Connect with us

ಬಹಿರಂಗ

ನಮ್ಮ ಸಮಾಜವು ಅತಿಬುದ್ಧಿವಂತರ ಮತ್ತು ಅತಿನಾಯಕತ್ವದ ಭಾರದಲ್ಲಿ ನರಳುತ್ತಿದೆ.‌‌‌‌.!

Published

on

  •  ಹ.ರಾ.ಮಹಿಶ ಬೌದ್ಧ

ಒಂದು ದೃಷ್ಟಾಂತ: ಸಮೂಹ ನೃತ್ಯ ಅಭ್ಯಾಸದ ಸಂದರ್ಭದಲ್ಲಿ ತಂಡದವರೆಲ್ಲಾ ಮೊದಲು ಬಲಗಾಲ ಬಲಕ್ಕಿಟ್ಟು ಎಡಗಾಲೆತ್ತಿ ಕುಣಿಯಬೇಕೆಂದು ಅಭ್ಯಾಸ ಮಾಡಿದ್ದೆವು ಎಂದಿಟ್ಟುಕೊಳ್ಳಿ ವೇದಿಕೆಯ ಮೇಲೆ ಪ್ರದರ್ಶನ ಮಾಡುವಾಗ ಮರೆತು ಅಕಸ್ಮಾತ್ ತಂಡದ ಎಲ್ಲರೂ ಬಲಗಾಲಿನ ಬದಲು ಎಡಗಾಲ ಎಡಕ್ಕಿಟ್ಟು ಬಲಗಾಲೆತ್ತಿ ಕುಣಿದರೂ ನೃತ್ಯವು ಕೆಡುವುದಿಲ್ಲ..! ತಂಡದವರೂ ಕಸಿವಿಸಿಗೊಳ್ಳದೇ ನಕ್ಕು ನೃತ್ಯ ಮುಂದುವರಿಸುತ್ತಾರೆ ಪ್ರೇಕ್ಷಕರಿಗೂ ಅಲ್ಲಿ ತಪ್ಪಾಯಿತು ಎನಿಸುವುದಿಲ್ಲ..!!

ಆದರೆ, ಆ ತಪ್ಪನ್ನು (?) ತಂಡದ ಎಲ್ಲರೂ ಮಾಡಬೇಕು..! ಒಂದಿಬ್ಬರು ಅಭ್ಯಾಸದಂತೆಯೇ ಬಲಗಾಲು ಬಲಕ್ಕಿಟ್ಟು ಸರಿಯಾಗಿ ಮಾಡಿ ಇನ್ನೆಲ್ಲರೂ ಎಡಗಾಲ ಎಡಕ್ಕಿಟ್ಟರೂ ಅಥವಾ ಎಲ್ಲರೂ ಅಭ್ಯಾಸದಂತೆಯೇ ಬಲಗಾಲ ಬಲಕ್ಕಿಟ್ಟು ಸರಿಯಾಗಿ ಮಾಡಿ ಒಂದಿಬ್ಬರು ಮಾತ್ರ ಎಡಗಾಲ ಎಡಕ್ಕಿಟ್ಟರೆ ನೃತ್ಯ ಕೆಡುತ್ತದೆ.‌.! ತಪ್ಪು ಮಾಡಿದವರಿಗೂ ಸರಿ ಮಾಡಿದವರಿಗೂ ವೇದಿಕೆಯ ಮೇಲೆಯೇ ಒಂಥರಾ ಕಸಿವಿಸಿಯಾಗುತ್ತದೆ. ಮತ್ತು ಆ ತಪ್ಪು ಪ್ರೇಕ್ಷಕರಿಗೂ ಎದ್ದು ಕಾಣುತ್ತದೆ.‌.!

ಬಂಧುಗಳೇ, ಅನೇಕ ವಿಚಾರಗಳಲ್ಲಿ ಈಗ ಆಗುತ್ತಿರುವುದು ಇದೇ. ನಾನು ಅಥವಾ ನಾವು ಮಾಡುವುದು ಬರೆಯುವುದು ಅರಿತಿರುವುದು ಮಾತ್ರ ಸರಿ ಆದರೆ ನಮ್ಮದೇ ಗುರಿಯಿರುವ ಇನ್ನೊಬ್ಬರು ಮಾಡುತ್ತಿರುವುದು ತಿಳಿದಿರುವುದು ಬರೆದಿರುವುದು ತಪ್ಪು‌. ಅದು ಸರಿಯಲ್ಲ ಸಮಂಜಸವಲ್ಲ..!! ಎಂಬ ಮನಸ್ಥಿತಿ.‌.‌!

ಯಾಕೆ ಹೀಗೆ….!? ಯಾಕೆ, ಶತಮಾನಗಳಿಂದಲೂ ಸರ್ವವಿದ್ಯೆಗಳ ಗುತ್ತಿಗೆ ಹಿಡಿದು ಬಂದಿರುವ ಬ್ರಾಹ್ಮಣ ಪುರಯಷ ವಿದ್ಯಾವಂತ ಬುದ್ಧಿವಂತರಿಗೆ ಈ ದೇವರು-ಗೀವರೆಲ್ಲಾ ಸುಳ್ಳು ಶಾಸ್ತ್ರ ಪುರಾಣಗಳೆಲ್ಲಾ ಪೊಳ್ಳು ಎಂದು ಗೊತ್ತಿಲ್ಲವೇ..!? ಆದರೂ ಅವರು ಹಾಗೆ ಹೇಳುವರೇ..!? ತಾವೂ ನಂಬುವಂತೆ ನಟಿಸಿ ಇತರಕೋಟಿಕೋಟಿಜನರನ್ನೂ ನಿಜವಾಗಿಯೂ ನಂಬಿಸಿ ಲಾಭ ಮಾಡಿಕೊಳ್ಳುತ್ತಿಲ್ಲವೇ.. ನಿರಾಯಾಸವಾಗಿ ಗೌರವ ಪಡೆಯುತ್ತಿಲ್ಲವೇ ಅದೇ ಧರ್ಮದೇವರೆಂಬ ಸುಳ್ಳುಗಳ ಸೌಧದ ಮೇಲೆ ದೇಶ ಆಳುತ್ತಿಲ್ಲವೇ..!? ಅವರಿಗೆ ಗೊತ್ತಿಲ್ಲವೇ
“ಈ ದೇಶದಲ್ಲಿ‌ ನಮ್ಮವರು ಇತಿಹಾಸವನ್ನು ತಮಗೆ ಬೇಕಾದಂತೆ ತಿರುಚಿಬರೆದಿದ್ದಾರೆ ಎಂದು..!? ಎಲ್ಲಿಯಾದರೂ‌ ಅವರು ಹೇಳುತ್ತಾರೆಯೇ…!? ಆ ಸುಳ್ಳು ಇತಿಹಾಸವನ್ನೇ ಸತ್ಯವೆಂದು ಪ್ರತಿಪಾದಿಸಲು ಸಾವಿರಾರು ಆಕರ ಗ್ರಂಥಗಳನ್ನು ಸೃಷ್ಟಿಸಿ ತಮಗೆ ಗೊತ್ತಿರುವ ಸತ್ಯವನ್ನು ಎದೆಯೊಳಗಿಟ್ಟುಕೊಂಡು ಪಠ್ಯದ ಮೂಲಕವೇ ದೇಶದ ಜನರ ಮೆದುಳಿಗೆ ಸುಳ್ಳುಗಳನ್ನೇ ತುರುಕಿ‌ ತುಂಬಿ ಅಜ್ಞಾನದಿಂದ ಬೆಳೆದ ಬೆಳೆಯನ್ನು ಭರಪೂರ ಉಣ್ಣುತ್ತಿಲ್ಲವೇ..

ಇಡೀ ದೇಶದ ಸಂಪತ್ತಿನ ಒಡೆಯರಾಗಿಲ್ಲವೇ..!? ತನ್ನವರ ಒಂದು‌ ಕೂದಲೂ ಕೊಂಕದಂತೆ ನೋಡಿಕೊಳ್ಳತ್ತಿಲ್ಲವೇ ದೇಶ ಆಳುತ್ತಿಲ್ಲವೇ..!? ಇದು ತಂತ್ರಗಾರಿಕೆ ಅಲ್ಲವೇ…!? ಅವರು ಸುಳ್ಳು ಮೋಸ ಸ್ವಾರ್ಥಕ್ಕಾಗಿ ತಂತ್ರಗಾರಿಕೆ ಮಾಡುತ್ತಾ ಯಶಸ್ವಿಯಾಗಿರಬೇಕಾದರೆ ನಾವು ಬಹುಜನ ಸಮಾಜವರು ಸತ್ಯಸ್ಥಾಪನೆಗಾಗಿ ಯಾಕೆ ಪ್ರತಿತಂತ್ರಗಾರಿಕೆ ಮಾಡಬಾರದು..!? ಅವರು ಒಡೆಯಲು ಒಡೆದು ಆಳಲು ಸಾವಿರ ಸುಳ್ಳು ಹೇಳುತ್ತಾ ನಂಬಿಸುತ್ತಾ ಬೇರುಬಿಡಿಸಿರಬೇಕಾದರೆ ನಾವು ಕಟ್ಟಲು ಕಟ್ಟಿಆಳಲು ನೂರು ಸತ್ಯಗಳನ್ನು ಯಾಕೆ ಗಟ್ಟಿಯಾಗಿ ಹೇಳಬಾರದು..!?

ಬಾಬಾಸಾಹೇಬರು ಹೋರಾಟ ಆರಂಭಿಸಿದ ಆ ದಿನಗಳಲ್ಲಿ (1918) ಸೌತ್ ಬರೋ ಆಯೋಗ ಮುಂದೆ ಭಾರತದ ಶೋಷಿತರಿಗೆ ವಿಶೇಷ ಹಕ್ಕುಗಳನ್ನು ಕೊಡಿಸಿಕೊಡಲು‌ ಅವರು ಗಟ್ಟಿದನಿ ಎತ್ತಿ‌ ಒತ್ತಿಹೇಳಿದ ಮಾತು
“ಶೋಷಿತರು/ಅಸ್ಪೃಶ್ಯರು ಹಿಂದೂಗಳಲ್ಲ”
ಅವರು (1927) ಚೌಡರ್ ಕೆರೆ ನೀರು ಮುಟ್ಟವ ಚಳವಳಿ‌ ಮಾಡಿದ್ದು (1930) ಕಾಳಾರಾಂ ದೇವಾಲಯ ಪ್ರವೇಶ ಚಳವಳಿ ಮಾಡಿದ್ದು “ಶೋಷಿತರು/ಅಸ್ಪೃಶ್ಯರು ಹಿಂದೂಗಳಲ್ಲ” ಎಂದು ಮರುಸಾಬೀತುಪಡಿಸಲು..! 1930-31 ರ ದುಂಡುಮೇಜಿನ ಸಭೆಯಲ್ಲಿ‌ ಗಟ್ಟಿಯಾಗಿ ವಾದ ಮಂಡಿಸಿ ಎಲ್ಲಾ ಹಕ್ಕುಅಧಿಕಾರಗಳನ್ನು ಗಳಿಸಿ ತಂದ್ದದ್ದು ಸಹ ಇದೇ “ಶೋಷಿತರು/ಅಸ್ಪೃಶ್ಯರು ಹಿಂದೂಗಳಲ್ಲ” ಎಂಬ ವಿಚಾರದಿಂದಲೇ…!! ಆದರೆ ಇದೇ ಬಾಬಾಸಾಹೇಬರಿಗೆ ತಾನು ತನ್ನ ಸಮುದಾಯ ಅಷ್ಟೇ ಅಲ್ಲದೇ ಇಡಿ ದೇಶದ SC ST/OBC ಗಳು ಮುಲತಃ ಹಿಂದೂಗಳಲ್ಲ ಎಂಬ ಸತ್ಯ ಆ ಮಟ್ಟದ ಐತಿಹಾಸಿಕ ಆಧಾರಸಹಿತ ಸ್ಪಷ್ಟತೆ ಇದ್ದರೂ 1935 ರ ಯವೋಲಾ ಅಧಿವೇಶನದಲ್ಲಿ “ನಾನು ಹಿಂದುವಾಗಿ ಹುಟ್ಟಿದ್ದೇನೆ” ಎಂದು ಯಾಕೆ ಹೇಳಿದರು…!? ಇದು ತನ್ನ ಸಮುದಾಯದೊಂದಿಗೆ ಇಡೀ ದೇಶದ ಶೋಷಿತ ಮೂಲನಿವಾಸಿ ಸಮುದಾಯಗಳನ್ನು ವಿಮೋಚನೆ ಮಾಡುವ ತಂತ್ರಗಾರಿಕೆಯಲ್ಲವೇ…!? ಬಾಬಾಸಾಹೇಬರನ್ನು ಓದಿಕೊಂಡು ಬರೆಯುತ್ತಿರುವ ಬುದ್ಧಿವಂತರಿಗೆಲ್ಲಾ ಎಲ್ಲವನ್ನೂ ಬಿಡಿಸಿ ಹೇಳಬೇಕೆ..!? ಯಾಕೆ ಈ ಕೂದಲು ಸೀಳುವ ಸಾಹಸ..!? ಯಾಕೀ ಅತಿಬುದ್ಧಿವಂತಿಕೆ..!?

“ಮಹಿಶ ದಸರ” ದ ಹೆಸರಿನಲ್ಲಿ‌ ಒಂದಷ್ಟು OBC/SC/ST/RM ಮೂಲನಿವಾಸಿ ಬಂಧುಗಳು ಕಳೆದ ಕೆಲವು ವರ್ಷಗಳಿಂದ ಮೂಲನಿವಾಸಿ ಪ್ರಜ್ಞೆಯನ್ನು ಜಾಗೃತಗೊಳಿಸುತ್ತಿದ್ದಾರೆ. ಮಾಡಲಿ‌ ಬಿಡಿ..! ಸಾಧ್ಯವಾದರೆ ಭಾಗವಹಿಸೋಣ ಇಲ್ಲದಿದ್ದರೆ ಸುಮ್ಮನಿರೋಣ..! ನಮ್ಮ ವಿರೋಧಿಗಳೆನಿಸಿಕೊಂಡಿರುವ ಮನುವಾದಿಗಳನ್ನಾದರೂ ನೋಡಿ ಕಲಿಯೋಣ ಎಂಬುದು ನನ್ನ ವಿನಮ್ರ ಮನವಿ..! ಯಾವುದಾದರೂ ನೆಪದಲ್ಲಿ‌ ಯಾರ ಮೂಲಕವಾದರೂ ಸಾಮಾಜಿಕ ಪರಿವರ್ತನಾ ಚಳವಳಿ ಮುನ್ನಡೆದರೆ ಎಲ್ಲರೂ‌ ಮನದಲ್ಲೇ ಖುಷಿಪಡೋಣ ಭಾಗಿಯಾಗೋಣ..! ವಿರೋಧಿಸಲೆಂದೇ ಹಾಳುಗೆಡವಲೆಂದೇ ಮನುವಾದಿಗಳಿದ್ದಾರೆ..! ನಾವು ಒಬ್ಬರನ್ನೊಬ್ಬರು ಒಪ್ಪೋಣ ಒಟ್ಟಿಗೆ ಸೇರಿ ಕಟ್ಟೋಣ..!

ಮಹಿಷದಸರಾವನ್ನು ಇನ್ನು ಮುಂದೆ ಮನೆಮನೆಯಲ್ಲಿಯೂ ಆಚರಿಸೋಣ…!

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

ಬಹಿರಂಗ

ಹಿಂದೂ ಧರ್ಮದ ಪ್ರಗತಿಪರ ಮನಸ್ಸುಗಳ ಬೆಳವಣಿಗೆಯನ್ನು ಜಾತಿಮೀರಿ ಬೆಂಬಲಿಸೋಣ

Published

on

  • ರಘೋತ್ತಮ ಹೊ.ಬ

ನ್ನಯ್ಯಕುಮಾರನ ಭಾಷಣ ಮತ್ತು ಬೆಳವಣಿಗೆ ಬಗ್ಗೆ ಒಂದು ಸಣ್ಣ ಚರ್ಚೆ ನಡೆಯುತ್ತಿದೆ. ಮುಖ್ಯವಾಗಿ ಆತನ ಜಾತಿ ಭೂಮಿಹಾರ ಜಾತಿ ಬಗ್ಗೆ ಕೆಲವು ದಲಿತ ಯುವಕರು ಚರ್ಚೆ ನಡೆಸುತ್ತಿದ್ದಾರೆ. ಖಂಡಿತ, ಸದರಿ ಜಾತಿ ದೌರ್ಜನ್ಯ ಮಾಡಿರಬಹುದು. ಆದರೆ ಆ ಜಾತಿಯ ಎಲ್ಲಾ ಗುಣಗಳನ್ನು ಕನ್ನಯ್ಯರಂತಹವರಿಗೆ ಆರೋಪಿಸುವುದು ಥರವಲ್ಲ. ನಿಜ, ದಿ.ಗೌರಿ ಲಂಕೇಶ್ ರವರೊಡನೆ ಇಂತಹದ್ದೆ ಮಾದರಿಯ ಚರ್ಚೆಗಳಲ್ಲಿ ಹಿಂದೆ ನಾನೂ ಕೂಡ ಪಾಲ್ಗೊಂಡಿದ್ದೆ. ಆದರೆ ಬಾಬಾಸಾಹೇಬ್ ಅಂಬೇಡ್ಕರರ ಬರಹಗಳನ್ನು ಓದಿದ ನಂತರ ನನ್ನ ಆ ನಿಲುವಿನಲ್ಲಿ ಬದಲಾವಣೆ ಮಾಡಿಕೊಂಡೆ. ಯಾಕೆಂದರೆ ತಮ್ಮ ‘ರಾನಡೆ, ಗಾಂಧಿ, ಜಿನ್ನಾ’ ಎಂಬ ಕೃತಿಯಲ್ಲಿ ಅಂಬೇಡ್ಕರರು ಸಮಸ್ಯೆಗಳ ನಡುವೆಯೂ ಹಿಂದೂ ಧರ್ಮ ಬದುಕಲಿಕ್ಕೆ ಒಂದಷ್ಟು ಸಹನೀಯವಾಗಿದೆ ಎಂದರೆ ಅದಕ್ಕೆ ಎಂ.ಜಿ.ರಾನಡೆಯವರಂತಹ ಮನಸ್ಸುಗಳೇ ಕಾರಣ ಎನ್ನುತ್ತಾರೆ. ಆದ್ದರಿಂದ ಅಂಬೇಡ್ಕರರ ಈ ಅಭಿಪ್ರಾಯದ ಪ್ರಕಾರ ನಾವು ಪ್ರಗತಿಪರ, ಬುದ್ಧಿಜೀವಿ ಒಂದಷ್ಟು ವ್ಯಕ್ತಿಗಳ ಬೆಳವಣಿಗೆಯನ್ನು, ಚಿಂತನೆಗಳನ್ನು ಒಪ್ಪಿಕೊಳ್ಳಬೇಕಿದೆ.

ಯಾಕೆಂದರೆ ಕೋಮುವಾದದ ವಿಜೃಂಭಣೆಯ, ಅಸಮಾನತೆಯನ್ನೂ ಸಾಮರಸ್ಯದ ಹಿನ್ನೆಲೆಯಲ್ಲಿ ಸಮರ್ಥಿಸಿಕೊಳ್ಳುವಂತಹ ಇಂತಹ ಕೆಟ್ಟ ವಾತಾವರಣದಲ್ಲಿ ನಾವು ಸಮಾನತೆಯನ್ನು ಪ್ರತಿಪಾದಿಸುವ ಒಂದಷ್ಟು ಮನಸ್ಸುಗಳನ್ನು ದೇಶದ ಹಿತದೃಷ್ಟಿಯ ಹಿನ್ನೆಲೆಯಲ್ಲಿ ಬೆಂಬಲಿಸದೆಹೋದರೆ ಜನತೆ ತೊಂದರೆಗೆ ಸಿಲುಕಲಿದ್ದಾರೆ. ಹಾಗೆಯೇ ಭಾರತ ವೈವಿದ್ಯಮಯ ಜಾತಿ-ಪಂಥ- ವರ್ಗ-ಸಿದ್ಧಾಂತಗಳ ನಾಡು. ಈ ನಿಟ್ಟಿನಲ್ಲಿ ಇಲ್ಲಿ ಒಂದು ಜಾತಿಯ ಒಬ್ಬ ಪ್ರತಿಗಾಮಿಯಾದರೆ ಅದೇ ಜಾತಿಯ ಮತ್ತೊಬ್ಬ ಪ್ರಗತಿಪರ ಆಗಬಾರದು ಎಂಬ ನಿಯಮವೇನು ಇಲ್ಲ. ಯಾಕೆಂದರೆ ಚಿಂತನೆ ಅದು ವಯಕ್ತಿಕ. ವ್ಯಕ್ತಿ ವೈಭಿನ್ಯತೆಯನ್ನು ಅದು ಅವಲಂಬಿಸಿರುತ್ತದೆ, ಆತ ಕಲಿಯುವ ಓದುವ ಪುಸ್ತಕಗಳನ್ನು ಅವಲಂಬಿಸಿರುತ್ತದೆ. ಈ ಹಿನ್ನೆಲೆಯಲ್ಲಿ ವ್ಯಕ್ತಿ ಸಂಬಂಧಿತ ಜಾತಿಯನ್ನು ಆತನ ವ್ಯಕ್ತಿತ್ವಕ್ಕೆ ಆರೋಪಿಸುವುದು ತಪ್ಪು. ಹೀಗೆ ಆರೋಪಿಸುವುದರ ಮೂಲಕ ನಾವೇ ಪ್ರತಿಗಾಮಿಗಳನ್ನು ಒಂದೆಡೆ ಹೆಚ್ಚಿಸುವ ಕ್ರಿಯೆಯಲ್ಲಿ ತೊಡಗಿದಂತಾಗುತ್ತದೆಯೇ ಹೊರತು ಇದರಿಂದ ಮತ್ತೇನು ಪ್ರಯೋಜನವಾಗದು.

ಹಾಗೆಯೇ ಬಾಬಾಸಾಹೇಬ್ ಅಂಬೇಡ್ಕರರ ಚಿಂತನೆಗಳನ್ನು ಅಷ್ಟೆ. ಒಂದು ದ್ವೀಪದ ರೀತಿ ನಾವು ಅದನ್ನು ಮಾಡಬಾರದು. ಏಕೆಂದರೆ ಬಾಬಾಸಾಹೇಬ್ ಅಂಬೇಡ್ಕರ್ ಅದು ಒಂದು ವ್ಯಕ್ತಿಯಲ್ಲ, ಅದೊಂದು ಮಾನವ ಪರ ಚಿಂತನೆ, ಜೀವಪರ ಬೋಧನೆ. ಎಲ್ಲಾ ಶೋಷಿತರ ವಿಮೋಚನೆಗೂ ಅದು ಮದ್ದಾಗಲಿದೆ. ಈ ನಿಟ್ಟಿನಲ್ಲಿ ಅದನ್ನು ಹೀಗೆಯೇ ಇರಬೇಕು, ಅದನ್ನು ದಲಿತರೇ ಅಥವಾ ಅವರ ಬೆಂಬಲದ ಒಂದು ಪಕ್ಷವೇ ಮಾತಾಡಬೇಕು ಇತರರು ಮಾತಾಡಬಾರದು ಎಂಬ ಹಟ ತಪ್ಪು. ಬದಲಿಗೆ ಮಾನವಪರ ಚಿಂತನೆಗಳನ್ನು ಎಲ್ಲರೂ ವಿಶೇಷವಾಗಿ ಪ್ರಗತಿಪರರು ಬಳಸಿಕೊಳ್ಳಲು, ಮಾತಾಡಲು ಮುಕ್ತ ಅವಕಾಶ ಹೊಂದಿದ್ದಾರೆ ಎಂಬುದನ್ನು ಅವರ ಅನುಯಾಯಿಗಳು ಅರಿಯಬೇಕು. ಆಗಷ್ಟೆ ಬಾಬಾಸಾಹೇಬ್ ಅಂಬೇಡ್ಕರರ ಚಿಂತನೆಗಳು ಜಾತಿ ಮೀರಿ ಬೆಳೆಯುತ್ತದೆ. ಹಾಗೆಯೇ ಪ್ರಗತಿಪರ ಮನಸ್ಸುಗಳು ಹೆಚ್ಚು ಹೆಚ್ಚು ಬೆಳೆಯಲಿವೆ ಭಾರತ ಜಾತಿ ಮುಕ್ತ ವಾತಾವರಣದಲ್ಲಿ ಮಿಂದು ಏಳಲಿದೆ.

ಈ ನಿಟ್ಟಿನಲ್ಲಿ ಕನ್ನಯ್ಯಕುಮಾರ್ ಇರಲಿ ಮತ್ಯಾರೇ ಇರಲಿ ಅವರು ಬಾಬಾಸಾಹೇಬ್ ಅಂಬೇಡ್ಕರರ ವಿಚಾರಗಳನ್ನು ಮಾತಾಡಿದರೆ ದಲಿತರು ಅವರನ್ನು ಬೆಂಬಲಿಸಲಿ. ಪ್ರಗತಿಪರ ಎಲ್ಲರನ್ನೂ ಅಂತಹ ಮನಸ್ಸುಗಳನ್ನೂ ಮಾತಾಡುವವರನ್ನು ಬರೆಯುವವರನ್ನು ದಲಿತರು ಬೆಂಬಲಿಸಲಿ. ಆ ಮೂಲಕ ಎಲ್ಲರಿಗೂ ಜಾತಿಮೀರಿ ವೈಚಾರಿಕ ಚಿಂತನೆಗಳನ್ನು ಮಾಡುವ ಹಕ್ಕು ಎಲ್ಲರಿಗೂ ಇದೆ ಎಂಬುದನ್ನು ಎಲ್ಲರೂ ವಿಶೇಷವಾಗಿ ಕೆಲ ದಲಿತ ಯುವಕರು ಅರಿಯಲಿ.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಬಹಿರಂಗ

ಪತ್ರಿಕಾ ಸ್ವಾತಂತ್ರ್ಯ ಎಷ್ಟು ಮುಖ್ಯ..?

Published

on

  • ವಿವೇಕಾನಂದ ಹೆಚ್.ಕೆ

ನಾವು ಪತ್ರಿಕೆ ಟಿವಿ ಮಾಧ್ಯಮಗಳ ತಿಕ್ಕಲುತನ, ವಿವೇಚನಾರಹಿತ ವರದಿಗಳು, ವೈಯಕ್ತಿಕ ನಿಂದನೆ, ವಿಕೃತ ಸುದ್ದಿಗಳು, ಸಮಾಜ ವಿರೋಧಿ ಚಟುವಟಿಕೆಗಳು, ಮೌಡ್ಯ ಬಿತ್ತನೆ, ಬ್ರೇಕಿಂಗ್ ನ್ಯೂಸ್ ಎಂಬ ಭ್ರಮೆಗಳು ಎಲ್ಲವನ್ನೂ ಕಠಿಣ ಶಬ್ದಗಳಲ್ಲಿ ಟೀಕಿಸೋಣ, ಸಾಧ್ಯವಾದರೆ ಪ್ರತಿಭಟಿಸೋಣ, ಬಹಿಷ್ಕರಿಸೋಣ, ಮಾನನಷ್ಟ ಮೊಕದ್ದಮೆ ಹೂಡೋಣ ಆದರೆ ಪತ್ರಿಕಾ ಸ್ವಾತಂತ್ರ್ಯಕ್ಕೆ ಯಾವುದೇ ಧಕ್ಕೆ ಬಾರದಂತೆ ಕಾಪಾಡುವುದು ಪ್ರತಿಯೊಬ್ಬರ ಕರ್ತವ್ಯ ಮತ್ತು ಜವಾಬ್ದಾರಿ.

ಪೋಲೀಸರು ಭ್ರಷ್ಟರಾಗಿದ್ದಾರೆ ಎಂದ ಮಾತ್ರಕ್ಕೆ ಪೋಲೀಸ್ ವ್ಯವಸ್ಥೆಯನ್ನು ನಿಷೇಧಿಸಲು ಸಾಧ್ಯವೇ ? ಹಾಗೆಯೇ ಆಸ್ಪತ್ರೆ, ಶಿಕ್ಷಣ, ಚುನಾವಣೆ ನ್ಯಾಯಾಲಯ ಸರಿಯಿಲ್ಲ ಅದರಿಂದ ತೊಂದರೆಯಾಗುತ್ತಿದೆ ಎಂದು ಆ ವ್ಯವಸ್ಥೆಯನ್ನು ನಿರ್ಮೂಲನೆ ಮಾಡಲು ಸಾಧ್ಯವೇ ? ಆ ವ್ಯವಸ್ಥೆ ಅದರ ಲೋಪಗಳನ್ನು ಸರಿ ಪಡಿಸಬೇಕೆ ಹೊರತು ನಿಷೇಧ ನಮ್ಮ ಇಡೀ ವ್ಯವಸ್ಥೆಯನ್ನೇ ಬುಡಮೇಲು ಮಾಡುತ್ತದೆ. ಅದರಲ್ಲೂ ವಿಶೇಷವಾಗಿ ದುರ್ಬಲರ ಶೋಷಣೆ ಮತ್ತಷ್ಟು ಹೆಚ್ಚುತ್ತದೆ.

ಕರ್ನಾಟಕ ಸರ್ಕಾರದ ಶಕ್ತಿ ಕೇಂದ್ರ ವಿಧಾನಸೌಧಕ್ಕೆ ಛಾಯಾಚಿತ್ರ ಪತ್ರಕರ್ತರ ನಿಷೇಧ ಮತ್ತು ವಿಧಾನಸಭಾ ಕಾರ್ಯಕಲಾಪಗಳ ನೇರ ಪ್ರಸಾರದ ದೃಶ್ಯಗಳನ್ನು ಚಿತ್ರೀಕರಿಸಲು ಖಾಸಗಿ ವಾಹಿನಿಯವರಿಗೆ ನಿಷೇಧ ಅಥವಾ ಈ ರೀತಿಯ ಇನ್ಯಾವುದೇ ರೂಪದ ನಿಷೇಧ ಅತ್ಯಂತ ಕೆಟ್ಟ ಮತ್ತು ದುರಹಂಕಾರಿ ಕ್ರಮವಾಗುತ್ತದೆ. ಈ ರೀತಿಯ ಕ್ರಮವನ್ನು ಹಿಂದಿನ ಸರ್ಕಾರಗಳು ಕೂಡ ತರಲು ಪ್ರಯತ್ನಿಸಿದ್ದವು. ಆದರೆ ಈಗ ಅದು ಜಾರಿಗೆ ಬಂದಿದೆ.

ಕಾರಣಗಳು ಏನೇ ಇರಲಿ ವಿಧಾನಸೌಧ ಮತ್ತು ಸರ್ಕಾರಿ ಆಡಳಿತ ಯಾರದೇ ಖಾಸಗಿ ಆಸ್ತಿಯಲ್ಲ ಅಥವಾ ಯಾವುದೇ ಮುಚ್ಚುಮರೆಯಿಂದ ಕಾರ್ಯನಿರ್ವಹಿಸುವ ಸಂಸ್ಥೆಯಲ್ಲ. ಯಾವುದೇ ಕೋನದಿಂದ ನೋಡಿದರು ಅಲ್ಲಿನ ವ್ಯವಹಾರಗಳು ಬಹುತೇಕ ಜನರಿಂದ ಮರೆಮಾಚುವ ಕೆಲಸಗಳು ನಡೆಯಬಾರದು. ರಕ್ಷಣೆಗೆ ಸಂಬಂಧಿಸಿದ ಸರ್ಕಾರದ ಗೌಪ್ಯ ಮಾಹಿತಿ ಹೊರತುಪಡಿಸಿ ಎಲ್ಲವೂ ಪಾರದರ್ಶಕವಾಗಿಯೇ ನಡೆಯಬೇಕು.

ಅಂತಹ ಸ್ಥಳದಲ್ಲಿ ಗೌಪ್ಯತೆ ಕಾಪಾಡಬೇಕು ಎಂದು ಪ್ರಯತ್ನಿಸಿದರೆ ಏನೋ ಅವ್ಯವಹಾರ ನಡೆಯುತ್ತದೆ ಎಂದೇ ಭಾವಿಸಬೇಕಾಗುತ್ತದೆ.ಯಾವುದೇ ಆಡಳಿತ ವ್ಯವಸ್ಥೆ ಇರಲಿ ಮಾಧ್ಯಮ ಸ್ವಾತಂತ್ರ್ಯ ಇಲ್ಲದಿದ್ದರೆ ಅದೊಂದು ಭೀಕರ ದುರಾಡಳಿತ ಮುನ್ಸೂಚನೆ ಎಂಬುದನ್ನು ಮರೆಯದಿರೋಣ. ಎಷ್ಟೋ ಅನ್ಯಾಯಗಳು ಮಾಧ್ಯಮ ಇದೆ,
ಅದರ ಮುಖಾಂತರ ಸಾರ್ವಜನಿಕರಿಗೆ ತಿಳಿಯುತ್ತದೆ ಎಂಬ ಕಾರಣದಿಂದ ಕಡಿಮೆಯಾಗಿದೆ. ಆದ್ದರಿಂದ ಮಾಧ್ಯಮ ಸ್ವಾತಂತ್ರ್ಯವನ್ನು ಎಲ್ಲರೂ ಬೆಂಬಲಿಸಬೇಕು.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

ಬಹಿರಂಗ

ಬಾಬಾಸಾಹೇಬ್ ಅಂಬೇಡ್ಕರರ ಹೇಳಿಕೆಯನ್ನೇ ದುರುಪಯೋಗ ಪಡಿಸಿಕೊಳ್ಳುತ್ತಿರುವ ಅವರ ಅನುಯಾಯಿಗಳು..!

Published

on

  • ರಘೋತ್ತಮ ಹೊ.ಬ

ಬಾಬಾಸಾಹೇಬ್ ಅಂಬೇಡ್ಕರ್ ರವರು ರಾಜಕೀಯ ಪಕ್ಷವೊಂದನ್ನು ಉರಿಯುವ ಮನೆ ಎಂದರು. ಆ ಕಾಲಘಟ್ಟದಲ್ಲಿ ಅಂಬೇಡ್ಕರ್ ರವರು ಹಾಗೆ ಹೇಳಲು ಕಾರಣ ಆ ಸಮಯದಲ್ಲಿ ಸದರಿ ಆ ರಾಜಕೀಯ ಪಕ್ಷವು ಭಿನ್ನಮತದ ಬೇಗೆಯಲ್ಲಿ ಬೇಯುತ್ತಿತ್ತು. ಇದನ್ನು ಉಲ್ಲೇಖಿಸುತ್ತ ಅಂಬೇಡ್ಕರ್ ರವರು ಆ ಪಕ್ಷವೇ ಹೀಗೆ ಭಿನ್ನಮತದಿಂದ ಒತ್ತಿ ಉರಿಯುತ್ತಿದೆ ಇನ್ನು ದಲಿತರು ಅಲ್ಲಿ ಹೋದರೆ ನಿಮಗೇನು ಸಿಗುತ್ತದೆ ಎಂಬ ಅರ್ಥದಲ್ಲಿ ಆ ಹೇಳಿಕೆ ಹೇಳಿದ್ದರು. ಬದಲಿಗೆ ತಾವೇ ಸ್ಥಾಪಿಸಿರುವ ನಮ್ಮ ಸ್ವಂತ ಪಕ್ಷ “ಪರಿಶಿಷ್ಟ ಜಾತಿಗಳ ಒಕ್ಕೂಟ”ಕ್ಕೆ ಬನ್ನಿ ಎಂದು ಅಂಬೇಡ್ಕರ್ ರವರು ಶೋಷಿತ ಸಮುದಾಯಗಳವರಿಗೆ ಕರೆ ನೀಡಿದ್ದರು.

ದುರಂತವೆಂದರೆ ಇತಿಹಾಸದಲ್ಲಿ ದಾಖಲಾಗಿರುವ ಬಾಬಾಸಾಹೇಬ್ ಅಂಬೇಡ್ಕರ್ ರವರ ಈ ಹೇಳಿಕೆಯನ್ನು ಬಹುತೇಕ ದಲಿತ ರಾಜಕಾರಣಿಗಳು ಈಗಿನ ಕಾಲಕ್ಕೆ ದುರುಪಯೋಗಪಡಿಸಿಕೊಳ್ಳುತ್ತಿರುವುದು, ಇತರೆ ಪಕ್ಷಗಳನ್ನು ಸೇರಲು ಲೈಸೆನ್ಸ್ ರೀತಿ ಬಳಸಿಕೊಳ್ಳುತ್ತಿರುವುದು! ಹಾಗಿದ್ದರೆ ಅಂಬೇಡ್ಕರ್ ರವರು ಹೇಳಿರುವ ಆ ರಾಜಕೀಯ ಹೇಳಿಕೆಯ ಒಟ್ಟಾರೆ ತಾತ್ಪರ್ಯವೇ ಅಪ್ರಸ್ತುತವೇ? ಖಂಡಿತ ಇಲ್ಲ. ಅವರು ಹೇಳಿದ ಶೋಷಿತ ಸಮುದಾಯಗಳ ಸ್ವತಂತ್ರ ರಾಜಕಾರಣ ಈಗಲೂ ಬೇರೆ ಬೇರೆ ರೂಪದಲ್ಲಿ ಅಸ್ತಿತ್ವದಲ್ಲಿ ಇದೆ. ಅವರು ಜೀವನದುದ್ದಕ್ಕೂ ವಿರೋಧಿಸಿದ ಮೇಲ್ಜಾತಿ ಹಿಂದೂ ರಾಜಕೀಯ ಪಕ್ಷಗಳೂ ಬೇರೆ ಬೇರೆ ಹೆಸರಿನಲ್ಲಿ ಅಸ್ತಿತ್ವದಲ್ಲಿ ಇವೆ!

ನಿಜ, ಇಂತಹ ರಾಜಕೀಯ ಸೂಕ್ಷ್ಮತೆಗಳನ್ನು ಸಾರ್ವಜನಿಕವಾಗಿ ಹೇಳುವುದು ತಪ್ಪು ಎಂದು ವಯಕ್ತಿಕವಾಗಿ ನನಗೆ ಗೊತ್ತಿದೆ ಆದರೆ ಬಾಬಾಸಾಹೇಬ್ ಅಂಬೇಡ್ಕರರ ಹೇಳಿಕೆಗಳ, ಬರಹಗಳ, ಚಿಂತನೆಗಳ ಮಹತ್ವವನ್ನು ಉಳಿಸುವ ದೃಷ್ಟಿಯಲ್ಲಿ ನನ್ನಂತಹವರು ಇಂತಹ ವಿಚಾರಗಳನ್ನು ಮುಕ್ತವಾಗಿ ಬಾಯಿಬಿಟ್ಟು ಹೇಳಲೇಬೇಕಿದೆ. ಅವರ ಬರಹಗಳ ಪ್ರಸ್ತುತತೆಯನ್ನು ನೈಜ ಅರ್ಥದಲ್ಲಿ ವಿಶ್ಲೇಷಿಸಿ ಸದಾ ಕಾಲ ಕಾಪಿಟ್ಟುಕೊಳ್ಳಬೇಕಿದೆ. ಜೈಭೀಮ್.

ಸುದ್ದಿದಿನ.ಕಾಂ|ವಾಟ್ಸಾಪ್|9980346243

Continue Reading

Trending