Connect with us

ಬಹಿರಂಗ

‘ಮೀಸಲಾತಿಯನ್ನು ಹತ್ತು ವರ್ಷಕ್ಕೆ ಮಾತ್ರ ನೀಡಲಾಗಿತ್ತು, ನಂತರ ಪ್ರತಿ ಹತ್ತು ವರ್ಷಕ್ಕೆ ವಿಸ್ತರಿಸಲಾಗುತ್ತಿದೆ’ ಎಂಬುದು ಸತ್ಯವಲ್ಲ..!

Published

on

“ಮೀಸಲಾತಿಯನ್ನು ಹತ್ತು ವರ್ಷಕ್ಕೆ ಮಾತ್ರ ನೀಡಲಾಗಿತ್ತು, ನಂತರ ಪ್ರತಿ ಹತ್ತು ವರ್ಷಕ್ಕೆ ವಿಸ್ತರಿಸಲಾಗುತ್ತಿದೆ’ ಎಂಬುದು ಸತ್ಯವಲ್ಲ”.‌ ಕೆಲವು ಮೂರ್ಖರು ಈ ಮಾತನ್ನು ಪದೇ ಪದೇ ಹೇಳಿ ನಿಜಗೊಳಿಸಲು ಪ್ರಯತ್ನ ಮಾಡುತ್ತಿದ್ದಾರೆ.

ಸಂವಿಧಾನದ 334 ನೇ ವಿಧಿಯು ಲೋಕಸಭೆ ಮತ್ತು ಸಂಸತ್ತುಗಳಲ್ಲಿ ಮೀಸಲಾತಿ ಪರಿಶಿಷ್ಟರಿಗೆ ಮತ್ತು ಆಂಗ್ಲೋ ಇಂಡಿಯನ್ನರಿಗೆ ಮೀಸಲು ನೀಡುವ ಅವಧಿಯ ಕುರಿತು ಹೇಳುತ್ತದೆ. ಆರಂಭದಲ್ಲಿ ಇದನ್ನು (ಈ ಮೀಸಲಾತಿ ಮಾತ್ರ) ಹತ್ತು ವರ್ಷಗಳ ಎಂದು ನಿಗದಿ ಮಾಡಿದ್ದರೂ ಇದು ಸರಿಯಾದ ಕ್ರಮವಲ್ಲ ಎಂದು ಬಹುಬೇಗನೇ ಅರ್ಥವಾಯಿತು. ಒಂದು ವೇಳೆ ಹಾಗೆ ಮಾಡಿದರೆ ಪರಿಶಿಷ್ಟರು ಸಂಸತ್ತು, ಅಸೆಂಬ್ಲಿಗಳಲ್ಲಿ ಶಾಶ್ವತವಾಗಿ ಸ್ಥಾನ ಕಳೆದುಕೊಳ್ಳುವ ವಾಸ್ತವ ಅರಿವಾಯಿತು.

ಹೀಗಾಗಿ ನಂತರದಲ್ಲಿ ಅವಧಿಯನ್ನು ತಿದ್ದುಪಡಿಯ ಮೂಲಕ ವಿಸ್ತರಿಸಲಾಗಿದ್ದು 2000 ನೇ ಇಸವಿಯಲ್ಲಿ ಮಾಡಿದ 79ನೇ ತಿದ್ದುಪಡಿಯಲ್ಲಿ ಇದನ್ನು 50 ವರ್ಷಗಳಿಗೆ ವಿಸ್ತರಿಸಲಾಗಿದೆ (2050ರ ವರೆಗೆ).
ಅಂಬೇಡ್ಕರ್ ಅವರು ಸಂಸತ್ತು, ಅಸೆಂಬ್ಲಿಗಳಲ್ಲಿ ದಲಿತರು ಸೂಕ್ತ ಪ್ರಾತಿನಿಧ್ಯ ಪಡೆಯಲಾರರು ಎಂಬ ಕಾರಣದಿಂದಲೇ ಪ್ರತ್ಯೇಕ ಮತಗಟ್ಟೆಯ ಬೇಡಿಕೆ ಇಟ್ಟದ್ದರು. ಆದರೆ ಇದರಿಂದ ಹಿಂದೂ ಧರ್ಮ ಒಡೆದು ಹೋಗುತ್ತದೆ ಎಂದು ಭಾವಿಸಿದ ಗಾಂಧೀಜಿ ಅದನ್ನು ತಿರಸ್ಕರಿಸಿ ಉಪವಾಸ ಕುಳಿತರು. ಅಂತಿಮವಾಗಿ ಇಬ್ಬರ ನಡುವೆ ಒಂದು ರಾಜಿ ಒಪ್ಪಂದ (ಪೂನಾ ಒಪ್ಪಂದ) ಆಗಿದ್ದು ಇತಿಹಾಸ. ಅಂಬೇಡ್ಕರ್ ಅವರ ಅಂದಿನ ಬೇಡಿಕೆ ಇಂದಿಗೂ ಪ್ರಸ್ತುತ ಎಂಬ ಚರ್ಚೆಯೂ ಇದ್ದು ಇಂದು ಸಂಸತ್ತು ಅಸೆಂಬ್ಲಿಗಳಲ್ಲಿ ಕಾಣುತ್ತಿರುವ ದಲಿತ ಜನಪ್ರತಿನಿಧಿಗಳ ನಡವಳಿಕೆ ನೋಡಿದರೆ ಅಥವಾ ಬಹುಸಂಖ್ಯಾತ ಸಮುದಾಯಗಳಿಗೆ ಅವರು ತಲೆಬಾಗಿಯೇ ನಡೆಯುವ ಸ್ಥಿತಿ ನೋಡಿದಾಗಲೂ ‘ಪ್ರತ್ಯೇಕ ಮತಗಟ್ಟೆ’ ಬೇಡಿಕೆ ಅಗತ್ಯ ಎನಿಸುತ್ತದೆ.

ಈಗ ಮೂಲ ವಿಷಯಕ್ಕೆ ಬರುವುದಾದರೆ, ಈ ಅಸಂಬದ್ಧವಾದ ‘ಹತ್ತು ವರ್ಷಗಳ ಕಾಲಮಿತಿ’ ಕೇವಲ ರಾಜಕೀಯ ಮೀಸಲಾತಿ ವಿಷಯದಲ್ಲಿ ಹಾಕಿದ್ದಾಗಿತ್ತು. ಆದರೆ ಕೆಲವು ಅತಿ ಬುದ್ಧಿವಂತರು ಮೀಸಲಾತಿ ವಿಷಯ ಚರ್ಚೆಗೆ ಬಂದಾಗಲೆಲ್ಲಾ ‘ಅಂಬೇಡ್ಕರ್ ಮೀಸಲಾತಿ ಹತ್ತು ವರ್ಷ ಸಾಕು ಎಂದಿದ್ದರು’ ಎಂದ ಹುಯಿಲಿಡುತ್ತಾರೆ. ಅರೆಬರೆ ತಿಳುವಳಿಕೆ ಇದ್ದವರು 334 ನೇ ವಿಧಿಯನ್ನೂ ಹೇಳುತ್ತಾರೆ. ಆದರೆ ಬೇಕೆಂದೇ ಅದರ ವಾಸ್ತವ ಮರೆಮಾಚುತ್ತಾರೆ.

ವಾಸ್ತವವಾಗಿ ಅಂಬೇಡ್ಕರ್ ಆಗಲೀ, ಸಂವಿಧಾನವಾಗಲೀ ಉದ್ಯೋಗ ಮತ್ತು ಶಿಕ್ಷಣಗಳ ಮೀಸಲಾತಿಗೆ ಎಲ್ಲೂ ಕಾಲಮಿತಿ ನಿಗದಿಪಡಿಸಿಲ್ಲ. ಮೀಸಲಾತಿ ಒಂದು ಪ್ರಾತಿನಿಧ್ಯ ವ್ಯವಸ್ಥೆ ಆಗಿರುವುದರಿಂದ ಎಲ್ಲಾ ಕ್ಷೇತ್ರಗಳಲ್ಲಿ ಎಲ್ಲಾ ಸಾಮಾಜಿಕ ಸ್ತರಗಳ ಪ್ರಾತಿನಿಧ್ಯ ಖಾಯಮ್ಮಾಗಿಯೇ ಇರಬೇಕಾಗುತ್ತದೆ. ಯಾವುದಾದರೂ ಜಾತಿ ಸಮಗ್ರ ಪ್ರಾತಿನಿಧ್ಯ ಹೊಂದಿದೆ ಎಂದು ಸ್ವತಃ ಅದಕ್ಕೆ ಮನವರಿಕೆ ಆದರೆ ಅದು ಮೀಸಲಾತಿ ಪಟ್ಟಿಯಿಂದ ತನ್ನನ್ನು ತೆಗೆಯಲು ಬೇಡಿಕೆ ಸಲ್ಲಿಸಬಹುದು. ಆದರೆ ಮೀಸಲಾತಿ ವ್ಯವಸ್ಥೆಯೇ ಎಲ್ಲದಕ್ಕೂ ರಾಮಬಾಣ ಎಂದು ಭ್ರಮಿಸಲ್ಪಟ್ಡ. ಸಂದರ್ಭದಲ್ಲಿ, ಎಲ್ಲಾ ಕ್ಷೇತ್ರಗಳಲ್ಲಿ ಸಮಗ್ರ ಪ್ರಾತಿನಿಧ್ಯ ಅಧಿಕವಾಗಿಯೇ ಇದ್ದರೂ 10%ಮೀಸಲಾತಿ ಪಡೆಯುವ ಸಾಮಾಜಿಕ ನ್ಯಾಯ ವಂಚಿಸುವ ವಂಚಕ ವ್ಯವಸ್ಥೆಯಲ್ಲಿ ಇದನ್ನೆಲ್ಲಾ ನಿರೀಕ್ಷಿಸುವುದು ಅಸಾಧ್ಯ. ಒಟ್ಟಿನಲ್ಲಿ ಸಮಾಜದಲ್ಲಿ ಎಲ್ಲಿಯವರೆಗೆ ಜಾತಿ ಆಧಾರಿತ ಅಸಮಾನತೆ ಇರುತ್ತದೆಯೋ ಅಲ್ಲಿಯವರೆಗೆ ಜಾತಿ ಆಧಾರಿತ ಸಕಾರಾತ್ಮಕ ತಾರತಮ್ಯ (ಅಥವಾ ಮೀಸಲಾತಿ) ಇರಬೇಕು…ಇರುತ್ತದೆ…

-ಹರ್ಷಕುಮಾರ್ ಕುಗ್ವೆ

ಸುದ್ದಿದಿನ.ಕಾಂ|ವಾಟ್ಸಾಪ್|9986715401

ಬಹಿರಂಗ

ದೇಹವನ್ನೇ ವಿಷವಾಗಿಸುವ ದ್ವೇಷ

Published

on

  • ವಿವೇಕಾನಂದ. ಹೆಚ್.ಕೆ

ನಸ್ಸನ್ನೇ ಘಾಸಿಗೊಳಿಸುವ ಅಸೂಯೆ.ವ್ಯಕ್ತಿತ್ವವನ್ನೇ ನಾಶ ಪಡಿಸುವ ಆಕ್ರೋಶ. ಪಾಕಿಸ್ತಾನ ಹಾಳಾಗಿದ್ದು ಏಕೆ ಗೊತ್ತೆ?ಅದು ಒಂದು ಧರ್ಮದ ಆಧಾರದಲ್ಲಿ ದೇಶವನ್ನು ಸ್ಥಾಪಿಸಿಕೊಂಡಿದ್ದರಿಂದ. ಧರ್ಮ ಯಾವಾಗಲೂ ಬದಲಾವಣೆಯ ಮತ್ತು ಪ್ರಗತಿಯ ವಿರೋಧಿ.
ಸ್ವತಂತ್ರ ಚಿಂತನೆಗಿಂತ ಗುಲಾಮಗಿರಿಯ ಮನೋಭಾವವನ್ನು ಪ್ರೋತ್ಸಾಹಿಸುತ್ತದೆ.ಅದರ ಪರಿಣಾಮ ನಿಂತ ನೀರು ಕೊಳೆಯಲಾರಂಬಿಸಿದೆ.

ಎರಡನೆಯದಾಗಿ,
ಹಿಂದು ಧರ್ಮವನ್ನು, ಅದರ ಜನರನ್ನು, ಅವರು ವಾಸಿಸುವ ಭಾರತವನ್ನು ಅತಿಯಾಗಿ ದ್ವೇಷಿಸಲಾರಂಭಿಸಿತು. ಅದರ ಎಲ್ಲಾ ಕಾರ್ಯಚಟುವಟಿಕೆಗಳು ಭಾರತದ ವಿರೋಧಿ ನೀತಿಯಾಗಿಯೇ ರೂಪಿಸಲ್ಪಟ್ಟಿತು. ಎಲ್ಲವೂ ನಕಾರಾತ್ಮಕ ಚಿಂತನೆ. ಪರಿಣಾಮ ಆಧೋಗತಿ.

ಮೂರನೆಯದಾಗಿ,
ತನ್ನ ಭೂಪ್ರದೇಶವನ್ನು ಅಭಿವೃದ್ಧಿ ಪಡಿಸಿಕೊಳ್ಳುವುದಕ್ಕಿಂತ ತನ್ನದಲ್ಲದ ಆದರೆ ತನ್ನ ಧರ್ಮದವರು ಹೆಚ್ಚಾಗಿದ್ದಾರೆ ಎಂಬ ಕಾರಣದಿಂದ ಕಾಶ್ಮೀರದ ಸ್ವತಂತ್ರ ಹೋರಾಟಕ್ಕೆ ಅಸೂಯೆಯಿಂದ ಪ್ರೋತ್ಸಾಹ ನೀಡಿದ್ದು. ಅದೂ ಯುದ್ಧದ ಮುಖಾಂತರ, ಭಯೋತ್ಪಾದನೆಯ ಮುಖಾಂತರ ಮತ್ತು ಸಾಧ್ಯವಿರುವ ಎಲ್ಲಾ ದುಷ್ಟ ಮಾರ್ಗಗಳ ಮೂಲಕ ಭಾರತವನ್ನು ದುರ್ಬಲ ಗೊಳಿಸಲು ಪ್ರಯತ್ನಿಸುತ್ತಾ ಅಪಾರ ಹಣ ಮತ್ತು ಶ್ರಮವನ್ನು ಕಳೆದುಕೊಂಡಿತು. ಅತ್ಯಂತ ಅಮಾನವೀಯ ಭಯೋತ್ಪಾದನೆಯನ್ನು ಹುಟ್ಟುಹಾಕಿತು. ಅಂತರರಾಷ್ಟ್ರೀಯವಾಗಿಯೂ ಕೆಟ್ಟ ಹೆಸರು ಪಡೆಯಿತು. ಪರಿಣಾಮ ವಿನಾಶ.

ಇದು ಅದರ ವ್ಯಾಪಾರ ವ್ಯವಹಾರ ಕ್ರೀಡೆ ಸಿನಿಮಾ ಮುಂತಾದ ಎಲ್ಲಾ ಕ್ಷೇತ್ರಗಳಿಗೂ ಹರಡಿ ಈಗ‌ ಕೆಲವು ಮಾಧ್ಯಮಗಳು ವರ್ಷಿಸುವಂತೆ ಭಿಕ್ಷೆ ಬೇಡುವ ಸ್ಥಿತಿ ತಲುಪಿದೆ. ಇದು ಸಹಜವೇ ಅಲ್ಲವೇ ? ನೋಡಿ, ದ್ವೇಷ ಅಸೂಯೆ ಜೊತೆಗೆ ಧರ್ಮದ ಅಮಲು ಸೇರಿದರೆ ವ್ಯಕ್ತಿ ಅಥವಾ ದೇಶ ಹೇಗೆ ಅಧಃಪತನದತ್ತ ಸಾಗುತ್ತದೆ ಎಂದು.

ಹಾಂ,..ಎಚ್ಚರ…,ಪಾಕಿಸ್ತಾನ ಮಾಡಿದ ತಪ್ಪುಗಳನ್ನೇ ಭಾರತವೂ ಇತ್ತೀಚಿನ ವರ್ಷಗಳಲ್ಲಿ ಮಾಡುತ್ತಿದೆ ಎಂಬುದು ನಿಮ್ಮ ಗಮನಕ್ಕೆ ಬಂದಿದೆಯೇ ?ಇಲ್ಲ ಎನ್ನವುದಾದರೆ ನೀವು ಸಹ ಅದೇ ರೀತಿ ದ್ವೇಷ ಅಸೂಯೆ ಧರ್ಮದ ಅಮಲಿನಲ್ಲಿ ಇರುವಿರಿ ಎಂದು ಭಾವಿಸಬೇಕಾಗುತ್ತದೆ.ಬಹಳಷ್ಟು ಜನ ಭಾರತದ ಅಭಿವೃದ್ಧಿ ಎಂದರೆ ಪಾಕಿಸ್ತಾನ ಚೀನಾವನ್ನು ವಿರೋಧಿಸುವುದು, ಮುಸ್ಲಿಮರನ್ನು ಭಯೋತ್ಪಾದಕರು ಎಂದು ಜರಿಯುವುದು, ಸೈನ್ಯಿಕ ಶಕ್ತಿಗೆ ಅವಶ್ಯತೆಗಿಂತ ಹೆಚ್ಚು ಮಹತ್ವ ನೀಡುವುದು ಎಂಬ ಭ್ರಮೆಗೆ ಒಳಗಾಗಿದ್ದಾರೆ.

ಇದು ಎಷ್ಟರಮಟ್ಟಿಗೆ ಇದೆ ಎಂದರೆ…ದೀಪಾವಳಿ ಹಬ್ಬದ ಪಟಾಕಿ ನಮ್ಮ ಪರಿಸರಕ್ಕೆ ಹಾನಿ ಎಂದರೆ ರಂಜಾನ್ ಕ್ರಿಸ್ಮಸ್ ನ್ಯೂ ಇಯರ್ ನಿಮಗೆ ಕಾಣುವುದಿಲ್ಲವೇ ಎನ್ನುತ್ತಾರೆ.ಪ್ರಾಣಿ ಹಿಂಸೆಯ ಕೆಲವು ಸಾಂಪ್ರದಾಯಿಕ ಕ್ರೀಡೆಗಳ ಬಗ್ಗೆ ವಿರೋಧಿಸಿದರೆ ಬಕ್ರೀದ್ ಬಕ್ರೀದ್ ಬಕ್ರೀದ್.ಮಹಿಳೆಯರ ದೇವಸ್ಥಾನ ಪ್ರವೇಶದ ವಿಷಯದಲ್ಲಿ ಸ್ವಾತಂತ್ರ್ಯ ಸಮಾನತೆಯ ಬಗ್ಗೆ ಮಾತನಾಡಿದರೆ ಮುಸ್ಲಿಂ ಮುಸ್ಲಿಂ ಮುಸ್ಲಿಂ.

ಭಾರತದ ಹಿಂದೂ ಜೀವನಶೈಲಿಯ ಮೂಡನಂಬಿಕೆಯ ಬಗ್ಗೆ ಹೇಳಿದರೆ ಇಸ್ಲಾಂ ಇಸ್ಲಾಂ ಇಸ್ಲಾಂ. ಭಾರತದ ಕೆಲವು ಶೋಷಿತ ವರ್ಗಗಳ ಮೇಲೆ ನಡೆಯುವ ದೌರ್ಜನ್ಯ ಪ್ರಸ್ತಾಪಿಸಿದರೆ ಪಾಕಿಸ್ತಾನದ ಟೆರರಿಸ್ಟ್ ಟೆರರಿಸ್ಟ್ ಟೆರರಿಸ್ಟ್.

ಹೀಗೆ ಸಾಲು ಸಾಲು ಅಭಿಪ್ರಾಯಗಳು ಎಲ್ಲಾ ವಿಷಯಗಳಲ್ಲೂ ಬರುತ್ತದೆ. ಮುಖ್ಯ ವಿಷಯ ಬಿಟ್ಟು ನಮ್ಮ ಬಹುತೇಕ ಅನಿಸಿಕೆಗಳು ಇಸ್ಲಾಂ ಮತ್ತು ಪಾಕಿಸ್ತಾನದ ಸುತ್ತಲೇ ತಿರುಗುತ್ತಿವೆ ಎಂದಾಯಿತು. ನಮ್ಮ ಬದಲಾವಣೆ ಅಥವಾ ಆತ್ಮಾವಲೋಕನಕ್ಕಿಂತ ಪಾಕಿಸ್ತಾನದ ಮೇಲಿನ ದ್ವೇಷವೇ ಹೆಚ್ಚಾಗಿದೆ.

ಅಷ್ಟೇ ಅಲ್ಲ ಆಂತರಿಕವಾಗಿಯೂ ಭಾರತದ ಒಳಗಡೆ ವಿವಿಧ ವರ್ಗ ಪಂಗಡಗಳ ನಡುವೆ ಸಾಕಷ್ಟು ದ್ವೇಷ ಅಸೂಯೆಗಳು ಹೊಗೆಯಾಡುತ್ತಿದೆ.

ವೈಚಾರಿಕ ಪ್ರಜ್ಞೆಯ ಪ್ರಗತಿಪರ ಚಿಂತನೆಯ ಶೋಷಿತ ವರ್ಗದ ಜಾಗೃತ ಮನಸ್ಥಿತಿಯ ಜನರು ಸಾರಾಸಗಟಾಗಿ ಇಡೀ ವೇದ ಉಪನಿಷತ್ತು ರಾಮಾಯಣ ಮಹಾಭಾರತ ಭಗವದ್ಗೀತೆ ಸೇರಿ ಎಲ್ಲವನ್ನೂ ತಿರಸ್ಕರಿಸುವ ಮಟ್ಟಕ್ಕೆ ದ್ವೇಷಿಸುತ್ತಾರೆ. ಕನಿಷ್ಠ ಅವುಗಳಲ್ಲಿ ಇರಬಹುದಾದ ಒಳ್ಳೆಯ ಅಂಶಗಳನ್ನು ಸಹ ಪರಿಶೀಲಿಸುವ ತಾಳ್ಮೆ ಮಾಯವಾಗಿದೆ. ತಲಾತಲಾಂತರದ ದ್ವೇಷ ಈಗ ಹೆಡೆ ಎತ್ತಿದೆ.

ಇದೇ ರೀತಿ ಇನ್ನೊಂದು ವರ್ಗ ಎಲ್ಲಾ ಸಂಪ್ರದಾಯಗಳನ್ನು ಅತ್ಯಂತ ಶ್ರೇಷ್ಠ ಎಂದು ಭಾವಿಸಿ ಅದನ್ನು ವಿರೋಧಿಸುವ ಎಲ್ಲರನ್ನೂ ಧರ್ಮ ವಿರೋಧಿಗಳು ದೇಶ ವಿರೋಧಿಸಗಳು ಎಂಬಂತೆ ಕಠಿಣ ಶಬ್ದಗಳಲ್ಲಿ ನಿಂದಿಸುತ್ತಾರೆ. ನಮ್ಮದೇ ಜನಗಳು ಪಡೆಯುವ ಮೀಸಲಾತಿ ಅವಕಾಶಗಳನ್ನು ಅಸೂಯೆಯಿಂದ ವಿರೋಧಿಸುತ್ತಾರೆ.

ಭಾರತದ ಪರಿಸ್ಥಿತಿ ಹಾಳಾಗಲು ಇಷ್ಟು ಸಾಕಲ್ಲವೇ..,ಆರ್ಥಿಕ ಕುಸಿತದಿಂದ ಕಂಗಾಲಾಗಿರುವ, ಜಾತಿ ವ್ಯವಸ್ಥೆಯ ಕಾರಣದಿಂದ ದೇಶಾಭಿಮಾನವೇ ಕಡಿಮೆಯಾಗಿರುವ,ಭ್ರಷ್ಟಾಚಾರದಿಂದ ಆಡಳಿತದ ಮೇಲೆ ನಂಬಿಕೆಯೇ ಇಲ್ಲದಿರುವ, ಪ್ರಕೃತಿಯ ವಿಕೋಪದ ಕಾರಣದಿಂದ ಬಹಳಷ್ಟು ಜನರು ನಿರ್ಗತಿರಾಗುತ್ತಿರುವ, ನಿರುದ್ಯೋಗಿಗಳಾಗುತ್ತಿರುವ ಭಾರತವನ್ನು ಮೇಲ್ದರ್ಜೆಗೆ ಏರಿಸುವ ವಿಷಯಗಳ ಕುರಿತು ಚಿಂತಿಸದೆ ಪಕ್ಕದ ಧರ್ಮ ದೇಶವನ್ನು ದೂಷಿಸುತ್ತಾ ಕುಳಿತರೆ ಭಾರತದ ಅಭಿವೃದ್ಧಿ ಸಾಧ್ಯವೇ ?
ಜಾತಿ ವ್ಯವಸ್ಥೆ ಇರುವವರಿಗು ಸಾಮಾಜಿಕ ನ್ಯಾಯ ಸಿಗುವುದೇ ?

ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನೂ ಮೀರಿ ಈ ದ್ವೇಷ ಅಸೂಯೆಗಳು ನಮ್ಮನ್ನು ಆಕ್ರಮಿಸಿದೆ.ಹೇಗೆ ಕಾಶ್ಮೀರ – ಯುದ್ಧ – ಚಂದ್ರಯಾನ ಮುಂತಾದ ವಿಷಯಗಳು ನಮ್ಮನ್ನು ಭಾವನಾತ್ಮಕವಾಗಿ ಜೋಡಿಸಿದೆಯೋ ಹಾಗೆಯೇ ಜಾತಿ ಭಾಷೆ ಪ್ರಾಂತ್ಯ ಸಂಪ್ರದಾಯ ಮತ್ತು ವೈಚಾರಿಕತೆ ನಮ್ಮನ್ನು ಭಾವನಾತ್ಮಕವಾಗಿ ಬೇರ್ಪಡಿಸಿದೆ ಎಂಬ ಸೂಕ್ಷ್ಮ ಅಂಶಗಳನ್ನು ಸಹ ಗಮನಿಸಬೇಕಿದೆ.

ನಮ್ಮ ಜನಗಳನ್ನು ಮುಖ್ಯವಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಚಟುವಟಿಕೆಯಿಂದ ಇರುವವರನ್ನು ಈ ಬಗ್ಗೆ ಜಾಗೃತಗೊಳಿಸಬೇಕಿದೆ. ಇಲ್ಲದಿದ್ದರೆ ಭಾರತ ವಿಶ್ವ ಗುರು ಎಂದು ಕನಸು ಕಾಣುತ್ತಿದ್ದರೆ ಮತ್ತೊಂದು ಪಾಕಿಸ್ತಾನವಾಗುವ ಅಪಾಯಕ್ಕೆ ‌ಸಿಲುಕಬಹುದು.

ಭಾರತ ಪ್ರೀತಿಯ ನೆಲ. ವಿಶ್ವಾಸದ ಜನ,
ಸಹಕಾರದ ಸಮಾಜ, ಆಧ್ಯಾತ್ಮದ ತವರೂರು. ಅದೇ ನಮ್ಮ ಶಕ್ತಿ. ನೆನಪಿಡಿ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಬಹಿರಂಗ

ವಿಜಯ ಕರ್ನಾಟಕದ ಈ ವರದಿಗಾರನ ಬುದ್ಧಿಗೆ ಏನು ಹೇಳಬೇಕೋ ತಿಳಿಯುತ್ತಿಲ್ಲ

Published

on

  • ಹರ್ಷಕುಮಾರ್ ಕುಗ್ವೆ

ಒಂದು ಮುಖ್ಯ ಸುದ್ದಿಯನ್ನು ವರದಿ ಮಾಡುವಾಗ ತನಗೆ ತಿಳುವಳಿಕೆ ಇಲ್ಲದ ವಿಷಯಗಳನ್ನು ಕನಿಷ್ಠ ಅಧ್ಯಯನ ಮಾಡಿಯಾದರೂ ಆ ಬಗ್ಗೆ ಸ್ಪಷ್ಟತೆ ಪಡೆದುಕೊಂಡು ವರದಿ ಮಾಡಬೇಕಲ್ಲವೇ? ವಿಜ್ಞಾನಿಗಳು ಹೇಳಿರುವ ವಿಷಯಗಳನ್ನು ತಮಗೆ ಬೇಕಾದ ಹಾಗೆ ತಿರುಚಿ ವರದಿ ಮಾಡಿರುವ ಪರಿಯನ್ನು ಇಲ್ಲಿ ನೋಡಿ.

ಮೊನ್ನೆ ಮತ್ತು ನೆನ್ನೆ ವಿಜ್ಞಾನಿಗಳು ರಾಖಿಗರಿ ಪಳೆಯುಳಿಕೆ ಕುರಿತ ಅತ್ಯಂತ ಮಹತ್ವದ ಮಾಹಿತಿಯನ್ನು ಪ್ರಕಟಿಸಿದರು. ಸಿಂಧೂ ನದಿ ನಾಗರಿಕತೆಯನ್ನು ಕಟ್ಟಿದ್ದು ದಕ್ಷಿಣ ಏಷಿಯನ್ನರು ಎಂಬ ಸಂಗತಿ ಅದು. ಈ ದಕ್ಷಿಣ ಏಷಿಯನ್ನರು ಎಂದರೆ ಯಾರು ಎಂಬುದನ್ನು ಸಹ ವಿಜ್ಞಾನಿಗಳು ಖಚಿತ ಪಡಿಸಿದ್ದಾರೆ. ಈ ದಕ್ಷಿಣ ಏಷಿಯನ್ನರಲ್ಲಿ ಆರ್ಯರು ಇರಲಿಲ್ಲ ಎಂಬ ಸಂಗತಿಯನ್ನು ಸಹ ವಿಜ್ಞಾನಿಗಳು ತಮ್ಮ ಅಧ್ಯಯನದ ಮೂಲಕ ತಿಳಿಸಿದ್ದಾರೆ. ಆದರೆ ವಿಜಯ ಕರ್ನಾಟದ ಈ  ವರದಿಗಾರ “ದಕ್ಷಿಣ ಏಷಿಯಾದ ಮೂಲ ನಿವಾಸಿಗಳೇ ಆರ್ಯರು” ಎಂದು ಬರೆದಿದ್ದಾನೆ.

ಇದೇ ವರದಿಗಾರ “ಹರಪ್ಪ ನಾಗರಿಕತೆಯ ಜಿನೋಮ್ ಸ್ಟೆಪ್ ಪ್ಯಾಸ್ಟೊರಲಿಸ್ಟ್ ಗಳು ಅಥವಾ ಇರಾನಿ ಕೃಷಿಕ ಸಮುದಾಯಕ್ಕೆ ಸಂಬಂಧಿಸಿದ್ದಲ್ಲ” ಎಂದು ವಿಜ್ಞಾನಿಗಳು ಹೇಳಿದ್ದನ್ನು ಸರಿಯಾಗಿ ದಾಖಲಿಸಿದ್ದಾನೆ. ಆದರೆ ಇವನಿಗೆ ಸ್ಟೆಪ್ ಪ್ಯಾಸ್ಟೊರಲಿಸ್ಟ್ ಗಳೇ ಆರ್ಯರು ಎಂಬ ಸಾಮಾನ್ಯ ಜ್ಞಾನವೂ ಇಲ್ಲ. ಕಳೆದ ಕೆಲವಾರು ವರ್ಷಗಳಿಂದ ಮನುಷ್ಯನ ಜಿನೋಮ್ ಕುರಿತು ಸಂಶೋಧನೆ ನಡೆಸುತ್ತಿರುವ ಸ್ಟೆಪ್ ಮೂಲದ ಆರ್ಯರಿಗೆ R1a1 ಎಂಬ ಸಂಕೇತವನ್ನೂ ನೀಡಿದ್ದಾರೆ. ಹಾಗೂ ಈ ಆರ್ಯರು ಭಾರತಕ್ಕೆ ವಲಸೆ ಬಂದಿದ್ದು ಸಿಂಧೂ ನದಿ ನಾಗರಿಕತೆಯ ಅವಸಾನದ ಸಮಯದಲ್ಲಿ ಎಂದೂ ಸ್ಪಷ್ಟಪಡಿಸಿದ್ದಾರೆ. ಮಾತ್ರವಲ್ಲ ಆರ್ಯರು ಭಾರತಕ್ಕೆ ಕುರ್ಗನ್ ಸಂಸ್ಕೃತಿ ಅಥವಾ ಯೂರೇಷಿಯಾದ ಪಾಂಟಿಕ್ ಸ್ಟೆಪ್ ಹುಲ್ಲುಗಾವಲಿನಲ್ಲಿ ವಿಕಾಸಗೊಂಡ ಯಾಮ್ನಾಯ ಸಂಸ್ಕೃತಿಯನ್ನು ತಂದವರು; ಭಾರತದ ಜನಸಂಖ್ಯೆಯಲ್ಲಿ ಕೆಲವು ಬ್ರಾಹ್ಮಣ ಪಂಗಡಗಳು ಈ ಸಂಸ್ಕೃತಿಯನ್ನು ಈಗಲೂ ಉಳಿಸಿಕೊಂಡಿದ್ದಾರೆ ಎಂಬ ಸಂಗತಿಯನ್ನು ಪ್ರಖ್ಯಾತ ತಳಿ ವಿಜ್ಞಾನಿ ಡೇವಿಡ್ ರೀಚ್ ಅವರೇ ತಿಳಿಸಿದ್ದಾರೆ.

ವಂಶವಾಹಿಗಳ ಅಧ್ಯಯನದ ಮೂಲಕ ವಿಜ್ಞಾನಿಗಳು ಭಾರತದ ಪ್ರಾಚೀನ ನಾಗರಿಕತೆಯಲ್ಲಿ ಆರ್ಯರ ಪಾತ್ರವೇ ಇಲ್ಲ ಎಂದು ಸ್ಪಷ್ಟಪಡಿಸಿದ ಮೇಲೂ ಸಿಂಧೂ ನದಿ ನಾಗರಿಕತೆಯಲ್ಲಿ ಆರ್ಯರ ಪಾತ್ರ ಇತ್ತು ಎಂಬಂತೆ ತಿರುಚಿ ಬರೆಯು ಪತ್ರಕರ್ತರ ಉದ್ದೇಶವಾದರೂ ಏನಾಗಿರಬಹುದು?

ಹೆಚ್ಚಿನ ಮಾಹಿತಿಗೆ ಇದನ್ನೂ ಓದಿ

https://kannada.truthindia.news/2019/09/06/scientists-finally-reveal-rakhigarhi-findings/

ಓದು ಪ್ರಕಾಶನ ಪ್ರಕಟಿಸಿದ ಪುಸ್ತಕ ‘ಹರಪ್ಪ‌ ಡಿ ಎನ್ ಎ ನುಡಿದ ಸತ್ಯ’

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಬಹಿರಂಗ

ಪ್ರವಾಹ ಬಂತು, ಬದುಕೇ ಮುಳುಗೋಯ್ತು; ಮುಂದೇನು..?

Published

on

“ಹೊಲಿ ಹೋಯ್ತು.ಮನಿ ಹೋಯ್ತು. ಆಕಳು ವಾದ್ವು, ಪಾತ್ರೆ ಪಗಡೆ ವಾದ್ವು. ಆಧಾರ್ ಕಾರ್ಡ್ ರೇಷನ್ ಕಾರ್ಡ್ ಓಟಿನ ಕಾರ್ಡ್ ವಾದ್ವು.ನಮ್ ಬದುಕೇ ಹೋಂಟೋತ್ರಿ.

ನಮ್ನ ಯಾರು ಕೇಳ್ವಂಗಿಲ್ರಿ,
ಸಾಯೋದೆ ಗತಿರ್ರೀ ನಮ್ಗೆ.”ಪ್ರವಾಹ ಪೀಡಿತ ಜನಗಳ ದಿನನಿತ್ಯದ ಗೋಳಾಟ ನರಳಾಟ ಪರದಾಟ. ಹೇಗೆ ಸಮಾಧಾನ ಮಾಡುವುದು ಇವರನ್ನು..!‌ಅವರ ಜೊತೆ ಸೇರಿ ನಾವು ಅಳುವುದೇ..?

ಮಾಧ್ಯಮಗಳು ಮಾಡುವಂತೆ ಅವರ ನೆನಪುಗಳನ್ನು ಮತ್ತೆ ಮತ್ತೆ ಕೆದಕಿ, ಅಳಿಸಿ ದುಃಖದ ಹಿನ್ನೆಲೆ ಸಂಗೀತ ನೀಡಿ ಮತ್ತಷ್ಟು ನೋವು ನೀಡುವುದೇ..?ರಾಜಕಾರಣಿಗಳು ಅಧಿಕಾರಿಗಳು ಮಾಡುವಂತೆ ನೆಪಮಾತ್ರಕ್ಕೆ ಅವರ ಕಷ್ಟ ಕೇಳಿ ಹುಸಿ ಭರವಸೆ ಕೊಟ್ಟು ಕೈ ತೊಳೆದುಕೊಳ್ಳುವುದೇ..?

ಸ್ವಯಂ ಸೇವಕರಂತೆ ಒಂದಷ್ಟು ಕೈಲಾಗುವ ಸಹಾಯ ಮಾಡಿ ವಾಪಸ್ಸಾಗುವುದೇ.ಒಂದಷ್ಟು ಪರಿಹಾರ ಸಾಮಗ್ರಿಗಳನ್ನು ತೆಗೆದುಕೊಂಡು ಹೋಗಿ ಕೆಲವರಿಗೆ ತಲುಪಿಸಿ ಬರುವುದೆ.ಹೀಗೆ ಸಾಮಾಜಿಕ ಜಾಲತಾಣಗಳಲ್ಲಿ ಬರೆಯುತ್ತಾ ಗೊಣಗಾಡುವುದೇ.

ನಮ್ಮ ರಾಜ್ಯದ ಮಟ್ಟಿಗೆ ‌ಈಗ ಆಗಿರುವ ಅನಾಹುತವನ್ನು ಒಂದು ಹಂತದವರೆಗೆ ಅಂದರೆ ತೊಂದರೆ ಸಿಲುಕಿರುವ ಜನರಿಗೆ ಕನಿಷ್ಠ ಮೂಲಭೂತ ಸೌಕರ್ಯಗಳನ್ನು ಒದಗಿಸುವಷ್ಟು ಸಂಪನ್ಮೂಲಗಳು ಖಂಡಿತ ಸರ್ಕಾರದ ಬಳಿ ಇದೆ ಮತ್ತು ರಾಜ್ಯದ ಜನರು ದಾನ ರೂಪದಲ್ಲಿ ಕೊಡುವಷ್ಟು ಒಳ್ಳೆಯ ಮನಸ್ಥಿತಿ ಹೊಂದಿದ್ದಾರೆ.

ಇಷ್ಟು ಅನುಕೂಲ ಇದ್ದರೂ ನಿಜವಾದ ಸಂತ್ರಸ್ತರಿಗೆ ಇನ್ನೂ ಅದರ ಪ್ರಯೋಜನ ದೊರೆಯುತ್ತಿಲ್ಲ. ಇದೇ ನಿಜವಾದ ಸಮಸ್ಯೆ. ಅದನ್ನು ಅರ್ಥಮಾಡಿಕೊಂಡು ಅದಕ್ಕೆ ಪರಿಹಾರ ಒದಗಿಸಬೇಕಾದ ಅಗತ್ಯವಿದೆ. ಸರ್ಕಾರ ನಡೆಸಲು ನೀತಿ ನಿಯಮಗಳು ಅತ್ಯಂತ ಅವಶ್ಯ. ಆದರೆ ಕೆಲವೊಮ್ಮೆ ಅದೇ ನೀತಿ ನಿಯಮಗಳಿಂದ ಸಾರ್ವಜನಿಕರಿಗೆ ತೊಂದರೆಯಾಗುವುದು ಇದೆ.

ಪ್ರವಾಹಕ್ಕೆ ಸಿಲುಕಿ ಕೊಚ್ಚಿ ಹೋದ ಜನರ ಬಳಿ ದಾಖಲೆಗಳು ಇರುವುದಿಲ್ಲ. ದಾಖಲೆಗಳಿಲ್ಲದೆ ಪರಿಹಾರ ಸಿಗುವುದಿಲ್ಲ. ಇದರ ಬಗ್ಗೆ ಸರಿಯಾದ ತೀರ್ಮಾನ ಕೈಗೊಳ್ಳಲು ಅಧಿಕಾರಿಗಳಿಗೆ ಸ್ವಾತಂತ್ರ್ಯ ನೀಡಿದರೆ ದುರುಪಯೋಗವಾಗುತ್ತದೆ. ಕೊಡದಿದ್ದರೆ ಸಮಸ್ಯೆ ಪರಿಹಾರವಾಗುವುದಿಲ್ಲ. ಇದು ಮಧ್ಯವರ್ತಿಗಳ ಲಾಭಕ್ಕೆ ಕಾರಣವಾಗುತ್ತದೆ.

ಇಡೀ ವ್ಯವಸ್ಥೆ ಕೆಟ್ಟು, ಪ್ರತಿಯೊಬ್ಬರಲ್ಲೂ ತಮ್ಮ ಹಿತಾಸಕ್ತಿಯ ಸ್ವಾರ್ಥ ಹೆಚ್ಚಾಗಿ, ಹಣದ ಮೋಹ ಎಲ್ಲರನ್ನೂ ಆಕ್ರಮಿಸಿ, ಮನಸ್ಸುಗಳಲ್ಲಿ ಅನುಮಾನದ ಬೀಜ ಮೊಳೆತಿರುವಾಗ ಯಾವ ಪರಿಹಾರಗಳು, ಕಾನೂನುಗಳು, ಸಲಹೆಗಳು ಉತ್ತಮ ಪರಿಣಾಮ ಬೀರಲು ಸಾಧ್ಯವಿಲ್ಲ.

ಪ್ರತಿಯೊಂದರಲ್ಲೂ ಭ್ರಷ್ಟಾಚಾರ ಅಕ್ರಮಗಳು ನಡೆಯುತ್ತಲೇ ಇರುತ್ತದೆ. ಅದನ್ನು ಪತ್ತೆ ಹಚ್ಚುವ, ವರದಿ ಮಾಡುವ, ತನಿಖೆ ಮಾಡುವ, ಕ್ರಮ ಕೈಗೊಳ್ಳುವ ವಿಷಯಗಳು ಹವ್ಯಾಸವಾಗಿ ಗೀಳಿನಂತೆ ಇವು ಮಾತ್ರ ಪ್ರಾಮುಖ್ಯತೆ ಪಡೆಯುತ್ತವೆ. ಜನರಿಗೆ ಪರಿಹಾರ ಮಾತ್ರ ಸರಿಯಾಗಿ ಸಿಗುವುದೇ ಇಲ್ಲ.ಕೊನೆಗೆ ನಮ್ಮ ವ್ಯವಸ್ಥೆಯೇ ಹೀಗೆ ಏನು ಮಾಡುವುದು ಎಂಬ ಸಿನಿಕತನದೊಂದಿಗೆ ಎಲ್ಲವೂ ಹಾಗೆಯೇ ಮುಕ್ತಾಯವಾಗುತ್ತದೆ.

ಸರ್ಕಾರಗಳಾಗಲಿ, ಹೋರಾಟಗಾರರಾಗಲಿ, ಸ್ವಯಂ ಸೇವಕರಾಗಲಿ, ದಾನಿಗಳಾಗಲಿ, ಮಠಗಳಾಗಲಿ ಅಥವಾ ಬೇರೆ ಯಾವುದೇ ಸಾಮಾಜಿಕ ಕಳಕಳಿಯ ಜಾಗೃತ ಸಂಸ್ಥೆಗಳಾಗಲಿ ನಿಜವಾದ ಕೆಲಸ ಮಾಡಬೇಕಾಗಿರುವುದು ವ್ಯವಸ್ಥೆಯ ಶುದ್ದೀಕರಣ, ಜನರ ಮನಸ್ಸುಗಳ ವಿಶಾಲೀಕರಣ, ಮಾನವೀಯ ನಡವಳಿಕೆಯ ಸರಿಯಾದ ವರ್ತನೀಕರಣ.

ಇದು ಆಗದೆ ನಾವು ಯಾವುದೇ ಸಂಕಷ್ಟಗಳನ್ನು ಎದುರಿಸಿ ನಿಲ್ಲುವುದು ಅಸಾಧ್ಯ. ಕೇವಲ ಆ ಕ್ಷಣದ ಒಂದು ಸಣ್ಣ ಪ್ರತಿಕ್ರಿಯಾತ್ಮಕ ಕ್ರಿಯೆಗಳನ್ನು ಮಾತ್ರ ಮಾಡಬಹುದು. ಶಾಶ್ವತ ಪರಿಹಾರ ಗಗನ ಕುಸುವೇ ಆಗಿದೆ.

ಆದ್ದರಿಂದ ಎಲ್ಲರೂ ಕೇವಲ ಜನರ ಸಂಕಷ್ಟದ ಬಗ್ಗೆ ಸಹಾನುಭೂತಿ ವ್ಯಕ್ತಪಡಿಸುವ ಜೊತೆಗೆ ನಮ್ಮ ನಮ್ಮ ಮನಸ್ಸುಗಳ ಆತ್ಮಾವಲೋಕನ ಮಾಡಿಕೊಂಡು ಸಂತ್ರಸ್ತರಿಗೆ ನಿಜವಾದ ಶಾಶ್ವತ ಪರಿಹಾರ ದೊರೆಯುವಂತಾಗಿ ಅವರಿಗೆ ಈ ನೆಲದ, ಈ ಬದುಕಿನ ಬಗ್ಗೆ ಗೌರವ, ಅಭಿಮಾನ, ಭರವಸೆ ಮೂಡುವಂತಾಗಲಿ.
ಒಂದಷ್ಟು ಹಣ, ವಸ್ತುಗಳು, ದವಸ ಧಾನ್ಯಗಳು ಕೇವಲ ತಾತ್ಕಾಲಿಕ ಪರಿಹಾರ ಎಂಬುದನ್ನು ಮರೆಯದಿರೋಣ.

ವಿವೇಕಾನಂದ. ಹೆಚ್.ಕೆ

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading
Advertisement

Trending