪು ಅವರ “ಜಲಗಾರ” ನಾಟಕ ಪ್ರಕಟಣೆಗೆ ಮತ್ತು ಅಂಬೇಡ್ಕರ್ ರೂಪಿಸಿದ ಕಾಳಾರಾಮ ದೇವಾಲಯ ಪ್ರವೇಶ ಚಳವಳಿಗೆ 90 ವರ್ಷಗಳು ತುಂಬುತ್ತಿರುವ ಈ ಹೊತ್ತಿನಲ್ಲಿ, ಮೊನ್ನೆ 02-12-2019 ರ ಸೋಮವಾರದಂದು, ದಕ್ಷಿಣ ಕನ್ನಡ ಜಿಲ್ಲೆಯ ಮೂಡಬಿದರೆ ತಾಲ್ಲೂಕಿನ ಕಡಂದಲೆ ಗ್ರಾಮದ ಸುಬ್ರಹ್ಮಣ್ಯ ದೇವಾಲಯದಲ್ಲಿ, ದಲಿತ ಮಹಿಳೆ ಎನ್ನುವ ಕಾರಣಕ್ಕೆ ಕರ್ತವ್ಯನಿರತ ದಲಿತ ಮಹಿಳಾ ಪೊಲೀಸ್ ಪೇದೆಯನ್ನು, ಸುಬ್ರಹ್ಮಣ್ಯ ದೇವಸ್ಥಾನದಲ್ಲಿನ ಬ್ರಾಹ್ಮಣ ಅರ್ಚಕರು ದೇವಸ್ಥಾನದಿಂದ ಹೊರಕ್ಕೆ ಕಳುಹಿಸಿದ ಅಮಾನವೀಯ ಘಟನೆ ನಡೆದಿದೆ.

ಇದನ್ನು ಟೀಕಿಸಿದವರು ಕುವೆಂಪು ಮತ್ತು ಅಂಬೇಡ್ಕರ್ ಅವರಂತೆ ಹಿಂದೂಧರ್ಮದ ವಿರೋಧಿಗಳೆಂಬ ಹಣೆಪಟ್ಟಿಯನ್ನು ಕಟ್ಟಿಕೊಳ್ಳಬೇಕಾಗುತ್ತದೆ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

ಭಾವ ಭೈರಾಗಿ

ಕವಿತೆ | ಇತಿ‌ ನಿನ್ನ ಬೆಂಗಳೂರು

Published

on

ಸೂರಿ
  • ದುನಿಯಾ ಸೂರಿ, ಚಿತ್ರ ನಿರ್ದೇಶಕ

ರಕಾರಿ ಗಾಡಿಯ ಮೇಲೆ
6 1/2 ವರ್ಷದ ಕೂಸು, ಬೆಳಗಿನ ಜಾವ
ಕತ್ತಲೆಯನ್ನು ನುಂಗುವಾಗ,
ಎಷ್ಟು ಮುಷ್ಟಿ ಬಿಗಿ ಹಿಡಿದರೂ ಮೈಯೆಲ್ಲಾ ಚಳಿ.
ಬೆಳಗಿನ ಮೂರುವರೆ ಸಮಯ
ಎದ್ದು ಕೂತಾಗ, ಕಿವಿಗೆ ನುಗ್ಗಿದ ಗಾಳಿಗೆ
ದೂರದಲ್ಲಿ ಬರುವ ದೀಪಗಳು ಮಬ್ಬು ಮಬ್ಬು
ಇದು ಕನಸೋ ಎಚ್ಚರವೋ ಗೊತ್ತಿಲ್ಲ.

ಅಪ್ಪಗಾಡಿ ತಳ್ಳುವಾಗ ನಾನು ಪ್ರಯತ್ನ ಪಡದೇ
ಮುನ್ನಡೆದಂತೆ ಏನೋ ಹಗುರ
ಇವತ್ತಿಗೂ ಆ ಅನುಭವಕ್ಕೆ ಹೆಸರಿಟ್ಟು
ಹೀಗೆ ಎಂದು ವಿವರಿಸಲು ಇನ್ನೊಂದು
ಅದೇ ರೀತಿಯ ಅನುಭವ ಇಲ್ಲ

ಹಾಗೇ ಈ ನಗರವನ್ನು ನನ್ನ ದೃಷ್ಟಿಕೋನದಿಂದ
ನೋಡುತ್ತಿದ್ದೇನೆ… ನಿರಂತರವಾಗಿ
ಅದೇ ಅದೇ ರಸ್ತೆಗಳು ಸೋತು ಕೂತು
ಗೆದ್ದು ಕಾರಿನಲ್ಲಿ ಅಲೆಯುವಾಗ
ಮತ್ತೆ ಮತ್ತೆ ನೆನಪಾಗುವ ನನ್ನೊಳಗಿನ
ನೆನಪುಗಳು, ಆ ನೆನಪುಗಳನ್ನೇ
ಮತ್ತೆ ಮತ್ತೆ ಸಿನೆಮಾ ಮಾಡುತ್ತೇನೆ
ಇದು ಮಾತ್ರ ಕ್ಷಣ ಕ್ಷಣದ ಮಧ್ಯೆ ಇರುವ
ಖಾಲಿತನ, ಇನ್ನೊಂದು ಶುರುವಾಗುವ
ಮೊದಲು ಇದ್ದ ಸೈಲೆನ್ಸ್,

ನಗರ ಎಂದರೆ ನನ್ನ ದೇಹ ಎಚ್ಚರವಾಗಿ
ಆಕಾಶ ನೋಡಿ ಭೂಮಿಯ ಮೇಲೆ ಕಾಲಿಟ್ಟು
ಸಂಜೆ ಕತ್ತಲಿಗೆ ಬೆಂಕಿ ಬೆಳಕಾಗಿ ಮಲಗಿ,
ಮತ್ತೆ ಎಚ್ಚರ ಬೇರೊಂದು ನಗರ
ನೆನಪುಗಳು ಪೋಟೋ ರೀತಿ
ವಿಡಿಯೋ ರೀತಿ ನೆನಪಾಗುವುದು.

ಅಲ್ಲೆಲ್ಲಾ ಭೂಮಿ-ಭಾನು ಇದ್ದಲ್ಲೆಲ್ಲಾನಗರ-ರಸ್ತೆ.
ನಮ್ಮ ಯೋಚನೆಯಲ್ಲಿ ಬರುವ ಎಲ್ಲಾ
ನೆನಪಿನಲ್ಲೂ ನಗರ ರಸ್ತೆ, ಊರು,
ನಿನಗೊಂದು ಹೆಸರಿಟ್ಟರೆ ಅದು ನೀನು ಬೆಂಗಳೂರು.
ನೀನು ನಿನ್ನ ನಗು ಇರೋ ಕಡೆ,
ಸಾವು ಬರಲ್ಲ ಅಕಸ್ಮಾತ್ ಸಾವು
ಬಂದರೂ, ಒಂದು ಕ್ಷಣ ನಿನ್ನ ನೋಡುತಾ…
ಬಂದ ಕೆಲಸ ಮರೆಯುವಂತೆ,
ಸದಾ ನಗು ಜೀವಂತವಾಗಿ ರಾಕ್ಷಸಿ.
ಸದಾ ನಿರಂತರವಾಗಿ,

ಇತಿ ನಿನ್ನ ಬೆಂಗಳೂರು
-ಸೂರಿ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಭಾವ ಭೈರಾಗಿ

ಕವಿತೆ | ಮಾಯಾಲೋಕ

Published

on

  • ವಿಜಯ್ ನವಿಲೇಹಾಳ್

ಮಾಯಾಲೋಕದಲ್ಲಿ
ಮನಸಿಗೆ ಬಣ್ಣ ಹಚ್ಚಿ
ನಟಿಸುವವರು
ನಂಬಿದವರ ಮನೆಗೆ
ಬೆಂಕಿಹಚ್ಚಿ ತಮ್ಮ ಮನೆಯಲ್ಲಿ
ಅನ್ನ ಬೇಯಿಸಿಕೊಂಡು
ಆರಾಮಾಗಿ ಉಂಡು ಮಲಗುತ್ತಿದ್ದಾರೆ.

ಮುಖಕ್ಕೆ ಬಣ್ಣ ಹಚ್ಚಿ‌ ನಟಿಸುವವರು
ತುತ್ತು ಅನ್ನಕ್ಕಾಗಿ;
ಕೊಂಚ ಮಲಗುವ ಜಾಗಕ್ಕಾಗಿ
ಬೀದಿ‌ಬೀದಿ ಸುತ್ತುತ್ತಿದ್ದಾರೆ.

ಇಲ್ಲಿ‌ಹಚ್ಚಿ‌ಕೊಳ್ಳುವ ಬಣ್ಣಕ್ಕಿಂತ
ಬಣ್ಣ ಹಚ್ಚಿಕೊಳ್ಳುವ ಮನುಷ್ಯರು
ತುಂಬಾ ವಿಭಿನ್ನವಾಗಿ ಕಾಣಿಸುತ್ತಾರೆ.

ಬಣ್ಣಗಳಲಿ ಬಂಧಿಯಾಗಿರುವ
ಮನಸು ಮುಖಗಳ ಭಾವನೆಗಳಿಗೆ
ಸ್ಪಂದಿಸುವ ನಾವುಗಳು ಬದಲಾಗಬೇಕು
ಆಗ ತಾನೆ ಈ ಸಮಾಜ ಬದಲಾಗಲು ಸಾಧ್ಯ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಭಾವ ಭೈರಾಗಿ

ಕನಸಿನ ಈಡಿಯಟ್‍ಗೊಂದು ಪ್ರೇಮ ಪತ್ರ

Published

on

ಪ್ರೇಮಿಗಳ ದಿನಾಚರಣೆಗೆ ಬೆರಳೆಣಿಕೆಯಷ್ಟು ದಿನಗಳು ಉಳಿದಿವೆ ಅಷ್ಟೇ.. ಫೆಬ್ರವರಿ ಬಂತೆಂದರೆ ಸಾಕು ಪ್ರೀತಿ ಮಾಡೋ ಪ್ರತಿ ಒಬ್ಬ ಯುವಕ ಯುವತಿಯರಿಗಂತು ಹಬ್ಬವೋ ಹಬ್ಬ. ಇವಾಗ ಆಗಲೇ ಪ್ರೀತಿ ಅಲ್ಲಿ ಮುಳುಗಿದವರಿಗೆ ಅಂದಿನ ದಿನ ಎಲ್ಲಿಗೆ ಹೋಗಬೇಕು ಅಂತ ಪ್ಲ್ಯಾನ್ ಮಾಡ್ತಿದ್ರೆ, ಪ್ರೀತಿನಾ ಕಳೆದುಕೊಂಡವರು ದುಃಖದಲ್ಲಿರುತ್ತಾರೆ, ಅದರಲ್ಲಿ ಕೆಲವರು ಅವರನ್ನು ಸಮಾಧಾನ ಮಾಡುವಲ್ಲಿ ಹರಸಾಹಸ ಮಾಡುತ್ತಿರುತ್ತಾರೆ. ಇನ್ನೂ ಈ ಪ್ರೀತಿಯೆಂಬ ಸಮುದ್ರಕ್ಕೆ ಈಜದವರು ಬೆಟ್ಟದಷ್ಟು ಕನಸುಗಳನ್ನು ಹೊತ್ತು ನಿಮಗಾಗಿ ಕಾಯ್ತಿರುತ್ತಾರೆ. ಒಟ್ಟಾರೆಯಾಗಿ ಈ ಜಗತ್ತಲ್ಲಿ ಪ್ರೀತಿ ಮಾಡದ ಮನುಜನೇ ಇಲ್ಲ ಅಲ್ವಾ?

ನಾನು ಈ ಮೇಲೆ ಹೇಳಿದ ಕೆಟಗರಿಯಲ್ಲಿ ಕೋಟಿ ಕೋಟಿ ಕನಸುಗಳನ್ನೆತ್ತಿಕೊಂಡು ಮುದ್ದಾದ ಜೀವಕ್ಕಾಗಿ ಕಾಯುತ್ತಿರುವವಳು. ಈ ಯೌವನ ಎಂಬುದು ಬಂದಾಕ್ಷಣ ಪ್ರತೀ ಹುಡುಗಿಯು ಸಹ ತನ್ನ ಜೀವನದಲ್ಲಿ ಬರೋ ತನ್ನ ಹುಡುಗನ ಬಗೆಗೆ ಬೆಟ್ಟದಷ್ಟು ಆಸೆ, ಕನಸುಗಳನ್ನು ಹೊತ್ತು ಆತ ಹೇಗಿರಬೇಕು? ಅವನಲ್ಲಿ ಯಾವ ಗುಣಗಳಿರಬೇಕು? ಸದಾ ನನ್ನನ್ನ ಮುದ್ದಿಸುತ್ತಾನ? ನನ್ನ ತಂದೆ ತಾಯಿಯ ನೆನಪುಗಳನ್ನ ಮರೆಸಿ ಮಗುವಿನ ಹಾಗೆ ನೋಡ್ಕೊತ್ತಾನ? ಹೀಗೆ ಸಾವಿರಾರು ಪ್ರಶ್ನೆಗಳನ್ನ ಹಾಕೊಂಡು ತಾವು ನೋಡೋ ಮೂವೀಗಳಲ್ಲಿ ಬರೋ ಪಾತ್ರಧಾರಿಗಳಲ್ಲಿ ತನ್ನ ರಾಜಕುಮಾರನ ಬಗೆಗಿನ ಕನಸುಗಳನ್ನ ಕಾಣ್ತಿರುತ್ತಾರೆ. ಹೀಗೆಯೇ ನಾನು ಕೂಡ ನನ್ನವನ ಕುರಿತಾಗಿ ಸಾವಿರಾರು ಆಸೆಗಳನ್ನು ಹೊತ್ತು ಕಾಯುತ್ತಲ್ಲಿದ್ದೇನೆ. ಹೇ ಮುದ್ದು ನೀನೆಲ್ಲಿದ್ದಿಯೋ ನನಗಂತು ಗೊತ್ತಿಲ್ಲ…. ಆದ್ರೆ ನಿನ್ನ ನೆನಪಲ್ಲೇ ಹೀಗೊಂದು ಪತ್ರ ನಿನಗಾಗಿ ಕಣೋ….

ಕನಸಿನ ಈಡಿಯಟ್‍ಗೊಂದು ಪತ್ರ,

ಹೇ ಪ್ರಿಯಕರನೆ.. ನೀನು ನನ್ನ ಬೆನ್ನುಡಿಯೂ ಅಲ್ಲ, ನನ್ನ ಮುನ್ನುಡಿಯೂ ಅಲ್ಲ. ನನ್ನ ಕವನದ ಪ್ರತಿ ಸಾಲು ನಿನದೆ ನೆನಪು ಕಣೋ. ನೀನು ನೋಡೋದಕ್ಕೆ ಹೇಗಿದ್ದಿಯಾ? ನಿನ್ನ ಮುಂದೆ ನನ್ನನ್ನ ಜರೀತಾರ? ನನ್ನ ಹಾಗೆ ನೀನು ನನಗಾಗಿ ಕಾಯ್ತಿದ್ದಿಯಾ? ಹೀಗೆ ನಿನ್ನ ಬಗೆಗೆ ನಾನು ಯೋಚಿಸುವಾಗಲೆಲ್ಲಾ ನನಗೆ ನೆನಪಾಗುವುದು ಪ್ರೀತ್ಸೆ ಅಂತ ಪ್ರಾಣ ತಿನ್ನೋ ಪ್ರೇಮಿ ನೀನು ಯರು? ಅನ್ನೋ ಹಾಡೆ ಕಣೋ.

ಈ ಮೂವೀ ಸಾಂಗ್‍ಗಳು ಕುಡಾ ನಮ್ಮನ್ನ ಎಂತೆಂತಹ ಲೋಕಕ್ಕೊಮ್ಮೆ ಕರೆದೋಗಿ ಬಿಡುತ್ತದ್ದಲ್ಲ!ಲೋ ಅಪ್ಪು.. ನಿನಗಾಗಿ ನಾನು ಅದೆಷ್ಟು ಕಾಯ್ತಿದ್ದಿನಿ ಅಂದ್ರೆ, ಸುಮಾರು ಜನ ಬಂದು ಚಮಕ್ ಕೊಟ್ಟು ಚಲೋ ಅಂದ್ರು ಅಲ್ಲಾಡ್ದೆ ಕಲ್ಲುಗುಂಡ್ ಇದ್ದಂಗೆ ಇದ್ದ ಗುಂಡಿಗೆ ಕಣೋ ನನ್ದು. ಅಂತ ಗುಂಡ್ಗಿಗೆನು ಗೊತ್ತಾಗ್ದಂಗೆ ಸೋಲಿಸೋ ನೀನು ಎಲ್ಲೋ ಇದೀಯಾ? ಈ ಲವ್ ಅನ್ನೋ ಮಾಯಲೋಕದಲ್ಲಿ ಅದೆಷ್ಟೋ ಮಾಟಗಾರರು ಆತ್ಮಬಂಧನ ಮಾಡಿದ್ರೆ, ನೀನೊಂತರ ವಿಭಿನ್ನವಾಗಿ ನನ್ನ ಊeಚಿಡಿಣ ನೇ ದಿಗ್ಬಂಧನ ಮಾಡೋ ಚೆನ್ನಿಗರಾಯ ಯಾರೋ ನೀನು..?

ಕನಸುಗಳ ತುಂಬೆಲ್ಲಾ ಕಾಡೋ ಪೆದ್ದು ಜೀವ ನೀನು. ಕಮಲದ ಹಾಗಿರೋ ಕಣ್ಣು, ಮಿಂಚುಳ್ಳಿ ತರ ಇರುವ ನಿನ್ನ ರೆಪ್ಪೆ, ಮುಂಗುರುಳು ದುಂಬಿಯ ಹಾಗೇ, ಕೆನ್ನೆ ತಾವರೆಯ ಎಲೆಯ ಹಾಗೇ ಇದಿಯೋ ಇಲ್ವೋ ಗೊತ್ತಿಲ್ಲ. ಆದ್ರೆ ನಿನ್ನ ನೆನಪಾದಾಗಲೆಲ್ಲಾ ನನ್ನ ಬಳಿ ಇರುವ ಆ ಬೇಬಿ ಡಾಲ್‍ನೊಮ್ಮೆ ಮುದ್ದಿಸುವೇ, ಆ ಬೇಬಿ ಡಾಲ್ ತರ ಖಂಡಿತ ಇರ್ತಿಯಾ ಅಲ್ವಾ?
ಕಾಯುತ್ತಲಿರುವೆ ನಿನಗಾಗಿ.. ನೀ ಬರುವೆಯಾ ನನಗಾಗಿ…
ಇಂತಿ ನಿನ್ನ ಬರುವಿಕೆಯನ್ನ ಎದುರುನೋಡುತ್ತಿರುವ ನಿನ್ನ ಮನದರಸಿ…

ಪ್ರೀತಿ.ಟಿ.ಎಸ್.
ಪತ್ರಿಕೋದ್ಯಮ ವಿಭಾಗ
ದಾವಣಗೆರೆ ವಿಶ್ವವಿದ್ಯಾಲಯ
ಮೊ.ನಂ: 8310521904

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

Trending